1 Manje kwenteka kutsi emvakwekutsi Alima sekente siphetfo senkhulumo ebantfwini belibandla, lebelimiswe edolobheni laseZarahemla, wagcoba baphristi kanye nemagosa, ngekubabeka tandla takhe ngekweluhlelo lwaNkulunkulu, kutsi bengamele futsi babuke libandla.

2 Futsi kwenteka kutsi loyo lobekangasuye welibandla kulabo labebaphendvuka etonweni tabo babhajatiselwa ekuphendvukeni, bemukelwa ebandleni.

3 Futsi ngetulu kwaloko kwenteka kutsi loyo lobekawasebandleni kulabo labebangakaphendvuki ebubini babo futsi batitfobe ngaphambi kwaNkulunkulu—ngisho labo labebatiphakamise ngekutikhukhumeta etinhlitiyweni tabo—bona kanye bebalahlwa, futsi nemagama abo bekesulwa, kute emagama abo angabalwa, emkhatsini walabo labebalungile.

4 Futsi ngaleyondlela bacala kumisa luhlelo lwelibandla edolobheni lakaZarahemla.

5 Manje ngifuna kutsi nicodze kutsi livi laNkulunkulu belitfolakala kubo bonkhe, kangangekutsi bekute labebangakatjelwa ngelilungelo lekuhlangana ndzawonye kutsi beve livi laNkulunkulu.

6 Noko bantfwana baNkulunkulu bayaletwa kutsi babutsane ndzawonye njalo, futsi bahlanganyele ekuzileni kanye nasekuthandazeni lokukhulu kute kuzuze imiphefumulo yalabo labebangamati Nkulunkulu.

7 Manje kwenteka kutsi ngesikhatsi Alima sekente lemitsetfo wesuka kubo, yebo, wesuka ebandleni lebelisedolobheni laseZarahemla, wahamba wawelela ngasemphumalanga yemfula iSidoni, esigodzini saGideyoni, lapho bekwakhiwe lidolobha khona, lebelibitwa ngelidolobha laGideyoni, lebelisesigodzini lebesibitwa ngekutsi yiGideyoni, lesabitwa ngendvodza leyabulawa ngesandla saNehori ngenkemba.

8 Futsi Alima wahamba wacala kumemetela livi laNkulunkulu ebandleni lebelimiswe esigodzini saGideyoni, njengekwembulwa kweliciniso lelivi lebelikhulunywe nguyise, futsi nanjengekwemoya wesiphrofetho lobewukuye, ngebufakazi baJesu Khristu, indvodzana yaNkulunkulu, loyokuta kutohlenga bantfu bakhe etonweni tabo, kanye nangeluhlelo lolungcwele lobekabitwe ngalo. Futsi kubhalwe kanjalo. Amen.