1 Futsi kwenteka kutsi ema-Amaleki nema-Amuloni nemaLamani labekaseveni lase-Amuloni, ngalokunjalo naseveni laseHelamu, kanye nalawo labekaseveni laseJerusalema, kafishane nje, eveni lonkhe lelitungeletile, lawo labekangakaphendvuki futsi angakatibiti ngeligama lema-Anthi-Nefi-Lehi, aphehlwa ngema-Amaleki kanye nangema-Amuloni ngentfukutselo ngalokumelene nabomnakabo.

2 Futsi inzondo yabo yaba yinkhulu kakhulu ngalokumelene nabo, kangangekutsi bacala kuyivukela inkhosi yabo, kangangekutsi bebangasayifuni kutsi ibe yinkhosi yabo; ngako-ke, batsatsa tikhali kuyobukana nebantfu bema-Anthi-Nefi-Lehi.

3 Manje inkhosi umbuso yawunika indvodzana yayo, futsi yayibita libito layo ngekutsi-Anthi-Nefi-Lehi.

4 Inkhosi yafa ngawo lowo mnyaka lapho emaLamani acala kwenta emalungiselelo emphi kuyawubukana nebantfu baNkulunkulu.

5 Manje ngesikhatsi Amoni nabomnakabo kanye nabo bonkhe labo labebafike naye babona emalungiselelo emaLamani kutsi abulale bomnakabo, baphuma baya eveni lemaMidiyani, lapho Amoni wahlangana nabo bonkhe bomnakabo; kusuka lapho beta eveni laka-Ishmayeli kute babambe umhlangano naLamonayi futsi ngalokunjalo kanye nemnakabo Anthi-Nefi-Lehi, kutsi kumele benteni kute bativikele kumaLamani.

6 Manje bekute namunye emkhatsini wabo bonkhe bantfu labebaphendvukele eNkhosini labebafuna kutsatsa tikhali balwe nabomnakabo; cha, abafunanga ngisho kwenta nanoma ngumaphi emalungiselelo emphi; yebo, futsi ngalokunjalo nenkhosi yabo yabayaleta kutsi bangalokotsi.

7 Manje, lawa ngemavi leyawakhuluma kubantfu mayelana naloludzaba: Ngiyambonga Nkulunkulu wami, bantfu bami labatsandzekako, kutsi Nkulunkulu wetfu lomkhulu ngebuhle bakhe utfumele labomnaketfu, emaNefi, kitsi kutsi atawushumayela kitsi, nekutsi atawusenta sikholwe ngemasiko abobabe betfu lamabi.

8 Futsi bukani, ngiyambonga Nkulunkulu wami lomkhulu kutsi usinike incenye yaMoya wakhe kutsi itsambise tinhlitiyo tetfu, kute sicale kuchumana nalabomnaketfu, emaNefi.

9 Futsi bukani, ngetulu kwaloko ngiyambonga Nkulunkulu wami, kutsi ngekuvula loku kuchumana sentiwe sakholwa ngetono tetfu, kanye nangekubulala lokuningi lesikwentile.

10 Futsi ngiyaphindza ngiyambonga Nkulunkulu wami, yebo, Nkulunkulu wami lomkhulu, kutsi usinikile kutsi siphendvuke kuleti tintfo, futsi nekutsi usicolele kuleto tono tetfu letiningi kanye nekubulala lesikwentile, futsi walisusa licala etinhlitiyweni tetfu, ngetento letinhle teNdvodzana yakhe.

11 Manje bukani, bomnaketfu, njengoba bekunguloko kuphela lebesingakwenta (njengoba besingulabalahleke kakhulu kunalo lonkhe luntfu) kutsi siphendvuke etonweni tetfu tonkhe kanye nasekubulaleni lokuningi lesikwentile, futsi nekutsi sitfole kutsi Nkulunkulu atisuse etinhlitiyweni tetfu, ngoba bekunguloko kuphela lebesingakwenta kutsi siphendvuke ngalokuphelele ngaphambi kwaNkulunkulu kute asuse libala letfu—

12 Manje bomnaketfu labatsandzekako kakhulu, njengoba Nkulunkulu sekawasusile emabala etfu, futsi netinkemba tetfu setikhatimula, ngako-ke asingatingcolisi tinkemba tetfu nanini ngengati yabomnaketfu.

13 Bukani, ngitsi kini, Cha, asitigcine tinkemba tetfu kute tingabe tisangcoliswa ngengati yabomnaketfu; ngoba mhlawumbe, uma singatingcolisa tinkemba tetfu futsi ngeke tisahlantwa nanini tikhatimule engatini yeNdvodzana yaNkulunkulu wetfu lomkhulu, leyawucitsekela inhlawulo yetono tetfu.

14 Futsi Nkulunkulu lomkhulu ube nesihawu kitsi, futsi watembula leti tintfo kitsi kute singalahleki; yebo, futsi wembule leti tintfo kitsi ngaphambili, ngenca yekutsi uyayitsandza imiphefumulo yetfu njengoba abatsandza bantfwana betfu; ngaloko-ke, ngesihawu sakhe uyasihambela ngetingilosi takhe, kute lisu lekusindzisa lembulwe kitsi ngalokunjalo nasetitukulwaneni letitako.

15 Awu, unemusa kangakanani Nkulunkulu wetfu! Manje bukani, njengoba kube nguloko nje kuphela lebesingakwati kutsi sikwente kutsi kususwe emabala kitsi, futsi tinkemba tetfu tentiwe takhatimula, asitifihle khashane kute tigcinwe tikhatimula, njengebufakazi kuNkulunkulu wetfu ngelusuku lwekugcina, noma ngelusuku lesiyawuletfwa ngalo kutsi sime ngaphambi kwakhe kutsi sehlulelwe, kutsi asitingcolisanga tinkemba tetfu engatini yabomnaketfu seloku asabela livi lakhe futsi wasenta sahlanteka ngaloko.

