1 Futsi kwenteka kutsi emvakwekutsi mine, Nefi, sengihlwitfwe nguMoya, futsi sengitibonile tonkhe leti tintfo, ngabuyela ethendeni lababe.

2 Futsi kwenteka kutsi ngabona bomnaketfu, baphikisana nguloyo naloyo mayelana netintfo leto babe labekatikhulumile kubo.

3 Ngoba ngempela wakhuluma tintfo letiningi naletinkhulu kubo, letatimatima kutsi ticondzakale, ngaphandle kwekutsi umuntfu abute eNkhosini; futsi ngenca yekutsi bebanetinhlitiyo letilukhuni, ngako-ke abatange babuke eNkhosini njengoba bekufanele bente.

4 Manje mine, Nefi, ngangidzabukile ngenca yebulukhuni betinhlitiyo tabo, futsi kanjalo, nangenca yetintfo lengangitibonile, futsi ngativa kutsi kwakufanele tenteke ngaphandle kwekuvinjelwa ngenca yebubi lobukhulu bebantfwana bebantfu.

5 Futsi kwenteka kutsi ngaphela emandla ngenca yetinhlupheko tami, ngoba ngabona kutsi tinhlupheko tami tatitinkhulu ngetulu kwato tonkhe, ngenca yekubhujiswa kwebantfu bami, ngoba ngangikubonile kuwa kwabo.

6 Futsi kwenteka kutsi emvakwekutsi sengitfole emandla ngakhuluma nabomnaketfu, nginesifiso sekwati kubo sizatfu sekuphikisana kwabo.

7 Futsi batsi: Buka, asikwati kuwacondza emavi ababe lawakhulumile mayelana nemagala emvelo esihlahla semncumo, futsi kanjalo mayelana nebeTive.

8 Futsi ngatsi kubo: Senike nabuta yini eNkhosini na?

9 Bona batsi kimi: Asikate; ngoba iNkhosi ayiyembuli intfo lenje kitsi.

10 Buka, ngatsi kubo: Kungani ningayigcini imiyaleto yeNkhosi na? Kungani nitawulahleka, ngenca yebulukhuni betinhlitiyo tenu na?

11 Anitikhumbuli yini tintfo iNkhosi letishito na?—Uma ningatutenta lukhuni tinhlitiyo tenu, futsi ningibuta ngelukholo, nikholwa kutsi nitonikwa, nikhutsale ekugcineni imiyaleto yami, ngempela leti tintfo tiyawukwembulwa kini.

12 Bukani, ngitsi kini, indlu yaka-Israyeli yafananiswa nesihlahla semncumo, ngaMoya weNkhosi lowawukuye babe; futsi bukani tsine asihleshulwanga yini kuyo indlu yaka-Israyeli, futsi asisilo yini ligala lendlu yaka-Israyeli na?

13 Manje, intfo babe layicondzile mayelana nekuchunyelelwa kwemagala emvelo ngekuphelela kwebeTive, kungukutsi ngetinsuku tekugcina, lapho intalelwane yetfu seyincishelwe kukholwa, yebo, sikhatsi lesiyiminyaka leminingi, futsi titukulwane letiningi emvakwekutsi Mesiya ayawubonakaliswa enyameni kubo bantfwana bebantfu, ngaleso sikhatsi livangeli leliphelele laMesiya liyawuta kubeTive, futsi liyosuka kubo beTive liye kuyo insali yentalelwane yetfu—

14 Futsi ngalolosuku insali yentalelwane yetfu iyawukwati kutsi bona bangibo bendlu yaka-Israyeli, futsi nekutsi bangibo bantfu besivumelwano beNkhosi; futsi ngaleso sikhatsi bayawukwati futsi bafinyelele elwatini lwabokhokho babo, futsi ngalokunjalo naselwatini lwelivangeli leMhlengi wabo, lelafundziswa kubobabe babo nguye; ngaloko-ke, bayawufinyelela ekumatini uMhlengi wabo futsi nangato tihloko temfundziso yakhe ngatinye, kute bati kutsi bangeta kanjani kuye futsi basindziswe.

15 Futsi ngalolosuku abatujabula yini futsi banikete ludvumo kuye Nkulunkulu wabo longunaphakadze, lidvwala labo, kanye nensindziso yabo na? Yebo, ngalolosuku, abatuwatfola yini emandla kanye nekondleka kuwo umvini weliciniso na? Yebo, abatukuta yini emhlambini weliciniso laNkulunkulu na?

16 Bukani, ngitsi kini, Yebo; bayawukhunjulwa futsi emkhatsini wendlu yaka-Israyeli; bayawuchunyelelwa, bangilo ligala lemvelo lesihlahla semncumo, kuso sihlahla seliciniso semncumo.

17 Futsi ngiko loku babe abekusho, futsi abecondze kutsi loku akutukwenteka kute kube semvakwekutsi sebahlakatwe beTive; futsi abecondze kutsi kuyawufika ngendlela yebeTive, kute iNkhosi ikhombise emandla ayo kubeTive ngaso leso sizatfu sekutsi iyawulahlwa ngemaJuda, noma bendlu yaka-Israyeli.

18 Ngaloko-ke babe akakhulumanga ngentalelwane yetfu kuphela, kodvwa futsi nangayo yonkhe indlu yaka-Israyeli, lekhombisa sivumelwano lekufanele sigcwaliseke ngetinsuku tekugcina; leso sivumelwano iNkhosi leyasenta kubabe Abrahama, itsi: Entalelwaneni yakho yonkhe imindeni yemhlaba iyawubusiswa.

