1 Futsi kwenteka kutsi ngesikhatsi sebalimisile libandla kulelolive, inkhosi Lamonayi yaba nesifiso sekutsi Amoni ahambe nayo aye eveni laNefi, kute imkhombise uyise.

2 Livi leNkhosi lafika ku-Amoni, litsi: Ungahambi ukhuphukele eveni laNefi, ngoba buka, inkhosi itawufuna imphilo yakho; kodvwa uyawuya eveni laseMidonayi; ngoba buka, umnakenu Aroni, ngalokunjalo naMulokhayi kanye na-Ama basejele.

3 Manje kwenteka kutsi ngesikhatsi Amoni sekakuvile loku, watsi kuLamonayi: Buka, umnaketfu kanye nabomnaketfu basejele eMidonayi, futsi ngitohamba kute ngiyawubakhulula.

4 Manje Lamonayi watsi ku-Amoni: Ngiyati, ngemandla eNkhosi ungakwati kwenta tonkhe tintfo. Kodvwa buka, ngitawuhamba nawe siye eveni laseMidonayi; ngoba inkhosi yelive laseMidonayi, libito layo lengu-Anthiyomino, ingumngani wami; ngako-ke ngitakuya eveni laseMidonayi, kute ngiyincenge inkhosi yelive, futsi itawubakhipha bomnakenu etilongweni. Manje Lamonayi watsi kuye: Ngubani lokutjele kutsi bomnakenu basejele na?

5 Amoni watsi kuye: Kute longitjelile, ngaphandle kwaNkulunkulu; futsi utsite kimi—Hamba uyokhulula bomnakenu, ngoba basejele eveni laseMidonayi.

6 Manje ngesikhatsi Lamonayi sekakuvile loku wenta kutsi tinceku takhe tilungise emahhashi kanye netincola takhe.

7 Watsi ku-Amoni: Wota, ngitawuhamba nawe sehlele eveni lase Midonayi, lapho ngitawuyincenga inkhosi kutsi ibakhiphe bomnakenu ejele.

8 Futsi kwenteka kutsi ngesikhatsi Amoni kanye naLamonayi basahamba baya lapho, bahlangana neyise waLamonayi, lobekayinkhosi eveni lonkhe.

9 Buka, uyise waLamonayi watsi kuye: Awutanga ngani edzilini ngalolwasuku lolukhulu ngesikhatsi ngentele emadvodzana ami, kanye nebantfu bami lidzili na?

10 Ngetulu kwaloko watsi: Uyaphi nalomNefi, longulomunye webantfwana bemcambimanga na?

11 Futsi kwenteka kutsi Lamonayi wamlandzisa kutsi bekayaphi, ngoba bekasaba kumkhuba.

12 Futsi waphindze wamtjela sizatfu sekutsi ahlale embusweni wakhe, nekutsi yini angayanga edzilini uyise lebekalilungisile.

13 Manje ngesikhatsi Lamonayi sekamlandzisile tonkhe leti tintfo, buka, wamangala, uyise wamtfukutselela, futsi watsi: Lamonayi, uyawukhulula lamaNefi, langemadvodzana emcambimanga. Buka, wagebenga bobabe betfu; manje bantfwana bakhe nabo ngalokunjalo beta emkhatsini wetfu kute, ngebucili babo kanye nangemanga abo, basikhohlise, kute baphindze basigebenge imphahla yetfu.

14 Manje uyise waLamonayi wamyaleta kutsi abulale Amoni ngenkemba. Waphindze wamyala kutsi angayi eveni laseMidonayi, kodvwa kutsi abuyele naye eveni la-Ishmayeli.

15 Kodvwa Lamonayi watsi kuye: Ngeke ngimbulale Amoni, noma ngibuyele eveni la-Ishmayeli, kodvwa ngiya eveni laseMidonayi kute ngikhulule bomnakabo-Amoni, ngoba ngiyati kutsi bangemadvodza lalungile futsi babaphrofethi labangcwele baNkulunkulu weliciniso.

16 Manje ngesikhatsi uyise sekawavile lamavi, wamtfukutselela, wahoshula inkemba yakhe kute amshaye amwisele phansi.

17 Kodvwa Amoni wema ngembili watsi kuye: Buka, ungayibulali indvodzana yakho; noko, bekuyawubancono kutsi kufe yona kunawe, ngoba buka, iphendvukile etonweni tayo; kodvwa uma wena ungafa ngalesi sikhatsi, usentfukutselweni yakho, umphefumulo wakho awunakusindziswa.

