Sehluko 18
Umkhumbi uyacedvwa—Kutalwa kwaJakobe kanye naJosefa kuyashiwo—Licembu lingena emkhunjini liya eveni lesetsembiso—Emadvodzana a-Ishmayeli kanye nebafati babo bahlangana ngekutitika nekuvukela—Nefi uyaboshwa, futsi umkhumbi ubuyiselwa emuva siphepho lesibi—Nefi uyakhululwa, futsi ngemthandazo wakhe siphepho siyancamuka—Bantfu bafika eveni lesetsembiso. Cishe ngemnyaka wa 591 kuya kuwa 589 ngaphambi kwekutalwa kwaKhristu.
1 Futsi kwenteka kutsi bayikhonta iNkhosi, bahamba nami; saphindze sakha emapulango ngebuciko. Futsi iNkhosi yangibonisa tikhatsi ngetikhatsi kutsi kufanele ngiwasebente kanjani emapulango emkhumbi.
2 Manje mine, Nefi, angitange ngiwasebente emapulango ngendlela leyayifundvwe bantfu, noma ngakhe umkhumbi ngendlela yebantfu; kodvwa ngawakha ngendlela iNkhosi leyayingibonise ngayo, ngaloko-ke, kwakungasiyo indlela yebantfu.
3 Mine, Nefi, bengikhuphukela entsabeni njalo nje, futsi bengithandaza njalo nje eNkhosini; ngaloko-ke iNkhosi yangibonisa tintfo letinkhulu.
4 Futsi kwenteka kutsi emvakwekutsi sengiwucedzile umkhumbi, ngekwelivi leNkhosi, bomnaketfu babona kutsi wawumuhle, futsi nekutsi kwentiwa kwawo kwakukuhle kakhulu; ngaloko-ke, batitfoba futsi phambi kweNkhosi.
5 Futsi kwenteka kutsi livi leNkhosi lafika kubabe, kutsi kufanele siphindze sisukume sehlele entansi emkhunjini.
6 Futsi kwenteka kutsi ngakusasa, emvakwekutsi sesitilungisile tonkhe tintfo, titselo letiningi kanye nenyama yasehlane kanye neluju loluningi, kanye nako konkhe lokudzingekako ngaloku iNkhosi yayisiyaletile, sehlela entansi emkhunjini, nato tonkhe timphahla tetfu nenhlanyelo yetfu, kanye nako konkhe lesasifike nako, wonkhe umuntfu ngekweminyaka yakhe; ngaloko-ke, sonkhe sehla saya entansi emkhunjini, nebafati betfu kanye nebantfwana betfu.
7 Manje, babe besekatele emadvodzana lamabili ehlane; lendzala yayibitwa ngekutsi nguJakobe kantsi lencane kwakunguJosefa.
8 Futsi kwenteka kutsi emvakwekutsi sonkhe sesehlele entansi emkhunjini, futsi sesitsatse imiphako yetfu kanye naleto tintfo lesasiyaletwe ngato, satsatsa luhambo elwandle futsi sachutjwa ngumoya saya eveni lesetsembiso.
9 Emvakwekutsi sesichutjwe ngumoya libanga lelitinsuku letiningi, buka, bomnaketfu kanye nemadvodzana a-Ishmayeli ngalokunjalo nebafati babo bacala kutijabulisa, kangangekutsi bacala kugidza, kanye nekuhlabela, futsi bakhuluma ngalokukhulu kwedzelela, yebo, bate bakhohlwa kutsi ngumaphi emandla labekabaletse lapho; yebo, baphakama ekwedzeleleni lokukhulu.
10 Mine, Nefi, ngacala kwesaba kakhulu kutsi hleze iNkhosi isitfukutselele, iphindze isishaye ngenca yebubi betfu, nekutsi funa sigwinywe siye ekujuleni kwelwandle; ngaloko-ke, mine, Nefi, ngacala kukhuluma nabo ngalesikhulu sizotsa; kodvwa buka bangitfukutselela, batsi: ngeke sivume kutsi umnaketfu lomncane abuse ngetulu kwetfu.
11 Futsi kwenteka kutsi Lamani naLemuweli bangitsatsa baphindze bangibopha ngetintsambo, futsi bangiphatsa ngalokukhulu kuhlukubeteka; noko, iNkhosi yakuvumela loko kute ikhombise emandla ayo, ekugcwaliseni emavi ayo leyayiwakhulumile mayelana nalababi.
12 Futsi kwenteka kutsi emvakwekutsi sebangibophile kangangekutsi ngangingasakwati nekunyakata, inkhombandlela lesasiyilungiselwe yiNkhosi yema kusebenta.
