Sehluko 40
Khristu ufeza kuvuka kwebantfu bonkhe—Labafile labalungile baya epharadisi kutsi lababi baye ebumnyameni lobungaphandle kute bayolindzela lusuku lwekuvuka—Tonkhe tintfo titawubuyiselwa esicwini sato lesifanele kanye nalesiphelele ngeKuvuka. Cishe ngemnyaka wa 74 ngaphambi kwekutalwa kwaKhristu.
1 Manje ndvodzana yami, naku lokunye lokumbalwa lengitawukusho kuwe; ngoba ngiyabona kutsi umcondvo wakho ukhatsatekile mayelana nekuvuka kwalabafile.
2 Buka, ngitsi kuwe, kute kuvuka—noma, ngingatsi, ngalamanye emavi, lomtimba lobhubhako awukwembatsi kungabhubhi, loku kubola akukwembatsi kungaboli—kute kube semvakwekuta kwaKhristu.
3 Buka, ufeza kuvuka kwalabafile. Kodvwa buka, ndvodzana yami, kuvuka akukafiki. Manje, ngikwembulela imfihlakalo, noko, tiningi timfihlakalo letigciniwe, lekute namunye lotatiko ngaphandle kwaNkulunkulu lucobo. Kodvwa ngitawukukhombisa intfo yinye nje lengiyibute ngekukhutsala kuNkulunkulu kutsi ngiyati—lemayelana nekuvuka.
4 Buka, kunesikhatsi lesibekiwe lapho bonkhe bayawuvuka kulabafile. Manje kutsi lesi sikhatsi sifika nini kute lowatiko; kodvwa Nkulunkulu uyati sikhatsi lesibekiwe.
5 Manje, noma kuyawuba khona sikhatsi lesisodvwa, noma sikhatsi sesibili, noma sikhatsi sesitsatfu, lapho bantfu bayawuvuka kulabafile, akusho lutfo; ngoba Nkulunkulu uyatati tonkhe letintfo; futsi kuyangenelisa kutsi ngati kutsi nguloku lokutawukwenteka—kutsi kukhona sikhatsi lesibekiwe sekutsi bonkhe bayawuvuka kulabafile.
6 Manje kufanele kutsi kubekhona sikhatsi emkhatsini wesikhatsi sekufa kanye nesikhatsi sekuvuka.
7 Manje ngitawubuta kutsi kwentekani ngemiphefumulo yebantfu kusukela kulesi sikhatsi sekufa kute kube sikhatsi lesibekiwe sekuvuka na?
8 Manje noma ngabe kunesikhatsi lesingetulu kwasinye lesibekelwe bantfu kutsi bavuke loko akusho lutfo; ngoba abafi ngesikhatsi sinye, futsi loku akusho lutfo; konkhe kunjengelusuku lunye kuNkulunkulu, futsi sikhatsi sibalwa bantfu kuphela.
9 Ngako-ke, kukhona sikhatsi lesibekelwe bantfu kutsi bayawuvuka kulabafile; futsi kunesikhatsi emkhatsini wesikhatsi sekufa kanye nesekuvuka. Manje, mayelana nalesi sikhatsi, kutsi kwentekani ngemiphefumulo yebanftu yintfo lengiyibutile ngekukhutsala eNkhosini kutsi ngiyati; futsi lena yintfo lengiyatiko.
10 Uma sikhatsi sesifika lapho bonkhe bayawuvuka, ngaleso sikhatsi bonkhe bayawukwati kutsi Nkulunkulu uyatati tonkhe tikhatsi latibekele umuntfu.
11 Manje, mayelana nesimo semphefumulo emkhatsini wekufa kanye nekuvuka—Buka, kwembuliwe kimi ngengilosi, kutsi imiphefumulo yabo bonkhe bantfu, masinyane ngesikhatsi nje uma isuka kulomtimba lobhubhako, yebo, imiphefumulo yabo bonkhe bantfu, noma ngabe beyimihle noma beyimibi, iyatsatfwa iyiswe ekhaya kuloyo Nkulunkulu lowayinika imphilo.
12 Futsi ngaleso sikhatsi kuyawukwenteka, kutsi imiphefumulo yalabo labalungile yemukelwa esimeni senjabulo, lesibitwa ngekutsi yipharadisi, simo sekuphumula, simo sekuthula, lapho iyawuphumula kuto tonkhe tinkhatsato tayo kanye nako konkhe lokuhlupheka, kanye nelusizi.
