Sehluko 51
Bantfu benkhosi bafuna kushintja umtsetfo baphindze babeke inkhosi—Phahorani kanye nebantfu benkhululeko basekelwa livi lebantfu—Moroni uphocelela bantfu benkhosi kutsi bavikele live labo noma babulawe—Amalikhiya kanye nemaLamani batfumba labaningi emadolobheni lacinisiwe—Thiyankham udvudvula kuhlaselwa ngemaLamani futsi ubulala Amalikhiya ethendeni lakhe. Cishe ngemnyaka wa 67 kuya kuwa 66 ngaphambi kwekutalwa kwaKhristu.
1 Futsi manje kwenteka kutsi ekucaleni kwemnyaka wemashumi lamabili nesihlanu wekubusa kwebehluleli kubantfu baNefi, sebamise kuthula emkhatsini webantfu baLehi kanye nebantfu baMoriyanthoni mayelana nemave abo, futsi sebacale umnyaka wemashumi lamabili nesihlanu ngekuthula;
2 Noko, abakugcinanga sikhatsi lesidze kuthula lokuphelele eveni, ngoba kwacala kwaba khona umbango emkhatsini webantfu mayelana nemehluleli lomkhulu Phahorani; ngoba buka, bekukhona incenye yebantfu labebanesifiso sekutsi tincenye letitsite letimbalwa temtsetfo kumele tiguculwe.
3 Kodvwa buka, Phahorani akatange afune noma avume kutsi umtsetfo uguculwe; ngako-ke akatange abalalele labo labebatfumele emavi abo neticelo mayelana nekuguculwa kwemtsetfo
4 Ngako-ke, labo labebanesifiso kutsi umtsetfo uguculwe bamtfukutselela, futsi bafisa kutsi angasabi ngumehluleli lomkhulu eveni; ngako-ke kwacubuka imphikiswano leshisako mayelana naloludzaba, kodvwa akubanga nekucitseka kwengati.
5 Futsi kwenteka kutsi labo labebanesifiso sekutsi Phahorani asuswe esihlalweni sekwehlulela bebabitwa ngekutsi bantfu benkhosi, ngoba bebafisa kutsi umtsetfo uguculwe ngendlela yekutsi baketule umbuso lokhululekile bese babeka inkhosi eveni.
6 Labo labebanesifiso sekutsi Phahorani ahlale angumehluleli lomkhulu eveni batsatsa libito lelitsi bantfu benkhululeko; ngaleyondlela kwaba nekuhlukana emkhatsini wabo, ngoba bantfu benkhululeko bebafungile noma bebente sivumelwano sekutsi bagcine emalungelo abo kanye nenzuzo yenkholo yabo ngembuso lokhululekile.
7 Futsi kwenteka kutsi loludzaba lwembango wabo lwacatululwa ngelivi lebantfu. Futsi kwenteka kutsi livi lebantfu lavumelana nebantfu benkhululeko, futsi Phahorani wasigcina sihlalo sekwehlulela, lokwaletsa injabulo lenkhulu emkhatsini wabomnakaboPhahorani kanye nakulabaningi bantfu labatsandza inkhululeko, labathulisa bantfu benkhosi, kangangoba abatange basalokotsa nakancane kuyiphikisa kodvwa baphoceleleka kutsi bayigcine indlela yenkhululeko.
8 Manje labo labebavumelana nemakhosi kwakungulabo labebatalelwe emndenini lohloniphekile, futsi bebafuna kuba ngemakhosi, bebasekelwa ngulabo labebafuna emandla kanye neligunya ngetulu kwebantfu.
9 Kodvwa bukani, lesi bekusikhatsi lesibucayi sekutsi kube khona imibango lenjena emkhatsini webantfu baNefi; ngoba buka, Amalikhiya besekaphindzile waphehla tinhlitiyo tebantfu bemaLamani ngalokumelene nebantfu bemaNefi, futsi besekagcogcela ndzawonye emasotja kuto tonkhe tincenye telive lakhe, awahlomisa, aphindze alungiselela imphi ngako konkhe kukhutsala; ngoba bekafungile kuyinatsa ingati yaMoroni.
10 Kodvwa bukani, sitawubona kutsi setsembiso sakhe lasenta bekakhakhamele; noko watilungiselela kanye nemabutfo akhe kutsi bete batawukulwa nemaNefi.
