1 Futsi kwenteka kutsi waphindze wabhalela umbusi welive, lobekanguPhahorani, lawa ngemavi lawabhala, atsi: Buka, ngicondzisa incwadzi yami kuPhahorani, edolobheni laseZarahemla, longumehluleli lomkhulu kanye nembusi eveni lonkhe, kanjalo nakubo bonkhe labo labakhetfwe ngulabantfu kutsi babuse futsi baphatse tindzaba talemphi.

2 Ngoba buka, nginalokutsite lengitawukusho kubo ngendlela yekubasola; ngoba buka, nine lucobo lwenu niyati kutsi nibekwe kutsi nibutsele ndzawonye emadvodza, futsi niwahlomise ngetinkemba, nangabocelemba, kanye nangato tonkhe tikhali temphi letitinhlobonhlobo, futsi niwatfumele ayawukulwa nemaLamani, nanoma ngutiphi tincenye langangena kuto eveni letfu.

3 Manje bukani, ngitsi kini mine, nemadvodza ami, kanjalo naHilamani kanye nemadvodza akhe, sive kuhlupheka lokukhulu kakhulu; yebo, kulamba, koma, nekukhatsala, kanye nako konkhe kuhlupheka lokutinhlobonhlobo.

4 Kodvwa bukani, kube bekunguloku kodvwa kuhlupheka lesibe nako besingeke sivungame noma sikhonone.

5 Kodvwa bukani, kube kukhulu kubulawa emkhatsini webantfu betfu; yebo, tinkhulungwane tife ngenkemba, lobekungeke kube njalo kube emabutfo etfu niwanike emandla kanye nelusito lolwanele. Yebo, kube kukhulu kusibukelela kwenu.

6 Manje bukani, sifuna kwati imbangela yaloku kusibukelela lokukhulu kangaka; yebo, sifuna kwati imbangela yekungasicabangeli kwenu.

7 Ningafuna kuhlala etihlalweni tenu tebukhosi nisesimeni sekungacabangi, tibe titsa tenu tisakata umsebenti wekufa ndzawo tonkhe na? Yebo, tibe tibulala tinkhulugwane tabomnakenu—

8 Yebo, nalabo labebatsembe kuvikelwa ngini, yebo, banibeke esimeni sekutsi ngabe nibanike lusito, yebo, ngabe nitfumele emabutfo kubo, kute abacinise, futsi ngabe nisindzise tinkhulungwane tabo ekufeni ngenkemba.

9 Kodvwa bukani, loku akusiko kodvwa—niyigodlile imiphako yenu kubo, kangangekutsi labaningi balwile futsi bopha bate bafa ngenca yetifiso tabo letinkhulu labebanato tekutsi kuzuze laba bantfu; yebo, futsi loku bakwente ngesikhatsi sebatoshabalaliswa yindlala, ngenca yekubabukelela kwenu lokukhulu.

10 Manje, bomnaketfu labatsandzekako—ngoba kufanele nitsandzeke; yebo, futsi bekufanele ngabe nitikhatsatile kakhulu ngenhlalakahle kanye nangenkhululeko yalabantfu; kodvwa bukani, nibabukelele kangangekutsi ingati yetinkhulungwane iyawukuta etikwetinhloko tenu kutiphindziselela; yebo, ngoba Nkulunkulu uyakwati konkhe kukhala kwabo, kanye nato tonkhe tinhlupheko tabo—

11 Bukani, nicabanga kutsi ningahlala etihlalweni tenu tebukhosi, bese ngenca yebuhle lobukhulu baNkulunkulu ningenti lutfo futsi yena bese uyanikhulula na? Bukani, uma nicabanga loku nicabange lite lelite.

12 Nicabanga kutsi, njengoba babaningi kangaka labomnakenu labafa kungenca yebubi babo na? Ngitsi kini, uma nicabanga kanjalo nicabanga lite; ngoba ngitsi kini, baningi labafe ngenkemba; futsi bukani nitawubekwa licala ngaloko;

13 Ngoba iNkhosi ivumela labalungile kutsi babulawe kute kulunga kwayo nekwehlulela kute kulababi; ngako-ke akukafaneli nicabange kutsi labalungile balahlekile ngoba babulewe; kodvwa bukani, bangena ekuphumuleni kweNkhosi Nkulunkulu wabo.

