1 Manje, ndvodzana yami, nginalokutsite lengitawukusho mayelana nekubuyiselwa lokukhulunywe ngako; ngoba, labanye bayiguculile imibhalo lengcwele, futsi baphambukile ngenca yalentfo. Futsi ngiyabona kutsi nengcondvo yakho beyikadze ikhatsatekile mayelana nalentfo. Kodvwa buka, ngitawuchaza loku kuwe.

2 Ngitsi kuwe, ndvodzana yami, lisu lekubuyisela lihambisana nekulunga kwaNkulunkulu; ngoba kusidzingo kutsi tonkhe tintfo tibuyiselwe esimeni sato sangempela. Buka, kusidzingo futsi kulungile, ngekwemandla kanye nekuvuka kwaKhristu, kutsi umphefumulo wemuntfu ubuyiselwe emtimbeni wawo, kanye nekutsi yonkhe incenye yemtimba ibuyiselwe kuwo.

3 Futsi kuhambisana nekulunga kwaNkulunkulu kutsi bantfu behlulelwe ngekwemisebenti yabo; futsi uma imisebenti yabo beyikadze imihle kulemphilo, kanye netifiso tetinhlitiyo tabo betitihle, kumele ngalokunjalo, ngelusuku lwekugcina, babuyiselwe kuloko lokuhle.

4 Futsi uma imisebenti yabo iyebubi iyawubuyiselwa kubo ibubi. Ngako-ke, tonkhe tintfo tiyawubuyiselwa esimeni sato sangempela, yonkhe intfo esicwini sayo semvelo—lokubhubhako kuvuselwe kuloko lokungabhubhi, lokonakalako ekungonakalini—bavuselwe enjabulweni lengapheli kute badle lifa lembuso waNkulunkulu, noma elusizini lolungapheli kute badle lifa lembuso wadeveli, lomunye ngakulolunye luhlangotsi, nalomunye ngakulolunye—

5 Lomunye avuselwe ekujabuleni ngekwetifiso takhe tekujabula, noma lokuhle ngekwetifiso takhe tebuhle; kantsi lomunye ebubini njengekwetifiso takhe tebubi; ngoba njengoba anesifiso sekwenta lokubi ebudzeni bonkhe belusuku kanjalo uyawutfola umvuzo wakhe webubi ngesikhatsi kufika busuku.

6 Futsi kunjalo ngakulolunye luhlangotsi. Uma aphendvukile etonweni takhe, wafisa kulunga kwate kwaba sekupheleni kwetinsuku takhe, kanjalo uyawuzuza kulunga.

7 Ngibo labo labahlengwa yiNkhosi; yebo, ngibo labo labakhishelwa ngaphandle, labakhululwa kulobo busuku lobumnyama lobungapheli; futsi ngaleyondlela bayema noma bawe; ngoba buka, babehluleli babo lucobo, noma kwenta lokuhle noma kwenta lokubi.

8 Manje, timemetelo taNkulunkulu atigucuki; ngako-ke, indlela ilungisiwe kute loyo lotsandzako ahambe ngayo futsi asindziswe.

9 Manje buka, ndvodzana yami, ungabe usangena engotini yebucala ngalokumelene naNkulunkulu wakho mayelana nalawo maphuzu, emfundziso, lowuwephulile ngesikhatsi wenta sono.

10 Ungacabangi, kutsi ngenca yekutsi sekukhulunyiwe mayelana nekubuyisela, kutsi uyawubuyiselwa ususwe esonweni uyiswe ekujabuleni. Buka, ngitsi kuwe, bubi abutange nanini bube yinjabulo.

11 Manje, ndvodzana yami, bonkhe bantfu labasesimeni semvelo, noma ngitawutsi, labasesimeni sekunaka inyama, basekubabeni kwenyongo kanye nasetiphopheni tebubi; bete Nkulunkulu emhlabeni, futsi bahamba ngekuphikisana nemvelo yaNkulunkulu; ngako-ke, basesimeni lesiphikisanako nemvelo yekujabula.

12 Manje buka, ngabe inchazelo yeligama lelitsi kubuyisela kutsatsa intfo lesesimeni semvelo bese uyibeka esimeni lesiphikisana nesemvelo, noma kuyibeka esimeni lesiphikisana nesemvelo yayo na?

13 Awu, ndvodzana yami, akusiko loko; kodvwa inchazelo yeligama lelitsi kubuyisela kuphindze ubuyisele lokubi ngalokubi, noma kwenyama ngekwenyama, noma budeveli ngebudeveli—lokuhle ngaloko lokuhle; lokulungile ngaloko lokulungile; lokunesihawu ngaloko lokusihawu.

14 Ngako-ke, ndvodzana yami, bona kutsi unesihawu kubomnakenu; yenta ngekulunga, hlulela ngekulunga, futsi wente lokuhle njalo-njalo; futsi uma utenta tonkhe leti tintfo uyawutfola umvuzo wakho; yebo, umusa uyawuphindze ubuyiselwe kuwe; nekulunga kuyawuphindze kubuyiselwe kuwe; kwehlulelwa lokulungile kuyawubuyiselwa kuwe futsi; uyawuphindze utfole umvuzo webuhle.

15 Ngoba loko lokutfumelako kuyawubuyela kuwe futsi, kuphindze kubuyiselwe; ngako-ke, ligama lekubuyisela ngalokugcwele liyasilahla ngelicala soni, alisitsetseleli nakancane.