Sehluko 9
Nefi wenta emasethi lamabili emibhalo—Ngayinye ibitwa ngekutsi bongcwengcwe baNefi—Bongcwengcwe labakhulu bacuketse umlandvo welive; labancane bona baphatselene ikakhulukati netintfo letingcwele. Cishe ngemnyaka wa 600 kuya kuwa 592 ngaphambi kwekutalwa kwaKhristu.
1 Futsi tonkhe leti tintfo babe watibona, wativa, waphindze watikhuluma, ngesikhatsi ahleti ethendeni, esigodzini saLemuweli, ngalokunjalo naletinye tintfo letiningi kakhulu, letingenawubhalwa kulaba bongcwengcwe.
2 Manje, njengoba sengikhulumile mayelana nalaba bongcwengcwe, buka akusibo bongcwengcwe lengibhala kubo umlandvo lophelele ngemlandvo webantfu bami; ngoba bongcwengcwe lengibhala kubo ngemlandvo lophelele webantfu bami bona ngibanike libito laNefi; ngaloko-ke, babitwa ngekutsi bongcwengcwe baNefi, ngelibito lami; futsi laba bongcwengcwe nabo babitwa ngekutsi bongcwengcwe baNefi.
3 Noko, ngitfole umyaleto eNkhosini wekutsi kufanele ngibente laba bongcwengcwe, ngibentele sizatfu lesibalulekile kute kube khona umlandvo locoshiwe ngebufundisi bebantfu bami.
4 Kulabanye bongcwengcwe kufanele kucoshwe umlandvo ngekubusa kwemakhosi, kanye netimphi nemibango yebantfu bami; ngaloko-ke laba bongcwengcwe baphatselene nencenye lenkhulu yebufundisi, futsi labanye bongcwengcwe baphatselene nencenye lenkhulu yekubusa kwemakhosi kanye netimphi kanye nemibango yebantfu bami.
5 Ngaloko-ke, iNkhosi ingiyaletile kutsi ngente laba bongcwengcwe ngekwenhloso yayo lenekuhlakanipha, inhloso leyo lengingayati.
6 Kodvwa iNkhosi yati tonkhe tintfo kusukela ekucaleni; ngaloko-ke, ilungisa indlela kute kufezeke yonkhe imisebenti yayo emkhatsini webantfwana bebantfu; ngoba buka, inawo onkhe emandla ngalokwanele kutsi igcwalise onkhe emavi ayo. Futsi kunjalo nje. Amen.