1 Futsi kwenteka kutsi bahamba, bacala kushumayela livi laNkulunkulu kubantfu, bangena emasinagogeni abo, kanye nasetindlini tabo; yebo, balishumayela livi ngisho nasemigwacweni yabo.

2 Futsi kwenteka kutsi emvakwekusebenta kamatima emkhatsini wabo, bacala baba nemphumelelo emkhatsini wesigaba sebantfu labamphofu; ngoba buka, bebakhishelwa ngaphandle kwemasinagoge ngenca yekuguga kwetingubo tabo—

3 Ngako-ke bebangakavumeleki kutsi bangene emasinagogeni abo kute bakhonte Nkulunkulu, batsatfwa ngekutsi bangcolile; ngako-ke bebamphofu; yebo, bebatsatfwa bomnakabo ngekutsi batintfo letingasilutfo; ngako-ke bebamphofu ngekwetintfo telive; ngetulu kwaloko bebamphofu etinhlitiyweni.

4 Manje, ngesikhatsi Alima afundzisa futsi akhuluma kubantfu etikweligcuma I-Onayida, kwefika sicuku lesikhulu kuye lokwakungibo labo lebesikhuluma ngabo, labebamphofu etinhlitiyweni, ngenca yebumphofu babo ngekwetintfo telive.

5 Beta ku-Alima; futsi loyo lobekaphambili kubo watsi kuye: Buka, yini labangayenta labomnaketfu, ngoba badzelelwa bantfu bonkhe ngenca yebumphofu babo, yebo, futsi ikakhulukati baphristi betfu; ngoba basikhiphele ngaphandle kumasinagoge etfu lesasebenta matima kuwakha ngetandla tetfu lucobo; basikhiphele ngephandle ngenca yebumphofu betfu lobukhulu; futsi asinandzawo yekukhontela Nkulunkulu wetfu; buka, kufanele sentenjani na?

6 Manje ngesikhatsi Alima akuva loku, wamgucula, buso bakhe ngekushesha babuka kuye ngco, futsi wambuka ngenjabulo lenkhulu; ngoba wabona kutsi tinhlupheko tabo tasetibente kutsi batitfobe ngempela, nekutsi bese balungele kuliva livi.

7 Ngako-ke akatange asasho lutfo kulesinye sicuku, kodvwa welulela phambili sandla sakhe, wakhala kulabo labekababona, labebadzabuke ngekweliciniso ngekona, watsi kubo:

8 Ngiyabona kutsi nitfobile ngenhlitiyo; futsi uma kunjalo, nibusisiwe.

9 Bukani umnakenu utsite, Kufanele sentenjani na?—ngoba sikhishelwe ngaphandle kwemasinagoge etfu, kute singakwati kukhonta Nkulunkulu wetfu.

10 Bukani ngitsi kini, nicabanga kutsi aninakumkhonta Nkulunkulu ngaphandle kwekutsi kube semasinagogeni enu kuphela na?

11 Futsi ngetulu kwaloko, ngitawunibuta kutsi, nicabanga kutsi akukafaneli nikhonte Nkulunkulu kuphela kanye ngelisontfo na?

12 Ngitsi kini, kuhle kutsi nikhishelwe ngaphandle kwemasinagoge enu, kute nititfobe, futsi kute nifundze kuhlakanipha; ngoba kudzingekile kutsi nifundze kuhlakanipha; ngoba kungenca yekutsi nikhishelwe ngaphandle, nekutsi nidzelelwe bomnakenu ngenca yebumphofu benu lobukhulu, kutsi niholelwe ekutseni nitfobeke ngetinhlitiyo; ngoba ngenca yesimo niholelwe ekutseni nititfobe.

13 Manje, ngenca yekutsi niphocelelekile kutsi nititfobe nibusisiwe; ngoba umuntfu ngalesinye sikhatsi, uma aphocelelekile kutsi atitfobe, uyaye afune kuphendvuka; manje ngalokucinisekile, loyo lophendvukako uyawutfola umusa; futsi loyo lotfola umusa abeketele kute kube sekugcineni nguye loyo loyawusindziswa.

14 Manje, njengoba ngishito kini, kutsi ngenca yekutsi niphocelelekile kutsi nititfobe nibusisiwe, ngabe anicabangi yini kutsi babusisiwe kakhulu labo labatitfoba ngeliciniso ngenca yelivi na?

15 Yebo, loyo lotitfoba ngeliciniso, aphendvuke etonweni takhe, abeketele kute kube sekugcineni, nguye loyo loyawubusiswa—yebo, ubusiswe kakhulu kunalabo labaphocelelekile kutsi batitfobe ngenca yebumphofu babo lobukhulu.

