1 Buka, manje kwenteka kutsi bantfu baNefi bebajabule kakhulu, ngoba iNkhosi yayiphindze yabakhipha futsi etandleni tetitsa tabo; ngako-ke bayibonga iNkhosi Nkulunkulu wabo; yebo, bazila kakhulu baphindze bathandaza kakhulu, futsi bamkhonta Nkulunkulu ngenjabulo lenkhulu kakhulu.

2 Futsi kwenteka ngemnyaka welishumi nemfica wekubusa kwebehluleli ngetulu kwebantfu baNefi, kutsi Alima weta kundvodzana yakhe Hilamani watsi kuyo: Uyawakholwa yini emavi lengawakhuluma kuwe mayelana naleyo mibhalo legciniwe na?

3 Hilamani watsi kuye: Yebo, ngiyawakholwa.

4 Alima waphindze watsi: Uyakholwa yini kuJesu Khristu, lotawukuta na?

5 Yena watsi: Yebo, ngiyawakholwa onkhe emavi lowakhulumile.

6 Alima waphindze watsi kuye: Utawuyigcina yini imiyaleto yami na?

7 Yena watsi: Yebo, ngitawuyigcina imiyaleto yakho ngayo yonkhe inhlitiyo yami.

8 Emvakwaloko Alima watsi kuye: Ubusisiwe; futsi iNkhosi itawukuphumelelisa kulelive.

9 Kodvwa buka, nginalokutsite lengitokuphrofetha kuwe; kodvwa loko lengitokuphrofetha kuwe ungakuveti; yebo, loku lengikuphrofetha kuwe akuyuvetwa, site siphrofetho sigcwaliseke; ngako-ke bhala lamavi lengitawuwakhuluma.

10 Nawa lamavi: Buka, ngiyabona kutsi bona kanye laba bantfu, emaNefi, ngekwemoya wekwembulelwa lokimi, eminyakeni lengemakhulu lamane kusukela ngaleso sikhatsi Jesu Khristu ayawutiveta ngaso kubo, bayawuncishelwa kukholwa.

11 Yebo, futsi ngaleso sikhatsi bayawubona timphi kanye nabomashayabhuce betifo, yebo, indlala kanye nekucitseka kwengati, bate bantfu baNefi baphele nya—

12 Yebo, futsi loku kungenca yekutsi bayawuncishelwa kukholwa bawele emisebentini yebumnyama, kanye nasetinkhanukweni, kanye nakuto tonkhe tinhlobo tebubi; yebo, ngitsi kuwe, ngenca yekutsi bayawukona ngalokumelene nekukhanya lokukhulu kangaka kanye nelwati lolungaka, yebo, ngitsi kuwe, kusukela ngalolo suku, nesitukulwane sesine angeke sendlule sonkhe ngaphambi kwekutsi lobu bubi lobukhulu bufike.

13 Futsi ngesikhatsi lolo suku lolukhulu lufika, buka, sikhatsi siyeta masinyane kutsi labo manje, noma intalelwane yalabo manje lababalwa emkhatsini wentalelwane yebantfu baNefi, angeke babalwe emkhatsini webantfu baNefi.

14 Kodvwa loyo loyawusala, angabulawa ngalolo suku lolukhulu nalolwesabekako, uyawubalwa emkhatsini wemaLamani, futsi uyawukuba njengawo, bonkhe, ngaphandle nje kwalabambalwa labayawubitwa ngebafundzi beNkhosi; futsi emaLamani ayawubatingela bate baphele nya. Manje, ngenca yebubi, lesiphrofetho siyawugcwaliseka.

15 Manje kwenteka kutsi emvakwekutsi Alima asatishito leti tintfo kuHilamani, wambusisa, kanjalo nalamanye emadvodzana akhe; futsi ngetulu kwaloko wawubusisa umhlaba ngenca yalabalungile.

16 Futsi watsi: Naku lokushiwo yiNkhosi Nkulunkulu—Liyawucalekiswa live, yebo, leli live, kuto tonkhe tive, imindeni, tilimi, kanye nebantfu, kuye ekubhujisweni, kwabo labenta bubi, uma sebavutfwe ngalokuphelele; futsi njengoba sengishito kuyawuba njalo; ngoba lesi sicalekiso kanye nesibusiso saNkulunkulu kulelive, ngoba iNkhosi ayinakusibuka sono isivumele ngisho nakancane.

17 Manje ngesikhatsi Alima sekawashito lamavi walibusisa libandla, yebo, bonkhe labo labebatokuma bacine elukholweni kusukela ngaleso sikhatsi kuya phambili.

18 Futsi ngesikhatsi Alima sekakwentile loku wesuka waphuma eveni laseZarahemla, kwaba shengatsi uya eveni laseMelekhi. Futsi kwenteka kutsi akuphindzanga kwevakala lutfo ngaye; mayelana nekufa kwakhe noma kungcwatjwa kwakhe asati lutfo ngako.

19 Buka, nguloku lesikwatiko, kutsi abeyindvodza lelungile; futsi emahemuhemu agcwala live lonkhe ebandleni kutsi watsatfwa nguMoya, noma wangcwatjwa ngesandla seNkhosi, njengaMosi. Kodvwa buka, imibhalo lengcwele itsi iNkhosi yamtsatsa Mosi yamletsa kuyo; futsi siyacabanga kutsi ngalokunjalo seyimukele na-Alima emoyeni, yamletsa kuyo; ngako-ke, ngenca yalesi sizatfu asati lutfo mayelana nekufa kanye nekungcwatjwa kwakhe.

20 Manje kwenteka ekucaleni kwenyaka welishumi nemfica wekubusa kwebehluleli ngetulu kwebantfu baNefi, kutsi Hilamani wahamba emkhatsini webantfu kute amemetele livi kubo.

21 Ngoba buka, ngenca yetimphi tabo nemaLamani kanye nekuphikisana lokuningi lokungasho lutfo kanye nekuphatamiseka lokwakusemkhatsini webantfu, kwabonakala kufanele kutsi livi laNkulunkulu limenyetelwe emkhatsini wabo, yebo, futsi nekutsi kuhlelembiswe libandla lonkhe.

22 Ngako-ke Hilamani kanye nabomnakabo bachubeka nekumisa libandla futsi eveni lonkhe, yebo, kuwo onkhe emadolobha eveni lonkhe lokwakulebantfu baNefi. Futsi kwenteka kutsi babeka baphristi kanye nebafundzisi kulo lonkhe live, ngetulu kwawo onkhe emabandla.

23 Manje kwenteka kutsi emvakwekutsi Hilamani kanye nabomnakabo sebabeke baphristi kanye nebafundzisi ebandleni kwavuka kuphikisana emkhatsini wabo, futsi abafunanga kulalela emavi aHilamani kanye nabomnakabo;

24 Kodvwa bakhula ekutikhukhumeteni baphakeme etinhlitiyweni tabo, ngenca yengcebo yabo leningi kakhulu; ngako-ke bakhula banotsa emehlweni abo, futsi abafunanga kulalela emavi abo, kutsi bahambe ngebucotfo phambi kwaNkulunkulu.