1 Futsi ngalokunjalo, bomnaketfu, ngiyawubhekisa tingcondvo tenu phambili ngesikhatsi iNkhosi Nkulunkulu inika lemiyaleto kubantfwana bayo; futsi ngifuna kutsi nikhumbule kutsi iNkhosi Nkulunkulu yagcoba baphristi, ngekweluhlelo lwayo lolungcwele, lolwalungekweluhlelo lweNdvodzana yayo, kutsi bafundzise leti tintfo kubantfu.

2 Futsi labo baphristi bagcotjwa ngekweluhlelo lweNdvodzana yayo, ngendlela yekutsi bantfu bati kutsi nguyiphi indlela labangabuka ngayo phambili kuyo iNdvodzana yayo kute bahlengwe.

3 Futsi lena yindlela labagcotjwa ngayo—babitiwe futsi balungiselelwa kusukela ekusekelweni kwemhlaba ngelwati lwangaphambilini ngaNkulunkulu, ngenca yelukholo lwabo lolukhulu kanye nemisebenti yabo lemihle; kwekucala bashiywe kutsi batikhetsele lokuhle noma lokubi; ngako-ke bona sebakhetse lokuhle, futsi babe nelukholo lolukhulu kakhulu, babitwa ngelubito lolungcwele, yebo, ngalolobito lolungcwele lolwalulungisiwe, kanye nangekuhlengwa lokulungiselelwe labanjalo.

4 Futsi ngaleyondlela babitelwe kulolubito lolungcwele ngenca yelukholo lwabo, babe labanye bawulahla Moya waNkulunkulu ngenca yebulukhuni betinhlitiyo tabo kanye nebumphumphutse bemicondvo yabo, kantsi, kube bekungesiko kutsi kwakungenca yaloku bebangaba nelilungelo lelikhulu njengabomnakabo.

5 Noma-ke kwephetsa, kwekucala babe sesimeni lesifanako nabomnakabo; ngaleyondlela lolubito lolungcwele lulungisiwe kusukela ekusekelweni kwemhlaba lulungiselwe labo labangeke batente lukhuni tinhlitiyo tabo, lukuyo futsi lungayo inhlawulo yeNdvodzana leTelwe Yodvwa, leyayilungisiwe—

6 Futsi ngaleyondlela babitwe ngalolubito lolungcwele, bagcotjelwa kubo buphristi lobukhulu beluhlelo lolungcwele lwaNkulunkulu, kutsi bafundzise imiyaleto yakhe kubantfwana bebantfu, kute nabo ngalokunjalo bangene ekuphumuleni kwakhe—

7 Lobuphristi lobukhulu bungekweluhlelo lweNdvodzana yakhe, luhlelo loluseloku lwabakhona kusukela ekusekelweni kwemhlaba; noma ngalamanye emavi, lolungenasicalo setinsuku nesiphetfo seminyaka, lulungiswe kusukela phakadze kuya kulolonkhe liphakadze, ngekwati kwakhe ngaphambili kwentintfo tonkhe—

8 Manje bagcotjwa ngalendlela—babitwe ngelubito lolungcwele, futsi bagcotjwa ngesimiso lesingcwele, batsatsa buphristi lobukhulu beluhlelo lolungcwele, lolo bito, nesimiso, kanye nebuphristi lobukhulu, lokungenasicalo nesiphetfo—

9 Ngaleyondlela baba baphristi labakhulu ingunaphakadze, ngekweluhlelo lweNdvodzana, leTelwe Yodvwa yaBabe, lengenasicalo setinsuku nesiphetfo seminyaka, legcwele umusa, kulunga, kanye neliciniso. Futsi kunjalo. Amen.

10 Manje, njengoba ngishilo mayelana neluhlelo lolungcwele, noma ngalobu buphristi lobukhulu, bebabaningi labagcotjwa baba baphristi labakhulu baNkulunkulu; futsi kwakungenca yelukholo lwabo lolukhulu kanye nekuphendvuka kwabo, kanye nekulunga kwabo phambi kwaNkulunkulu, ngenca yekutsi bakhetse kuphendvuka nekwenta kulunga kunekutsi balahleke;

11 Ngako-ke babitwa ngekwalolu luhlelo lolungcwele, bangcweliswa, netingubo tabo tahlantwa taba mhlophe ngengati yeMvana.

12 Manje bona, emvakwekutsi sebangcwelisiwe ngaMoya loNgcwele, tingubo tabo tentiwa taba mhlophe, bamsulwa futsi bangenabala phambi kwaNkulunkulu, abakwatanga kubuka sono ngaphandle kwekusitondza; futsi bebabaningi, babaningi ngalokwendlulele, labebentiwe baba msulwa futsi bangeniswa ekuphumuleni kweNkhosi Nkulunkulu wabo.

13 Manje, bomnaketfu, ngifuna kutsi nititfobe phambi kwaNkulunkulu, niletse titselo letinhle tekuphendvuka, kute nani ningene kuloko kuphumula.

14 Yebo, titfobeni njengebantfu ngetinsuku taMelkhisedeki, naye lobekangumphristi lomkhulu ngekweluhlelo lengikhulume ngalo, naye lowabutsatsa buphristi lobukhulu ingunaphakadze.

15 Futsi bekunguye kanye loMelkhisedeki Abrahama lobekakhokha kuye kwelishumi; yebo, nababe wetfu Abrahama bekakhokha kwelishumi lokuyincenye yinye eshumini kwako konkhe labekanako.