18 Futsi ngetulu kwaloko, kudzingekile kutsi ukuyekele loku; ngoba uma ungayibulala indvodzana yakho, ibe yona iyindvodza lengenacala, ingati yayo iyawukhala isuka phansi iye eNkhosini Nkulunkulu wayo, kute imphindziselo ite etikwakho; futsi mhlawumbe ungalahlekelwa nangumphefumulo wakho.

19 Manje ngesikhatsi Amoni sekawashito lamavi kuye, wamphendvula, watsi: Ngiyati kutsi uma ngingabulala indvodzana yami, ngiyawube ngicitsa ingati lengenacala; ngoba nguwe lona lofune kuyibulala.

20 Futsi yelula sandla sayo kutsi ibulale Amoni. Kodvwa Amoni wawamela emagalelo ayo, futsi waphindze washaya sandla sayo kute ingabe isakwati kusisebentisa.

21 Manje ngesikhatsi inkhosi ibona kutsi Amoni angayibulala, yacala kuncenga ku-Amoni kutsi aphephise imphilo yayo.

22 Kodvwa Amoni waphakamisa inkemba yakhe, watsi kuyo: Buka, ngitawukubulala ngaphandle kwekutsi uvume kutsi bomnaketfu bakhishwe ejele.

23 Manje inkhosi, inekwesaba kutsi ingase ilahlekelwe yimphilo yayo, yatsi: Uma nje ungangisindzisa ngitawukunika noma ngabe yini lotawuyicela, noma ngabe yincenye yembuso.

24 Manje ngesikhatsi Amoni abona kutsi besekayitfolile inkhosi lendzala njengekwesifiso sakhe, watsi kuyo: Uma nje ungavumela bomnaketfu kutsi baphume ejele, nekutsi Lamonayi agcine umbuso wakhe, nekutsi ungabi nekungamtsandzi, kodvwa umvumele kutsi ente njengekwetifiso takhe kunoma nguyiphi intfo layicabangako, uma kunjalo ngitawukuphephisa; kungasinjalo ngitawukushaya ngikulahle phansi.

25 Manje ngesikhatsi Amoni sekawashito lamavi, inkhosi yacala kutfokota ngenca yemphilo yayo.

26 Futsi ngesikhatsi ibona kutsi Amoni bekangenanhloso yekuyibulala, ngesikhatsi ibona lutsandvo lolukhulu lebekanalo ngendvodzana yayo Lamonayi, yamangala kakhulu, yatsi: Ngenca yekutsi nguloku kuphela lokufisako, kutsi ngikhulule bomnakenu, futsi ngivume kutsi indvodzana yami Lamonayi igcine umbuso wayo, buka, ngitawuvuma kutsi indvodzana yami iwugcine umbuso wayo kusukela kulesi sikhatsi naphakadze; angisatukuphindze ngiyibuse nanini.

27 Ngetulu kwaloko ngitawuvuma kutsi bomnakenu bakhishwe ejele, futsi wena kanye nabomnakenu ningeta kimi, embusweni wami; ngoba ngiyafisa kakhulu kutsi ngikubone. Ngoba inkhosi beyimangele kakhulu ngemavi labekawakhulumile, futsi ngalokunjalo nangemavi labekakhulunywe yindvodzana yayo Lamonayi, ngako-ke yaba nesifiso sekuwafundza.

28 Futsi kwenteka kutsi Amoni kanye naLamonayi bachubeka neluhambo lwabo lwekuya ngaseveni laseMidonayi. Futsi Lamonayi watfola kutsandvwa emehlweni enkhosi yelive; ngako-ke bomnakabo-Amoni bakhishwa ejele.

29 Ngesikhatsi Amoni ahlangana nabo wadzabuka kakhulu, ngoba buka bebangcunu, futsi tikhumba tabo betigatukile kakhulu ngenca yekuboshwa ngetintsambo leticinile. Ngetulu kwaloko bese bafile yindlala, koma, kanye nato tonkhe tinhlobo tetinhlupheko; noko bebakubeketelele konkhe kuhlupheka kwabo.

30 Futsi njengoba kwenteka, loku bekusabelo sabo kutsi bawele etandleni tebantfu labebalukhuni kanye nalabebanetinhloko letilukhuni; ngako-ke babengafuni ngisho nekuwalalela emavi abo, babacosha, babakhiphela ngaphandle, babashaya, futsi babachuba besuka indlu ngendlu, indzawo ngendzawo, bate babafikisa eveni laseMidonayi; Futsi lapho batsatfwa baphonswa ejele, baboshwa ngetintsambo leticinile, bagcinwa ejele tinsuku letiningi, bate bakhishwa nguLamonayi kanye na-Amoni.