1 Futsi kwenteka ekucaleni kwemnyaka wesihlanu wekubusa kwabo kwacala kutsi kube khona umbango emkhatsini webantfu; ngoba indvodza letsite, lebeyibitwa ngekutsi nguAmilisayi, indvodza lenebucili lobukhulu, yebo, indvodza lehlakaniphile ngekuhlakanipha kwaseveni, ingulomunye wenhlangano yaleyondvodza lebeyibulala Gideyoni ngenkemba, leyabulawa ngekwemtsetfo—

2 Manje lo-Amilisayi, ngebucili bakhe, wadvonsela khashane bantfu labaningi kutsi bamlandzele; labaningi kangangekutsi bacala kuba nemandla lamakhulu; bacala kutama kutsi bente Amilisayi kutsi abe yinkhosi ngetulu kwebantfu.

3 Manje loku bekwetfusa ebantfwini belibandla, futsi ngalokunjalo nakubo bonkhe labo labebangaheheka ngekuboniswa ngu Amilisayi; ngoba bebati kutsi ngekwemtsetfo wabo leyontfo lenjalo kwakufanelwe imiswe ngelivi lebantfu.

4 Ngako-ke, uma ngabe bekungenteka kutsi Amilisayi akwati kuzuza livi lebantfu, njengemuntfu lobekagcwele inkhohlakalo, bekangabamuka emalungelo abo kanye netibusiso telibandla; ngoba bekuyinhloso yakhe kulicedza libandla laNkulunkulu.

5 Futsi kwenteka kutsi bantfu babutsana ndzawonye kulo lonkhe live, wonkhe muntfu ngekwemcondvo wakhe, noma ngabe bebavumelana na-Amilisayi noma bebaphikisana naye, ngekwemacembu lahlukene, banemphikiswano lenkhulu kanye nalemangalisako imibango loyo naloyo.

6 Futsi ngaleyondlela babutsana ndzawonye batovakalisa emavi abo mayelana naleyondzaba; babekwa phambi kwebehluleli.

7 Futsi kwenteka kutsi livi lebantfu laphikisana na-Amilisayi, ngaloko-ke akabekwanga kutsi abe yinkhosi ngetulu kwebantfu.

8 Manje loku kwadala injabulo lenkhulu etinhlitiyweni talabo labebaphikisana naye; kodvwa Amilisayi wabaphehla labo labebamtsandza kutsi babatfukutselele labo labebangamtsandzi.

9 Futsi kwenteka kutsi babutsana ndzawonye, bamgcoba Amilisayi kutsi abe yinkhosi yabo.

10 Manje ngesikhatsi Amilisayi sekabekwe kutsi abe yinkhosi ngetulu kwabo wabayaleta kutsi batsatsele bomnakabo tikhali; futsi loku wakwenta kute abente babe ngaphansi kwakhe.

11 Manje bantfu ba-Amilisayi bebahlukaniswa ngeligama la-Amilisayi, babitwa ngema-Amilisayi; kutsi labasalako bese babitwa ngemaNefi, noma bantfu ba-Nkulunkulu.

12 Ngako-ke bantfu bemaNefi bebati ngenhloso yema-Amilisayi, ngako-ke batilungiselela kuhlangabetana nabo; yebo batihlomisa ngetinkemba, nangabocelemba, nangebutjoki, nangemicibisholo, nangematje, nangetilingi, kanye nangato tonkhe tinhlobo tetikhali temphi, talo lonkhe luhlobo.

13 Ngaleyondlela bebatilungiselele kuhlangabetana nema-Amilisayi ngesikhatsi eta. Bekukhona tindvuna letikhetsiwe, kanye netindvuna letinkhulu, kanye netindvuna letinkhulu kakhulu, ngekwesibalo sabo.

14 Futsi kwenteka kutsi Amilisayi wabahlomisa bantfu bakhe ngato tonkhe tinhlobo tetikhali temphi talo lonkhe luhlobo; waphindze wabeka babusi kanye nebaholi ngetulu kwebantfu bakhe, kutsi babahole kutsi bayolwa nabomnakabo.

15 Futsi kwenteka kutsi ema-Amilisayi aya etikwentsaba i-Aminihu, lebeyingasemphumalanga yemfula iSidoni, lebewugijima edvute nelive iZarahemla, futsi lapho bacala kulwa nemaNefi.

16 Manje Alima, angumehluleli lomkhulu kanye nembusi webantfu baNefi, ngako-ke wahamba wakhuphuka nebantfu bakhe, yebo, kanye netindvuna takhe, kanye netindvuna letinkhulu kakhulu, yebo, ahola emabutfo akhe, kuyobukana nema-Amilisayi emphini.

17 Bacala kuwabulala ema-Amilisayi egcumeni lelisemphumalanga yeSidoni. Nema-Amilisayi alwa nemaNefi ngemandla lamakhulu, kangangekutsi labaningi bemaNefi bawa phambi kwema-Amilisayi.

18 Noko inkhosi yasicinisa sandla semaNefi, kangangekutsi awabulala ema-Amilisayi ngekubulawa lokukhulu, kangangekutsi acala awabalekela.

19 Futsi kwenteka kutsi emaNefi awacosha ema-Amilisayi lilanga lonkhe, awabulala ngekubulawa lokukhulu, kangangekutsi lababulawa bema-Amilisayi bekuyimiphefumulo letinkhulungwane letilishumi nakubili nemakhulu lasihlanu nemashumi lamatsatfu nakubili; futsi kumaNefi bekubulewe imiphefumulo letinkhulungwane letisitfupha nemakhulu lasihlanu nemashumi lasitfupha nakubili.

