1 Manje kwenteka kutsi Alima wabuya eveni laGideyoni, emvakwekutsi sekafundzise bantfu baGideyoni tintfo letiningi letingeke tibhalwe, sekalumisile luhlelo lwelibandla, njengoba bekentile ngaphambili eveni laseZarahemla, yebo, wabuyela emtini wakhe eZarahemla kute ayotiphumuta ekusebenteni labekakwentile.

2 Futsi waphela kanjalo-ke umnyaka wemfica wekubusa kwebehluleli ngetulu kwebantfu baNefi.

3 Futsi kwenteka kutsi ekucaleni kwemnyaka welishumi wekubusa kwebehluleli ngetulu kwebantfu baNefi, Alima wesuka kuleyondzawo watsatsa luhambo lwakhe wawelela eveni laseMelekhi, enshonalanga yemfula iSidoni, enshonalanga ngaseminceleni yelihlane.

4 Wacala kufundzisa bantfu eveni laseMelekhi ngekweluhlelo lolungcwele lwaNkulunkulu, lebekabitwe ngalo; wacala kufundzisa bantfu kulo lonkhe live laseMelekhi.

5 Futsi kwenteka kutsi bantfu beta kuye baphuma eminceleni yonkhe yelive lebelingasehlane. Babhajatiswa kulo lonkhe lelo live;

6 Kwatsi uma sekacedzile umsebenti wakhe eMelekhi wesuka kuleyondzawo, wahamba luhambo lwetinsuku letintsatfu waya ngasenyakatfo yelive laseMelekhi; wafika edolobheni lelalibitwa ngekutsi yi-Amoniha.

7 Manje bekulisiko lebantfu baNefi kutsi babite emave abo, nemadolobha abo, kanye netigodzi tabo, yebo, tonkhe tigodzi tabo letincane, ngeligama laloyo wekucala lobekawatsatsile; futsi kwaba kanjalo nangelive lase-Amoniha.

8 Futsi kwenteka kutsi ngesikhatsi Alima sekafikile edolobheni lase-Amoniha wacala kushumayela livi laNkulunkulu kubo.

9 Manje Sathane besekatilawule kakhulu tinhlitiyo tebantfu basedolobheni lase-Amoniha; ngako-ke abafunanga kuwalalela emavi a-Alima.

10 Noko Alima wasebenta kakhulu kumoya, azabalaza naNkulunkulu ngekuthandaza lokukhulu, kute atsele Moya wakhe etikwebantfu labebakulelidolobha; kute amvumele kutsi ababhabhadisele ekuphendvukeni.

11 Noko batenta lukhuni tinhlitiyo tabo, batsi kuye: Buka, siyati kutsi ungu-Alima; futsi siyati kutsi ungumphristi lomkhulu ngetulu kwelibandla lowalisungula etincenyeni letiningi telive, ngekwelisiko lakho; asisibo belibandla lakho, futsi asikholelwa emasikweni labuwula njengalawa.

12 Futsi siyati kutsi ngenca yekutsi asisibo belibandla lakho siyati kutsi ute emandla ngetulu kwetfu; futsi unike sihlalo sekwehlulela kuNefiha; ngako-ke awusuye umehluleli lomkhulu ngetulu kwetfu.

13 Manje ngesikhatsi bantfu sebakushito loku, bamelana nemavi akhe onkhe, bamtfuka, bamkhafulela ngematse, benta kutsi acoshwe edolobheni labo, wesuka kuleyo ndzawo watsatsa luhambo lwakhe waya ngasedolobheni lelabitwa ngekutsi yi-Aroni.

14 Futsi kwenteka kutsi ngesikhatsi asahamba aya kuleyondzawo, umtimba wakhe ushone phansi ngenca yelusizi, ahlupheke kakhulu futsi adzabukile emphefumulweni, ngenca yebubi bebantfu labebasedolobheni lase-Amoniha, kwenteka kutsi ngesikhatsi Alima umtimba wakhe usashone phansi ngenca yelusizi, buka ingilosi yenkhosi yavela kuye, itsi:

15 Ubusisiwe, Alima; ngako-ke, phakamisa inhloko yakho futsi utfokote, ngoba unesizatfu lesikhulu sekutsi utfokote; ngoba utsembekile ekugcineni imiyaleto yaNkulunkulu kusukela ngesikhatsi utfola umlayeto wakho wekucala kuye. Buka, nginguye loyo lowawuletsa kuwe.