14 Manje bukani, ngitsi kini, ngiyesaba kakhulu kutsi tehlulelo taNkulunkulu titawukuta etikwalabantfu, ngenca yebuvila babo lobukhulu, yebo, nebuvila bembuso wetfu, kanye nekubabukelela kwabo lokukhulu kakhulu bomnakabo, yebo, labo lababulewe.

15 Ngoba kube bekungasiko ngenca yebubi lobucale kucala enhloko yetfu, besingamelana netitsa tetfu kangangekutsi betingeke tiwatfole emandla etikwetfu.

16 Yebo, kube bekungasiko ngenca yemphi leyaba khona emkhatsini wetfu; yebo, kube bekungasiko ngenca yalabantfu benkhosi, lababanga kucitseka kwengati leningi kangaka emkhatsini wetfu; yebo, ngesikhatsi silwa sodvwa, kube sahlanganisa emandla etfu njengoba besentile phambilini; yebo, kube bekungasiko ngenca yekufuna emandla kanye neligunya kulabo bantfu benkhosi ngetulu kwetfu; kube bekatsembekile emzabalazweni wenkhululeko yetfu, futsi ahlangana natsi, ahamba ayawukulwa netitsa tetfu, esikhundleni sekutsatsela tsine tinkemba tabo, lokwaba yimbangela yekucitseka kwengati leningi kangaka emkhatsini wetfu; yebo, kube sihambe sayawukulwa nato ngemandla eNkhosi, besiyawutihlakata titsa tetfu, ngoba bekuyawukwenteka, njengekugcwaliseka kwelivi layo.

17 Kodvwa bukani, manje emaLamani eta kitsi, atitsatsela emave etfu, futsi abulala bantfu betfu ngenkemba, yebo, besifazane betfu kanye nebantfwana betfu, futsi ngetulu kwaloko ayabatfwala ayobatfumba, ababangele kutsi beve tonkhe tinhlobo tetinhlupheko, futsi loku kwenteka ngenca yebubi lobukhulu balabo labafuna emandla kanye nemagunya, yebo, ngisho labo bantfu benkhosi.

18 Kodvwa kuyangani ngikhulume kangaka mayelana naloludzaba? Ngoba asati kodvwa kungenteka kutsi nani lucobo nifuna emagunya. Asati kodvwa kungenteka kutsi nani futsi nibatsengisi eveni lenu.

19 Noma nisibukelele ngoba nisenkhabeni yelive letfu nitungeletwe bavikeli, kutsi ningenti kutsi kudla kuletfwe kitsi, kanjalo nemadvodza kutsi atawucinisa emabutfo etfu na?

20 Ngabe seniyikhohliwe yini imiyaleto yeNkhosi yenu Nkulunkulu na? Yebo, ngabe senikukhohliwe yini kutfunjwa kwabobabe betfu na? Ngabe senitikhohliwe yini tikhatsi letiningi sikhululwa etandleni tetitsa tetfu na?

21 Noma nicabanga kutsi iNkhosi isetawuphindza isikhulule, sibe tsine sihleti etihlalweni tetfu tebukhosi futsi sibe singawasebentisi emasu iNkhosi lesinikete wona na?

22 Yebo ngabe nitawuhlala ebuvileni nibe nitungeletwe tinkhulungwane talabo, yebo, kanye nemashumi etinkhulungwane, nabo futsi ngalokunjalo labahleti ebuvileni, kube kukhona tinkhulungwane etindzaweni tonkhe eminceleni yelive letifa ngenkemba, yebo, letilimele futsi letophako na?

23 Ngabe nicabanga kutsi Nkulunkulu angeke anibeke licala yini uma nihleti futsi nitibukela letintfo tenteka na? Bukani ngitsi kini, Cha. Manje ngifuna kutsi nikhumbule kutsi Nkulunkulu utsite lingekhatsi lesitja liyawuhlantwa kucala, bese emvakwaloko nelingephandle lesitja seliyahlantwa.

24 Manje ngaphandle kwekutsi niphendvuke kuloko lenikwentile, futsi nicale nisukume futsi nente, nitfumele kitsi kudla kanye nemadvodza, kanjalo nakuHilamani, kute naye asekele leto tincenye telive letfu laphindze watitfola, kute natsi ngalokunjalo sitfole futsi timphahla tetfu letisele kuleti tincenye, bukani kutawudzingeka kutsi singabe sisalwa nemaLamani site sihlante kucala lingekhatsi letfu, yebo, ngisho nebaphatsi labakhulu labaphetse umbuso wetfu.

