Emavi a-Alima, futsi ngalokunjalo nemavi a-Amulekhi, lamenyetelwa kubantfu labebaseveni lase-Amoniha. Ngetulu kwaloko baphonswa ejele, futsi bakhishwa ngemandla lamangalisako aNkulunkulu labekakubo, ngekwembhalo wa-Alima.
Atfolakala esehlukweni 9 kuya ku 14.
Sehluko 9
Alima uyaleta bantfu baka-Amoniha kutsi baphendvuke—INkhosi itawuba nemusa kumaLamani ngetinsuku tekugcina—Uma emaNefi ayakulahla kukhanya, atawubhujiswa ngemaLamani—INdvodzana yaNkulunkulu itawuta masinyane—Itawuhlenga labo labaphendvukako, babhajatiswe, futsi babe nelukholo egameni Layo. Cishe ngemnyaka wa 82 ngaphambi kwekutalwa kwaKhristu.
1 Futsi ngetulu kwaloko, mine, Alima, ngiyaletwe nguNkulunkulu kutsi ngitsatse Amulekhi sihambe siphindze sishumayele kulaba bantfu, noma kubantfu labebasedolobheni lase-Amoniha, kwenteka kutsi ngesikhatsi ngicala kushumayela kubo, bacala kuphikisana nami, batsi:
2 Ungubani wena? Ucabanga kutsi tsine sitawukholwa bufakazi bemuntfu munye, noma angasishumayela kutsi umhlaba kumele wendlule na?
3 Manje bebangawacondzi lamavi labebawakhuluma; ngoba bebangati kutsi umhlaba kumele wendlule.
4 Futsi baphindze batsi: Angeke siwakholwe lamavi akho uma ungaphrofetha kutsi lelidolobha lelikhulu lingabhujiswa ngelilanga linye.
5 Manje bebangati kutsi Nkulunkulu bekangayenta imisebenti lemangalisako lenjalo, ngoba bebabantfu labanetinhlitiyo letilukhuni kanye nalabanenhloko lelukhuni.
6 Futsi batsi, Ngubani Nkulunkulu, longasatfumeli ligunya ngaphandle kwemuntfu munye nje emkhatsini walaba bantfu, kutsi amemetele kubo liciniso letintfo letinkhulu kangaka futsi letimangalisako na?
7 Futsi beta ngaphambili kute bangibambe; kodvwa buka, abatange. Futsi ngema ngesibindzi kute ngimemetele kubo, yebo, ngafakaza ngesibindzi kubo, ngatsi:
8 Bukani, Awu nine situkulwane lesikhohlakele nalesiphambene, seniwakhohlwe kanjani emasiko aboyihlo; yebo, seniyikhohlwe masinyane kanjani imiyaleto yaNkulunkulu na?
9 Anikhumbuli yini kutsi babe, Lehi, wakhishwa eJerusalema ngesandla saNkulunkulu na? Anikhumbuli yini kutsi bonkhe bebaholwa nguye ehlane na?
10 Futsi ngabe senikhohlwe masinyane kangaka kutsi tingakhi tikhatsi abakhulula bobabe betfu etandleni tetitsa tabo, futsi wabavikela ekubulaweni, nangetandla tabomnakabo lucobo na?
11 Yebo, futsi kube kwakungasiko ngenca yemandla akhe langalinganiswa, kanye nemusa wakhe, kanye nekumela bulukhuni kwakhe kitsi, ngabe sesasuswa ngalokungenakuvimbeleka ebusweni bemhlaba kudzala ngaphambi kwalesi sikhatsi, futsi mhlawumbe ngabe sesayiswa esimeni sekuhlupheka kanye nelusizi lolungapheli.
12 Bukani, manje ngitsi kini uyaniyaleta kutsi niphendvuke; futsi ngaphandle kwekutsi niphendvuke, kute ngisho nalencane indlela yekutsi nidle lifa lembuso waNkulunkulu. Kodvwa bukani, akusiko loku kuphela—uniyalete kutsi niphendvuke, noma utawunibhubhisa nya ebusweni bemhlaba; yebo, utawunivakashela ngentfukutselo yakhe, futsi lulaka lwakhe lolwesabekako akanakulubuyisela emuva.
