1 Ngetulu kwaloko futsi: Lalelani, Awu ninendlu yaka-Israyeli, nonkhe nine lenehlukanisiwe futsi nakhishwa ngenca yebubi bebelusi bebantfu bami; yebo, nonkhe nine lenehlukanisiwe nasakatwa ndzawotonkhe, nine lenibantfu bami, Awu yindlu yaka-Israyeli. Ngilaleleni, Awu tichingi, futsi lalelani nine bantfu labakhashane; iNkhosi ingibite esibeletfweni; etibilinini tamake yenta kutsi libito lami likhunjulwe.

2 Futsi yente umlomo wami waba njengenkemba leloliwe; emtfuntini wesandla sayo ingitfukusile, futsi yangenta umcibisholo lololongiwe; emgodleni wayo ingitfukusile;

3 Futsi yatsi kimi: Uyinceku yami, Awu Israyeli, ngawe ngitawudvunyiswa.

4 Emvakwaloko ngatsi, ngikhandlekele lite, ngicitse emandla ami ngelite nalokungenalutfo; ngempela kwehlulelwa kwami kuseNkhosini, futsi nemsebenti wami ukuNkulunkulu wami.

5 Manje, itsi iNkhosi—leyangibumba kusukela esibeletfweni kutsi ngibe yinceku yayo, kute ngibuyisele Jakobe futsi kuyo—noma Israyeli angakagcogcwa, noko ngiyawuba nenkhatimulo lenkhulu emehlweni eNkhosi, futsi Nkulunkulu wami uyawuba ngemandla ami.

6 Futsi yatsi: Kuyintfo lelula kutsi ube yinceku yami kute uvuse tivana takaJakobe, futsi ubuyisele labasele baka-Israyeli. Ngetulu kwaloko ngitawukubeka ube kukhanya kubeTive, kute ube yinsindziso yami kute kube semikhawulweni yemhlaba.

7 Naku lokushiwo yiNkhosi, uMhlengi waka-Israyeli, loNgcwele wakhe, lodzelelwa ngumuntfu, losinengiso etiveni, kuyo inceku yebabusi: Emakhosi ayawubona futsi aphakame, tikhulu nato tiyawukhotsama, ngenca yeNkhosi leyetsembekile.

8 Naku lokushiwo yiNkhosi: Ngesikhatsi lesivumelekile nginivile, Awu tichingi telwandle, futsi ngelusuku lwensindziso nginisitile; futsi ngitawunilondvolota, ngininike inceku yami njengesivumelwano sebantfu, kumisa umhlaba, kubenta badle emafa lacitsekile

9 Kute utsi kulababoshiwe: Phumani; nakubo labo labahleti ebumnyameni: Tiveteni. Bayawutondla basetindleleni, futsi emadlelo abo ayawukuba kuto tonkhe tindzawo letiphakeme.

10 Angeke balambe noma bome, futsi kushisa nelilanga angeke kubashaye; ngoba loyo lonemusa kubo uyawubahola, uyawubacondzisa nasemitfonjeni yemanti.

11 Futsi ngitawutenta tonkhe tintsaba tami tibe tindlela, futsi nemigwaco yami lemikhulu iyawuphakanyiswa.

12 Futsi emvakwaloko, Awu yindlu yaka-Israyeli, buka, laba bayawukuta bavela khashane; futsi buka, laba bayawuphuma enyakatfo kanye nasenshonalanga; kutsi laba bayawuphuma eveni laseSinimu.

13 Hlabelani, Awu mazulu; futsi nitfokote, Awu mhlaba; ngoba tinyawo talabo labasemphumalanga tiyawumiswa; futsi nihlokome ngekuhlabelela, Awu tintsaba; ngoba abayukushaywa nanini; ngoba iNkhosi ibadvudvutile bantfu bayo, futsi itawuba nemusa kulabahluphekile bayo.

14 Kodvwa, buka, iSiyoni yatsi: INkhosi ingishiyile, futsi iNkhosi yami ingikhohliwe—kodvwa itawukhombisa kutsi ayikakhohlwa.

15 Ngoba wesifazane angamkhohlwa yini umntfwana wakhe lomunyako, kutsi angabi nebubele kuyo indvodzana yesibeletfo sakhe na? Yebo, bangakhohlwa, kodvwa mine angitukukhohlwa nguwe, Awu yindlu yaka-Israyeli.

16 Buka, ngikucophe entsendzeni yetandla tami; tibondza takho tisembikwami njalo.

17 Bantfwana bakho bayawushesha ngalokumelene nalabo labakucitsako, futsi nalabo labakwenta lite bayawuphuma kuwe.

18 Phakamisa emehlo akho ucalate ndzawo tonkhe futsi ubuke; bonkhe laba labagcogcene ndzawonye, futsi bayawukuta kuwe. Futsi njengoba ngiphila, kusho iNkhosi, impela uyakubembatsa bonkhe, njengemhlobiso, futsi utibophe ngabo njengamakoti.

19 Ngoba tindzawo takho letingenalutfo naletilihlane, kanye nelive lakho lembubhiso, liyawuba lincane kakhulu manje ngenca yesizatfu salabakhile kulo; futsi nalabo labakonako bayawuba khashane.

20 Bantfwana loyawukuba nabo, emvakwekutsi sowulahlekelwe bekucala, bayawuphindza batsi etindlebeni takho: Lendzawo ingumntjuntju kakhulu kimi; ngiphe indzawo kute ngihlale.

21 Ngaleso sikhatsi uyotsi enhlitiyweni yakho: Ngubani longitalele laba, loku mine ngalahlekelwa bantfwana bami, futsi anginantalo, ngingumtfunjwa, futsi ngingulozulazulako na? Ngubani lokhulise laba na? Buka, mine ngasala ngingedvwa vo; laba, bebakuphi na?

22 Naku lokushiwo yiNkhosi: Buka, ngitawuphakamisa sandla sami kubo beTive, futsi ngimise sibonakaliso sami kubantfu; futsi bayawuletsa emadvodzana akho etandleni tabo, futsi emadvodzakati akho bayawuwatfwala emahlombe abo.

23 Futsi emakhosi ayawuba boyihlo labakondlako, futsi nemakhosikati abo bomake bakho labakondlako; bayawukukhotsamela buso babo bubheke phansi, futsi bakhotse lutfuli lwetinyawo takho; futsi uyawukwati kutsi mine ngiyiNkhosi; ngoba abayukujabha labangilindzako.

24 Ngoba iyawususwa yini imphango kubo labanemandla, noma labatfunjwe ngekwemtsetfo bakhululwe na?

25 Kodvwa naku lokushiwo yiNkhosi, nalabatfunjwa balabo labanemandla bayawususwa, futsi nemphango yalabo labesabekako iyawukhululwa; ngoba ngitawuphikisana naye loyo lophikisana nawe, futsi ngitawubasindzisa bantfwana bakho.

26 Futsi ngitawubadlisa ngenyama yabo labo labakucindzetelako; bayawudzakwa yingati yabo lucobo njengeliwayini lelinongotelako; futsi wonkhe muntfu uyawukwati kutsi mine, Nkhosi, nginguMsindzisi wakho kanye neMhlengi wakho, loneMandla waJakobe.