Umlandvo wekushumayela kwa-Aroni, kanye naMulokhayi, kanye nabomnakabo, kumaLamani.
Utfolakala etahlukweni 21 kuya ku 25.
Sehluko 21
Aroni ufundzisa ema-Amaleki ngaKhristu kanye nangeNhlawulo Yakhe—Aroni kanye nabomnakabo bayaboshwa eMidonayi—Emvakwekukhululwa kwabo, bafundzisa emasinagogeni futsi benta labaningi baphendvuke—Lamonayi uvumela inkhululeko yenkholo kubantfu eveni la-Ishmayeli. Cishe ngemnyaka wa 90 kuya kuwa 77 ngaphambi kwekutalwa kwaKhristu.
1 Manje ngesikhatsi Amoni kanye nabomnakabo sebatehlukanisile eminceleni yelive lemaLamani, buka Aroni watsatsa luhambo lwakhe loluya eveni lelalibitwa ngemaLamani ngekutsi yiJerusalema, balibita ngelive lekutalwa laboyise; futsi lalikhashane lihlanganisa imincele yaMormon.
2 Manje emaLamani nema-Amaleki kanye nebantfu baka-Amuloni bese bakhe lidolobha lelikhulu, lelalibitwa ngekutsi yiJerusalema.
3 Manje emaLamani ngekwawo nje abelukhuni ngalokwanele, kodvwa ema-Amaleki kanye nema-Amuloni abelukhuni ngalokwendlulele; ngako-ke bawabangela emaLamani kutsi ente lukhuni tinhlitiyo tawo, kutsi akhule acine ebubini kanye nasetinengisweni tawo.
4 Futsi kwenteka kutsi Aroni weta edolobheni laseJerusalema, wacala kushumayela kuma-Amaleki. Wacala kushumayela kuwo emasinagogeni awo, ngoba besekakhe emasinagoge ngekweluhlelo lwemaNehori; ngoba labaningi bema-Amaleki kanye nema-Amuloni bebabeluhlelo lwemaNehori.
5 Ngako-ke, ngesikhatsi Aroni angena kulenye yemasinagoge abo kutsi ayewushumayela kubantfu, futsi ngesikhatsi akhuluma nabo, buka kwavuka um-Amaleki wacala kuphikisana naye, watsi: Yini lena lofakaza ngayo? Uke wayibona ingilosi na? Kungani tingilosi tingaveli kitsi? Buka ngabe labantfu abakalungi yini njengebantfu bakho na?
6 Futsi utsi, ngaphandle kwekutsi siphendvuke siyawubhubha. Uwati kanjani umcabango kanye nenhloso yetinhlitiyo tetfu na? Wati kanjani kutsi sinesidzingo sekutsi siphendvuke na? Wati kanjani kutsi asisibo bantfu labalungile na? Buka, sitakhile tindzawo letingcwele, futsi siyahlangana ndzawonye kute sidvumise Nkulunkulu. Siyakholwa kutsi Nkulunkulu utawubasindzisa bonkhe bantfu.
7 Manje Aroni watsi kuye: Uyakholwa yini kutsi iNdvodzana yaNkulunkulu iyawuta kutawuhlenga bantfu etonweni tabo na?
8 Lendvodza yatsi kuye: Tsine asikholelwa kutsi uyayati intfo lenjalo. Asikholelwa kulamasiko labuwula. Asikholelwa kutsi uyati ngetintfo letisetawukwenteka, noma sikholelwe kutsi boyihlo futsi ngalokunjalo nabobabe betfu bebati mayelana netintfo labatikhuluma, letisetawukwenteka.
9 Manje Aroni wacala kubavulela imibhalo lengcwele mayelana nekuta kwaKhristu, ngalokunjalo mayelana nekuvuka kwalabafile, nekutsi angeke kube khona kuhlengwa kweluntfu ngaphandle kwekutsi kube kungekufa kanye nekuhlupheka kwaKhristu, kanye nenhlawulo yengati yakhe.