16 Ngako-ke, babusisiwe labo labatitfobako ngaphandle kwekuphocelelwa kutsi batfobe; noma-ke, ngalokungiko, ngalamanye emagama, ubusisiwe loyo lokholelwa evini laNkulunkulu, abhajatiswe ngaphandle kwekuba nenhlitiyo lelukhuni, yebo, ngaphandle kwekuholeleka ekutseni alati livi, noma baphoceleleke kutsi bati, ngaphambi kwekutsi bakholwe.

17 Yebo, baningi labatsi: Uma ungasikhombisa sibonakaliso lesivela ezulwini, ngaloko siyawukwati ngeliciniso; ngaloko siyawukholwa.

18 Manje ngiyabuta, ngabe loku lukholo na? Bukani, ngitsi kini, Cha; ngoba uma umuntfu ayati intfo akanasidzingo sekukholwa, ngoba uyayati.

19 Manje, ucalekiswe kanganani loyo loyatiko intsandvo yaNkulunkulu kodvwa angayenti, kunaloyo lokholwako kuphela, noma kuphela abe nesizatfu sekukholwa, bese uwela esiphambukweni?

20 Manje kufanele nehlulele mayelana nalentfo. Bukani, ngitsi kini, kunjalo kulesinye simo njengoba kunjalo nakulesinye; futsi kuyawuba njalo kuwo wonkhe umuntfu ngekwemsebenti wakhe.

21 Manje njengoba ngishito mayelana nelukholo—lukholo akusiko kutsi ube nelwati loluphelele lwetintfo; ngako-ke uma unelukholo unelitsemba letintfo letingabonakali, letiliciniso.

22 Manje, bukani, ngitsi kini, ngifuna kutsi nikhumbule, kutsi Nkulunkulu unemusa kubo bonkhe labo labakholwa egameni lakhe; ngako-ke unesifiso, kwekucala nje, sekutsi nikholwe, yebo, ngisho nakulo livi lakhe.

23 Manje, wembula livi lakhe ngetingilosi kubantfu, yebo, hhayi kuphela kubesilisa kodvwa nakubesifazane ngalokunjalo. Manje loku akusiko konkhe; bantfwana labancane banawo emavi lanikwe bona tikhatsi letiningi, atfobisa labahlakaniphile kanye nalabafundzile.

24 Manje, bomnaketfu labatsandzekako, njengoba ninesifiso sekwati kimi kutsi kufanele nentenjani ngoba niyahlushwa futsi nikhishelwa ngaphandle—manje angifuni kutsi nicabange kutsi ngicondze kunehlulela kuphela ngaloko lokuliciniso—

25 Ngoba angikacondzi kutsi nonkhe niphocelelekile kutsi nititfobe; ngoba ngempela ngiyakholwa kutsi kukhona labanye emkhatsini wenu labangatitfoba, noma ngabe bangaba kusiphi simo.

26 Manje, njengoba ngishito mayelana nelukholo—kutsi bekungasilo lwati loluphelele—kanjalo nangemavi ami. Angeke nikwati ngekweliciniso kwawo kwekucala, ngalokuphelele, njengoba nelukholo kungasilo lwati loluphelele.

27 Kodvwa bukani, uma ningavuka futsi nivusetele lwati lwenu, nekuwalinga emavi ami, futsi nisebentise inshwanyana lencane yelukholo, yebo, ngisho noma ungeke wente ngetulu kwekutsi ube nesifiso nje kuphela sekukhohlwa, yenta lesifiso sisebente kuwe, ute ukholwe ngendlela longaniketa ngayo indzawo yencenye nje yemavi ami.

28 Manje, sitawucatsanisa livi nenhlanyelo. Manje, uma niniketa indzawo, kutsi inhlanyelo ihlanyelwe etinhlitiyweni tenu, buka, uma kuyinhlanyelo yeliciniso, noma kuyinhlanyelo lenhle, uma ningayilahli ngaphandle ngekungakholwa kwenu, kute nale Moya weNkhosi, buka, iyocala ikhukhumuke ngekhatsi kwetifuba tenu; futsi uma seniyiva lemizwa yekukhukhumuka, niyawucala nitsi ngekhatsi kwenu—Kufanele kutsi lena yinhlanyelo lenhle, noma kutsi lelivi lihle, ngoba selicala kuwukhulisa umphefumulo wami; yebo, selicala kukhanyisa kucondza kwami, yebo, selicala kutsi libe mnandzi kimi.

29 Manje buka, ngabe loku angeke yini kulikhulise lukholo lwenu na? Ngitsi kini, Yebo; noma kunjalo alukakhuli kutsi lube lwati loluphelele.

