1 Futsi buka, manje kwenteka kutsi lawo maLamani atfukutsela kakhulu ngoba bebabulele bomnakabo; ngako-ke afungela kutiphindzisela kumaNefi; futsi akatange asenta imitamo yekutsi ababulale bantfu bema-Anthi-Nefi-Lehi ngaleso sikhatsi.

2 Kodvwa atsatsa emabutfo awo ahamba awelela eminceleni yelive laseZarahemla, ahlasela bantfu labebaseveni lase-Amoniha futsi bababulala.

3 Emvakwaloko, aba netimphi letiningi nemaNefi, kuto achutjwa aphindze abulawa.

4 Futsi emkhatsini wemaLamani labekabulewe bekukhona cishe yonkhe intalelwane ya-Amuloni kanye nabomnakabo, labebabaphristi ba-Nowa, futsi babulawa ngetandla temaNefi;

5 Futsi labasala, sebabalekele ehlane lelisemphumalanga, sebatitsatsele emandla kanye neligunya ngetulu kwemaLamani, benta kutsi emaLamani lamaningi afe ngemlilo ngenca yenkholo yawo.

6 Ngoba labaningi bawo, emvakwekutsi asabe nekulahlekelwa lokukhulu kanye netinhlupheko letiningi kakhulu, acala kuphehlelwa ekukhumbuleni emavi Aroni nabomnakabo labebawashumayele kubo eveni labo; ngako-ke acala kungawakholwa emasiko aboyise, akholwa eNkhosini, nekutsi yaniketa emandla lamakhulu kumaNefi; futsi ngaleyondlela kwaba khona labaningi bawo labaphendvuka ehlane.

7 Futsi kwenteka kutsi labo babusi labebayinsali yebantfwana ba-Amuloni benta kutsi babulawe, yebo, bonkhe labo labebakholelwa kuleti tintfo.

8 Manje loku kufela lukholo kwenta kutsi labaningi babomnakabo baphehlelwe entfukutselweni; futsi kwacala kwaba khona umbango ehlane; emaLamani acala kutingela intalelwane ya-Amuloni kanye nabomnakabo aphindze acala kuyibulala; futsi babalekela ehlane lelisemphumalanga.

9 Futsi buka basatingelwa nangalolusuku ngemaLamani. Ngaleyondlela emavi a-Abinadi agcwaliseka, lawasho mayelana nentalelwane yebaphristi labenta kutsi eve tinhlungu tekufa ngemlilo.

10 Ngoba watsi kubo: Loko leniyawukwenta kimi kuyawuba luhlobo lwetintfo letitakwenteka.

11 Manje Abinadi waba wekucala loweva tinhlungu tekufa ngemlilo ngenca yenkholo yakhe kuNkulunkulu; manje nguloku labekucondzile, kutsi labaningi bayawuva tinhlungu tekufa ngemlilo, njengoba naye ativa.

12 Washo kubaphristi baNowa kutsi intalelwane yabo iyokwenta labaningi kutsi babulawe, ngendlela lefanako njengoba kwentiwa nakuye, nekutsi bayohlakatwa ngaphandle baphindze babulawe, njengetimvu letingenamelusi ticoshwa tiphindze tibulawa tilwane tasendle; manje bukani, lamavi acinisekiswa, ngoba bacoshwa ngemaLamani, batingelwa, baphindze bashaywa.

13 Futsi kwenteka kutsi ngesikhatsi emaLamani abona kutsi bekangeke akhone kuncoba emaNefi abuyela futsi eveni lawo; lamaningi awo eta atohlala eveni la-Ishmayeli kanye naseveni la-Nefi, atihlanganisa nebantfu baNkulunkulu, labebabantfu ba-Anthi-Nefi-Lehi.

14 Futsi nawo ngalokunjalo atingcwaba tikhali tawo temphi, njengoba nabomnakabo bebentile, acala kutsi abe bantfu labalungile; ahamba etindleleni teNkhosi, futsi betama kugcina imiyaleto kanye nemitsetfo yayo.

15 Yebo, bawugcina umtsetfo waMosi, ngoba kwakudzingekile kutsi bawugcine umtsetfo waMosi kwangaleso sikhatsi, ngoba kwakungakagcwaliseki konkhe. Kodvwa nanoma wawukhona umtsetfo waMosi, babuka embili ekuteni kwaKhristu, babona kutsi umtsetfo waMosi bewuluphawu lwekuta kwakhe, futsi bakholelwa kutsi kufanele bagcine leto tento letibonakalako kute kube sikhatsi ayokwembulwa ngaso kubo.

16 Manje bebangacabangi kutsi kusindziswa kwakuta ngemtsetfo waMosi; kodvwa umtsetfo waMosi wenta kutsi lukholo lwabo kuKhristu lucine; futsi ngaleyondlela baligcina litsemba ngelukholo, lelaliholela ekusindzisweni kwaphakadze, batsembele kumoya wekuphrofetha, lowakhuluma ngaleto tintfo letatitakwenteka.

17 Manje bukani, Amoni, na-Aroni, na-Omneri, naHimnayi, kanye nabomnakabo bajabula kakhulu, ngemphumelelo lababenayo emkhatsini wemaLamani, babona kutsi iNkhosi yayibaniketile ngekwemithandazo yabo, nekutsi ngetulu kwaloko yalicinisekisa livi layo kubo ngayo yonkhe indlela.