Sehluko 33
Zenoshe wafundzisa kutsi bantfu kumele bathandaze futsi bakhonte kuto tonkhe tindzawo, nekutsi tehlulelo tiyesuswa ngenca yeNdvodzana—Zenokhi wafundzisa kutsi umusa unikwa ngenca yeNdvodzana—Mosi waphakamisa ehlane luphawu lweNdvodzana yaNkulunkulu. Cishe ngemnyaka wa 74 ngaphambi kwekutalwa kwaKhristu.
1 Manje emvakwekutsi Alima sekawakhulumile lamavi, batfumela kuye banesifiso sekwati kutsi ngabe kumele bakholwe Nkulunkulu munye yini, kute batfole lesi sitselo labekakhulume ngaso, noma kutsi bangayihlanyela kanjani inhlanyelo, noma livi lelo labekakhulume ngalo, labekatse kumele lihlanyelwe etinhlitiyweni tabo; noma bangacala kanjani kusebentisa lukholo lwabo.
2 Alima watsi kubo: Bukani, nitsite anikwati kukhonta Nkulunkulu wenu ngoba niyacoshwa emasinagogeni enu. Kodvwa bukani, ngitsi kini, uma nicabanga kutsi aninakuvunyelwa kukhonta Nkulunkulu, nenta siphosiso lesikhulu, futsi kufanele niphenye imibhalo lengcwele; uma nicabanga kutsi ngiyo lenifundzise loku, aniyicondzi
3 Niyakhumbula nifundza loko Zenoshi, umphrofethi wasendvulo, lakusho mayelana nekuthandaza noma kukhonta na?
4 Ngoba watsi: Unesihawu, Awu Nkulunkulu, ngoba uwuvile umthandazo wami, noma bengisehlane; yebo, waba nesihawu ngesikhatsi ngithandaza mayelana nalabo labebatitsa tami, futsi wabaguculela kimi.
5 Yebo, Awu Nkulunkulu, waba nesihawu kimi ngesikhatsi ngikhala kuwe ngisensimini yami; ngesikhatsi ngikhala kuwe emthandazweni wami, wangiva.
6 Ngetulu kwaloko, Awu Nkulunkulu, ngesikhatsi ngiya endlini yami wangiva emthandazweni wami.
7 Ngesikhatsi ngiya egumbini lami, Awu Nkhosi, ngithandaza kuwe, wangiva.
8 Yebo, unesihawu kubantfwana bakho uma bakhala kuwe, kutsi baviwe nguwe hhayi bantfu, futsi utawubeva.
9 Yebo, Awu Nkulunkulu, ube nesihawu kimi, wakuva kukhala kwami emkhatsini wemabandla akho.
10 Yebo, ngetulu kwaloko ungivile ngesikhatsi ngikhala ngikhishelwe ngephandle phindze ngihlekwa titsa tami; yebo, wakuva kukhala kwami, watitfukutselisa titsa tami, wativakashela ngentfukutselo yakho ngembubhiso losheshako.
11 Wangiva ngenca yetinhlupheko tami kanye nekwetsembeka kwami; futsi kungenca yeNdvodzana yakho kutsi ube nesihawu ngalendlela kimi, ngako-ke ngitawukhala kuwe kuto tonkhe tinhlupheko tami, ngoba kujabula kwami kukuwe; ngoba wena utisusile tehlulelo takho kimi, ngenca yeNdvodzana yakho.
12 Manje Alima watsi kubo: Niyayikholwa yini leyo mibhalo lengcwele leyabhalwa ngulabo basendvulo na?
13 Bukani, uma niyikholwa, kumele nikukholwe lokwashiwo nguZenoshe; ngoba, bukani watsi: Utisusile tehlulelo takho ngenca yeNdvodzana yakho.
14 Manje bukani, bomnaketfu, ngitawunibuta kutsi niyifundzile yini imibhalo lengcwele na? Uma niyifundzile, kungani ningakholelwa kuyo iNdvodzana yaNkulunkulu na?
15 Ngoba akukabhalwa kutsi nguZenoshe kuphela lowakhuluma ngaletintfo, kodvwa naZenokhi ngalokunjalo naye wakhuluma ngaleti tintfo—
16 Ngoba bukani, watsi: Ubatfukutselele, Awu Nkhosi, labantfu, ngenca yekutsi abafuni kuwucondza umusa wakho lobanike wona ngenca yeNdvodzana yakho.
17 Manje, bomnaketfu, niyabona kutsi umphrofethi wesibili wasendvulo ufakazile ngeNdvodzana yaNkulunkulu, futsi ngenca yekutsi bantfu bebangafuni kuwacondza lamavi akhe bamgcoba ngematje wate wafa.
18 Kodvwa bukani, loku akusiko konkhe; laba akusibo kuphela labakhulumile mayelana neNdvodzana yaNkulunkulu.
19 Bukani, wakhuluma ngayo naMosi; yebo, futsi bukani luphawu lwaphakanyiswa ehlane, kutsi loyo loyawulubuka angaphila. Labaningi babuka baphila.
20 Kodvwa bambalwa labayicondza inchazelo yaleti tintfo, futsi loku kwakungenca yebulukhuni betinhlitiyo tabo. Kodvwa bebabaningi labebalukhuni kakhulu kangangekutsi abafunanga kubuka, ngako-ke bafa. Manje sizatfu sekutsi bangabuki kungoba bebangakholwa kutsi lwalungabaphilisa.
21 Awu bomnaketfu, uma beningaphiliswa kubuka nje ngemehlo enu kute niphile, beningeke yini nibuke ngekushesha na, noma beningamane nitente lukhuni tinhlitiyo tenu ngekungakholwa na, futsi nivilaphe, kutsi ningabuka ngemehlo enu, kute nife na?
22 Uma kunjalo, sicalekiso siyawufika etikwenu; kodvwa uma kungenjalo, phonsani emehlo enu ngala nangala nicale kukholwa kuyo iNdvodzana yaNkulunkulu, kutsi itawufika itawuhlenga bantfu bayo, nekutsi iyawuhlupheka iphindze ife kute ihlawulele tono tabo; nekutsi iyawuphindze ivuke kulabafile, lokuyawufeza kuvuka, kute bonkhe bantfu beme phambi kwayo, kute behlulelwe ngelusuku lwekugcina kanye nelekwehlulela, ngekwemisebenti yabo.
23 Manje, bomnaketfu, ngifisa kutsi nilihlanyele lelivi etinhlitiyweni tenu, ngesikhatsi selicala kukhukhumuka londleni ngelukholo lwenu. Bukani, litawuba sihlahla, lesiyawukhula kini sibe kuphila lokuphakadze. Shengatsi ngaleso sikhatsi Nkulunkulu anganinika kutsi imitfwalo yenu ibe melula, ngenjabulo yeNdvodzana yakhe. Futsi konkhe loko ningakwenta uma nje nitsandza. Amen.