1 Manje, ndvodzana yami, ngiyabona kutsi kukhona lokunye lokutsite lokusakhatsata ingcodvo yakho, longakucondzi—lokumayelana nekulunga kwaNkulunkulu ekujeziseni soni; ngoba utama kucabanga kutsi akusiko kulunga kutsi soni siyiswe esimeni selusizi.

2 Manje buka, ndvodzana yami, ngitawuchaza lentfo kuwe. Ngoba buka, emvakwekutsi iNkhosi Nkulunkulu ikhiphe batali betfu bekucala ensimini yase-Edeni, bayolima umhlaba, lapho bebatsetfwe khona—yebo, yamkhipha umuntfu, yabeka emphumalanga yensimu yase-Edeni likherubhi, kanye nenkemba levutsako leyayigucukela etindzaweni tonkhe, kugadza lesihlahla sekuphila—

3 Manje, siyabona kutsi umuntfu besekafanana naNkulunkulu, sekati lokuhle nalokubi; futsi hleze elule sandla sakhe, aphindze atsatse esihlahleni sekuphila, adle bese uphila ingunaphakadze, iNkosi Nkulunkulu yabeka likherubhi kanye nenkemba levutsako, kute angasidli leso sitselo—

4 Futsi ngaleyondlela siyabona, kutsi kwabakhona sikhatsi lesabekelwa umuntfu kutsi aphendvuke, yebo, sikhatsi sekuvivinywa, sikhatsi sekuphendvuka kanye nesekusebentela Nkulunkulu.

5 Ngoba buka, kube Adamu welula sandla sakhe ngekushesha, wadla esihlahleni sekuphila, bekatophila ingunaphakadze, ngekwelivi laNkulunkulu, angenasikhatsi sekuphendvuka; yebo, ngetulu kwaloko nelivi laNkulunkulu lalitawuba yintfo lengenamsebenti, futsi lisu lelikhulu lensindziso laliyawuvimbeleka.

6 Kodvwa buka, kwakumisiwe kutsi umuntfu afe—ngako-ke, njengoba bavinjelwa esihlahleni sekuphila, kumele basuswe emhlabeni—futsi umuntfu wabese uba ngulolahlekile ingunaphakadze, yebo, base baba bantfu labawile.

7 Manje, ngaloku uyabona kutsi batali betfu bekucala bavinjelwa ngekwenyama kanye nangekwakamoya kutsi bete eNkhosini, futsi ngaleyondlela siyabona kutsi baba ngulabalandzela intsandvo yabo.

8 Manje buka, bekungakadzineki kutsi umuntfu asindziswe kulokufa kwenyama, ngoba loko bekuyawumisa lisu lelikhulu lenjabulo.

9 Ngako-ke, njengoba umphefumulo wawungeke ufe nanini, futsi nekuwa bekuletse kuwo wonkhe umuntfu kufa ngekwakamoya kanjalo nekwemtimba, lokungukutsi, babese bayehlukaniswa neNkhosi, kwakudzingekile kutsi wonkhe umuntfu abuyiswe kulokufa ngekwakamoya.

10 Ngako-ke njengoba bese kungulabanaka kwemhlaba, kwemvelo, nekwebudeveli, ngekwendalo, lesi simo sekuvivinywa kwaba simo sabo sekulungiselela; kwaba simo sekutilungiselela.

11 Manje khumbula, ndvodzana yami, kube kwakungasiko kutsi kwakungenca yelisu lekuhlengwa, (uma silibeka eceleni) masinyane nje ngesikhatsi bafa imiphefumulo yabo yayiyawuba selusizini, seyihlukanisiwe neNkhosi.

12 Manje, bekute indlela yekusindzisa bantfu kulesimo sekuwa, umuntfu lebekasiletse etikwakhe ngenca yekungalaleli kwakhe lucobo;

13 Ngako-ke, ngekulunga, lisu lekuhlengwa lalingenakwenteka, ngaphandle kwemibandzela yekuphendvuka kwebantfu kulesimo sekuvivinywa, yebo, lesimo sikutilungiselela; ngoba ngephandle kwekutsi kube ngenca yalemibandzela, umusa wawungeke ukwati kusebenta ngaphandle kwekutsi umise umsebenti wekulunga. Manje umsebenti wekulunga wawungenakumiswa; uma kunjalo, Nkulunkulu bekatawuyekela kuba nguNkulunkulu.

14 Ngaleyondlela siyabona kutsi wonkhe umuntfu wawa, futsi bese babanjwe kulunga; yebo, kulunga kwaNkulunkulu, lokwabayisa ekutseni behlukaniswe ingunaphakadze naye.

15 Manje, lisu lemusa lalingeke lenteke ngaphandle kwekutsi kwentiwe inhlawulo, ngako-ke Nkulunkulu lucobo lwakhe wahlawulela tono temhlaba; kute aletse lisu lemusa, kwenelisa tidzingo tekulunga, kute Nkulunkulu abe ngulophelele, Nkulunkulu lolungile, futsi ngalokunjalo naNkulunkulu lonemusa.