19 Futsi kwenteka kutsi mine, Nefi, ngakhuluma kabanti nabo mayelana naleti tintfo; yebo, ngakhuluma kubo mayelana nekubuyiselwa kwemaJuda ngetinsuku tekugcina.

20 Futsi ngabalandzisa emavi a-Isaya, lawakhuluma mayelana nekubuyiselwa kwemaJuda, noma kwendlu yaka-Israyeli; futsi emvakwekutsi asabuyiselwe angeke asaphindze nanini atfotjiswe noma ahlakatwe futsi. Futsi kwenteka kutsi ngakhuluma emavi lamaningi kubo bomnaketfu, kangangekutsi batfotjiswa futsi batitfoba phambi kweNkhosi.

21 Futsi kwenteka kutsi baphindza bakhuluma kimi, batsi: Isho kutsini lentfo babe layibona ephusheni na? Sisho kutsini sihlahla lasibona na?

22 Ngatsi kubo: Kwakungumfanekiso wesihlahla sekuphila.

23 Futsi batsi kimi: Isho kutsini indvuku yensimbi babe layibona, leyo leyayiholela esihlahleni na?

24 Ngatsi kubo kwakulivi laNkulunkulu; futsi labo labebayawuliva livi laNkulunkulu; futsi babambelele bacine kulo, bebangeke balahleke nanini; futsi tilingo kanye nemicibisholo levutsako yesitsa ngeke kubancobele ekungatini, kute sibaholele ekubhujisweni.

25 Ngaloko-ke, mine, Nefi, ngabancusa kutsi balinake livi leNkhosi; yebo, ngabancusa ngawo onkhe emandla emphefumulo wami, kanye nangalo lonkhe lwati lwami lenganginalo, kutsi balinake livi laNkulunkulu futsi bakhumbule kugcina imiyaleto yakhe njalo kuto tonkhe tintfo.

26 Futsi batsi kimi: Usho kutsini umfula wemanti babe lawubona na?

27 Ngatsi kubo emanti lawo babe lawabona kwakukungcola; futsi umcondvo wakhe wawutsatsekile kakhulu ngaletinye tintfo kangangekutsi akakubonanga kungcola kwemanti.

28 Ngatsi kubo kwakungumhosha losabekako, lohlukanisa lababi esihlahleni sekuphila, futsi ngalokunjalo nakubo labangcwele baNkulunkulu.

29 Ngatsi kubo kwakungumfanekiso waleso sihogo lesesabekako, leso ingilosi leyatsi kimi sasilungiselwe lababi.

30 Ngatsi kubo babe waphindze wabona kutsi kulunga kwaNkulunkulu kwabehlukanisa lababi kulabalungile; futsi nekukhanya kwako kwakufana nekukhanya kwelilangabi lemlilo, lelalenyukela kuNkulunkulu ingunaphakadze, futsi lingenamkhawulo.

31 Futsi batsi kimi: Ngabe lentfo isho kuhlushwa kwemtimba etinsukwini tekuvivinywa, noma isho simo sekugcina semphefumulo emvakwekufa kwemtimba wenyama, noma ngabe ikhuluma ngetintfo letingetesikhashana na?

32 Futsi kwenteka kutsi ngatsi kubo kwakungumfanekiso wetintfo tesikhashana kanye netakamoya; ngoba lusuku luyeta lapho kufanele bahlulelwe ngekwemisebenti yabo, yebo, nangemisebenti leyo leyentiwa ngumtimba wenyama ngetinsuku tekuvivinywa kwabo.

33 Ngaloko-ke, uma bangafela ebubini babo kufanele balahlwe futsi, ngalokuphatselene netintfo takamoya, leto letiphatselene nekulunga; ngaloko-ke, kufanele baletfwe batoma phambi kwaNkulunkulu, kute bahlulelwe ngekwemisebenti yabo; futsi uma imisebenti yabo beyiyekungcola kufanele kutsi bangcolile; futsi uma bangcolile kufanele kutsi bangakwati kuhlala embusweni waNkulunkulu; uma kunjalo, umbuso waNkulunkulu kufanele ungcole nawo futsi.

34 Kodvwa bukani, ngitsi kini, umbuso waNkulunkulu awukangcoli, futsi kute intfo lengcolile lengangena embusweni waNkulunkulu; ngaloko-ke kufanele kutsi kube khona indzawo yekungcola lelungiselwe loko lokungcolile.

35 Futsi kukhona indzawo lelungisiwe, yebo, naleso sihogo lesesabekako lengikhulume ngaso, futsi develi ungumlungisi waso; ngaloko-ke simo sekugcina semiphefumulo yebantfu kuhlala embusweni waNkulunkulu, noma-ke kube kulahlwa ngenca yaloko kulunga lengikhulume ngako.

36 Ngaloko-ke, labakhohlakele bayalahlwa kulabalungile, futsi ngalokunjalo nakuleso sihlahla sekuphila, sitselo saso lesiligugu lelikhulu futsi lesitsandzeka kakhulu ngetulu kwato tonkhe letinye titselo; yebo; futsi kusipho lesikhulu kunato tonkhe tipho taNkulunkulu. Futsi ngakhuluma ngalendlela kubomnaketfu. Amen.