1 Manje kwenteka kutsi emvakwekutsi Amulekhi sekacedzile kukhuluma lamavi, basishiya sicuku futsi babuyela eveni laseJeshoni

2 Yebo, nabo bonkhe labanye bekahamba nabo, emvakwekutsi sebalishumayele livi kumaZoramu, nabo babuyela eveni laseJeshoni.

3 Futsi kwenteka kutsi emvakwekutsi liningi lemaZoramu lebelatiwa selike lahlangana ndzawonye mayelana nemavi lebekashunyayelwe kubo, latfukutsela ngenca yelivi, ngoba labucedza bucili babo; ngako-ke abafunanga kuwalalela emavi.

4 Futsi batfumela phindze bagcogcela bonkhe bantfu ndzawonye kulo lonkhe live, babonisana nabo mayelana nalawo mavi lebekakhulunyiwe.

5 Manje babusi babo kanye nebaphristi babo kanye nebafundzisi babo ababatisanga bantfu mayelana netifiso tabo; ngako-ke batitfolela ngansense imibono yebantfu.

6 Futsi kwenteka kutsi emvakwekutsi sebayitfolile imibono yabo bonkhe bantfu, labo labebawatsandza lawomavi lebekakhulunywe ngu-Alima kanye nabomnakabo bacoshwa bakhishelwa ngaphandle kwelive; bebabaningi; futsi ngetulu kwaloko bawelela eveni laseJeshoni.

7 Futsi kwenteka kutsi Alima kanye nabomnakabo babafundzisa.

8 Manje bantfu bemaZoramu babatfukutselela bantfu baka-Amoni labebaseJeshoni, futsi umbusi lomkhulu wemaZoramu, angumuntfu lomubi kakhulu, watfumela kubantfu baka-Amoni afuna kutsi babacoshe babakhiphele ngaphandle kwelive bonkhe labo labebabalekele eveni labo.

9 Futsi wabasabisa ngalokuningi kubasongela ngalokumelene nabo. Manje bantfu baka-Amoni abawesabanga emavi abo; ngako-ke abatange babacoshe, kodvwa babemukela bonkhe labamphofu bemaZoramu labeta kubo; babondla, babembatsisa, baphindze babaniketa imihlaba kutsi ibe ngemafa abo; babasita nangekwetidzingo tabo.

10 Manje loku ngempela kwawaphehla emaZoramu kutsi abatfukutselele bantfu baka-Amoni, acala kuhlangana nemaLamani futsi bawaphehla nawo kutsi abatfukutselele.

11 Ngaleyondlela emaZoramu kanye nemaLamani acala kwenta emalungiselelo emphi kutsi alwe nebantfu baka-Amoni, ngalokunjalo nemaNefi.

12 Waphela ngaleyondlela-ke umnyaka welishumi nesikhombisa wekubusa kwebehluleli ngetulu kwebantfu baNefi.

13 Futsi bantfu baka-Amoni besuka baphuma eveni laseJeshoni, bawelela eveni laseMelekhi, banika emabutfo emaNefi indzawo leseveni laseJeshoni, kute alwe nemabutfo emaLamani kanye nemabutfo emaZoramu; ngaleyondlela yacala imphi emkhatsini wemaLamani kanye nemaNefi, ngemnyaka welishumi nesiphohlongo wekubusa kwebehluleli; futsi lomlandvo wetimphi tabo utonikwa emvakwaloku.

14 Alima na-Amoni, kanye nabomnakabo, ngalokunjalo nemadvodzana lamabili a-Alima babuyela eveni laseZarahemla, emvakwekutsi babe tikhali etandleni taNkulunkulu kuletsa labaningi bemaZoramu ekuphendvukeni; ngebuningi balabo labaletfwa ekuphendvukeni bacoshwa baphuma eveni labo; kodvwa banemave langemafa abo eveni laseJeshoni, batsatse tikhali kutsi bativikele, bavikele nebafati babo, nebantfwana, kanye nemave abo.

15 Manje Alima, akhatsatekile ngenca yebubi bebantfu bakhe, yebo nangetimphi, nangekucitseka kwengati, kanye nangencabano lebeyisemkhatsini wabo; sekalimemetele livi, noma sekatfumele kutsi kumenyetelwe livi, emkhatsini wabo bonkhe bantfu emadolobheni onkhe; abona kutsi tinhlitiyo tebantfu tabese ticala kutsi tibe lukhuni, nekutsi bese bacala kutsi bacansuke ngenca yekucina kwelivi, inhlitiyo yakhe yaba buhlungu kakhulu.

16 Ngako-ke, wenta kutsi emadvodzana akhe agcogcelwe ndzawonye, kute awanike onkhe ngamunye umyaleto wakhe, ngekwehlukana, mayelana netintfo letiphatselene nekulunga. Futsi sinawo umlandvo ngemiyaleto yakhe, labaniketa yona ngekwembhalo wakhe.