1 Manje Alima, abona kutsi emavi a-Amulekhi besekamthulisile Zeziromu, ngoba wabona kutsi Amulekhi besekambambile emangeni kanye nasekukhohliseni kwakhe kute ambulale, futsi abona kutsi besekacala kuchachatela ngesazela sakhe sekuba nelicala, wavula umlomo wakhe wacala kukhuluma kuye, kanye nekugcizelela emavi a-Amulekhi, nekuchaza tintfo ngetulu, noma kwembula imibhalo lengcwele ngetulu kwaloko Amulekhi bekakwentile.

2 Manje emavi Alima lawakhuluma kuZeziromu aviwa bantfu etindzaweni tonkhe; ngoba sicuku besisikhulu, futsi wakhuluma ngalendlela:

3 Manje Zeziromu, ngoba sewubonile kutsi sewubanjiwe emangeni kanye nasebucilini bakho, ngoba awukacambi emanga kubantfu kuphela kodvwa uwacambe nakuNkulunkulu; ngoba buka, uyayati yonkhe imicabango yakho, futsi nawe uyabona kutsi imicabango yakho yatisiwe kitsi ngaMoya wakhe;

4 Futsi uyabona kutsi siyati kutsi lisu lakho bekulisu lebucili lobukhulu, njengebucili badeveli, kucamba emanga kanye nekukhohlisa laba bantfu kute ubente balwe natsi, kutsi basitfuke futsi basikhiphele ngaphandle.

5 Manje leli bekulisu lesitsa sakho, futsi sisebentise emandla aso kuwe. Manje ngifuna kutsi ukhumbule kutsi lengikusho kuwe ngikusho kubo bonkhe.

6 Futsi bukani ngitsi kini nonkhe lolu bekulugibe lwesitsa, lesilubekele kutsi lubambe labantfu, kute siniletse ngaphansi kwaso, kute sinitungelete ngetinketane taso, kute sinibophele phansi ekubhujisweni kwaphakadze, ngekwemandla ekutfumba kwaso.

7 Manje ngesikhatsi Alima sekawakhulumile lamavi, Zeziromu wacala kuchachatela kakhulu, ngoba wakholwa kakhulu ngemandla aNkulunkulu; ngetulu kwaloko wakholwa kutsi Alima na-Amulekhi bebanelwati ngaye, ngoba wakholwa kutsi bebayati imicabango kanye netinjongo tenhlitiyo yakhe; ngoba bebanikiwe emandla ekutsi batati leti tintfo ngekwemoya wesiphrofetho.

8 Futsi Zeziromu wacala kubuta kubo aphindzelela, kute ati kabanti mayelana nembuso waNkulunkulu. Futsi watsi ku-Alima: Kuchaza kutsini loku Amulekhi lakukhulumile mayelana nekuvuka kwalabafile, kutsi bonkhe bayawuvuka ekufeni, labalungile kanye nalabangakalungi, baletfwe kute beme phambi kwaNkulunkulu kutsi behlulelwe ngekwemisebenti yabo?

9 Manje Alima wacala kumcacisela leti tintfo, atsi kuniketiwe kulabaningi kutsi batati timfihlakalo taNkulunkulu; noko babekwe ngaphansi kwemtsetfo locinile wekutsi bangalindlulisi kuphela ngekwencenye yelivi lakhe lalinikete bantfwana bebantfu, ngekulalela kanye nekukhutsala labamnika kona.

10 Ngako-ke, loyo lotawukwenta lukhuni inhlitiyo yakhe, nguye kanye loyo lotfola incenye lencane yelivi; futsi loyo longeke ente lukhuni inhlitiyo yakhe, kuye kunikwa incenye lenkhulu yelivi, ate anikwe kutsi ati timfihlakalo taNkulunkulu ate atati ngalokugcwele.

11 Futsi labo labatawutenta lukhuni tinhlitiyo tabo, baniketwa incenye lencane yelivi bate bangabe basati lutfo mayelana netimfihlakalo takhe; futsi emvakwaloko batfunjwa ngudeveli, abahole ngekwentsandvo yakhe; abayise phansi ekubhujisweni. Manje nguloku lokuchazwa tinketane tesihogo.

12 Futsi Amulekhi ukhulume ngalokusobala mayelana nekufa, kanye nekuvuswa kuloku kubhubha kuya esimeni sekungabhubhi, kanye nekuletfwa ngaphambi kwesihlalo saNkulunkulu, kute sehlulelwe ngekwemisebenti yetfu.

13 Kuleso simo uma tinhlitiyo tetfu betilukhuni, yebo, uma sitente taba lukhuni tinhlitiyo ngalokumelene nelivi, kangangekutsi alitfolakalanga kitsi, uma kunjalo simo setfu sitawuba sibi kakhulu, ngoba uma kunjalo siyawubekwa licala.

