Nefi weSine
Incwadzi yaNefi
Loyindvodzana yaNefi—Lomunye webaFundzi baJesu Khristu
Umlandvo webantfu baNefi, ngekwembhalo wakhe.
Sehluko 1
EmaNefi kanye nemaLamani bonkhe baphendvukele eNkhosini—Bonkhe baba netintfo tonkhe ngalokufanako, benta timangaliso, futsi bayaphumelela eveni—Emvakweminyaka lengemakhulu lamabili, kwehlukana, bubi, emabandla emanga, kanye nekuhlushwa kuyacubuka—Emvakweminyaka lengemakhulu lamatsatfu, emaNefi kanye nemaLamani baba nebubi—Amaroni uyayifihla imibhalo lengcwele. Cishe ngemnyaka weNkhosi wa 35 kuya kuwa 321.
1 Futsi kwenteka kutsi umnyaka wemashumi lamatsatfu nakune wendlula, kanjalo newemashumi lamatsatfu nesihlanu, buka labafundzi baJesu babese bakha libandla laKhristu kuwo onkhe emave etindzaweni tonkhe. Ngebuningi balabo labeta kubo, baphendvuka ngeliciniso etonweni tabo, babhajatiswa egameni laJesu; ngetulu kwaloko bamtfola Moya loNgcwele.
2 Futsi kwenteka kutsi ngemnyaka wemashumi lamatsatfu nesitfupha, bonkhe bantfu bese baphendvukele eNkhosini, kulo lonkhe live, kumaNefi kanye nemaLamani, futsi bekungasekho nemibango kanye nekuphikisana emkhatsini wabo, wonkhe umuntfu bekenta kulunga lomunye kulomunye.
3 Bebanetintfo tonkhe ngalokufanako emkhatsini wabo; ngako-ke bekute labebacebile nalabebamphofu, labebagcilatiwe kanye nalabebakhululiwe, kodvwa bonkhe bebakhululekile, futsi bahlanganyela esiphiweni sasezulwini.
4 Futsi kwenteka kutsi umnyaka wemashumi lamatsatfu nesikhombisa wendlula nawo, kwachubeka kwaba khona kuthula eveni.
5 Kwaba khona imisebenti lemikhulu nalemangalisako leyentiwa bafundzi baJesu, kangangekutsi babalapha labagulako, bavusa labafile, benta netishosha tahamba, timphumphutse tatfola kubona kwato, kanye netihhulu teva, futsi benta tonkhe tinhlobo tetimangaliso emkhatsini webantfwana bebantfu; kute timangaliso labatenta ngaphandle kwekutsi kube segameni laJesu.
6 Umnyaka wemashumi lamatsatfu nesiphohlongo wendlula kanjalo, kanjalo newemashumi lamatsatfu nemfica, newemashumi lamane nakunye, kanye newemashumi lamane nakubili, yebo, kwate kwendlula ngisho iminyaka lengemashumi lamane nemfica, kanjalo newemashumi lasihlanu nakunye, kanye newemashumi lasihlanu nakubili; yebo, kwate kwendlula ngisho iminyaka lengemashumi lasihlanu nemfica.
7 INkhosi yabaphumelelisa kakhulu eveni; yebo, kangangekutsi baphindze bakha emadolobha lapho bekukadze kukhona emadolobha lashisiwe khona.
8 Yebo, ngisho nalelo lidolobha lelikhulu iZarahemla benta kutsi liphindze lakhiwe.
9 Kodvwa bekamaningi emadolobha labekacwilile, futsi kwavela emanti esikhundleni sawo; ngako-ke lamadolobha bekangeke akhiwe kabusha.
10 Manje, buka, kwenteka kutsi bantfu baNefi bakhula bacina, bandza ngekushesha lokukhulu, baba bantfu labahle futsi labatsandzekako.
11 Bebashada, baphindze bendziswa, babusiswa njengekwetetsembiso letiningi iNkhosi lebeyitente kubo.
12 Abatange basahamba nanini ngekwetento kanye nangekwetimiso temtsetfo waMosi; kodvwa bahamba ngekwemiyaleto labebayitfole eNkhosini yabo kanye naNkulunkulu wabo, bachubeka nekuzila kudla kanye nekuthandaza, kanye nasekuhlanganyeleni ndzawonye njalo nje kute bathandaze baphindze balalele livi leNkhosi.
13 Futsi kwenteka kutsi bekute umbango emkhatsini wabo bonkhe bantfu, kulo lonkhe live; kodvwa bekukhona timangaliso letinkhulu lebetenteka emkhatsini webafundzi baJesu.
14 Futsi kwenteka kutsi umnyaka wemashumi lasikhombisa nakunye wendlula, kanjalo nemnyaka wemashumi lasikhombisa nakubili, yebo, kwephetsa, kwate kwendlula ngisho umnyaka wemashumi lasikhombisa nemfica; yebo, kwate kwendlula iminyaka lelikhulu, futsi bafundzi baJesu, labo labekabakhetsile, babese bonkhe bayahamba baya epharadesi laNkulunkulu, ngaphandle kwalabatsatfu labebatawusala; kwaba khona labanye bafundzi lababekwa etikhundleni tabo; ngalokunjalo nalabaningi baleso situkulwane bese bendlulile.