11 Manje emabutfo akhe abengasiwo maningi kakhulu njengoba abenjalo ngaphambilini, ngenca yetinkhulungwane letiningi letatibulewe ngetandla temaNefi; kodvwa nanoma kungekulahlekelwa kwabo lokukhulu, Amalikhiya bekagcogcele ndzawonye libutfo lelikhulu ngalokumangalisako, kangangoba akesabanga kwehlela entansi eveni laseZarahemla.
12 Yebo, ngisho na-Amalikhiya lucobo wehlela entansi, ahola emaLamani. Kwakusemnyakeni wemashumi lamabili nesihlanu wekubusa kwebehluleli; futsi kwakungiso kanye sikhatsi lapho besebacale kuticatulula tindzaba tabo temibango mayelana nemehluleli lomkhulu, Phahorani
13 Futsi kwenteka kutsi ngesikhatsi labantfu labebabitwa ngekutsi bantfu benkhosi sebavile kutsi emaLamani ayeta ehlela entansi kutawukulwa nabo, bajabula etinhlitiyweni tabo; futsi bala kutsatsa tikhali, ngoba bebamtfukutselele kakhulu umehluleli lomkhulu, ngalokunjalo nebantfu benkhululeko, kangangekutsi abafunanga kutsatsa tikhali kute bavikele live labo.
14 Futsi kwenteka kutsi ngesikhatsi Moroni akubona loku, ngetulu kwaloko abona kutsi emaLamani beseketa eminceleni yelive, watfukutsela kakhulu ngenca yenkhani yalabo bantfu labekadze asebente ngekukhutsala lokukhulu kubavikela; yebo, watfukutsela kakhulu; umphefumulo wakhe wagcwala intfukutselo ngenca yabo.
15 Futsi kwenteka kutsi watfumela sicelo, ngelivi lebantfu, kumphatsi welive, afisa kutsi asifundze, futsi amnike (Moroni) emandla ekuphocelela lawo mahlubuka kutsi avikele live lawo, noma-ke ababulale.
16 Ngoba bekungumsebenti wakhe wekucala kutsi acedze lemibango lenjena kanye nekuphikisana emkhatsini webantfu; ngoba buka, kute kube manje loku bekungiko lokwabangela konkhe kubhujiswa kwabo. Futsi kwenteka kutsi loku kwavunyelwa ngekwelivi lebantfu.
17 Futsi kwenteka kutsi Moroni wayaleta libutfo lakhe kutsi lihambe liyokulwa nalabo bantfu benkhosi, kutsi behlise kutikhukhumeta kanye nekuhlonipheka kwabo baphindze babalinganise nemhlabatsi, noma batsatse tikhali futsi basekele indlela yenkhululeko.
18 Futsi kwenteka kutsi emabutfo ahamba ayokulwa nabo; futsi bakwehlisa kutikhukhumeta kwabo kanye nekuhlonipheka kwabo, kangangekutsi ngesikhatsi baphakamisa tikhali tabo temphi kutsi balwe nebantfu baMoroni babulawa, balinganiswa nemhlabatsi.
19 Futsi kwenteka kutsi bekatinkhulungwane letine lawo mahlubuka labulawa ngenkemba; futsi labo baholi bawo labangabulawanga emphini batsatfwa baphonswa ejele, ngoba sasingekho sikhatsi sekutekwa kwemacala abo ngalesi sikhatsi.
20 Futsi insalela yalawo mahlubuka, kunekutsi ishaywe iwe phansi ngenkemba, yatinikela esibonakalisweni senkhululeko, yaphocelelwa kutsi isiphakamise sibonakaliso senkhululeko emibhoshongweni yayo, kanye nasemadolobheni ayo, iphindze itsatse tikhali ivikele live layo.
21 Ngaleyondlela Moroni wabacedza bantfu benkhosi, kangangekutsi kwasekute namunye lowatiwa ngalelibito lebantfu benkhosi; futsi ngaleyondlela wayicedza inkhani kanye nekukutikhukhumeta kwalabo bantfu labebatsi bengati lehloniphekile; kodvwa behliswa kutsi batitfobe njengabomnakabo, futsi balwele inkhululeko yabo ngesibindzi ebugcilini.
