1 Futsi kwenteka kutsi emaNefi labekangakabulawa ngetikhali temphi, emvakwekutsi sekangcwabe labo labebabulewe—manje sibalo salabo labebabulewe sasingakabalwa, ngenca yebukhulu besibalo sabo—emvakwekutsi sebacedze kungcwaba labafile babo bonkhe babuyela emaveni abo, nasemitini yabo, nakubafati babo, kanye nakubantfwana babo.

2 Manje labaningi besifazane kanye nebantfwana bebabulewe ngenkemba, futsi ngalokunjalo naleminingi imihlambi yetimvu neyetinkhomo tabo; ngalokunjalo nalamaningi emasimu alokuyinhlavu kwabo abhujiswa, ngoba anyatselwa ticuku tebantfu.

3 Manje ngebuningi bemaLamani kanye nema-Amilisayi labekabulewe ngaselusentseni lwemfula iSidoni aphonswa emantini aseSidoni; buka ematsambo abo asekujuleni kwelwandle, futsi maningi.

4 Ema-Amilisayi bekahlukanisiwe kumaNefi, ngoba wona abetibeke luphawu lolubovu esimongweni sawo ngendlela yemaLamani; noko wona abengakatihhuli tinhloko tawo njengemaLamani.

5 Manje tinhloko temaLamani tatihhuliwe; futsi bekangcunu, ngaphandle nje kwesikhumba lebekasibophe etinkhalo tawo, futsi ngalokunjalo netikhali tawo, lebekatibophile, kanye nebutjoki bawo, nemicibisholo yawo, nematje awo, kanye netilingi tawo, njalonjalo.

6 Tikhumba temaLamani tatinsundvu, ngekweluphawu lolo lolwalubekwe kuboyise, lolwalusicalekiso etikwabo ngenca yetimbambeko tabo kanye nekuhlubuka kwabo ngalokumelene nabomnakabo, labafaka ekhatsi Nefi, Jakobe naJosefa, kanye neSemu, labebangemadvodza lalungile futsi angcwele.

7 Bomnakabo bebafuna kubabulala, ngako-ke bacalekiswa; futsi iNkhosi Nkulunkulu yabeka luphawu kubo, yebo, kuLamani nakuLemuweli, kanjalo nakuwo emadvodzana a-Ishimayeli, kanye nakubesifazane baka-Ishimayeli.

8 Loku kwentiwa kute intalelwane yabo yehlukaniswe nentalelwane yabomnakabo, kute ngaloko iNkhosi Nkulunkulu ilondvolote bantfu bayo, kute bangahlangani baphindze bakholwe emasikweni langakalungi lebekatobangela konakala kwabo.

9 Futsi kwenteka kutsi loyo lobekahlanganisa intalelwane yakhe naleyo yemaLamani bekatiletsela sicalekiso lesifanako etikwentalelwane yakhe.

10 Ngako-ke, loyo lobekavumela kutsi adukiswe ngemaLamani bekabitwa ngaphansi kwalelo gama, futsi kwakuba khona luphawu lolwalubekwa kuye.

11 Futsi kwenteka kutsi loyo lobekangakholelwa esikweni lemaLamani, kodvwa akholelwa kuleyo mibhalo leyayikhishwe eveni laseJerusalema, futsi ngalokunjalo nasesikweni laboyise, lebelilungile, labo labebakholelwa kumiyaleto yaNkulunkulu futsi bayigcina, bebabitwa ngekutsi maNefi, noma bantfu baNefi, kusukela ngaleso sikhatsi kuya phambili—

12 Futsi ngibo labo labagcine imibhalo leliciniso yebantfu babo, futsi ngalokunjalo neyebantfu bemaLamani.

13 Manje sitawuphindza futsi sibuyele kuma-Amilisayi, ngoba nawo ngalokunjalo bekaneluphawu lolwalubekwe kuwo; yebo, atibeka wona luphawu, yebo, luphawu lolubovu etimongweni tawo.

14 Ngaleyondlela livi laNkulunkulu liyagcwaliseka, ngoba lawa ngemavi lawasho kuNefi: Buka emaLamani ngiwacalekisile, futsi ngitawubeka luphawu kuwo kanye nentalelwane yawo yehlukaniswe kuwe kanye nentalelwane yakho, kusukela ngalesi sikhatsi kuya phambili ingunaphakadze ngaphandle kwekutsi aphendvuke ebubini bawo futsi aphendvukele kimi kute ngibe nemusa kuwo.

15 Ngetulu kwaloko: Ngitawubeka luphawu kuloyo lohlanganisa intalelwane yakhe neyabomnakenu, kute nayo icalekiswe.

16 Ngetulu kwaloko: Ngitawubeka luphawu kuloyo lolwa nawe kanye nentalelwane yakho.

17 Ngetulu kwaloko, ngitsi loyo losukako kuwe angeke abitwe nanini ngentalelwane yakho; futsi ngitawukubusisa, kanye naloyo loyawubitwa ngentalelwane yakho, kuya phambili ingunaphakadze; futsi leti kwakutetsembiso teNkhosi kuNefi kanye nakuyo intalelwane yakhe.

18 Manje ema-Amilisayi abengati kutsi agcwalisa emavi aNkulunkulu ngesikhatsi acala kutibeka luphawu etimongweni tawo; noko abephumele ebaleni ahlubuka Nkulunkulu; ngako-ke kwakufanele kutsi sicalekiso siwele kuwo.

19 Manje ngifuna kutsi nibone kutsi atiletsela wona sicalekiso; futsi ngaleyondlela wonkhe umuntfu localekisiwe, utiletsela yena kubekwa licala.

20 Manje kwenteka kutsi etinsukwini nje letingatiningi emvakwemphi leyayiliwe eveni laseZarahemla, ngemaLamani kanye nema-Amilisayi kwaba khona lelinye libutfo lemaLamani leleta kubantfu bakaNefi, endzaweni lefanako naleyo lapho libutfo lekucala lalihlangene khona nema-Amilisayi.

21 Futsi kwenteka kutsi kwaba khona libutfo lelatfunyelwa kutsi libachube libakhiphe eveni labo.

22 Manje Alima aphetfwe linceba akahambanga kuyolwa ngalesi sikhatsi nemaLamani;

23 Kodvwa watfumela libutfo lelikhulu kuyolwa nawo; bahamba bakhuphuka babulala labaningi bemaLamani, babachuba labasele bawo babakhiphela ngaphandle kwemincele yelive labo.

24 Emvakwaloko baphindze babuya futsi bacala bacinisa kuthula eveni, sebete kukhatsatwa titsa tabo kwesikhashana.

25 Manje tonkhe leti tintfo tenteka, yebo, tonkhe leti timphi kanye nemibango kwacala kwaphindze kwaphela ngemnyaka wesihlanu wekubusa kwebehluleli.

26 Futsi ngemnyaka munye kwaba khona tinkhulungwane kanye nemashumi etinkhulungwane temiphefumulo leyatfunyelwa eveni laphakadze, kute ivune imivuzo yayo ngekwemisebenti yayo, noma yayimihle noma yayimibi, kute ivune kujabula kwaphakadze noma lusizi lwaphakadze, ngekwemoya lowo labakhetsa kutsi bawulalele, noma ngabe ngumoya lomuhle noma ngulowo lomubi.

27 Ngoba wonkhe umuntfu utfola inkhokhelo kuloyo lakhetse kutsi amlalele, futsi loku kungekwemavi emoya wesiphrofetho; ngako-ke akube ngekweliciniso. Futsi waphela kanjalo-ke umnyaka wesihlanu wekubusa kwebehluleli.