1 Buka, manje kwenteka kutsi inkhosi yemaLamani yatfumela simemetelo emkhatsini wabo bonkhe bantfu bayo, kutsi bangatibeki tandla tabo ku-Amoni, Aroni, Omneri, noma Himnayi, noma lomunye wabomnakabo labayohamba bashumayela livi laNkulunkulu, kunoma nguyiphi indzawo labayokuba kuyo, kunoma nguyiphi incenye yelive labo.

2 Yebo, yatfumela simemetelo emkhatsini wabo, sekutsi bangatibeki tandla tabo kubo bababophe, noma babaphonse ejele; noma babakhafulele ngematse, noma babashaye, noma babacoshe babakhiphe emasinagogeni abo, noma bababhacabule; noma babajikijele ngematje, kodvwa babe nenkhululeko yekungena etindlini tabo, futsi ngalokunjalo nasemathempelini abo, kanye nasetindzaweni tabo letingcwele.

3 Futsi ngaleyondlela kute bahambe bashumayele livi ngekwetifiso tabo, ngoba inkhosi yaseyiphendvukele eNkhosini, kanye nabo bonkhe bendlu yayo; ngako-ke yatfumela simemetelo sayo kulo lonkhe live ebantfwini bayo, kute livi laNkulunkulu lingabi nekuvimbeleka, kodvwa lihambe liye kulo lonkhe live, kute bantfu bayo bentiwe bakholwe mayelana nemasiko lamabi aboyise, futsi bentiwe bakholwe kutsi bonkhe bebabomnakabo, nekutsi akukameli babulale, baphange, bebe, baphinge, noma bente nanoma nguluphi luhlobo lwebubi.

4 Manje kwenteka kutsi ngesikhatsi inkhosi seyisitfumele lesi simemetelo, Aroni kanye nabomnakabo bahamba lidolobha ngelidolobha, bahamba indlu ngendlu yekukhonta, bamisa emabandla, bagcoba baphristi kanye nebafundzisi kulo lonkhe live emkhatsini wemaLamani, kutsi bashumayele baphindze bafundzise livi laNkulunkulu emkhatsini wabo; futsi ngaleyondlela bacala kutsi babe nemphumelelo lenkhulu.

5 Futsi tinkhulungwane taletfwa elwatini lweNkhosi, yebo, tinkhulungwane taletfwa kutsi tikholelwe emasikweni emaNefi; tafundziswa imibhalo kanye netiphrofetho letatindluliselwe kutsi tehle kute kube ngulesi sikhatsi sanyalo.

6 Futsi njengoba kunesiciniseko kutsi iNkhosi iyaphila, kusiciniseko futsi kutsi njengoba labaningi bakholwa, noma njengoba labaningi baletfwa elwatini leliciniso, ngekushumayela kwa-Amoni kanye nabomnakabo, ngekwemoya wekwembulelwa kanye newekuphrofetha, emandla a-Nkulunkulu asebenta timangaliso kubo—yebo, ngitsi kini, njengoba iNkhosi iphila, njengoba labaningi bemaLamani bakholwa enshumayelweni yabo, futsi baphendvukela eNkhosini, abatange basahlubuka.

7 Ngoba baba bantfu labalungile; batibeka phansi tikhali tekuhlubuka, kangangekutsi abatange basalwa ngalokumelene naNkulunkulu nanini, futsi nanoma ngubaphi kubomnakabo.

8 Manje, ngulaba labaphendvukela eNkhosini;

9 Bantfu bemaLamani labebaseveni la-Ishmayeli;

10 Ngalokunjalo nebantfu bemaLamani labebaseveni laseMidonayi;

11 Ngalokunjalo nebantfu bemaLamani labebasedolobheni laNefi;

12 Ngalokunjalo nebantfu bemaLamani labebaseveni laseShilomu, futsi nalabo labebaseveni laseShemiloni, kanye nasedolobheni la-Lemuweli, kanye nasedolobheni laseShiminilomu.

13 Futsi lawa ngemagama emadolobha emaLamani labekaphendvukele eNkhosini; laba ngibo labo lababeka phansi tikhali tekuhlubuka, yebo, tonkhe tikhali tabo temphi; futsi bonkhe bebangemaLamani.

14 Futsi ema-Amaleki akaphendvukanga, ngaphandle kwamunye kuphela; kanjalo ngisho namunye wema-Amuloni; kodvwa batenta lukhuni tinhlitiyo tabo, ngalokunjalo netinhlitiyo temaLamani kuleyoncenye yelive lapho bebahlala khona, yebo, futsi nato tonkhe tigodzi tabo kanye nemadolobha.

15 Ngako-ke, sesiwashito onkhe emadolobha emaLamani lapho aphendvuka khona eta elwatini leliciniso, futsi aphendvuka.

16 Manje kwenteka kutsi inkhosi kanye nalabo labebaphendvukile baba nesifiso sekutsi babe nelibito, kute behlukaniswe kubomnakabo; ngako-ke inkhosi yabonisana na-Aroni kanye nebaphristi babo labaningi, mayelana nelibito labebatobitwa ngalo, kute behlukaniswe.

17 Futsi kwenteka kutsi batibita ngelibito lelitsi ngema-Anthi-Nefi-Lehi; futsi babitwa ngalelibito bangasabitwa ngekutsi ngemaLamani.

18 Bacala kutsi babe bantfu labakhutsele; yebo, futsi baba nebungani nemaNefi; ngako-ke, bacala budlelwane nabo, futsi sicalekiso saNkulunkulu asitange sisabalandzela.