Sehluko 2
Lehi utsatsa umndeni wakhe uya ehlane ngaseLwandle loluBovu—Bashiya imphahla yabo—Lehi unikela ngemhlatjelo eNkhosini uphindze ufundzisa emadvodzana akhe kutsi agcine imiyaleto—Lamani naLemuweli bavungamela uyise—Nefi uyalalela uphindze uthandaza ngekukholwa; iNkhosi ikhuluma kuye, futsi ukhetfwa kutsi abuse ngetulu kwabomnakabo. Cishe ngemnyaka wa 600 ngaphambi kwekutalwa kwaKhristu.
1 Ngoba buka, kwenteka kutsi iNkhosi yakhuluma kubabe, yebo, nasephusheni, yatsi kuye: Ubusisiwe wena Lehi, ngenca yetintfo lotentile; futsi ngenca yekutsi bewetsembekile wamemetela kulaba bantfu tintfo mine lengikuyale ngato, buka, bafuna kutsatsa imphilo yakho.
2 Futsi kwenteka kutsi iNkhosi yamyaleta babe, nasephusheni, kutsi kuyofanele atsatse umndeni wakhe esuke aye ehlane.
3 Futsi kwenteka kutsi walilalela livi leNkhosi, ngaloko-ke wenta njengoba iNkhosi imyalile.
4 Futsi kwenteka kutsi wasuka waya ehlane. Washiya umuti wakhe, kanjalo nelive lelalilifa lakhe, kanye neligolide lakhe, nesiliva yakhe, netintfo letiligugu takhe, futsi wangatsatsi lutfo kutsi ahambe nako, ngaphandle kwemndeni wakhe, kanye netintfo lebekatidzinga, kanye nemathende, wesuka waya ehlane.
5 Wehlela entansi ngaseminceleni edvute nesisekelo seLwandle loluBovu; futsi wahamba ehlane eminceleni lesedvute neLwandle loluBovu; wahamba ehlane nemndeni wakhe, lowo lowawufaka ekhatsi make, Sariya, kanye nabomnaketfu labadzala, lokwakunguLamani, naLemuweli, kanye naSemu.
6 Futsi kwenteka kutsi ngesikhatsi sekahambe tinsuku letitsatfu ehlane, wamisa lithende lakhe esigodzini ngaseceleni kwemfula wemanti.
7 Futsi kwenteka kutsi wakha lilati ngematje, wabese wenta umnikelo eNkhosini, waphindze wabonga eNkhosini Nkulunkulu.
8 Futsi kwenteka kutsi wawubita lomfula, ngelibito laLamani, wawutfululela eLwandle loluBovu; futsi sigodzi besiseminceleni edvute kwemlomo wawo.
9 Futsi ngesikhatsi babe abona kutsi emanti emfula atfululeka emtfonjeni weLwandle loluBovu, wakhuluma kuLamani watsi: Awushengatsi bewungaba njengalomfula, ugobhotele njalo emtfonjeni wako konkhe kulunga!
10 Waphindze kanjalo wakhuluma kuLemuweli: Awu shengatsi bewungaba njengalesi sigodzi, ugcile usime, futsi unganyakatiseki ekugcineni imiyaleto yeNkhosi!
11 Manje loku yena wakukhuluma ngenca yekuba bonhlokolukhuni kwaLamani banaLemuweli; ngoba buka bavungama ngetintfo letiningi kubabe, ngoba bekayindvodza yemibono, futsi bekabaholile wabakhipha eveni laseJerusalema, kute bashiye live lebekulifa labo, kanye neligolide labo, nesiliva yabo, kanye netintfo letingemagugu tabo, kute babhubhele ehlane. Futsi batsi bekakwente loku ngenca yebuwula bemicabango yenhlitiyo yakhe.
12 Futsi kungalendlela Lamani naLemuweli labavungamela ngayo babe, kungibo labadzala. Futsi bavungama ngoba bebangatati tento taloyo Nkulunkulu lobekabadalile.
13 Bebangakholwa kutsi iJerusalema, lelo dolobha lelikhulu, lalingabhujiswa njengekusho kwemavi ebaphrofethi. Futsi bona bebanjengemaJuda labekaseJerusalema, labekafuna kutsatsa imphilo yababe.
14 Futsi kwenteka kutsi babe wakhuluma kubo esigodzini saLemuweli, ngemandla, agcwaliswe ngaMoya, kwate kwatsi luhlaka lwemitimba yabo lwadlukutela ngaphambi kwakhe. Futsi yena wabatfobisa, kangangekutsi abatange basalokotsa bakhulume ngekuphikisana naye; ngaloko-ke, benta njengoba abebayalile.
15 Futsi babe wahlala ethendeni.
16 Futsi kwenteka kutsi mine, Nefi, ngimncane kakhulu, noko ngimkhulu ngimudze, ngiphindze nginetifiso letinkhulu ngekwati ngetimfihlakalo takaNkulunkulu, ngaloko-ke, ngakhala eNkhosini; futsi buka yona yangivakashela, yayitsambisa inhlitiyo yami kangangoba ngakhohlwa ngiwo onkhe emavi lawo lebekadze akhulunywe ngubabe; ngaloko-ke, mine angitange ngimvukele njengabomnaketfu.
17 Ngakhuluma kuSemu, ngimatisa ngetintfo iNkhosi leyayitivetile kimi ngaMoya wayo loNgcwele. Futsi kwenteka kutsi wakholelwa emavini ami.
18 Kodvwa, buka, Lamani naLemuweli abatange bawalalele emavi ami; futsi ngidzabukile ngenca yebulukhuni betinhlitiyo tabo ngakhala eNkhosini.
19 Futsi kwenteka kutsi iNkhosi yakhuluma kimi, itsi: Ubusisiwe wena, Nefi, ngenca yelukholo lwakho, ngoba ungifunile ngekukhutsala, nangenhlitiyo letfobekile.
20 Futsi kangangoba uyawuyigcina imiyaleto yami, uyawuphumelela, futsi uyawuholelwa eveni lesetsembiso; yebo, live lengikulungisele lona; yebo, live lelikhetsiwe ngetulu kwawo onkhe lamanye emave.
21 Futsi kangangoba bomnakenu bayawukuvukela, bona bayawususwa embikweNkhosi.
22 Futsi kangangoba uyawuyigcina imiyaleto yami, uyawentiwa umbusi nemfundzisi ngetulu kwabomnakenu.
23 Ngoba buka, ngalolosuku labayawungivukela ngalo, ngiyawubacalekisa ngesicalekiso lesibuhlungu, futsi abayukuba nemandla ngetulu kwentalelwane yakho ngaphandle uma nayo iyawungivukela futsi.
24 Futsi uma kungenteka kutsi bangivukele, batawuba luhlupho entalelwaneni yakho, kutsi ibaphehlele etindleleni tekukhunjutwa.