30 Kodvwa bukani, ngesikhatsi inhlanyelo seyikhukhumuka, seyichuma, futsi seyicala kukhula, uma kunjalo kufanele nitsi lenhlanyelo yinhle; ngoba buka seyiyakhukhumuka, seyiyachuma, futsi seyicala kukhula. Manje, bukani, ngabe loku akutulicinisa yini lukholo lwenu na? Yebo, kutawulicinisa lukholo lwenu: ngoba nitawutsi ngiyati kutsi lena yinhlanyelo lenhle; ngoba buka iyachuma futsi seyicala kukhula.

31 Manje, bukani, ngabe ninaso yini siciniseko sekutsi lena yinhlanyelo lenhle na? Ngitsi kini, Yebo; ngoba yonkhe inhlanyelo ikhipha loko lokufana nayo.

32 Ngako-ke, uma inhlanyelo ikhula yinhle, kodvwa uma ingakhuli, buka ayiyinhle, ngako-ke ilahlwa ngaphandle.

33 Manje, bukani, ngoba senitamile kulinga, futsi nayihlanyela inhlanyelo, seyiyakhukhumuka seyiyachuma, futsi seyicala kukhula, kufanele nati kutsi lenhlanyelo yinhle.

34 Manje, bukani, ngabe lwati lwenu seluphelele na? Yebo, lwati lwenu seluphelele kuleyontfo, futsi lukholo lwenu luselele; loku ngenca yekutsi niyati, ngoba niyati kutsi livi liyikhukhumukisile imiphefumulo yenu, futsi ngetulu kwaloko niyati kutsi lichumile, nekutsi kucondza kwenu kucala kukhanya, futsi nengcondco yenu seyicala kuvuleka.

35 Awu uma, kunjalo-ke, ngabe loku akusilo yini liciniso na? Ngitsi kini, Yebo, ngoba kukukhanya; futsi noma ngabe yini lekukhanya, yinhle, ngenca yekutsi iyabonakala, ngako-ke kufanele nati kutsi yinhle; manje bukani, emvakwekutsi senikuvile loku kukhanya ngabe lwati lwenu seluphelele na?

36 Bukani ngitsi kini; futsi akukafaneli nilubeke eceleni lukholo lwenu, ngoba nisebentise lukholo lwenu kuphela kuhlanyela lenhlanyelo kute netame kulinga kute nati kutsi lenhlanyelo yinhle yini.

37 Futsi bukani, ngesikhatsi sihlahla sesicala sikhula, nitawutsi: asisondle ngekusinakekela lokukhulu, kute sitfole imphandze, kute sikhule siye etulu, futsi sisitselele titselo. Manje bukani, uma nisondla ngekusinakekela lokukhulu sitawutfola imphandze, sikhule siye etulu, sitsele sitselo.

38 Kodvwa uma ningasinaki sihlahla, futsi ningacabangi nangekondliwa kwaso, Bukani angeke siyitfole imphandze; uma kushisa kwelilanga sekufika kusishisa, ngenca yekutsi asinamphandze siyabuna, futsi niyasisiphula nisilahle ngaphandle.

39 Manje, loku akusiko kutsi kungenca yekutsi inhlanyelo beyingasiyo lenhle, noma ngoba sitselo saso singatukutsandzeka; kodvwa kungenca yekutsi umhlabatsi wenu ulugadvule, futsi anisondli lesi sihlahla, ngako-ke aninakutfola sitselo saso.

40 Ngako-ke, uma ningalondli livi, nibuke phambili ngeliso lekukholwa esitselweni salo, aniyukwati nanini kukha sitselo sesihlahla sekuphila.

41 Kodvwa uma nitawulondla livi, yebo, nisondle sihlahla ngesikhatsi sesicala kukhula, ngelukholo lwenu ngekukhutsala lokukhulu, kanye nangekubeketela, nibuke phambili esitselweni salo, liyawuba nemphandze; futsi buka liyawuba sihlahla lesiyawukhula siye etulu sibe kuphila lokuphakadze.

42 Futsi ngenca yekukhutsala kwenu kanye nelukholo lwenu nekubeketela kwenu kutsi nilondle livi, kute litfole imphandze kini, buka, emvakwesikhashana nje niyawusikha sitselo salo, lesiligugu lelikhulu, lesinongotela ngetulu kwako konkhe kunongotela, nalesimhlophe ngetulu kwako konkhe lokumhlophe, yebo, nalesimsulwa ngetulu kwako konkhe lokumsulwa; futsi niyawutitika ngalesi sitselo nite nineliseke, kute ningabe nisalamba, noma nome.

43 Ngaleso sikhatsi, bomnaketfu, niyawuvuna umphumela welukholo lwenu, nekukhutsala kwenu, nekubeketela, kanye nekumela bulukhuni, nilindze sihlahla kutsi sinivetele sitselo.