13 Ngaleso sikhatsi kuyawukwenteka, kutsi imiphefumulo yalababi, yebo, labo labanebubi—ngoba buka, bete sabelo saMoya weNkhosi; ngoba buka, bona bakhetsa imisebenti yebubi kunemisebenti lemihle; ngako-ke umoya wadeveli wangena kubo, watsatsa indlu yabo yaba ngeyakhe—lena iyawulahlwa ebumnyameni lobungaphandle; lapho kuyawuba khona kukhala, nekulila kanye nekugedla kwematinyo, futsi loku kungenca yebubi babo, baholelwe ekutfunjweni ngentsandvo yadeveli.
14 Manje lesi simo semiphefumulo yalababi, yebo, lesebumnyameni, kanye nasesimeni lesibi kakhulu, sekulindzela ngekwesaba kushiswa yintfukutselo yelulaka lwaNkulunkulu; ngako-ke bahlala bakulesi simo, kanjalo nalabalungile epharadisi, kute kube sikhatsi sekuvuka kwabo.
15 Manje, kukhona labanye labasicondzako kutsi lesi simo senjabulo kanye nalesi simo sekuhlupheka kwemphefumulo, lesingaphambi kwekuvuka, sikuvuka kwekucala. Yebo, ngiyavuma kutsi singabitwa ngekuvuka, kuvuswa kwemoya noma kwemphefumulo kanye nekuyiswa kwawo ekujabuleni noma elusizini, njengekwemavi lakhulunyiwe.
16 Futsi buka, kukhulunyiwe phindze, kwatsiwa kukhona kuvuka kwekucala, kuvuka kwabo bonkhe labo labebakhona, noma labakhona, noma labayawuba khona, kwehle kute kufike ekuvukeni kwaKhristu kulabafile.
17 Manje, asikholelwa kutsi lokuvuka kwekucala, lokukhulunywa ngako ngalendlela, kungaba kuvuka kwemiphefumulo kanye nekuyiswa kwayo ekujabuleni noma elusizini. Ungakholelwa kutsi loku kusho loko.
18 Buka, ngitsi kuwe, Cha; kodvwa kuchaza kuhlangana kwemphefumulo kanye nemtimba, walabo kusukela etinsukwini ta-Adamu kwehla kuya ekuvukeni kwa-Khristu.
19 Manje, noma ngabe imiphefumulo kanye nemitimba yalabo losekukhulunywe ngabo yonkhe iyawuhlanganiswa kanyekanye, lababi ngalokunjalo nalabalungile, angisho; akukwenelise, kutsi ngitsi yonkhe iyawuvuka, noma-ke ngalamanye emavi, kuvuka kwabo kuyawufezeka ngaphambi kwekuvuka kwalabo labafa emvakwekuvuka kwaKhristu.
20 Manje, ndvodzana yami, angisho kutsi kuvuka kwabo kuyawufika ngekuvuka kwaKhristu; kodvwa buka, ngikusho nje njengembono wami, kutsi imiphefumulo kanye nemitimba iyawuhlangana futsi, yalabalungile, ekuvukeni kwaKhristu, kanye nasekwenyukeni kwakhe ezulwini.
21 Kodvwa noma ngabe kuyawuba sekuvukeni kwakhe noma ngemuva, angisho; kodvwa nguloku lengingakusho, kutsi kukhona sikhatsi emkhatsini wekufa kanye nekuvuka kwemtimba, kanye nesimo semphefumulo lesisekujabuleni noma lesiselusizini kute kube sikhatsi leso lesibekwe nguNkulunkulu kutsi labafile bavuke, baphindze bahlangane, umphefumulo kanye nemtimba, baphindze baletfwe kutsi batokuma ngaphambi kwaNkulunkulu, behlulelwe ngekwemisebenti yabo.
22 Yebo, loku kuletsa kubuyisela kwaletintfo lokwakhulunywa ngato ngemilomo yebaphrofethi.
23 Umphefumulo uyawubuyiselwa emtimbeni, kanye nemtimba emphefumulweni; yebo, futsi tonkhe titfo kanye nemalunga kuyawubuyiselwa emtimbeni wako; yebo, ngisho nelunwele lwasenhloko aliyikulahleka; kodvwa tonkhe tintfo tiyawubuyiselwa esicwini sato lesingiso nalesiphelele.
24 Manje, ndvodzana yami, loku kubuyisela lokukhulunywe ngako ngemilomo yebaphrofethi—
25 Futsi ngaleso sikhatsi labalungile bayawukhatimula embusweni waNkulunkulu.
26 Kodvwa buka, kufa lokubi kakhulu kuyeta kulababi; ngoba bona bayawukufa ngekwetintfo letiphatselene netintfo tekulunga; ngoba bona bangcolile, futsi ayikho intfo lengcolile lengakwati kudla lifa lembuso waNkulunkulu; kodvwa bayokhishelwa ngaphandle, futsi bahanjiswe bayodla titselo tekusebenta kwabo noma temisebenti yabo, leyinkhohlakalo; futsi banatse tidzidzi enkomishi lebabako.