16 Manje, kuphendvuka kwakungeke kute kubantfu ngaphandle kwekutsi kube khona sijeziso, naso futsi lesasisaphakadze njengoba imphilo yemphefumulo kumele ibe njalo, lesasibekiwe saphikisana nelisu lenjabulo, nalo lelalilaphakadze njengemphilo yemphefumulo.

17 Manje, umuntfu bekangaphendvuka kanjani ngaphandle kwekutsi one na? Bekangona kanjani uma umtsetfo wawungekho? Bewungaba khona kanjani umtsetfo ngaphandle kwekutsi kube khona sijeziso na?

18 Manje, kwakukhona sijeziso lesasibekiwe, kanye nemtsetfo lolungile lowawumisiwe, lowawuletsa kutisola kwanembeza kumuntfu.

19 Manje, uma ngabe bekute umtsetfo lomisiwe—kutsi uma umuntfu abulala naye kumele afe—ngabe bekatawusaba yini kutsi utawufa uma angabulala na?

20 Futsi ngalokunjalo, uma bekute umtsetfo lobekiwe ngalokumelene nesono bantfu bebangeke bakwesabe kufa.

21 Futsi uma bekute umtsetfo lobekiwe, uma bantfu bona kulunga bekungentani, noma nemusa ngalokunjalo, ngoba bekungeke kufune lutfo esidalweni?

22 Kodvwa kukhona umtsetfo lobekiwe, nesijeziso lesibekiwe, kanye nekuphendvuka lokuniketiwe; kuphendvuka loko, lokufunwa ngumusa; ngaphandle kwaloko, kulunga kuyasifuna sidalwa bese kusebentisa umtsetfo, bese umtsetfo wehlisa sijeziso; uma kungenjalo, imisebenti yekulunga ingaphela, futsi Nkulunkulu angayekela kuba nguNkulunkulu.

23 Kodvwa Nkulunkulu akayekeli kuba nguNkulunkulu, futsi umusa uyamemukela lotisolako, futsi umusa uta ngenca yenhlawulo; inhlawulo yenta kwenteke kuvuka kwalabafile; kuvuka kwalabafile kubuyisela bantfu emuva kuNkulunkulu; futsi ngaleyondlela babuyiselwa ebukhoneni bakhe, kute behlulelwe ngekwemisebenti yabo, ngekwemtsetfo kanye nangekulunga.

24 Ngoba buka, kulunga kusebentisa tonkhe tidzingo tako, ngalokunjalo nemusa ufuna konkhe lokungekwawo; ngaleyondlela kute namunye kodvwa labo labatisola ngekweliciniso labasindziswako.

25 Ngabe ucabanga kutsi umusa ungakwemuka kulunga na? Ngitsi kuwe, Cha; nakancane nje. Uma kunjalo, Nkulunkulu angayekela kuba nguNkulunkulu.

26 Futsi ngaleyondlela Nkulunkulu wenta tinhloso takhe letinkhulu netaphakadze, letatilungiswe kusukela ekusekelweni kwemhlaba. Futsi ngaleyondlela kweta kusindziswa kanye nekuhlengwa kwebantfu, futsi ngalokunjalo nekubhujiswa kwabo kanye nelusizi.

27 Ngako-ke, Awu ndvodzana yami, loyo loyawukuta angeta futsi anatse emantini ekuphila ngekukhululeka; futsi loyo longeyukuta akanakuphocelelwa kutsi ete; kodvwa ngelusuku lwekugcina kuyawubuyiselwa kuye ngekwetento takhe.

28 Uma bekanesifiso sekwenta lokubi, futsi angaphendvukanga etinsukwini takhe, buka, bubi buyawukwentiwa kuye, njengekubuyisela kwaNkulunkulu.

29 Manje, ndvodzana yami, ngifisa kutsi ungativumeli letintfo kutsi tikukhatsate nanini, vumela kukhatsatwa tono takho kuphela, kukhatsatwa loko lokuyawukwehlisela phansi ekuphendvukeni.

30 Awu Ndvodzana yami, ngifisa kutsi ungaphindzi ukuphike kulunga kwaNkulunkulu nanini. Ungatami kutikhulula nakancane nje ngenca yetono takho, ngekuphika kulunga kwaNkulunkulu; kodvwa vumela kulunga kwaNkulunkulu, nemusa wakhe, kanye nekumela bulukhuni kwakhe kube nemtselela logcwele enhlitiyweni yakho; futsi kuvumele kukuletse phansi elutfulini ngekutitfoba.

31 Manje, Awu ndvodzana yami, ubitwe nguNkulunkulu kutsi ushumayele livi kulaba bantfu. Manje, ndvodzana yami, hamba ngendlela yakho, umemetele livi ngeliciniso kanye nangebucotfo, kute uletse imiphefumulo ekuphendvukeni, kute lisu lelikhulu lemusa libazuze. Futsi shengatsi Nkulunkulu angakupha njengekwemavi ami. Amen.