Incwadzi yaOmini
Sehluko 1
Omini, Amaroni, Khemishi, Abhinadomu, kanye na Amaleki, ngamunye ngekushintjana, bagcina imibhalo—Mosiya utfola bantfu baZarahemla, lababuya eJerusalema etinsukwini takaSedekiya—Mosiya wentiwa iNkhosi ngetulu kwabo—Besitukulwane saMulekhi eZarahemla batfola Khoriyanthuma, wekugcina wemaJarede—INkhosi Bhenjamini itsatsa bukhosi emvakwaMosiya—Bantfu kumele banikele imiphefumulo yabo njengemnikelo kuKhristu. Cishe ngemnyaka wa 323 kuya kuwa 130 ngaphambi kwekutalwa kwaKhristu.
1 Buka, kwenteka kutsi mine, Omini, ngiyaletiwe ngubabe, Jaromu, kutsi kumele ngibhale lokutsite kulabongcwengcwe, kugcina umlandvo wesitukulwane setfu—
2 Ngaloko-ke, etinsukwini tami, ngifisa kutsi nati kutsi ngalwa kakhulu ngenkemba kuvikela bantfu bami, emaNefi, ekuweleni etandleni tetitsa tabo, emaLamani. Kodvwa buka, mine ngekwami ngiyindvodza lembi, futsi angiyigcinanga imitsetfo kanye nemiyaleto yeNkhosi njengoba bekufanele ngabe ngentile.
3 Futsi kwenteka kutsi emakhulu lamabili nemashumi lasikhombisa nesitfupha yeminyaka beseyendlulile, saba netikhatsi letiningi tekuthula; saba netikhatsi letiningi tetimphi letimatima kanye nekucitseka kwengati. Yebo, kwephetsa, emakhulu lamabili nemashumi lasiphohlongo nakubili yeminyaka beseyendlulile, futsi ngangibagcinile laba bongcwengcwe njengekwemiyaleto yabobabe; ngabendlulisela kundvodzana yami Amaroni. Futsi ngenta siphetfo.
4 Manje mine, Amaroni, ngibhala tonkhe tintfo lengitibhalako, letimbalwa, encwadzini yababe.
5 Buka kwenteka kutsi emakhulu lamatsatfu kanye nemashumi lamabili eminyaka besekendlulile, futsi incenye lenkhulu lembi yemaNefi yabhujiswa.
6 Ngoba iNkhosi yayingeke ivume, emvakwekutsi seyibaholile baphuma eveni laseJerusalema futsi yabagcina bavikelekile ekuweleni etandleni tetitsa tabo, yebo, yayingeke ivume kutsi emavi angafezeki, leyawakhuluma kubobabe betfu, itsi: Kangangoba ningetuyigcina imiyaleto yami angeke niphumelele eveni.
7 Ngaloko-ke, iNkhosi yabavakashela ngekwehlulela lokukhulu; noko, yabasindzisa labalungile kute bangashabalali, kodvwa yabakhulula etandleni tetitsa tabo.
8 Futsi kwenteka kutsi bongcwengcwe ngabaniketa umnaketfu Khemishi.
9 Manje mine, Khemishi, ngibhala tintfo letimbalwa lengingatibhala, encwadzini lefanako neyemnaketfu; ngoba buka, ngakubona kwekugcina lakubhala, nekutsi wakubhala ngesakhe sandla lucobo; wakubhala ngelusuku labaletsa ngalo kimi. Futsi ngalendlela sigcina imibhalo, ngoba kungenca yemiyaleto yabobabe betfu. Futsi ngenta siphetfo.
10 Buka, mine, Abhinadomu, ngiyindvodzana yaKhemishi. Buka, kwenteka kutsi ngabona timphi letiningi kanye nembango emkhatsini webantfu bami, emaNefi, kanye nemaLamani; futsi mine, ngenkemba yami lucobo, ngititsatsile timphilo letiningi temaLamani ekuvikeleni bomnaketfu.
11 Futsi buka, umbhalo walabantfu ucoshwe kubongcwengcwe labaphetfwe ngemakhosi, ngekwetitukulwane; futsi mine angati ngesembulo ngaphandle kwaleso lesibhaliwe, noma siphrofetho; ngaloko-ke, loko lokwanele kubhaliwe. Futsi ngenta siphetfo.
12 Buka, mine ngingu-Amaleki, indvodzana ya-Abhinadomu. Buka, ngitokhuluma kini ngalokutsite mayelana naMosiya, lowentiwa inkhosi eveni laseZarahemla; ngoba buka, yena acwayiswe yiNkhosi kutsi kumele abaleke aphume eveni laNefi, futsi nangebuningi balabo labayolilalela livi leNkhosi nabo kumele besuke baphume eveni kanye naye, baye ehlane—
13 Futsi kwenteka kutsi wenta njengoba iNkhosi yayimyaletile. Besuka baphuma eveni baya ehlane, ngebuningi balabo labalilalela livi leNkhosi; futsi baholwa ngetinshumayelo letiningi kanye netiphrofetho. Futsi bebayalwa njalonjalo ngelivi laNkulunkulu; futsi baholwa ngemandla esandla sakhe, badzabula ehlane bate befika entansi eveni lelalibitwa ngelive laseZarahemla.
14 Futsi batfola bantfu, lebebabitwa ngekutsi bantfu baZarahemla. Manje, kwaba khona kutfokota lokukhulu emkhatsini webantfu baZarahemla; futsi ngalokunjalo naZarahemla watfokota kakhulu, ngenca yekutsi iNkhosi beyitfumele bantfu baMosiya nabongcwengcwe belitfusi lebebacuketse umbhalo wemaJuda.