15 Futsi kwenteka kutsi bekute umbango eveni, ngenca yelutsandvo lwaNkulunkulu lobelukhona etinhlitiyweni tebantfu.
16 Bekute umona, kucabana, tiphitsiphitsi, bugwadla, emanga, kubulala nanoma nguluphi luhlobo lwenkhanuko; futsi akuyuze kube khona bantfu labebatfokote kangaka emkhatsini wabo bonkhe bantfu labadalwa sandla saNkulunkulu.
17 Bekute tigebengu, babulali, noma emaLamani, noma nhloboni yebantfu labebahlukaniswe ngekwebuve; kodvwa bonkhe bebamunye, bantfwana baKhristu, kanye netindlalifa tembuso waNkulunkulu.
18 Bebabusisiwe! Ngoba iNkhosi yababusisa kuko konkhe kwenta kwabo; yebo, babusiswa baphindze baphumeleliswa kwate kwendlula ngisho likhulu nelishumi leminyaka; nesitukulwane sekucala kusukela kuKhristu bese sendlulile, bekute umbango kulo lonkhe live.
19 Futsi kwenteka kutsi Nefi, loyo lobekagcine lombhalo wekugcina, (awugcine kubongcwengcwe baNefi) wafa, indvodzana yakhe Amosi yawugcina esikhundleni sakhe; naye wawugcina kubo bongcwengcwe baNefi.
20 Wabagcina iminyaka lengemashumi lasiphohlongo nakune, futsi bekunguloku kukhona kuthula eveni, ngaphandle nje kwencenye lencane yebantfu labebahlukene ebandleni baphindze batibita ngemaLamani; ngako-ke kwaphindze kwacala kutsi kube khona emaLamani eveni.
21 Futsi kwenteka kutsi Amosi naye wafa, (bese kuyiminyaka lelikhulu nemashumi layimfica nakune kusukela ekuteni kwaKhristu) indvodzana yakhe Amosi yawugcina umbhalo esikhundleni sakhe; nayo ngalokunjalo yawugcina kubo bongcwengcwe baNefi; ngetulu kwaloko bewubhalwe encwadzini yaNefi, lokungulenancwadzi.
22 Futsi kwenteka kutsi bese kwendlule iminyaka lengemakhulu lamabili; netitukulwane tesibili bese tendlulile tonkhe ngaphandle kwalabambalwa.
23 Manje mine, Mormon, ngifuna kutsi nati kutsi bantfu bese bandzile, kangangekutsi bese basabalele eveni lonkhe, nekutsi bese bacebe kakhulu, ngenca yekuphumelela kwabo kuKhristu.
24 Manje, kulomnyaka wemakhulu lamabili nakunye kwacala emkhatsini wabo kutsi kube khona labo labaphakama ekutichenyeni, njengekugcoka tingubo letibitako, nato tonkhe tinhlobo temagugu lamahle kakhulu, kanye netintfo letinhle kakhulu temhlaba.
25 Kusukela ngaleso sikhatsi kuya phambili abatange basaba netimphahla kanye netintfo emkhatsini wabo ngalokufanako nanini.
26 Bacala kutsi behlukane ngetigaba; bacala kutsi batakhele emabandla kute batfole inzuzo, bacala kuliphika libandla leliciniso laKhristu.
27 Futsi kwenteka kutsi ngesikhatsi sekwendlule iminyaka lengemakhulu lamabili neminyaka lelishumi bese kukhona emabandla lamaningi eveni; yebo, bekukhona lamaningi emabandla labekafakaza kutsi ayamati Khristu, kodvwa atiphika tincenye letiningi telivangeli lakhe, kangangekutsi bekavumela yonkhe inhlobo yebubi, futsi anika loko lokungcwele kuloyo lobekangakavunyelwa ngenca yekungafaneleki.
28 Futsi lelibandla landza kakhulu ngenca yebubi, nangenca yemandla aSathane lowatfola kubambelela etinhlitiyweni tabo.
29 Ngetulu kwaloko, kwabakhona lelinye libandla lebelimphika Khristu; futsi bebahlupha libandla leliciniso laKhristu, ngenca yekutfobeka kwabo kanye nekukholwa kwabo kuKhristu; bebabadzelela ngenca yetimangaliso letiningi lebetenteka emkhatsini wabo.
30 Ngako-ke basebentisa emandla kanye neligunya kubafundzi baJesu labebasele nabo, babaphonsa ejele; kodvwa ngemandla elivi laNkulunkulu, labekakubo, emajele adzabuka kabili, bahamba benta timangaliso letinkhulu emkhatsini wabo.
31 Noko, nanoma kwakungato tonkhe letimangaliso, bantfu baticinisa tinhlitiyo tabo, futsi bafuna kubabulala, njengemaJuda eJerusalema labekafuna kubulala Jesu, njengekwelivi lakhe.