14 Ngoba emavi etfu atawusibeka licala, yebo, yonkhe imisebenti yetfu itawusibeka licala; angeke sitfolakale site licala; futsi imicabango yetfu nayo itawusibeka licala; futsi kulesi simo lesibi kangaka ngeke silinge nakancane simbuke Nkulunkulu wetfu; futsi singakujabulela sikutfokotele uma besingayaleta emadvwala kanye netintsaba kutsi tiwele etikwetfu kute tisifihle phambi kwakhe.

15 Kodvwa loku akunakwenteka; kufanele siphumele ebaleni futsi sime phambi kwakhe enkhatimulweni yakhe, nasemandleni akhe, nakubo bukhulu bemandla akhe, nebukhosi, kanye nebukhulu bakhe, futsi sivume ngekutenyeta kwetfu kwaphakadze kutsi tonkhe tehlulelo takhe tilungile; nekutsi ulungile kuyo yonkhe imisebenti yakhe, nekutsi unebubele kubo bantfwana bebantfu, futsi nekutsi unawo onkhe emandla ekusindzisa wonkhe muntfu lokholwa egameni lakhe futsi aletse titselo tekuphendvuka.

16 Manje bukani, ngitsi kini ngaleso sikhatsi kuta kufa, kufa kwesibili, lokukufa kwakamoya; kuyakuba nguleso sikhatsi lapho noma ngubani lofela etonweni takhe, ngekufa kwesikhashana, uyawukufa kufa kwakamoya; yebo, uyawukufa etintfweni letiphatselene nekulunga.

17 Nguleso sikhatsi lapho tinhlupheko tabo tiyawuba njenge lichibi lemlilo kanye nesibabuli, emalangabi alo akhuphukela ngetulu phakadze naphakadze; futsi nguleso sikhatsi lapho bayawuboshelwa phansi ekubhujisweni kwaphakadze, ngekwemandla kanye nebucili baSathane, ababeke phansi kwakhe ngekwentsandvo yakhe.

18 Ngako-ke, ngitsi kini, kubo kuyawuba shengatsi akutange kube khona kuhlengwa lokwentiwe; ngoba abanakuhlengwa ngekuhambisana nekulunga kwaNkulunkulu; futsi abatukufa, ngenca yekutsi kuyawube kungasekho konakala.

19 Manje kwenteka kutsi ngesikhatsi Alima sekacedzile kukhuluma lamavi, bantfu bacala kumangala kakhulu.

20 Kodvwa bekukhona munye lobekabitwa ngekutsi ngu-Anthiyona, lobekangumbusi lomkhulu emkhatsini wabo, weta ngaphambili watsi kuye: Yini lena loyishito, kutsi umuntfu uyawuvuka ekufeni futsi aguculwe kulesimo sekubhubha abe sesimeni sekungabhubhi, nekutsi umphefumulo ngeke usaphindze ubhubhe na?

21 Ucondze kutsini umbhalo longcwele, lona lotsi Nkulunkulu wabeka ikherubhi kanye nenkemba levutsako emphumalanga yensimu yase-Edeni, hleze batali betfu bekucala bangene futsi badle sitselo sesihlahla sekuphila, bese baphila ingunaphakadze na? Futsi ngaleyondlela siyabona kutsi belingekho litfuba lekutsi baphile ingunaphakadze.

22 Manje Alima watsi kuye: Lena yintfo lebesengitoyichaza. Manje siyabona kutsi Adamu ngempela wawa ngekudla sitselo lebesingakavunyelwa, ngekwelivi laNkulunkulu; futsi ngaleyondlela siyabona, kutsi ngekuwa kwakhe, lonkhe luntfu lwaba bantfu labalahlekile kanye nalabawile.

23 Manje bukani, ngitsi kini uma bekungenteka kutsi Adamu adle sitselo sesihlahla sekuphila ngaleso sikhatsi, bekungeke kube khona kufa, futsi livi beliyawuba lite, lente Nkulunkulu umkhohlisi, ngoba watsi: Uma usidla uyawukufa nekufa.

24 Futsi siyabona kutsi kufa kuta etikweluntfu, yebo, kufa loko lakhulume ngako Amulekhi, lokukufa kwesikhashana; noko kwaba khona sikhatsi lesanikwa umuntfu kutsi ngaso aphendvuke; ngako-ke lemphilo yase iba yesimo sekulingwa; sikhatsi sekulungiselela kuhlangana naNkulunkulu; sikhatsi sekulungiselela leso simo lesingapheli lesikhulume ngaso, lesingemuva kwekuvuka kwalabafile.