15 Buka, kwenteka kutsi Mosiya watfola kutsi bantfu baZarahemla baphuma eJerusalema ngesikhatsi Sedekiya, inkhosi yakaJuda, yayitfwelwe yayotfunjelwa eBhabhulona.
16 Futsi bahamba ehlane, futsi baletfwa ngesandla seNkhosi ngesheya kwemanti lamaningi; baya eveni lapho Mosiya abatfola khona; futsi bebahleli lapho kusukela ngaleso sikhatsi kuya phambili.
17 Futsi ngesikhatsi Mosiya abatfola, bese babaningi kakhulu. Noko, bese babe netimphi letiningi kanye nemibango lematima, bese bafe ngenkemba tikhatsi ngetikhatsi; nelulwimi lwabo lwaselonakele; bebangaketi nemibhalo; futsi bebabuphika bukhona beMenti wabo; futsi Mosiya, noma bantfu baMosiya, abakwatanga kubacondza.
18 Kodvwa kwenteka kutsi Mosiya wenta kutsi bafundziswe ngelulwimi lwakhe. Futsi kwenteka kutsi emvakwekutsi sebafundzisiwe ngelulwimi lwaMosiya, Zarahemla wanika umlandvo wesitukulwane saboyise, njengekukhumbula kwakhe; futsi ubhaliwe, kodvwa hhayi kulaba bongcwengcwe.
19 Futsi kwenteka kutsi bantfu baZarahemla, kanye nebaMosiya, bahlangana ndzawonye; futsi Mosiya wabekwa kutsi abe yiNkhosi yabo.
20 Futsi kwenteka kutsi etinsukwini taMosiya, kwaba khona litje lelikhulu lelaletfwa kuye lelalinemifanekiso lecoshiwe kulo; futsi wayihumusha lemifanekiso lebeyicoshiwe ngesipho kanye nangemandla aNkulunkulu.
21 Futsi leyo yayinika umlandvo ngaKhoriyanthuma lotsite, kanye nekubulawa kwebantfu bakhe. Futsi Khoriyanthuma watfolwa bantfu baZarahemla; wahlala nabo sikhatsi lesitinyanga letiyimfica.
22 Futsi ngetulu kwaloko yayikhuluma emavi lambalwa mayelana naboyise. Futsi batali bakhe bekucala baphuma embhoshongweni, ngesikhatsi iNkhosi iphambanisa lulwimi lwebantfu; lulaka lweNkhosi lwawela etikwabo njengekwetehlulelo tayo letilungile; futsi ematsambo abo alele asakateke eveni lelingasenyakatfo.
23 Buka, mine, Amaleki, ngatalwa etinsukwini taMosiya; futsi ngihlalile ngate ngabona kufa kwakhe; Bhenjamini, indvodzana yakhe, yabusa esikhundleni sakhe.
24 Futsi Buka, ngibonile, etinsukwini teNkhosi Bhenjamini, imphi lematima kanye nekucitseka kwengati lokuningi emkhatsini wemaNefi kanye nemaLamani. Kodvwa buka, emaNefi atfola kusitakala lokukhulu ngetulu kwawo; yebo, kangangekutsi inkhosi Bhenjamini yabacosha baphuma eveni laseZarahemla.
25 Futsi kwenteka kutsi ngacala kuba mdzala; futsi, ngingenantalelwane, ngati kutsi iNkhosi Bhenjamini bekayindvodza lelungile phambi kweNkhosi, ngaloko-ke, ngitohambisa laba bongcwengcwe kuye, ngincuse bonkhe bantfu kutsi bete kuNkulunkulu, loNgcwele waka-Israyeli, futsi bakholelwe etiphrofethweni, nasetembulweni, nasekusitweni tingilosi, nakuso sipho sekukhuluma ngetilimi, nakuso sipho sekuhumusha tilimi, kanye nakuto tonkhe tintfo letinhle; ngoba kute lutfo lokuhle ngaphandle kwekutsi kuvela eNkhosini; futsi loko lokubi kuvela kudeveli.
26 Manje, bomnaketfu labatsandzekako, ngifuna kutsi nite kuKhristu, loNgcwele waka-Israyeli, futsi nihlanganyele ensindzisweni yakhe, kanye nasemandleni ekuhlenga akhe. Yebo, wotani kuye, ninikele imiphefumulo yenu yonkhe njengemnikelo kuye, nichubeke ekuzileni nasekuthandazeni, nibeketele kute kube sekugcineni; futsi njengoba iNkhosi iphila niyawusindziswa.
27 Manje ngitawukhuluma lokutsite mayelana nesibalo lesitsite lesahamba sakhuphukela ehlane kute sibuyele eveni laNefi; ngoba bekukhona sibalo lesikhulu salabo labebanesifiso sekutfola live lelilifa labo.
28 Ngaloko-ke, bahamba bakhuphukela ehlane. Futsi umholi wabo ayindvodza lecinile nalenemandla, futsi ayindvodza lenenhloko lelukhuni, ngaloko-ke yadala umbango emkhatsini wabo; futsi bonkhe babulawa, ngaphandle kwalabangemashumi lasihlanu, ehlane, baphindze babuyela emuva eveni laseZarahemla.
29 Futsi kwenteka kutsi baphindze batsatsa labanye baba sibalo lesikhudlwana, batsatsa luhambo lwabo futsi baya ehlane.
30 Futsi mine, Amaleki, nganginemnaketfu, naye lowahamba nabo; futsi kusukela ngaleso sikhatsi angikate ngati mayelana nabo. Futsi sengitolala ethuneni lami; nalaba bongcwengcwe sebagcwele. Ngenta siphetfo senkhulumo yami.