1 Futsi kwenteka kutsi bema baphindze bahlehla bema bucadlwana nawo. Moroni watsi kuZerahemna: Buka, Zerahemna, asifuni kutsi sibe bantfu bengati. Niyati kutsi nisetandleni tetfu, kepha asifuni kutsi sinibulale.

2 Buka, asikaphumeli kutsi sitolwa nani kute sicitse ingati yenu kute sizuze emandla; noma asifuni kuletsa noma ngubani ejokeni lebugcili. Kodvwa lesi ngusona sizatfu nine lenite ngaso kutolwa natsi, yebo, futsi nisitfukutselele ngenca yenkholo yetfu.

3 Kodvwa manje, niyabona kutsi iNkhosi inatsi; futsi niyabona kutsi iniletsile etandleni tetfu. Manje ngifuna kutsi nicondze kutsi loku sikwentelwe ngenca yenkholo yetfu kanye nelukholo lwetfu kuKhristu. Manje niyabona kutsi aninokwati kulucedza lolu lukholo lwetfu.

4 Manje seniyabona kutsi lolu lukholo lweliciniso lwaNkulunkulu; yebo. Niyabona kutsi Nkulunkulu utawusisekela, asigcine, aphindze asilondvolote, uma nje setsembeka kuye, naselukholweni lwetfu, kanye nasenkholweni yetfu, futsi angeke nanini iNkhosi ivumele kutsi sibhujiswe ngaphandle kwekutsi siwele esiphambukweni futsi siluphike lukholo lwetfu.

5 Manje, Zerahemna, ngiyakuyaleta, egameni laloyo Nkulunkulu lonemandla onkhe, locinise imikhono yetfu kute sitfole emandla ngetulu kwenu, ngelukholo lwetfu, ngenkholo yetfu, kanye nangetimiso tetfu tekukhonta, kanye nangelibandla letfu, kanye nangekusekelwa lokungcwele lokufanele sibonge bafati betfu kanye nebantfwana betfu ngako, ngaleyo nkhululeko lesenta sibambelele emihlabeni yetfu kanye naseveni letfu; yebo, futsi kanjalo nangekugcinwa kwelivi lelingcwele laNkulunkulu, lokufanele silibonge ngayo yonkhe injabulo yetfu; nangako konkhe lokutsandzeka kakhulu kitsi—

6 Yebo, akusiko loku kuphela; ngiyaniyaleta ngato tonkhe tifiso leninato kute niphile, kutsi niletse lapha tikhali tenu temphi, futsi angeke sifune ingati yenu, kodvwa sitawutisindzisa timphilo tenu, uma nje ningahamba ningaphindzi nibuye kutolwa natsi.

7 Manje, uma ningakwenti loku, bukani, nisetandleni tetfu, futsi ngitawuyaleta bantfu bami kutsi banihlasele, banishaye ngemanceba ekufa emitimbeni yenu, kute ningasabi khona; futsi ngaleyondela sitawubona kutsi ngubani lotoba nemandla ngetulu kwalaba bantfu; yebo, sitawubona kutsi ngubani lotawuletfwa ebugcilini.

8 Manje kwenteka kutsi ngesikhatsi Zerahemna asayivile lenkhulumo weta ngaphambili wabeka inkemba yakhe kanye nacelemba wakhe, kanye nebutjoki bakhe etandleni taMoroni, watsi kuye: Buka nati tikhali tetfu temphi; sitawutiletsa kuwe, kodvwa angeke sivume kwenta sifungo kuwe sibe sati, kutsi sitosiphula, futsi ngalokunjalo nebantfwana betfu; kodvwa titsatse tikhali tetfu temphi, bese uyasivumela kutsi sihambe siye ehlane; kungenjalo sitawutigcina tinkemba tetfu, futsi sitawufa noma sincobe.

9 Buka, tsine asisibo belukholo lwenu, asikholwa kutsi nguNkulunkulu lona losiletse etandleni tenu; kodvwa kutsi bucili benu lobunivikele etinkembeni tetfu. Buka, tivikelo tesifuba kanye netihlangu tenu letinivikele.

10 Manje ngesikhatsi Zerahemna asacedzile kukhuluma lamavi, Moroni wabuyisela inkemba kanye netikhali temphi, lebekatemukele, kuZerahemna, watsi: Buka, sitawuyicedza lencabano.