13 Ngaloko-ke, abatanga kutsi kwakufane bawugwedle umkhumbi bawuyise ngakuphi, kangangekutsi kwasuka siphepho lesikhulu, yebo, lesikhulu nalesesabeka kakhulu sivunguvungu, futsi sachutjwa sabuyiselwa emuva etikwemanti libanga lelitinsuku letintsatfu; futsi bacala kwesaba kakhulu hleze bamite elwandle; noko abatange bangichache.
14 Futsi kwatsi ngelusuku lwesine, sisachutjwa sibhekiswa emuva, sivunguvungu sacala kuba sibi kakhulu.
15 Futsi kwenteka kutsi sase sitogwinywa siye ekujuleni kwelwandle. Emvakwekutsi sesichutjwe saya emuva etikwemanti libanga lelitinsuku letine, bomnaketfu bacala kubona kutsi tehlulelo taNkulunkulu tasetisetikwabo, futsi nekutsi kwakufanele babhubhe ngaphandle kwekutsi baphendvuke ebubini babo; ngaloko-ke, beta kimi, baphindze baticekisa tibopho letatisetihlakaleni tetandla tami, futsi buka tase tivuvukile kakhulu; futsi ngalokunjalo nemacakala ami bekavuvukile kakhulu, baba bukhulu buhlungu lobabulapho.
16 Noko, ngabuka kuNkulunkulu wami, futsi ngamdvumisa lusuku lonkhe, futsi angitange ngiyivungamele iNkhosi ngenca yetinhlupheko tami.
17 Manje babe, Lehi, bekasho tintfo letiningi kubo, futsi ngalokunjalo nakuwo emadvodzana a-Ishmayeli; kodvwa, buka, bafutselana kakhulu basongela nanoma ngubani lobekangikhulumela; nebatali bami sebakhulile ngeminyaka, futsi sebeve lolukhulu lusizi ngenca yebantfwana babo, behlela phansi, yebo, nasemibhedzeni yabo yekugula.
18 Ngenca yekudzabuka kwabo kanye nelusizi lolukhulu, kanye nebubi babomnaketfu, basondzetwa edvute nekufa kute bahlangane naNkulunkulu wabo; yebo, tinwele tabo letimphunga tasetisondzele kutsi tilale phansi elutfulini; yebo, kwasekusedvute nekutsi balahlwe banelusizi ethuneni lemanti.
19 Jakobe kanye naJosefa nabo, babancane, basadzinga kondliwa lokukhulu, badzabuka ngenca yetinhlupheko tenina; futsi ngalokunjalo nemkami netinyembeti kanye nemithandazo yakhe, ngalokunjalo nebantfwana bami, abatange batitsambise tinhlitiyo tabomnaketfu kutsi bangikhulule.
20 Kwakute lutfo ngaphandle kwemandla aNkulunkulu, lobekabasabisa ngekubhubha, bekangatsambisa tinhlitiyo tabo; ngaloko-ke, ngesikhatsi babona kutsi kwase kusondzele kutsi bagwinywe bayoshona ekujuleni kwelwandle baphendvuka ngaleyontfo labebayentile, kangangekutsi bangikhulula.
21 Futsi kwenteka kutsi emvakwekutsi sebangikhululile, buka, ngatsatsa inkhombandlela, futsi yasebenta njengoba ngangifisa. Futsi kwenteka kutsi ngathandaza eNkhosini; emvakwekutsi sengithandazile umoya wancamuka, kanye nesiphepho sancamuka, kwabakhona kuthula lokukhulu.
22 Futsi kwenteka kutsi mine, Nefi, ngawucondzisa umkhumbi, kangangoba sachubekela eveni lesetsembiso.
23 Futsi kwenteka kutsi emvakwekutsi sesihambe libanga lelitinsuku letiningi safika eveni lesetsembiso; futsi sachubekela phambili eveni, futsi samisa emathende etfu; salibita ngelive lesetsembiso.
24 Futsi kwenteka kutsi sacala salima umhlabatsi, sacala kuhlanyela tinhlanyelo; yebo, satifaka tonkhe tinhlanyelo tetfu emhlabatsini; lesasifike nato sisuka eveni laseJerusalema. Futsi kwenteka kutsi tamila kahle kakhulu; ngaloko-ke sabusiswa ngenala.
25 Futsi kwenteka kutsi satfola eveni lesetsembiso, ngesikhatsi sihamba ehlane, kutsi kwakukhona tilwane ehlatsini letitinhlobonhlobo, inkhomati kanye nenkhabi, kanye nembongolo kanye nelihhashi, nembuti kanye nembuti yasendle, kanye nato tonkhe tinhlobo tetilwane tasendle, lebetilusito kubantfu. Futsi satfola yonkhe inhlobo yelitje lensimbi, yeligolide, neyesiliva, kanye neyelitfusi.