1 Futsi kwenteka kutsi Alima kanye na-Amulekhi bayaletwa kutsi besuke kulelo dolobha; besuka, bahamba bate befika eveni laseSidomu; buka, lapho batfola bonkhe bantfu labebasukile eveni lase-Amoniha, labebacoshiwe futsi bagcotjwa nangematje ngoba bakholelwa emavini a-Alima.

2 Babacocela konkhe lokwakwentekile kubafati babo kanye nakubantfwana babo, ngalokunjalo nangalokuphatselene nabo lucobo, kanye nangemandla ekukhululwa kwabo.

3 Ngetulu kwaloko Zeziromu bekalele agula eSidomu, anemkhuhlane loshisako, lowawudalwe tinhlupheko letinkhulu tengcodvo yakhe ngenca yebubi bakhe, ngoba bekacabanga kutsi Alima na-Amulekhi bebangasekho; futsi bekacabanga kutsi bebabulewe ngenca yebubi bakhe. Lesi sono lesikhulu, kanye naletinye tono takhe letiningi, tayikhatsata ingcondvo yakhe yate yaba buhlungu kakhulu, angenakukhululwa, ngako-ke wacala wahlushwa kushisa lokukhulu.

4 Manje ngesikhatsi eva kutsi Alima na-Amulekhi bebaseveni laseSidomu, inhlitiyo yakhe yacala kuma sibindzi, watfumela umlayeto ngekushesha kubo, afisa kutsi bete kuye.

5 Futsi kwenteka kutsi bahamba ngekushesha, balalele umlayeto lobekawutfumele kubo; bahamba bangena endlini kuye Zeziromu; bamtfola alele embhedzeni wakhe, agula, aphansi kakhulu ngenca yemkhuhlane loshisako; futsi nengcodvo yakhe nayo yayikhatsatekile kakhulu ngenca yebubi bakhe; ngesikhatsi ababona welula sandla sakhe, wabancenga kutsi bamelaphe.

6 Futsi kwenteka kutsi Alima watsi kuye, ambambe ngesandla: Uyakholelwa yini emandleni aKhristu kutsi ekusindziseni na?

7 Yena waphendvula watsi: Yebo, ngiyawakholwa onkhe emavi lowuwafundzisile.

8 Alima watsi: Uma ukholwa ekuhlengeni kwaKhristu ungaphiliswa.

9 Yena watsi: Yebo, ngiyakholwa ngekwemavi akho.

10 Emvakwaloko Alima wakhala eNkhosini, watsi: Awu Nkhosi Nkulunkulu wetfu, yiba nemusa kulendvodza, uyiphilise ngekwelukholo lwayo lolukuKhristu.

11 Futsi ngesikhatsi Alima sekawashito lamavi, Zeziromu wagcuma wema ngetinyawo takhe, wacala kuhamba; loku kwenteka kwamangalisa bonkhe bantfu; futsi lwati lwaloku lwahamba lwefika eveni lonkhe laseSidomu.

12 Alima wabhabhatisa Zeziromu eNkhosini; futsi wacala kusukela ngaleso sikhatsi kuya embili kutsi ashumayele kubantfu.

13 Alima wamisa libandla eveni laseSidomu, waphindze wagcoba baphristi kanye nebafundzisi eveni, kutsi babhabhatise eNkhosini noma ngubani lobekanesifiso sekubhajatiswa.

14 Futsi kwenteka kutsi bebabaningi; ngoba batseleka bavela kuto tonkhe tifundza letitungelete iSidomu, futsi babhajatiswa.

15 Kodvwa kulabantfu labebaseveni lase-Amoniha, bekusesele bantfu labanetinhlitiyo letilukhuni kanye nalabanetinhloko letilukhuni; futsi abaphendvukanga etonweni tabo, batsi onkhe emandla a-Alima na-Amulekhi adeveli; ngoba bebabenkholo yaNehori, futsi bangakholelwa ekuphendvukeni kwetono tabo.

16 Futsi kwenteka kutsi Alima na-Amulekhi, Amulekhi asashiye lonkhe ligolide lakhe, nesiliva, kanye netintfo takhe letiligugu, letatiseveni lese-Amoniha, ngenca yelivi laNkulunkulu, ekubeni alahlwe ngulabo labake baba bangani bakhe futsi nangalokunjalo nanguyise kanye netihlobo takhe;

17 Ngako-ke, emvakwekutsi Alima asasungule libandla eSidomu, abona kutilawula lokukhulu, yebo abona kutsi bantfu bayalawulwa ekutichenyeni kwabo, futsi bacala kutehlisa phambi kwaNkulunkulu, bacala kugcogcana ndzawonye etindzaweni tabo letingcwele kute badvumise Nkulunkulu phambi kwelilati, bacaphele baphindze bathandaze ngaso sonkhe sikhatsi kutsi bakhululwe kuSathane, nasekufeni, kanye nasekubhujisweni—

18 Manje njengoba ngishito, Alima asatibonile tonkhe leti tintfo, ngako-ke watsatsa Amulekhi waya naye eveni laseZarahemla, wamtsatsa wamyisa endlini yakhe, wamsita ekuhluphekeni kwakhe, wamcinisa eNkhosini.

19 Futsi waphela kanjalo-ke umnyaka welishumi wekubusa kwebehluleli ngetulu kwebantfu baNefi.