1 Lalelani futsi nive loku, Awu yindlu yaJakobe, lenibitwa ngeligama la-Israyeli, futsi leniphuma emantini akaJuda, noma emantini embhabhatiso, lenifunga ngeligama leNkhosi, futsi lenibita Nkulunkulu wema-Israyeli, kepha abafungi ngeliciniso nangekulunga.

2 Noko, batibita ngekutsi batakhamiti tasedolobheni lelingcwele, kodvwa abahlali kuye Nkulunkulu wema-Israyeli, loyiNkhosi yemaBandla; yebo, iNkhosi yemaBandla libito lakhe.

3 Bukani, ngitimemetele tintfo takucala kusukela ekucaleni; futsi taphuma emlonyeni wami, futsi ngatibonakalisa. Ngatibonakalisa masinyane.

4 Ngakwenta loku ngoba bengati kutsi unenkhani, futsi nentsamo yakho ingumsipha wensimbi, nelibunti lakho lilitfusi;

5 Futsi kusukela ekucaleni ngatimemetela kuwe; ngaphambi kwekutsi tenteke leti tintfo ngatibonakalisa kuwe; futsi ngatibonakalisa ngekwesaba hleze utsi—Sithico sami sitentile letintfo, kanye nesitfombe sami lesibatiwe, futsi nesitfombe sami lesibunjiwe sibayaletile.

6 Ukubonile futsi wakuva konkhe loku; futsi ngabe awutukumemetela na? Futsi nekutsi ngikubonisile tintfo letinsha kusukela kulesi sikhatsi, netintfo letifihlekile, futsi bewungatati.

7 Tidaliwe manje, hhayi kusukela ekucaleni, nangaphambi kwelusuku lowungativanga ngalo tamenyetelwa kuwe, hleze utsi—Buka bengitati.

8 Yebo, futsi awutivanga; yebo, awatanga; yebo, kusukela kuleso sikhatsi indlebe yakho yayingavulwanga; ngoba bengati kutsi utotiphatsa ngenkhohliso, futsi wabitwa ngalophambukako kusukela esibeletfweni.

9 Noko, ngenca yeligama lami ngitawuyihocisa intfukutselo yami, futsi ngenca yeludvumo lwami ngitawutibamba kuta kuwe, kute ngingakubulali.

10 Ngoba, buka, ngikucwengisisile, ngikukhetsile esitsandvweni setinhlupheko.

11 Ngenca yami, yebo, ngenca yami ngitawukwenta loku, ngoba angitukuvuma kutsi ligama lami lingcoliswe, futsi angitukuyinika lomunye inkhatimulo yami.

12 Lalela mine, Awu Jakobe, futsi na-Israyeli lababitiwe bami, ngoba nginguye; nginguwekucala, futsi nginguwekugcina.

13 Sandla sami ngetulu kwaloko sisibekile sisekelo semhlaba, futsi nesandla sami sangesekudla siwendlalile emazulu. Ngiyawabita futsi eme ndzawonye.

14 Nine nonkhe, butsanani, futsi nilalele; ngubani emkhatsini wabo lomemetela leti tintfo kubo na? INkhosi imtsandzile; yebo, futsi itawulifeza livi layo lelimemetele ngabo; futsi itawukwenta intsandvo yayo ngeBhabhulona, futsi umkhono wayo uyawuba etikwemaKhaledi.

15 Ngetulu kwaloko, kusho iNkhosi; mine Nkhosi, yebo, ngikhulumile; yebo, ngimbitile kutsi amemetele, ngimletsile, futsi uyawukwenta indlela yakhe iphumelele.

16 Sondzelani edvute nami; angikakhulumi ekusitsekeni; kusukela ekucaleni, kusukela ngesikhatsi kwamenyetelwa ngikhulumile; futsi iNkhosi Nkulunkulu, kanye naMoya wayo, ingitfumile.

17 Futsi naku lokushiwo yiNkhosi, uMhlengi wakho, loNgcwele wa-Israyeli; ngimtfumile, iNkhosi Nkulunkulu wakho lokufundzisa kutsi usitakale, lokuhola endleleni lokumele uhambe ngayo, ngikwentile loko.

18 Awu kube wawuyilalele imiyaleto yami—kube bekunjalo kuthula kwakho bekuyokuba njengemfula, futsi nekulunga kwakho njengemagagasi elwandle.

19 Nentalelwane yakho ngetulu kwaloko beyiyokuba njengesihlabatsi; nebantfwana betibilini takho njengematjana elwandle; libito lakhe ngabe alicishwanga noma lisuswe phambi kwami.

20 Phumani eBhabhulona, balekelani emaKhaledi, ngelivi lekuhlabelela kumemeteleni, shanoni loku, kukhulumeni nasemkhawulweni wemhlaba; shanoni nitsi: INkhosi iyihlengile inceku yayo Jakobe.

21 Futsi abatange boma; wabahola elugwadvuleni; wenta emanti kutsi abagobhotele aphume edvwaleni; ngetulu kwaloko wacheketa lidvwala futsi emanti ampompota aphuma kulo.

22 Futsi noma asakwentile konkhe loku, kanye nalokukhulu futsi, kute kuthula kulababi, kusho iNkhosi.