Sehluko 13
Nefi ubona embonweni libandla ladeveli limiswe emkhatsini kwebeTive, kutfolwa kanye nekwakha eMelika, kulahleka kwetincenye letiningi letisobala kanye naletiligugu teliBhayibheli, simo semphumela wekuhlubuka kwebetive, kubuyiselwa kwelivangeli, kuvela kwemibhalo lengcwele yetinsuku tekugcina, kanye nekwakhiwa kweSiyoni. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Futsi kwenteka kutsi ingilosi yakhuluma kimi, itsi: Buka! Ngabuka ngabona letiningi tive kanye nemibuso.
2 Futsi ingilosi yatsi kimi: Ubonani na? Ngase ngitsi: Ngibona letiningi tive kanye nemibuso.
3 Yatsi kimi: Leti tive kanye nemibuso yebeTive.
4 Futsi kwenteka kutsi ngabona emkhatsini wetive tebeTive kwakhiwa kwelibandla lelikhulu.
5 Ingilosi yatsi kimi: Buka kwakhiwa kwelibandla lelinengekile kakhulu ngetulu kwawo onkhe lamanye emabandla, lelibulala labangcwele baNkulunkulu, yebo, futsi lelibahlukubetako libabophele phansi, lelibafaka lijoka lensimbi, leliphindze libabuyisela phansi ekutfunjweni.
6 Futsi kwenteka kutsi ngalibona leli libandla lelikhulu nalelinengekile; ngabona kutsi develi bekangumcambi walo.
7 Ngaphindze ngabona ligolide, kanye nesiliva, kanye nabosilika, kanye nalokubovu, kanye nelineni lelukiwe lecolekile, kanye nato tonkhe tinhlobo tetingubo letiligugu; ngabona letiningi tingwadla.
8 Ingilosi yakhuluma kimi itsi: Buka ligolide, kanye nesiliva, kanye nabosilika, kanye nalokubovu, kanye nelineni lelukiwe lecolekile, kanye netingubo letiligugu, kanye netingwadla, kutifiso talo leli libandla lelikhulu nalelinengekile.
9 Ngetulu kwaloko ngenca yeludvumo lwasemhlabeni babhubhisa labangcwele baNkulunkulu, babayise phansi ekutfunjweni.
10 Futsi kwenteka kutsi ngabuka ngabona emanti lamaningi; bekahlukanisa beTive nentalelwane yabomnaketfu.
11 Futsi kwenteka kutsi ingilosi yatsi kimi: Buka intfukutselo yaNkulunkulu etikwentalelwane yabomnakenu.
12 Ngabuka ngabona indvodza emkhatsini webeTive, leyayehlukaniswe nentalelwane yabomnaketfu ngemanti lamaningi, ngabona uMoya waNkulunkulu, kutsi wehlela phansi, wasebenta kuyo indvodza; futsi yahamba kuwo lamanti lamaningi, nakuyo intalelwane yabomnaketfu, lebeyiseveni lesetsembiso.
13 Futsi kwenteka kutsi ngabona Moya waNkulunkulu, kutsi wasebenta nakulabanye beTive, baphindze bahamba etikwemanti lamaningi baphuma ekutfunjweni.
14 Futsi kwenteka kutsi ngabona ticuku letiningi tebeTive kulo live lesetsembiso; ngabona intfukutselo yaNkulunkulu, kutsi yayisetikwentalelwane yabomnaketfu; futsi bebahlakatekile phambi kwebeTive baphindze bashayiwe.
15 Ngabona Moya weNkhosi, kutsi wawusetikwebeTive, futsi baphumelela baphindze balitfola lelive njengelifa labo; ngabona kutsi bebamhlophe, babukeka kahle kakhulu futsi babahle, njengebantfu bami ngaphambi kwekutsi babulawe.
16 Futsi kwenteka kutsi mine, Nefi, ngabona kutsi beTive labebabaphume ekutfunjweni batitfoba phambi kweNkhosi, nemandla eNkhosi aba nabo.
17 Ngabona kutsi bonina bebeTive bebabutsene ndzawonye etikwemanti, ngalokunjalo nasetikwelive, kute balwe nabo.
18 Ngabona kutsi emandla aNkulunkulu bekanabo, futsi nekutsi intfukutselo yaNkulunkulu yayisetikwabo bonkhe labo labebabutsene ndzawonye kute balwe nabo.
19 Futsi mine, Nefi, ngabona kutsi beTive labo labebaphume ekutfunjweni bakhululwa ngemandla aNkulunkulu baphuma etandleni tato tonkhe letinye tive.
