Akwateke kuto tonkhe tive, tihlobo, tilimi, kanye nakubantfu, lomsebenti loyawufika kubo: Kutsi tsine, ngemusa waNkulunkulu Babe, kanye neNkhosi yetfu Jesu Khristu, sibabonile bongcwengcwe labacuketse lombhalo, lokungumbhalo webantfu bakaNefi, kanjalo newemaLamani, bomnakabo, kanjalo newebantfu baJaredi, labachamuka embhoshongweni losekukhulunywe ngawo. Futsi siyati kutsi bahunyushwe ngesipho kanye nangemandla aNkulunkulu, ngoba livi lakhe likushilo loko kitsi; ngaloko-ke sati ngekweliciniso kutsi lomsebenti uliciniso. Siphidze siyafakaza kutsi siyibonile imifanekiso lecoshiwe kubongcwengcwe; futsi sivetelwe yona ngemandla aNkulunkulu, hhayi emuntfu. Siyacinisa ngemavi lanesizotsa, kutsi ingilosi yaNkulunkulu yehla ivela ezulwini, yabaletsa yaphindze yababeka phambi kwemehlo etfu, kute sibabuke siphindze sibabone bongcwengcwe, kanye nemifanekiso lecoshiwe lebeyikubo; futsi siyati kutsi kungumusa waNkulunkulu Babe, kanye neNkhosi yetfu Jesu Khristu, kutsi sibabone siphindze sinikete bufakazi kutsi leti tintfo tiliciniso. Futsi kuyamangalisa emehlweni etfu. Noko livi leNkhosi lasiyaleta kutsi siyoniketa bufakazi bako; ngaloko-ke, kulalela imiyaleto yaNkulunkulu, siniketa bufakazi ngaleti tintfo. Futsi siyati kutsi uma sitsembekile kuKhristu, siyawuyisusa ingati yabo bonkhe bantfu etembatfweni tetfu, s phindze sitfolwe singenabala phambi kwesihlalo sekwehlulela saKhristu, futsi siyawuhlala naye ingunaphakadze ezulwini. Ludvumo alube kuBabe, nakuNdvodzana kanye nakuMoya loNgcwele, lokunguNkulunkulu munye. Amen.