13 Bukani, aniwakhumbuli yini emavi lawakhuluma kuLehi, latsi: Kangangoba niyawuyigcina imiyaleto yami, niyawuphumelela eveni? Kantsi futsi kuyashiwo kutsi: Kangangoba ningetuyigcina imiyaleto yami niyawuhlukaniswa ebukhoneni beNkhosi.
14 Manje ngifuna kutsi nikhumbule, kutsi kangangoba emaLamani angayigcinanga imiyaleto yaNkulunkulu, ahlukaniswa phambi kweNkhosi. Manje siyabona kutsi livi leNkhosi licinisekisiwe kulentfo, futsi emaLamani ehlukanisiwe phambi kwakhe, kusukela ekucaleni kwetiphambuko tawo kulelive.
15 Noko ngitsi kini, kuyawubeketeleleka kakhulu kwawo ngelusuku lwekwehlulelwa kunaloku kwenu, uma nihlala etonweni tenu, yebo, futsi kuyawubeketeleleka kakhulu kwawo kulemphilo kunaloku kwenu, ngaphandle kwekutsi niphendvuke.
16 Ngoba kukhona titsembiso letiningi letentelwe emaLamani; ngoba kungenca yemasiko aboyise lenta kutsi ahlale kuleso simo sawo sekungati; ngako-ke iNkhosi itawuba nemusa kuwo futsi yelule kuphila kwawo eveni.
17 Futsi ngalesinye sikhatsi lesitsite atawuholelwa ekutseni akholelwe evini layo, futsi ati ngekungalungi kwemasiko aboyise; futsi labaningi bawo batawusindziswa, ngoba iNkhosi itawuba nemusa kubo bonkhe labo lababita ligama layo.
18 Kodvwa bukani, ngitsi kini uma niphikelela ebubini benu tinsuku tenu ngeke tiselulwa eveni, ngoba emaLamani ayawutfunyelwa kini; futsi uma ningaphendvuki ayawufika ngesikhatsi leningasati, futsi niyawuvakashelwa ngekubhujiswa lokuphelele; futsi kuyawuba ngekwentfukutselo leyesabekako yeNkhosi.
19 Ngoba angeke inivumele kutsi nihlale ebubini benu, kutsi nibhubhise bantfu bayo. Ngitsi kini, Cha; lokungenani iyovumela emaLamani kutsi abhubhise bonkhe bantfu bayo lababitwa ngebantfu baNefi, uma kungenteka kutsi bawele etonweni kanye nasetiphambukweni, emvakwekutsi sebabe nekukhanya kangaka kanye nelwati lolukhulu kangaka lolunikwe bona yiNkhosi Nkulunkulu;
20 Yebo, emvakwekutsi babantfu labebatsandvwa kakhulu kangaka yiNkhosi; yebo, emvakwekutsi batsandvwe ngetulu kwato tonkhe letinye tive, imindeni, tilimi, noma bantfu; emvakwekutsi sebatiswe tonkhe tintfo, ngekwetifiso tabo, nelukholo lwabo, kanye nemithandazo, loko lokwakukhona, naloko lokukhona, kanye naloko lokusatokuta.