16 Manje leti timiso tatiniketwe ngayo lendlela, kute ngaloko bantfu babuke phambili kuyo iNdvodzana yaNkulunkulu, loko lokwakuluphawu lweluhlelo lwayo, noma lokwakuluhlelo lwayo, futsi ngaloku kute babuke phambili kuyo kute batfole kutsetselelwa kwetono tabo, kute bangene ekuphumuleni kweNkhosi.

17 Manje lo Melkhisedeki bekayinkhosi eveni laseSalema; futsi bantfu bakhe besebakhule bacina ebubini kanye nasetinengisweni; yebo, bonkhe bebadukile, bebagcwele lonkhe luhlobo lwebubi;

18 Kodvwa Melkhisedeki asebentise lukholo lolukhulu, futsi emukele sikhundla sebuphristi lobukhulu ngekweluhlelo lolungcwele lwaNkulunkulu, wakushumayela kuphendvuka kubantfu bakhe. Futsi buka, baphendvuka; futsi Melkhisedeki wenta kwaba nekuthula kulelo live etinsukwini takhe; ngako-ke wabitwa ngenkhosi yekuthula, ngoba bekayinkhosi yaseSalema; futsi wabusa ngaphansi kweyise.

19 Manje, bebabaningi ngaphambi kwakhe, ngetulu kwaloko bebabaningi nasemuva kwaloko, kodvwa kwakute namunye lobekamendlula ngebukhulu; ngako-ke, babhala lokukhetsekile ngaye.

20 Manje akudzingeki ngiyiphindzaphindze lendzaba; loko lesengikushito sekwanele. Bukani, imibhalo lengcwele iphambi kwenu; uma niyihlanekela loko kuyawubangela kubhujiswa kwenu.

21 Manje kwenteka kutsi ngesikhatsi Alima sekawashito lamavi kubo, welulela sandla sakhe kubo wamemeta ngelivi lelikhulu, watsi: Manje sesikhatsi sekuphendvuka, ngoba lusuku lwekusindziswa selusondzele.

22 Yebo, futsi livi leNkhosi, ngemlomo wetingilosi, liyakumemetela loku kuto tonkhe tive; yebo liyakumemetela, kute tive tindzaba letitfokotisako tekujabula lokukhulu; yebo, futsi iyatimemetela leti tindzaba letitfokotisako emkhatsini webantfu bonkhe, yebo, nakubo labo labasakatwe ndzawotonkhe etikwebuso bemhlaba, ngaloko-ke setifikile kitsi.

23 Futsi tatiswa kitsi ngalokucacile, kute siticondze, kute singaphambuki; futsi loku kwentiwa ngenca yekutsi singulabazulazulako eveni lelingatiwa; ngako-ke, ngaleyondlela sitsandvwe kakhulu, ngoba sitivile leti tindzaba letitfokotisako timenyetelwa kitsi kuto tonkhe tincenye tesivini setfu.

24 Ngoba bukani, tingilosi tiyatimemetela kulabaningi ngalesi sikhatsi eveni letfu; futsi loku kungesizatfu sekulungiselela tinhlitiyo tebantfwana bebantfu kutsi bemukele livi layo ngesikhatsi sekuta kwayo enkhatimulweni yayo.

25 Manje sesilindzele kuphela kuva tindzaba letijabulisako timenyetelwa kitsi ngemlomo wetingilosi, ngekuta kwayo; ngoba sikhatsi siyeta, asati kutsi sisedvute kangakanani. Ngiyacela kuNkulunkulu kutsi kube kungelusuku lwami; kodvwa kube madvutane noma emvakwesikhashana, kuko nitawutfokota.

26 Futsi kuyawukwatiswa kubantfu labalungile nalabangcwele, ngemlomo wetingilosi, ngesikhatsi sekuta kwayo, kute emavi abobabe betfu agcwaliseke, ngekwaloko labakukhulumile mayelana nayo, lokwakungesiphrofetho semoya lowawukubo.

27 Manje, bomnaketfu, nginesifiso ekujuleni kwenthlitiyo yami, yebo, ngenshisekelo lenkhulu nangebuhlungu, kutsi niweve emavi ami, nitilahle tono tenu, futsi ningaluhlehlisi lusuku lwekuphendvuka kwenu.

28 Kodvwa nititfobe phambi kweNkhosi, futsi nibite ligama layo lelingcwele, nilindze futsi nithandaze njalonjalo, kute ningalingwa ngetulu kwaloko leningakubeketelela, futsi ngaleyondlela niholwe nguMoya loNgcwele, nititfobe, nitehlise, nivume, nibeketele, nigcwale lutsandvo kanye nako konkhe kumela bulukhuni.

29 Ninelukholo eNkhosini; ninelitsemba lekutsi niyawuzuza kuphila lokuphakadze; ninelutsandvo lwaNkulunkulu njalo etinhlitiyweni tenu, kute niphakanyiswe ngelusuku lwekugcina futsi ningene ekuphumuleni kwakhe.

30 Futsi shengatsi iNkhosi inganinika kuphendvuka, kute ningayehliseli intfukutselo yayo etikwenu, kute ningaboshelwa phansi ngetinketane tesihogo, kute ningakuva kufa kwesibili.

31 Futsi Alima wakhuluma emavi lamaningi kakhulu kulabantfu, langakabhalwa kulencwadzi.