20 Futsi kwenteka kutsi ngesikhatsi Alima angasakwati kuwacosha ema-Amilisayi wenta kutsi bantfu bakhe bamise emathende abo esigodzini saGideyoni, sigodzi lesasibitwa ngaGideyoni lowabulawa ngesandla saNehori ngenkemba; futsi kulesigodzi emaNefi amisa emathende awo ngalobo busuku.

21 Futsi Alima watfumela tinhloli kutsi tiyilandzele insali yema-Amilisayi, kute ati ngemasu kanye nangemachinga awo, kute ngaloko akwati kutsi ativikele ngalokumelene nawo, kute aphephise bantfu bakhe ekubhujisweni.

22 Manje labo labekabatfumele kutsi bayogadza inkambu yema-Amilisayi bebabitwa ngekutsi boZeramu, na-Aminori, naManthi, naLimheri; laba bekungibo labebahamba nebantfu babo kuyogadza inkambu yema-Amilisayi.

23 Futsi kwenteka kutsi ngakusasa babuyela enkambu yemaNefi ngekushesha lokukhulu, bamangele kakhulu, futsi banekwesaba lokukhulu, batsi:

24 Bukani, siyilandzele inkambu yema-Amilisayi, futsi ngekumangala kwetfu lokukhulu, eveni lakaMinoni, ngetulu kwelive laseZarahemla, endleleni leya eveni laNefi, sibone imphi lenkhulu kakhulu yemaLamani; bukani, ema-Amilisayi sekahlangene nawo.

25 Sebasetikwabomnaketfu kulelolive; futsi bayababalekela nemihlambi yabo, nebafati babo, kanye nebantfwana babo, beta ngasedolobheni letfu; futsi ngaphandle kwekutsi sente masinyane bayalitsatsa lidolobha letfu, nabobabe betfu, nebafati betfu, kanye nebantfwana betfu batobulawa.

26 Futsi kwenteka kutsi bantfu baNefi batsatsa emathende abo, besuka baphuma esigodzini sakaGideyoni baya ngasedolobheni labo, lebekulidolobha laseZarahemla.

27 Buka, ngesikhatsi bewela umfula iSidoni, emaLamani kanye nema-Amilisayi, bekamaningi kangangekutsi bekacishe abe ngangesihlabatsi saselwandle, atseleka etikwabo kutsi ababulale.

28 Noko, emaNefi ngekuciniswa sandla seNkhosi, athandazile kakhulu kuyo kutsi ibakhulule etandleni tetitsa tawo, ngako-ke iNkhosi yakuva kukhala kwawo, yawacinisa, futsi emaLamani kanye nema-Amilisayi awa phambi kwawo.

29 Futsi kwenteka kutsi Alima walwa na-Amilisayi ngenkemba, buso nebuso; balwa kakhulu, loyo naloyo.

30 Futsi kwenteka kutsi Alima, angumuntfu waNkulunkulu, anelukholo lolukhulu, wakhala, atsi: Awu Nkhosi, bani nemusa futsi usindzise imphilo yami, kute ngibe sikhali etandleni takho kute ngisindzise futsi ngilondvolote laba bantfu.

31 Manje ngesikhatsi Alima sekawashito lamavi waphindza walwa na-Amilisayi; waciniswa, kangangekutsi wambulala Amilisayi ngenkemba.

32 Futsi ngetulu kwaloko walwa nenkhosi yemaLamani; kodvwa inkhosi yemaLamani yabaleka yabuyela emuva ngaphambi kwa-Alima yatfumela bogadzi bayo kutsi balwe na-Alima.

33 Kodvwa Alima, nabogadzi bakhe, walwa nabogadzi benkhosi yemaLamani wate wababulala wababuyisela emuva.

34 Futsi ngaleyondlela walitsanyela libala, noma ngalokungiko lusentse, lebelisenshonalanga yemfula iSidoni, alahla tidvumbu temaLamani labekabulewe emantini aseSidoni, kute ngaloko bantfu bakhe babe nendzawo yekuwela bayolwa nemaLamani kanye nema-Amilisayi enshonalanga yemfula iSidoni.

35 Futsi kwenteka kutsi ngesikhatsi bonkhe sebawuwelile umfula iSidoni emaLamani kanye nema-Amilisayi acala kubaleka phambi kwabo, nanoma bekamaningi kangangekutsi bekangabaleki.

36 Abaleka ngaphambi kwemaNefi aya ngasehlane lebelingasenshonalanga kanye nasenyakatfo, aya khashane ngale kwemncele welive; futsi emaNefi awacosha ngemandla awo onkhe, awabulala.

37 Yebo, ahlangabetwa ngakuto tonkhe tinhlangotsi, abulawa ahlehliswa, ate ahlakateka enshonalanga, kanye nasenyakatfo, ate afika ehlane, lebelibitwa ngekutsi yiHemowunthi; futsi bekunguleyo ncenye yelihlane lebeyigcwele tilwane tasendle kanye netilwane letibukhali.

38 Futsi kwenteka kutsi lamaningi afela ehlane ngenca yemanceba awo, futsi ashwabadzelwa ngito leto tilwane kanye nemangce asemoyeni; futsi ematsambo awo atfolakele, futsi angcwatjelwe ndzawonye emhlabatsini.