25 Futsi ngaphandle kwekutsi ninginike lelengikucele encwadzini yami, futsi niphumele ebaleni ningikhombise umoya weliciniso wenkhululeko, niphokophele kukhulisa kanye nekucinisa emabutfo etfu, futsi niwanikete kudla kwekuwasekela, bukani ngitawushiya incenye yebantfu bami benkhululeko kutsi bagcine lencenye yelive letfu, futsi ngitawushiya emandla kanye netibusiso taNkulunkulu etikwabo, kute kubebete lamanye emandla langasebenta kulwa nabo—

26 Futsi loku ngenca yelukholo lwabo lolukhulu, kanye nekubeketela kwabo etinkhatsatweni tabo—

27 Ngitawuta kini, futsi uma kukhona loyo emkhatsini wenu lonesifiso senkhululeko, yebo, uma nje kungaba khona nenhlasi nje yenkhululeko lesele, bukani ngitawuphehla lutfutfuva emkhatsini wenu, kute kutsi labo labanetifiso tekutsatsa emandla kanye neligunya baphele nya.

28 Yebo, bukani angiwesabi emandla enu noma emagunya enu, kodvwa nguNkulunkulu wami lengimesabako; futsi kungemiyaleto yakhe kutsi ngitsatse inkemba yami kute ngivikele lokufunwa live lami, futsi kungenca yekungalungi kwenu kutsi sibe nekulahlekelwa lokungaka.

29 Bukani sesikhatsi, yebo, sikhatsi manje sesifikile, sekutsi ngaphandle kwekutsi nivuke nivikele live lenu kanye nalabancane benu, inkemba yekulunga ilengela etikweni; yebo, futsi itawuwela etikwenu futsi inivakashele nite nibhujiswe nya.

30 Bukani, ngilulindzele lusito lweni, futsi, ngaphandle kwekutsi nisinikete lusito, bukani, ngitawufika kini, ngisho naseveni laseZarahemla, nginishaye ngenkemba, kangangekutsi ningabe nisaba nemandla ekuvimbela inchubekela phambili yalabantfu endleleni yenkhululeko yetfu.

31 Ngoba bukani, iNkhosi ngeke ivume kutsi niphile nikhule nicine ebubini benu kutsi nibulale bantfu bayo labalungile.

32 Bukani, nicabanga kutsi iNkhosi inganisindzisa nine futsi iwehlulele emaLamani, kube kungemasiko abobabe lenta inzondo yabo, yebo, futsi iphindze yengetetelwa ngulabo labahlubuka kitsi, kube bubi benu busizatfu sekutsandza kwenu inkhatimulo kanye netintfo letilite temhlaba na?

33 Niyati kutsi naphambuka emitsetfweni yaNkulunkulu, futsi niyati kutsi niyinyatsela ngaphansi kwetinyawo tenu. Bukani, iNkhosi itsi kimi: Uma ngabe labo lenibabekile kutsi babe babusi benu bangaphendvuki etonweni tabo kanye nasebubini babo lobukhulu, niyawuhamba nikhuphuke niyawukulwa nabo.

34 Manje bukani, mine, Moroni, ngiphocelelekile, ngekwesivumelwano lengisentile sekugcina imiyaleto yaNkulunkulu wami; ngako-ke ngifuna kutsi nililalele lelivi laNkulunkulu, futsi nitfumele ngekushesha kimi imiphako kanye nemadvodza enu, futsi ngalokunjalo nakuHilamani.

35 Futsi bukani, uma ningakwenti loku ngita kini ngekushesha; ngoba bukani, Nkulunkulu angeke avume kutsi sibulawe yindlala; ngako-ke utawusinika kudla kwenu, ngisho noma ngabe kufanele kutsi kube ngenkemba. Manje bonani kutsi niyaligcwalisa lelivi laNkulunkulu.

36 Bukani, nginguMoroni, indvuna yenu lenkhulu. Angifuni emandla, kodvwa kutsi ngiwadvonsele phansi. Angifuni kuhlonishwa ngumhlaba, kodvwa inkhatimulo yaNkulunkulu wami, kanye nenkhululeko nenhlalakahle yelive lami. Futsi ngaloko ngiyayivala incwadzi yami.