10 Futsi kwenteka kutsi ngesikhatsi acala kubachazela ngaleti tintfo bamtfukutselela, bacala kuhlekisa ngaye; futsi abafunanga kuwalalela emavi labewakhuluma.
11 Ngako-ke, ngesikhatsi abona kutsi bebangafuni kuweva emavi akhe, wesuka esinagogeni labo, weta edolobhaneni lelalibitwa ngekutsi yi-Ani-Anthi, futsi lapho watfola Mulokhayi ashumayela livi kubo; ngalokunjalo na-Ama kanye nabomnakabo. Futsi bebaphikisana nalabaningi ngelivi.
12 Futsi kwenteka kutsi babona kutsi bantfu bebatotenta lukhuni tinhlitiyo tabo, ngako-ke besuka beta eveni laseMidonayi. Balishumayela livi kulabaningi, futsi bambalwa labakholelwa emavini labebawafundzisa.
13 Noko, Aroni kanye nesibalo lesitsite sabomnakabo batsatfwa baphonswa ejele, kwatsi labasalako babaleka baphuma eveni laseMidonayi baya etifundzeni letitungeletile.
14 Futsi labo labaphonswa ejele beva buhlungu ngetintfo letiningi, bate bakhululwa ngesandla saLamonayi kanye na-Amoni, futsi baphiwa kudla baphindze bembatsiswa.
15 Bahamba futsi bayawumemetela livi, ngaleyondlela bakhululwa kwekucala baphuma ejele; ngaleyondlela bebeve buhlungu.
16 Bahamba bayanoma ngukuphi lapho bebaholwa khona nguMoya weNkhosi, bashumayela livi laNkulunkulu kuwo onkhe emasinagoge ema-Amaleki, noma kuyo yonkhe imibutsano yemaLamani lapho bebamukelwa khona.
17 Futsi kwenteka kutsi iNkhosi yacala kubabusisa, kangangekutsi baletsa labaningi ekwatini liciniso; yebo, benta labaningi bakholwa ngetono tabo, kanye nangemasiko aboyise, labengakalungi.
18 Futsi kwenteka kutsi Amoni kanye naLamonayi babuya eveni laseMidonayi baya eveni la-Ishmayeli, lokwakulive lelalilifa labo.
19 Futsi inkhosi Lamonayi ayivumanga kutsi Amoni ayisebentele, noma abe yinceku yayo.
20 Kodvwa yenta kutsi kwakhiwe emasinagoge eveni la-Ishmayeli; yenta kutsi bantfu bayo, noma bantfu labebangaphansi kwembuso wayo, babutsane ndzawonye.
21 Yatfokota ngabo, yabafundzisa tintfo letiningi. Yaphindze yamemetela kubo kutsi bebabantfu labebangaphansi kwayo, nekutsi bebabantfu labebakhululekile, kutsi bebakhululekile ekucindzetelweni yinkhosi, uyise; ngoba uyise bekasayivumele kutsi ingabusa ngetulu kwebantfu labebaseveni la-Ishmayeli, kanye nakulo lonkhe live lelalitungeletiwe.
22 Futsi yaphindze yamemetela kubo kutsi bebanayo inkhululeko yekudvumisa iNkhosi Nkulunkulu wabo ngekwetifiso tabo, kunoma nguyiphi indzawo labebakuyo, uma nje kuseveni lelalingaphansi kwembuso wenkhosi Lamonayi.
23 Amoni washumayela kubantfu benkhosi Lamonayi; futsi kwenteka kutsi wabafundzisa tonkhe tintfo mayelana netintfo letiphatselene nekulunga. Wabancusa tinsuku tonkhe, ngako konkhe kukhutsala; baligcina livi lakhe, futsi bebanenshisekelo yekugcina imiyaleto yaNkulunkulu.