32 Futsi babaphonsa etitsandvweni temlilo, baphuma bangakalimali.
33 Ngetulu kwaloko babaphonsa emigodzini yetilwane tasendle, kodvwa badlala netilwane tasendle njengemntfwana nemvu; baphuma emkhatsini wato, bangakalimali.
34 Noko, bantfu baticinisa tinhlitiyo tabo, ngoba bebaholwa baphristi labaningi kanye nebaphrofethi bemanga kutsi bakhe emabandla lamaningi, kanye nekutsi bente tonkhe tinhlobo tebubi. Babashaya bantfu baJesu; kodvwa bantfu baJesu abatange batiphindziselele. Futsi ngaleyondlela bancishelwa lukholo bandza ngebubi, umnyaka nemnyaka, kwate kwendlula iminyaka lengemakhulu lamabili nemashumi lamatsatfu.
35 Manje kwenteka ngalomnyaka, yebo, emnyakeni wemakhulu lamabili nemashumi lamatsatfu nakunye, kwaba khona kwehlukana lokukhulu emkhatsini webantfu.
36 Futsi kwenteka kutsi ngalomnyaka kwacubuka bantfu labebabitwa ngekutsi ngemaNefi, bebakholwa ngeliciniso kuKhristu; emkhatsini wabo kwaba khona labo labebabitwa ngekutsi ngemaLamani—ngemaJakobe, emaJosefa, kanye nemaZoramu.
37 Ngako-ke labebakholwa ngeliciniso kuKhristu, kanye nalabebamkhonta ngeliciniso Khristu, (emkhatsini wabo bekukhona nalabafundzi labatsatfu baJesu labebayawusala) bebabitwa ngekutsi ngemaNefi, emaJakobe, emaJosefa, kanye nemaZoramu.
38 Futsi kwenteka kutsi labo labebalahla livangeli babitwa ngekutsi ngemaLamani, emaLemuweli, kanye nema-Ishmayeli; abatange bancishelwe lukholo, kodvwa balivukela ngemabomu livangeli laKhristu; futsi bafundzisa bantfwana babo kutsi bangakholwa, njengaboyise, kusukela ekucaleni, bancipha.
39 Bekungenca yebubi kanye netinengiso taboyise, njengoba bekunjalo ekucaleni. Futsi bafundziswa kubatondza bantfwana baNkulunkulu, njengoba emaLamani afundziswa kutsi atondze bantfwana baNefi kusukela ekucaleni.
40 Futsi kwenteka kutsi iminyaka lengemakhulu lamabili nemashumi lamane nakune bese yendlulile, betime kanjalo-ke tindzaba talabantfu. Incenye lenebubi kakhulu yebantfu yakhula yacina, futsi baba baningi kakhulu kunebantfu baNkulunkulu.
41 Bachubeka nekutakhela emabandla abo, bawahlobisa ngato tonkhe tinhlobo tetintfo letiligugu. Yendlula ngaleyondlela-ke iminyaka lengemakhulu lamabili nemashumi lasihlanu, kanjalo neminyaka lengemakhulu lamabili nemashumi lasitfupha.
42 Futsi kwenteka kutsi incenye lenebubi yebantfu yacala kutsi yente tifungo letiyimfihlo kanye nemacembu aGadiyanthoni.
43 Ngetulu kwaloko nebantfu labebabitwa ngekutsi bantfu baNefi bacala kutikhukhumeta etinhlitiyweni tabo, ngenca yemcebo wabo lomningi, baphindze baba nekutikhukhumeta njengabomnakabo, emaLamani.
44 Kusukela ngalesi sikhatsi bafundzi bacala kudzabuka ngetono temhlaba.
45 Futsi kwenteka kutsi ngesikhatsi sekwendlule iminyaka lengemakhulu lamatsatfu, bantfu baNefi kanye nemaLamani bese banebubi lobukhulu ngalokufanako.
46 Futsi kwenteka kutsi tigebengu taGadiyanthoni tasabalala eveni lonkhe; futsi bekute namunye lobekalungile ngaphandle kwebafundzi baJesu. Ligolide kanye nesiliva baligcina ngebuningi, futsi bahweba ngayo yonkhe indlela yekuhweba.
47 Futsi kwenteka kutsi emvakwekutsi sekwendlule iminyaka lengemakhulu lamatsatfu, (bantfu bebasolo bahleli ebubini) Amosi wafa; kwatsi umnakabo, Amaroni, wawugcina umbhalo esikhundleni sakhe.
48 Futsi kwenteka kutsi ngesikhatsi sekwendlule iminyaka lengemakhulu lamatsatfu nemashumi lamabili, Amaroni, ngekuphocelelwa nguMoya loNgcwele, wayifihla imibhalo lengcwele—yebo, yonkhe imibhalo lengcwele leyayendlulisiwe kusukela etitukulwaneni netitukulwane, leyayingcwele—kwate kwaba yiminyaka lengemakhulu lamatsatfu nemashumi lamabili kusukela ekuteni kwaKhristu.
49 Futsi wayifihla eNkhosini, kute iphindze ite kuyo insali yendlu yaJakobe, njengekwetiphrofetho kanye netetsembiso teNkhosi. Uphela kanjalo-ke umbhalo wa-Amoroni.