20 Futsi kwenteka kutsi mine, Nefi, ngabona kutsi baphumelela kulelive; ngabona incwadzi, yayindluliswa emkhatsini wabo.
21 Ingilosi yatsi kimi: Uyayati yini inchazelo yencwadzi na?
22 Ngatsi kuyo: Angiyati.
23 Yatsi: Buka iphuma emlonyeni weliJuda. Mine, Nefi, ngayibona; yatsi kimi: Incwadzi leyo loyibonako ingumbhalo wemaJuda, locuketse tivumelwano teNkhosi, leyatenta kuyo indlu yaka-Israyeli; ngetulu kwaloko icuketse tiphrofetho letiningi tebaphrofethi labangcwele, futsi ingumbhalo lonjengemifanekiso lecoshiwe lokubongcwengcwe belitfusi, ngaphandle nje kwekutsi atitiningi tona kakhulu; noko, nato ticuketse tivumelwano teNkhosi, leyatenta kuyo indlu yaka-Israyeli; ngaloko-ke, tinguletibaluleke kakhulu kubeTive.
24 Ingilosi yeNkhosi yatsi kimi: Ubonile kutsi incwadzi iphume emlonyeni weliJuda; futsi ngesikhatsi iphuma emlonyeni weliJuda beyicuketse livangeli leliphelele leNkhosi, lelo baphostoli labalishumi nakubili labanika bufakazi ngalo; baphindze banika bufakazi njengekweliciniso lelo lelikuyo iMvana yaNkulunkulu.
25 Ngaloko-ke, leti tintfo tiphuma kumaJuda timsulwa tiya kubeTive, njengekweliciniso laNkulunkulu.
26 Futsi emvakwekutsi setiphumile tahamba ngesandla sebaphostoli labalishumi nakubili beMvana, tisuka kumaJuda tiya kubeTive, uyakubona kwakhiwa kwalelo bandla lelikhulu nalelinengekile, lelinengekile kakhulu ngetulu kwawo onkhe lamanye emabandla; ngoba buka, batisusile evangelini leMvana tincenye letiningi letisobala naletiligugu lelikhulu; futsi ngalokunjalo netivumelwano letiningi teNkhosi batisusile.
27 Futsi konkhe loku bakwentile kute baguculele tindlela leticondzile tenkhosi, kute baphumphutsekise emehlo baphindze bente lukhuni tinhlitiyo tebantfwana bebantfu.
28 Ngaloko-ke, uyabona kutsi emvakwekutsi incwadzi seyindlulile etandleni talelo bandla lelikhulu nalelinengekile, kutsi kube khona letiningi futsi letisobala futsi letiligugu tintfo letikhishiwe encwadzini, lokuyincwadzi yeMvana yaNkulunkulu.
29 Emvakwekutsi leti tintfo letisobala futsi letiligugu setikhishiwe yendlulela kuto tonkhe tive tebeTive; emvakwekutsi seyendlulele kuto tonkhe tive tebeTive, yebo, nangesheya kwemanti lamaningi lawo lowuwabonile nebeTive labo labaphume ekutfunjweni, uyabona—ngenca yaleto tintfo letisobala letiningi futsi naletiligugu letikhishiwe encwadzini, letatisobala kutsi ticondvwe bantfwana bebantfu, njengaloko lokusobala lokukuyo iMvana yaNkulunkulu—ngenca yaleti tintfo letikhishiwe evangelini leMvana, labaningi kakhulu bayakhubeka, yebo, kangangekutsi Sathane unemandla lamakhulu etikwabo.
30 Noko, uyabona kutsi beTive labaphuma ekutfunjweni futsi baphakanyiswa ngemandla aNkulunkulu ngetulu kwato tonkhe letinye tive, ebusweni balelo live lelikhetsekile ngetulu kwawo onkhe lamanye emave, lokulive iNkhosi Nkulunkulu lavumelane ngalo neyihlo kutsi intalelwane yakhe kufanele ilitfole kube live lelilifa labo; ngaloko-ke uyabona kutsi iNkhosi Nkulunkulu ayitukuvumela kutsi beTive bayibhubhise nya incubevane yentalelwane yakho, leyo lesemkhatsini kweyabomnakenu.
31 Futsi ayitukuvuma kutsi beTive babhubhise intalelwane yabomnakenu.
32 Futsi iNkhosi Nkulunkulu ayitukuvuma kutsi beTive bahlale njalonjalo kuleso simo lesibi kakhulu sekuphumphutseka, leso lobabone bakuso, ngenca yetincenye letisobala futsi letiligugu kakhulu telivangeli leMvana letigodlwe ngilo lelo bandla lelinengekile, kwakhiwa kwalo lowukubonile.