22 Buka, kwenteka kutsi ngesikhatsi Moroni asacedza timphi kanye nemibango emkhatsini webantfu bakhe lucobo, abafaka ngaphansi kwekuthula kanye nemphucuko, futsi enta imitsetfo yekulungiselela imphi nemaLamani, buka, emaLamani abesafikile eveni laMoroni, lelaliseminceleni ngaselugwini lwelwandle.
23 Futsi kwenteka kutsi emaNefi labekasedolobheni laMoroni bekete emandla ngalokwanele; ngako-ke Amalikhiya wawakhipha, abulala labaningi. Futsi kwenteka kutsi Amalikhiya walitsatsa lidolobha, yebo, watsatsa nato tonkhe tincaba tawo.
24 Futsi labo lababaleka baphuma edolobheni laMoroni baya edolobheni laNefiha; ngetulu kwaloko bantfu basedolobheni laLehi bagcogcana ndzawonye, benta emalungiselelo, futsi bebakulungele kutsi bamelane nemaLamani emphini.
25 Kodvwa kwenteka kutsi Amalikhiya akafunanga kuwavumela emaLamani kutsi ahambe aye edolobheni laNefiha kuyokulwa, kodvwa wawagcina entansi ngaselugwini lwelwandle, ashiya emadvodza kuwo onkhe emadolobha kutsi aligcine futsi alivikele.
26 Futsi wachubeka ngaleyondlela, atsatsa lamaningi emadolobha, lidolobha laNefiha, nelidolobha laLehi, nelidolobha laMoriyanthoni, nelidolobha la-Omneri, nelidolobha laGidi, kanye nelidolobha laMulekhi, onkhe labekaseminceleni emphumalanga ngaselugwini lwelwandle.
27 Futsi emaLamani awatfola ngaleyondlela, ngebucili ba-Amalikhiya, emadolobha lamaningi kangaka, ngemabutfo awo langabaleki, onkhe labeciniswe kakhulu ngendlela yetincaba taMoroni; tonkhe letatinika emaLamani tincaba leticinile.
28 Futsi kwenteka kutsi ahamba aya eminceleni yelive iNala, achuba emaNefi labekaphambi kwawo futsi abulala lamaningi.
29 Kodvwa kwenteka kutsi ahlangana naThiyankham lobekabulele Moriyanthoni futsi wavimbela bantfu bakhe ekubalekeni kwakhe.
30 Futsi kwenteka kutsi wamvimba na-Amalikhiya, asahamba nelibutfo lakhe lelikhulu kute atsatse live iNala, futsi ngalokunjalo nelive lelingasenyakatfo.
31 Kodvwa bukani wahlangabetana nekudvumala ngekudvudvulwa nguThiyankham nebantfu bakhe, ngoba bebangemachawe lamakhulu; ngoba yonkhe indvodza yaThiyankham yayiwendlula emaLamani ngemandla abo kanye nangebuciko bekulwa, kangangekutsi bawehlula emaLamani.
32 Futsi kwenteka kutsi bawahlukubeta, kangangekutsi bawabulala kwate kwaba mnyama. Futsi kwenteka kutsi Thiyankham nemadvodza akhe bamisa emathende abo eminceleni yelive iNala; na-Amalikhiya wamisa emathende akhe eminceleni elusebeni ngaselugwini lwelwandle, futsi abalekiswa ngalendlela.
33 Futsi kwenteka kutsi ngesikhatsi sebufikile busuku, Thiyankham kanye nenceku yakhe banyenya bahamba ebusuku, baya enkanjini ya-Amalikhiya; futsi bukani, butfongo babubengamile ngenca yekukhatsala kwabo lokukhulu, lokwakubangwe yimisebenti kanye nekushisa kwelusuku.
34 Futsi kwenteka kutsi Thiyankham wanyenya ngansense wangena ethendeni lenkhosi, wayihlaba ngentjumentju enhlitiyweni yayo; wakubangela kufa kwenkhosi ngekuphatima kweliso kute angativusi tinceku tayo.
35 Futsi waphindze wabuyela futsi ngansense enkanjini yakhe, bukani, emadvodza akhe bekalele, wawavusa wawatjela tonkhe tintfo labetentile.
36 Futsi wenta kutsi emabutfo akhe atilungiselele, hleze emaLamani besekavukile futsi besekatawuta kubo.
37 Waphela ngaleyondlela-ke umnyaka wemashumi lamabili nesihlanu wekubusa kwebehluleli kubantfu baNefi; futsi taphela kanjalo tinsuku ta-Amalikhiya.