25 Manje, kube bekungasiko kutsi bekungelisu lekuhlengwa, lebelentiwe kusukela esisekelweni semhlaba, bekungeke kube khona kuvuka kulabafile; kodvwa kwaba khona lisu lekuhlengwa lelentiwa, leliyawuletsa kuvuka kwalabafile, loko lesekukhulunywe ngako.

26 Manje bukani, uma bekungenteka kutsi batali betfu bekucala bebangahamba futsi bayawudla esihlahleni sekuphila bebayawuba lusizi ingunaphakadze, bangenasimo sekutilungiselela; futsi ngaleyondlela lisu lekuhlengwa beliyawube selivimbelekile, futsi livi laNkulunkulu beliyawuba lite, lingasafezekanga.

27 Kodvwa bukani, akubanga njalo; kodvwa bantfu bamiselwa kutsi kufanele bafe; emvakwekufa, kufanele bete ekwehlulelweni, loko kwehlulelwa lesikhulume ngako, lokukwekugcina.

28 Emvakwekutsi Nkulunkulu sekatimisile kutsi leti tintfo kufanele tenteke kumuntfu, bukani, emvakwaloko wabona kutsi bekudzingekile kutsi umuntfu ati mayelana netintfo labekababekele tona;

29 Ngako-ke watfumela tingilosi kutsi tikhulume nabo, tibente bantfu kutsi babone inkhatimulo yakhe.

30 Bacala kusukela ngaleso sikhatsi kuya phambili kubita libito lakhe; ngako-ke Nkulunkulu wakhuluma nebantfu, wenta kutsi bati ngelisu lekuhlengwa, lebelilungiswe kusukela esisekelweni semhlaba, futsi loku wabatisa ngekwelukholo lwabo kanye nekuphendvuka kanye nangekwemisebenti yabo lengcwele.

31 Ngaloko-ke, waniketa imiyaleto kubantfu, bona sebayiphulile imiyaleto yekucala ngekwetintfo tesikhashana, futsi sebanjengabonkulunkulu, bati lokuhle nalokubi, batibeke esimeni sekwenta, noma babekwe esimeni sekwenta ngekwetifiso kanye nangekutsandza kwabo, noma kwenta lokubi noma kwenta lokuhle—

32 Ngako-ke Nkulunkulu wabanika imiyaleto, emvakwekutsi asalatisile kubo lisu lekuhlengwa kutsi bangakwenti lokubi, sijeziso saloko kufa kwesibili, lobekukufa kwaphakadze ngekwetintfo letiphatselene nekulunga; ngoba kulabo lisu lekuhlengwa, kutsi bangakwenti lokubi, sijeziso saloko kufa kwesibili, lobekukufa kwaphakadze ngoba imisebenti yekulunga beyingeke ibhujiswe, ngenca yebuhle lobukhulu kakhulu baNkulunkulu.

33 Kodvwa Nkulunkulu wababita bantfu, egameni leNdvodzana yakhe, (loku kulisu lekuhlengwa lebelicanjiwe) atsi: Uma nitawuphendvuka, futsi ningatenti lukhuni tinhlitiyo tenu, uma kunjalo ngiyawuba nemusa kini, ngayo iNdvodzana yami leTelwe Yodvwa.

34 Ngako-ke, loyo lophendvukako, futsi angayenti lukhuni inhlitiyo yakhe, uyawuba nesabelo kuwo umusa ngeNdvodzana yami leTelwe Yodvwa, kute atsetselelwe tono takhe; futsi laba bayawungena ekuphumuleni kwami.

35 Futsi loyo lotawuyenta lukhuni inhlitiyo yakhe futsi ente bubi, bukani, ngiyafunga ngisentfukutselweni yami kutsi akayukungena ekuphumuleni kwami.

36 Manje, bomnaketfu, bukani ngitsi kini, uma nitawutenta lukhuni tinhlitiyo tenu aniyukungena ekuphumuleni kwenkhosi; ngako-ke bubi benu bumbangela lulaka kangangekutsi wehlisela lulaka lwakhe etikwenu njengekuhlubuka kwekucala, yebo, ngekwelivi lakhe ngesikhatsi sekuhlubuka kwekugcina njengaloko kwekucala, kute kubhujiswe imiphefumulo yenu ingunaphakadze; ngako-ke, ngekwelivi lakhe, ngalokwanele kutsi ife kwekugcina, ngalokunjalo nangekwekucala.

37 Manje, bomnaketfu, ngekubona kutsi siyatati letintfo, futsi tiliciniso, asiphendvukeni, futsi singatenti lukhuni tinhlitiyo tetfu, kute singayibangeli iNkhosi Nkulunkulu wetfu kutsi yehlisele lulaka lwayo etikwetfu kulemiyaleto yayo yesibili lesinike yona; kodvwa asingeneni ekuphumuleni kwaNkulunkulu, lokulungisiwe ngekwelivi lakhe.