33 Ngaloko-ke itsi iMvana yaNkulunkulu; Ngitawuba nesihawu kubeTive, kangangoba ngiyovakashela insali yendlu yaka-Israyeli ngekwehlulela lokukhulu.
34 Futsi kwenteka kutsi ingilosi yeNkhosi yakhuluma kimi, itsi: Buka, kusho iMvana yaNkulunkulu, emvakwekutsi sengiyivakashele insali yendlu yaka-Israyeli—lensali lengikhuluma ngayo iyintalelwane yeyihlo—ngaloko-ke, emvakwekutsi sengiyivakashele ngekwahlulelwa, futsi ngayishaya ngesandla sebeTive, emvakwekutsi beTive sebakhubeka kakhulu, ngenca yetincenye letisobala kakhulu futsi letiligugu telivangeli leMvana letigodlwe ngulelobandla lelinengekile, lelingunina wetingwadla, kusho iMvana—Ngitawuba nesihawu kubo beTive ngalolosuku, kangangekutsi, ngitawuletsa kubo, ngemandla ami, lokuningi kwelivangeli lami, lokuyawuba sobala futsi kube ligugu, kusho iMvana.
35 Ngoba, buka, kusho iMvana: Ngitawutiveta lucobo lwami kuyo intalelwane yakho, kute ibhale tintfo letiningi lengiyawubafundzisa tona, letiyawube tisobala futsi tiligugu; emvakwekutsi intalelwane yakho seyibhujisiwe, yancishelwa kukholwa, futsi ngalokunjalo nentalelwane yabomnakenu, buka, leti tintfo tiyawutfukuswa, kute tivetwe kubeTive, ngesipho kanye nangemandla eMvana.
36 Futsi kuto kuyawubhalwa livangeli lami, kusho iMvana, nelidvwala lami kanye nensindziso yami.
37 Futsi babusisiwe labo labayawufuna kusungula iSiyoni yami ngalolosuku, ngoba bayawuba nesipho kanye nemandla aMoya loNgcwele, futsi uma babeketela kute kube sekugcineni bayawuphakanyiswa ngelusuku lwekugcina, futsi bayawusindziswa embusweni waphakadze weMvana; futsi nalabo labayawumemetela kuthula, yebo, tindzaba tekutfokota lokukhulu, bayawuba bahle kangakanani etintsabeni.
38 Futsi kwenteka kutsi ngabona insali yentalelwane yabomnaketfu, ngalokunjalo nencwadzi yeMvana yaNkulunkulu, leyayiphume emlonyeni weliJuda, kutsi yavela kubeTive yaya kuyo insali yentalelwane yabomnaketfu.
39 Futsi emvakwekutsi seyivelile yaya kubo ngabona letinye tincwadzi, letavela ngemandla eMvana, tivela kubeTive tiya kubo, ekukholwiseni beTive kanye nensali yentalelwane yabomnaketfu, futsi ngalokunjalo nemaJuda labekahlakateke etikwebuso bemhlaba wonkhe, kutsi imibhalo yebaphrofethi neyebaphostoli labalishumi nakubili beMvana iliciniso.
40 Futsi ingilosi yakhuluma kimi, itsi: Lemibhalo yekugcina, loyibonile emkhatsini webeTive, iyawumisa liciniso laleyo yekucala, lokungeyebaphostoli labalishumi nakubili beMvana, futsi iyawukwatisa ngaloko lokusobala kanye nangetintfo letiligugu letikhishwe kuyo; futsi iyawukwatiswa kuyo yonkhe imindeni, tilimi, kanye nakubantfu, kutsi iMvana yaNkulunkulu iyiNdvodzana yaBabe longunaPhakadze, futsi inguMsindzisi wemhlaba, nekutsi bonkhe bantfu kufanele bete kuyo, noma angeke basindziswe.
41 Futsi kufanele bete njengekwemavi lawo layawumiswa ngemlomo weMvana; futsi emavi eMvana ayawukwatiswa emibhalweni yentalelwane yakho, ngalokunjalo nasemibhalweni yebaphostoli labalishumi nakubili beMvana; ngaloko-ke yomibili iyawuhlanganiswa ibe yinye; ngoba Nkulunkulu munye futsi neMelusi munye ngetulu kwemhlaba wonkhe.
42 Futsi sikhatsi siyeta lapho ayawutiveta etiveni tonkhe, kumaJuda ngalokunjalo nakubo beTive; futsi emvakwekutsi asativetile kuwo emaJuda ngalokunjalo nakubo beTive, uyawubese sewuyativeta kubeTive ngalokunjalo nakumaJuda, futsi bekugcina bayawuba bekucala, nebekucala bayawuba bekugcina.