16 Futsi buka, ngitfunywe kutsi ngitokuyaleta kutsi ubuyele edolobheni lase-Amoniha, uphindze ushumayele bantfu balelo dolobha; yebo, utsi kubo, ngaphandle kwekutsi baphendvuke iNkhosi Nkulunkulu itawubabhubhisa.

17 Ngoba buka, benta imetamo ngalesi sikhatsi kute bacedze inkhululeko yebantfu bakho, (ngoba naku lokushiwo yiNkhosi) loko lokuphambene nemitsetfo, kanye netehlulelo, kanye nemiyaleto leyiyinike bantfu bayo.

18 Manje kwenteka kutsi emvakwekutsi Alima sekawutfolile umyaleto wakhe lovela engilosini yeNkhosi wabuyela ngekushesha eveni lase-Amoniha. Wangena edolobheni ngalenye indlela, yebo, ngendlela lebeyingaseningizimu yelidolobha lase-Amoniha.

19 Ngesikhatsi angena edolobheni besekalambile, watsi endvodzeni: Ungayipha yini inceku letfobekile yaNkulunkulu lokutsite kute idle na?

20 Futsi lendvodza yatsi kuye: NgingumNefi, ngiyati kutsi ungumphrofethi longcwele waNkulunkulu, ngoba uyindvodza ingilosi lengitjele ngayo embonweni yatsi: Uyawumemukela. Ngako-ke, hamba nami siye endlini yami ngitakunika incenye yekudla kwami; futsi ngiyati kutsi utawuba sibusiso kimi kanye nasemtini wami.

21 Futsi kwenteka kutsi lendvodza yamemukela emtini wayo; lendvodza yayibitwa ngekutsi ngu-Amulekhi; yaletsa sinkhwa kanye nenyama yakubeka ngaphambi kwa-Alima.

22 Futsi kwenteka kutsi Alima wadla sinkhwa wesutsa; futsi wambusisa Amulekhi kanye nemndeni wakhe, wabonga kuNkulunkulu.

23 Emvakwekutsi sekadlile futsi sekesutsi watsi ku-Amulekhi: Ngingu-Alima, ngingumphristi lomkhulu ebandleni laNkulunkulu kulo lonkhe live.

24 Futsi buka, ngibitwe kutsi ngishumayele livi laNkulunkulu emkhatsini wabo bonkhe labantfu, ngekwemoya wekwembulelwa kanye nekuphrofetha; bengikulelive futsi abangemukelanga, kodvwa bangikhiphele ngaphandle phindze besengitolifulatsela lelive ingunaphakadze.

25 Buka, ngiyaletwe kutsi kufanele ngiphindze ngibuyele ngiphrofethe kulaba bantfu, yebo, futsi ngifakaze ngalokumelene nabo mayelana nebubi babo.

26 Manje, Amulekhi, ngenca yekutsi ungiphile kudla futsi wangingenisa, ubusisiwe; ngoba bengilambile, ngoba bengizilile tinsuku letiningi.

27 Futsi Alima wahlala tinsuku letiningi na-Amulekhi ngaphambi kwekutsi acale kushumayela kubantfu.

28 Futsi kwenteka kutsi bantfu bakhula kakhulu ebubini babo.

29 Futsi livi lafika ku-Alima, litsi: Hamba; uphindze usho encekwini yami Amulekhi, kutsi akahambe aphrofethe kulaba bantfu, atsi—Phendvukani, ngoba naku lokushiwo yiNkhosi, ngaphandle kwekutsi niphendvuke ngitawubavakashela laba bantfu ngentfukutselo yami; yebo, futsi anginalubuyisela emuva lulaka lwami lolwesabekako kubo.

30 Futsi Alima wahamba, na-Amulekhi ngalokunjalo, emkhatsini webantfu, kuyomemetela emavi aNkulunkulu kubo; futsi bagcwaliswa ngaMoya loNgcwele.

31 Futsi baba nemandla labanikwa wona, kangangekutsi bebangeke bavalelwe emgodzini lolijele; noma kube lula kutsi umuntfu ababulale; noko abatange bawasebentise emandla abo kwate kwaba ngesikhatsi baboshwa ngetibopho baphoswa ejele. Manje, loku kwentelwa kutsi iNkhosi ikhombise emandla ayo kubo.

32 Futsi kwenteka kutsi bahamba bacala kushumayela kanye nekuphrofetha kubantfu, ngekwakamoya kanye nemandla iNkhosi lebeyibanike wona.