Sehluko 54
Amoroni naMoroni bacocisana ngekushintjiselana ngetiboshwa—Moroni ufuna kutsi emaLamani ahocise futsi ayekele kuhlasela kwawo ngekubulala—Amoroni ufuna kutsi emaNefi abeke phansi tikhali tawo bese aba ngephansi kwemaLamani. Cishe ngemnyaka wa 63 ngaphambi kwekutalwa kwaKhristu.
1 Manje kwenteka kutsi ekucaleni kwemnyaka wemashumi lamabili nemfica webehluleli, Amoroni watfumela kuMoroni afisa kutsi ashintjise ngetiboshwa.
2 Futsi kwenteka kutsi Moroni wativa anekujabula lokukhulu ngalesi sicelo, ngoba bekafuna imiphako leyayiniketwe kutsi yondle tiboshwa temaLamani kutsi yondle bantfu bakhe; futsi aphindze afuna bantfu bakhe kutsi bacinise libutfo lakhe.
3 Manje emaLamani bekatsetse besifazane labaningi kanye nebantfwana, kantsi kwakute namunye wesifazane noma umntfwana emkhatsini wato tonkhe tiboshwa taMoroni, noma tiboshwa Moroni bekatitsetse; ngako-ke Moroni wenta sincumo ngekutsi ente licebo lekutsi atfole tiboshwa temaNefi letiningi kunemaLamani kangangoba kwakungenteka.
4 Ngako-ke wabhala incwadzi, wayitfumela ngenceku ya-Amoroni, yona kanye leyo leyayiletse incwadzi kuMoroni. Manje lawa ngemavi lawabhalela Amoroni, atsi:
5 Buka, Amoroni, ngikubhalele lokutsite mayelana nalemphi leniyichubile ngalokumelene nebantfu bami, noma-ke umnakenu layichubile ngalokumelene nabo, futsi lenisatimisele kuyichuba emvakwekufa kwakhe.
6 Buka, ngitawukutjela lokutsite mayelana nekulunga kwaNkulunkulu, kanye nenkemba yentfukutselo yakhe lenemandla onkhe, lelengela kini ngaphandle kwekutsi niphendvuke futsi nihocise emabutfo enu emaveni enu, noma eveni lekungelenu, lokulive lemaNefi.
7 Yebo, bengitawukutjela letintfo kube bewungakhona kutilalela; yebo, bengitawukutjela mayelana naleso sihogo lesibi lesilindzele kwemukela babulali labanjengawe kanye nemnakenu, ngaphandle kwekutsi niphendvuke futsi nihocise tinhloso tenu tekubulala, nibuyele nemabutfo enu emaveni enu.
8 Kodvwa njengoba nake natilahla letintfo, futsi nalwa nebantfu beNkhosi, ngilindzele kutsi nitawukwenta loko futsi.
9 Manje buka, sikulungele kuhlangana nani; yebo, futsi ngaphandle kwekutsi nihocise tinhloso tenu, buka, nitawudvonsela phansi intfukutselo yaloyo Nkulunkulu lenimlahlile, kute kube sekubhujisweni kwenu nonkhe.
10 Kodvwa, njengoba iNkhosi iphila, emabutfo etfu atawukuta kini ngaphandle kwekutsi nihocise, futsi masinyane nitawuvakashelwa ngekufa, ngoba sitawuwagcina emadolobha etfu kanye nemihlaba yetfu; futsi sitawuyigcina inkholo yetfu kanye netindlela taNkulunkulu
11 Kodvwa buka, kubukeka kimi kungatsi leti tintfo lengitikhuluma nawe tilite; noma kubukeka kimi kungatsi ungumntfwana wesihogo; ngako-ke ngitawuyivala incwadzi yami ngekukutjela kutsi anginawutishintjisa tiboshwa, ngaphandle kwembandzela wekutsi nitawukhulula indvodza nemkayo kanye nebantfwana bayo, ngesiboshwa sinye; uma nikwenta loku, ngitawushintjisa.
12 Futsi buka, uma ningakwenti loku, ngitawunihlasela nemabutfo ami, yebo, ngitawuhlomisa ngisho nebesifazane kanye nebantfwana bami, futsi ngitawukuta ngilwe nani, ngitawunilandzela ngisho eveni lenu, lokulive lelilifa letfu lekucala; yebo, futsi kuyawuba yingati ngengati, yebo imphilo ngemphilo; ngitawukulwa nani nite nibulawe nisuswe emhlabeni.
13 Buka, ngitfukutsele, kanjalo nebantfu bami; nifune kusibulala, tsine sifune kutivikela kuphela. Kodvwa buka, uma nisafuna kusibulala natsi sitawufuna kunibulala; yebo, futsi sitawulifuna live letfu, live lelilifa letfu lekucala.
14 Manje ngiyayivala incwadzi yami; NginguMoroni; ngingumholi webantfu bemaNefi.
15 Manje kwenteka kutsi Amoroni, ngesikhatsi asayitfolile lencwadzi, watfukutsela; wabhala lenye incwadzi leya kuMoroni, futsi lawa ngemavi lawabhala, atsi:
16 Ngingu-Amoroni, inkhosi yemaLamani; ngingumnakabo-Amalikhiya lenambulala. Buka, ngitawuyiphindzisela ingati yakhe kini, yebo, futsi ngitawunihlasela nemabutfo ami ngoba angikwesabi kusonga kwakho.
17 Ngoba buka, boyihlo babona bomnakabo, kangangekutsi babancisha lilungelo labo lekubusa ekubeni lalilabo.
18 Manje buka, uma ningabeka phansi tikhali tenu, bese nitiletsa ngaphansi kwalabo umbuso lowungewabo ngekwemtsetfo, ngitawukwenta kutsi bantfu bami babeke phansi tikhali tabo futsi bangabe basalwa nanini.
19 Buka, usonge kakhulu ngalokumelene nami kanye nebantfu bami; kodvwa buka, asikwesabi kusonga kwakho.
20 Noma kunjalo, ngitawuvuma kutsi sishintjiselane tiboshwa njengekwesicelo sakho, ngentfokoto, kute ngigcinele emadvodza ami emphi kudla; futsi sitawuchuba imphi lengeke iphele, kute siletse emaNefi ngaphansi kwetfu noma aphele ingunaphakadze.
21 Mayelana naloyo Nkulunkulu lotsi simlahlile, buka, asati lutfo ngaloyo muntfu; ngisho nani imbala; kodvwa uma kungenteka kutsi ukhona umuntfu lonjalo, asati kodvwa kungenteka usidalile njengani.
22 Futsi uma kungenteka kutsi ukhona develi kanye nesihogo, buka angeke yini akutfumele lapho kutsi uyawuhlala kanye nemnaketfu lenimbulele, lophawule ngaye kutsi uye endzaweni lenjalo na? Kodvwa buka leti tintfo atinamsebenti.
23 Ngingu-Amoroni, futsi ngiwesitukulwane saZoramu, boyihlo labamphocelela futsi bamkhipha eveni laseJerusalema.
24 Buka manje, ngingumLamani lonesibindzi; buka, lemphi ichutjelwe kutsi iphindzisele koniwa kwabo, nekugcina iphindze ibuyisele emalungelo abo kutsi babuse; futsi ngiyayivala lencwadzi yami leya kuMoroni.