11 Manje angisakwati kuwabuyisela emuva emavi lengiwakhulumile, njengoba iNkhosi iphila, aninawusuka ngaphandle kwekutsi nisuke nesifungo sekutsi angeke nisaphindze nibuye kutolwa natsi. Manje njengoba nisetandleni tetfu sitawuyicitsa ingati yenu igcwale phansi, noma nivumele lemibandzela lengiyiphakamisile.

12 Manje ngesikhatsi Moroni asawashito lamavi, Zerahemna watsatsa inkemba yakhe, wamtfukutselela Moroni, wagijima waya ngaphambili kute abulale Moroni; kodvwa ngesikhatsi aphakamisa inkemba yakhe, buka, linye lemasotja aMoroni wayishaya yawa, futsi yaphuka ngakuso sibambo, futsi ngetulu kwaloko lamshaya Zarahemna ngendlela yekutsi lasusa lukhakhayi lwakhe lwawela phansi. Futsi Zerahemna wesuka kubo wangena emkhatsini wemabutfo akhe.

13 Futsi kwenteka kutsi lisotja lelalime edvute, lelo lelashaya lasusa lukhakhayi lwaZerahemna, lalutsatsa lukhakhayi lolo lwaluphansi ngetinwele, lalubeka ekucijeni kwenkemba, futsi laluphakamisa ngetulu kwabo, litsi kubo ngelivi lelikhulu:

14 Njengoba lolu lukhakhayi luwele phansi, lokulukhakhayi lwemholi wenu, nani ngalokunjalo nitowela phansi ngaphandle kwekutsi niletse tikhali tenu temphi bese niyahamba nesivumelwano sekuthula.

15 Manje bekamaningi, ngesikhatsi eva lamavi futsi alubona lukhakhayi lolwalusenkembeni, angenwa kwesaba; lamaningi eta ngaphambili atilahla phansi tikhali tawo temphi etinyaweni taMoroni, futsi angena esivumelwaneni sekuthula. Futsi ngebuningi balawo langena esivumelwaneni avunyelwa kutsi ahambe aye ehlane.

16 Manje kwenteka kutsi Zerahemna watfukutsela kakhulu, futsi wawaphehla lasele emasotja akhe kutsi atfukutsele, kutsi alwe ngemandla lamakhulu nemaNefi.

17 Manje naMoroni watfuketsela, ngenca yenkhani yemaLamani; ngako-ke wayaleta bantfu bakhe kutsi bawahlasele phindze bawabulale. Futsi kwenteka kutsi bacala bawabulala; yebo, nemaLamani alwa ngetinkemba tawo nangemandla awo.

18 Kodvwa buka, tikhumba tawo letingcunu kanye netinhloko tawo letisebaleni kwakusebungotini betimkemba letikhaliphako temaNefi; yebo, buka ahlatjwa aphindze ashaywa, yebo, awa ngekushesha lokukhulu phambi kwetinkemba temaNefi; futsi acala esuswa, njengoba lisotja laMoroni laliphrofethile.

19 Manje Zerahemna, ngesikhatsi abona kutsi cishe bonkhe bese batobulawa, wakhala kakhulu kuMoroni, atsembisa kutsi bekatosenta sivumelwano nabo futsi ngalokunjalo nebantfu bakhe, uma nje bangasindzisa timphilo talabebasele, nekutsi bebangeke basaphindza nanini bete kutolwa nabo.

20 Futsi kwenteka kutsi Moroni wenta kutsi lesento sekubulala asiphele futsi emkhatsini walabantfu. Watitsatsa tikhali temphi kumaLamani; futsi emvakwekutsi sebangene esivumelwaneni sekuthula naye avunyelwa kutsi ahambe aye ehlane.

21 Manje sibalo salabafile babo alibalwanga ngenca yebukhulu baleso sibalo; yebo, sibalo salabafile babo sasisikhulu kakhulu, kumaNefi kanye nakumaLamani.

22 Futsi kwenteka kutsi babaphonsa labafile babo emantini aseSidoni, futsi tidvumbu tabo setikhukhulekile taze tayongcwatjwa ekujuleni kwelwandle.

23 Futsi emabutfo emaNefi, noma aMoroni, abuyela emakhaya kanye nasemihlabeni yawo.

24 Waphela kanjalo-ke umnyaka welishumi nesiphohlongo wekubusa kwebehluleli ngetulu kwebantfu baNefi. Futsi waphela kanjalo-ke umbhalo wa-Alima, lowawubhalwe kubongcwengcwe baNefi.