16 Manje, bomnaketfu, uma bomnaketfu bafuna kusibulala, bukani, sitawutifihla khashane tinkemba tetfu, yebo, sitawutingcwaba ngisho ekujuleni kwemhlaba, kute tigcinwe ticwebetela, njengebufakazi bekutsi asitange nanini sitisebentise, ngelusuku lwekugcina; futsi uma bomnaketfu basibulala, bukani, siyawuya kuNkulunkulu wetfu futsi siyawusindziswa.

17 Manje kwenteka kutsi ngesikhatsi inkhosi seyente siphetfo salenkhulumo, futsi bonkhe bantfu babutsene ndzawonye, batsatsa tinkemba tabo, kanye nato tonkhe tikhali lebetisetjentiselwa kucitsa ingati yemuntfu, batingcwaba ekujuleni kwemhlaba.

18 Futsi loku bakwenta, kutsi kube sibonakaliso sabo sebufakazi kuNkulunkulu, ngalokunjalo nakubantfu, sekutsi abasayuphindza batisebentise tikhali nanini kucitsa ingati yemuntfu; loku bakwenta, bacinisekisa phindze benta tivumelwano naNkulunkulu, kutsi kunekutsi bacitse ingati yabomnakabo bayawunikela ngetimphilo tabo lucobo; futsi kunekutsi batsatse kumnakabo bayawumupha; futsi kunekutsi bacitse tinsuku tabo ngebuvila bayawusebenta kakhulu ngetandla tabo.

19 Futsi ngaleyondlela siyabona kutsi, ngesikhatsi lamaLamani aletfwa ekukholweni kanye nasekwatini liciniso, acina, futsi bekangabeketelela buhlungu kute kube sekufeni kunekutsi ente sono; ngaleyondlela siyabona kutsi batingcwaba tikhali tabo tekuthula, noma batingcwaba tikhali temphi, kute kube khona kuthula.

20 Futsi kwenteka kutsi bomnakabo, emaLamani, benta emalungiselelo emphi, beta bakhuphukela eveni laNefi ngenhloso yekutawubulala inkhosi, kanye nekutsi abeke lenye esikhundleni sayo, futsi nekutsi abulale bantfu bema-Anthi-Nefi-Lehi baphele eveni.

21 Manje ngesikhatsi bantfu babona kutsi bekatawulwa nabo bahamba bayawuwahlangabeta, batilahla phambi kwawo phansi, bacala kubita libito leNkhosi; futsi ngaleyondlela bebakulesi simo ngesikhatsi emaLamani acala kutseleka etikwabo, acala kubabulala ngenkemba.

22 Futsi ngaphandle kwekuhlangabetana nanoma ngukuphi kuvimbeleka, abulala inkhulungwane nesihlanu yabo; futsi siyati kutsi babusisiwe, ngoba bahamba bayohlala naNkulunkulu wabo.

23 Manje ngesikhatsi emaLamani abona kutsi bomnakabo abatange bayibalekele inkemba, noma babheke eceleni ngesekudla noma ngesencele, kodvwa kutsi balala phansi phindze bafa, bamdvumisa Nkulunkulu ngisho nakuleso sehlakalo sekubulawa ngenkemba—

24 Manje ngesikhatsi emaLamani akubona loku atibamba ekubabulaleni; futsi kwaba khona labaningi laba netinhlitiyo letagcwala kudzabuka ngenca yalabo bomnakabo labebawe ngaphansi kwenkemba, ngoba besebaphendvukile etintfweni lebebatentile.

25 Futsi kwenteka kutsi balahla phansi tikhali tabo temphi, abatange basaphindze batitsatsa, ngoba bahlabeka ngekubulala lebebakwentile; futsi batilahla phansi njengabo bomnakabo, batsembele emseni walabo labebaphakamise imikhono yabo kubabulala.

26 Futsi kwenteka kutsi bantfu baNkulunkulu ngalolosuku bahlangana nalabangetulu kwesibalo salabo labebabulewe; labo labebabulewe bebabantfu labalungile, ngako-ke site sizatfu sekungabata kutsi basindziswa.

27 Futsi bekute namunye umuntfu lomubi lowabulawa emkhatsini wabo; kodvwa kwaba khona labangetulu kwenkhulungwane labaletfwa ekwatini liciniso; ngaleyondlela siyabona kutsi iNkhosi isebenta ngetindlela letiningi kute isindzise bantfu bayo.

28 Manje sibalo lesikhulu kakhulu salabo bemaLamani lababulala labaningi kangaka babomnakabo bebangema-Amaleki kanye nema-Amuloni, sibalo lesikhulu kakhulu sabo bekubeluhlelo lwemaNehori.

29 Manje, emkhatsini walabo labahlangana nebantfu beNkhosi, bekute namunye lobekangum-Amaleki noma ngum-Amuloni, noma lobekaweluhlelo lwaNehori, kodvwa bebabesitukulwane sangempela saLamani kanye naLemuweli.

30 Futsi ngaleyondlela singakwati kuhlukanisa ngalokucacile, kutsi emvakwekutsi bantfu sebake bakhanyiselwa ngaMoya waNkulunkulu, baba nelwati lolukhulu lwetintfo letiphatselene nekulunga, emvakwaloko babese bawela esonweni kanye nasesiphambukweni, baba lukhuni kakhulu, futsi ngaleyondlela simo sabo siba sibi kakhulu kunekutsi bangatange bati ngaleti tintfo.