21 Bavakashelwe nguMoya waNkulunkulu; bakhulumile netingilosi, futsi kukhulunyiwe nabo ngelivi leNkhosi; futsi banemoya wekuphrofetha, kanye nemoya wekwembulelwa, futsi ngalokunjalo netipho letiningi, sipho sekukhuluma ngetilimi, kanye nesipho sekushumayela, nesipho seMoya loNgcwele, nesipho sekuhumusha;
22 Yebo, futsi emvakwekutsi bakhululwe nguNkulunkulu baphuma eveni laseJerusalema, ngesandla seNkhosi, basindziswe endlaleni, nasekuguleni, kanye nakuto tonkhe tinhlobo tetifo letitinhlobonhlobo; futsi bakhulile bacina ekulweni, kute bangabhujiswa; bakhishwe ebugcilini tikhatsi ngetikhatsi, futsi bagciniwe futsi balondvolotwa kute kube manje; futsi baphunyelelisiwe bate banotsa ngato tonkhe tinhlobo tetintfo—
23 Manje bukani ngitsi kini, uma laba bantfu, lesebatfole tibusiso letiningi kangaka esandleni seNkhosi, bebangaphambuka baphambane nekukhanya kanye nelwati labanalo, ngitsi kini uma loku kungaba njalo, uma bangawela esiphambukweni, kuyawubeketeleleka kakhulu kwemaLamani kunekwabo.
24 Ngoba bukani, titsembiso teNkhosi tentelwe emaLamani, kodvwa atikentelwa nine uma niphambuka; ngoba iNkhosi ayitsembisanga yini ngalokusobala futsi yamemetela ngalokucinile, kutsi uma nitawuyihlamuka niyawubhujiswa ngalokuphelele ebusweni bemhlaba na?
25 Manje ngalesi sizatfu, kute ningabhujiswa, iNkhosi itfumele ingilosi yayo kutsi ivakashele bantfu bayo labaningi, imemetele kubo kutsi kufanele bahambe futsi bakhale kakhulu kulaba bantfu, batsi: Phendvukani, ngoba umbuso welizulu sewusondzele.
26 Futsi akusetinsuku letiningi kusukela manje kutsi iNdvodzana yaNkulunkulu ifike ngenkhatimulo yayo; futsi inkhatimulo yayo iyawuba yinkhatimulo yaloTelwe Yedvwa waBabe, logcwele sihawu, kulunga, kanye neliciniso, logcwele kubeketela, umusa kanye nekumela bulukhuni, losheshako kuva kukhala kwebantfu bakhe futsi aphendvule imithandazo yabo.
27 Futsi bukani, uta kutawuhlenga labo labatawubhajatiselwa ekuphendvukeni, ngekukholwa egameni lakhe.
28 Ngako-ke, lungisani indlela yeNkhosi, ngoba sikhatsi sesisondzele kutsi bonkhe bantfu bavune umvuzo wemisebenti yabo, ngaloko labebakadze bangiko—uma bebalungile bayawuvuna kusindziswa kwemiphefumulo yabo, ngekwemandla kanye nenkhululeko yaJesu Khristu; futsi uma beyimibi bayawuvuna kulahlwa kwemiphefumulo yabo, ngekwemandla kanye nekutfunjwa ngudeveli.
29 Manje bukani, leli livi lengilosi, likhala ebantfwini.
30 Manje, bomnaketfu labatsandzekako, ngoba nibomnaketfu, futsi nimele kutsi nitsandzeke, futsi nimele kutsi niletse imisebenti ledzingekako yekuphendvuka, ngekubona kutsi tinhlitiyo tenu tentiwe taba lukhuni kakhulu ngalokumelene nelivi laNkulunkulu, futsi ngekubona kutsi nibantfu labalahlekile nalabawile.
31 Manje kwenteka kutsi ngesikhatsi mine, Alima, sengiwakhulumile lamavi, buka bantfu bangitfukutselela ngenca yekutsi ngatsi kubo bebabantfu labanetinhlitiyo letilukhuni kanye nalabanetinhloko letilukhuni.
32 Futsi ngetulu kwaloko ngenca yekutsi ngatsi kubo bebabantfu labalahlekile futsi labawile bangitfukutselela, futsi bafuna kungibamba, kute bangiphonse ejele.
33 Kodvwa kwenteka kutsi iNkhosi ayibavumelanga kutsi bangitsatse ngaleso sikhatsi bangiphonse ejele.
34 Futsi kwenteka kutsi Amulekhi wahamba wema ngaphambili, wacala kushumayela kubo futsi. Manje emavi a-Amulekhi akabhalwa onkhe, noko incenye yemavi akhe abhaliwe kulencwadzi.