1 Ndvodzana yami, phani indlebe emavi ami, ngoba ngitsi kuwe, njengoba ngasho kuHilamani, kutsi kangangoba uyawuyigcina imiyaleto yaNkulunkulu uyawuphumelela eveni; futsi kangangoba ungetuyigcina imiyaleto yaNkulunkulu uyawuhlukaniswa naye.

2 Manje, ndvodzana yami, ngiyetsemba kutsi ngitawuba nentfokoto lenkhulu ngawe, ngenca yekucina kwakho kanye nekwetsembeka kwakho kuNkulunkulu; njengoba ucale usesebusheni bakho kutsi ubuke eNkhosini Nkulunkulu wakho, nakanjalo ngiyetsemba kutsi utawuchubeka nekugcina imiyaleto yayo; ngoba ubusisiwe loyo lobeketela kute kube sekugcineni.

3 Ngitsi kuwe, ndvodzana yami, sengivele nginako kutfokota lokukhulu ngawe, ngenca yekwetsembeka kwakho nekukhutsala kwakho, nekubeketela kwakho kanye nekumela bulukhuni kwakho emkhatsini walaba bantfu bemaZoramu.

4 Ngoba ngiyati kutsi wawuboshiwe; yebo, futsi ngetulu kwaloko ngiyati kutsi wagcotjwa ngematje ngenca yelivi; watitfwala tonkhe letintfo ngekubeketela ngenca yekutsi iNkhosi yayinawe; futsi manje sewuyati kutsi iNkhosi yakukhulula.

5 Manje ndvodzana yami, Shibiloni, ngifuna kutsi ukhumbule, kutsi kangangoba uyawubeka litsemba lakho kuNkulunkulu nakanjalo uyawukhululwa uphume etilingweni takho, nasetinkhatsatweni takho, kanye nasetinhluphekweni takho, uyawuphakanyiswa ngelusuku lwekugcina.

6 Manje, ndvodzana yami, angifuni kutsi ucabange kutsi ngiyatatela ngekwami leti tintfo, kodvwa nguMoya waNkulunkulu lokimi lowembula leti tintfo kimi; ngoba kube bengingatalwa nguNkulunkulu bengingeke ngitati letintfo.

7 Kodvwa buka, iNkhosi ngemusa wayo lomkhulu yatfumela ingilosi yayo kutsi imemetele kimi kutsi kufanele ngiwuyekele umsebenti wekubhubhisa emkhatsini webantfu bayo; yebo, futsi ngibone ingilosi buso nebuso, yakhuluma nami, livi layo belinjengekudvuma, latamatamisa umhlaba wonkhe.

8 Futsi kwenteka kutsi tinsuku letintsatfu kanye nebusuku lobutsatfu ngangisebuhlungwini lobukhulu kakhulu kanye naselusizini lolukhulu lwemphefumulo; futsi angitange nanini, ngatfola kutsetselelwa kwetono tami, ngate ngakhalela umusa eNkhosini Jesu Khristu, kodvwa buka, ngakhala kuye ngakutfola kuthula emphefumulweni wami.

9 Manje, ndvodzana yami, ngikutjele loku kute ufundze kuhlakanipha, kute ufundze kimi kutsi kute lenye indlela noma luhlobo umuntfu langasindziswa ngalo, kuphela nje kuye kanye nangaye Khristu. Buka, ukuphila kanye nekukhanya kwemhlaba. Buka, ulivi leliciniso kanye nekulunga.

10 Manje, njengoba sewucalile kulifundzisa livi kanjalo nami ngifuna kutsi uchubeke nekulifundzisa, futsi ngifuna kutsi ukhutsale uphindze utitsibe kuto tonkhe tintfo.

11 Caphela kutsi awutiphakamisi ngekutikhukhumeta; yebo, caphela kutsi awutichayisi ngekuhlakanipha kwakho noma ngemandla akho lamakhulu.

12 Sebentisa buchawe, kodvwa hhayi kuphocelela; ngalokunjalo caphela kutsi ufaka ematomu kuyo yonkhe imizwa yakho, kute ugcwaliswe ngelutsandvo; caphela kutsi uyehlukana nebuvila.

13 Ungathandazi njengoba emaZoramu enta, ngoba ubonile kutsi athandazela kutsi kuve bantfu, nekutsi advunyiswe ngekuhlakanipha kwawo.

14 Ungasho kutsi: Awu Nkulunkulu, ngiyabonga kutsi tsine sincono kunabomnaketfu; kodvwa esikhundleni saloko tsani: Awu Nkhosi, tsetselela kungafaneleki kwami, futsi ukhumbule bomnaketfu ngemusa—yebo, vuma kungafaneleki kwakho phambi kwaNkulunkulu ngetikhatsi tonkhe.

15 Futsi shengatsi iNkhosi ingawubusisa umphefumulo wakho, ikwemukela ngelusuku lwekugcina embusweni wayo, kutsi uhlale phansi ngekuthula. Manje hamba, ndvodzana yami, ufundzise livi kulabantfu. Uzitse. Ndvodzana yami, hamba kahle.