Imiyaleto ya-Alima kundvodzana yakhe Hilamani.
Itfolakala etahlukweni 36 kuya ku 37.
Sehluko 36
Alima ufakaza kuHilamani ngekuguculwa kwakhe emvakwekubona ingilosi—Weva buhlungu bemphefumulo lojezisiwe; wabita libito laJesu, futsi emvakwaloko wabese utalwa nguNkulunkulu—Injabulo lemnandzi yagcwalisa umphefumulo wakhe—Ubona ticuku tetingilosi tidvumisa Nkulunkulu—Labaningi labagucukile bavile futsi babona njengoba naye avile futsi wabona. Cishe ngemnyaka wa 74 ngaphambi kwekutalwa kwaKhritsu.
1 Ndvodzana yami, phani indlebe emavi ami; ngoba ngiyafunga kuwe, kutsi uma uyawuyigcina imiyaleto yaNkulunkulu uyawuphumelela eveni.
2 Ngifuna kutsi wente njengoba ngentile, ngekukhumbula kutfunjwa kwabobabe betfu; ngoba bebasebugcilini, futsi bekute namunye lobekangabakhulula ngaphandle kwekutsi kube nguNkulunkulu wa-Abrahama, naNkulunkulu wa-Isaka, kanye naNkulunkulu waJakobe; futsi wabakhulula etinhluphekweni tabo.
3 Manje, Awu ndvodzana yami Hilamani, buka, usesebusheni bakho, ngako-ke, ngiyakuncusa kutsi shengatsi ungaweva emavi ami futsi ufundze kimi; ngoba ngiyati kutsi noma bobani labayawubeka litsemba labo kuNkulunkulu bayawusekelwa etilingweni tabo, nasetinkhatsatweni tabo, kanye nasetinhluphekweni tabo, futsi bayawuphakanyiswa ngelusuku lwekugcina.
4 Futsi angifuni kutsi ucabange kutsi ngiyatatela ngekwami—hhayi ngekwenyama kodvwa ngekwakamoya, hhayi ngekwengcondvo yasemhlabeni kodvwa ngeyaNkulunkulu.
5 Manje, buka, ngitsi kuwe, kube bengingatalwa nguNkulunkulu bengingeke ngitati letintfo; kodvwa Nkulunkulu, ngemlomo wengilosi yakhe lengcwele ungembulele, hhayi ngenca yekufaneleka kwami;
6 Ngoba ngahamba ngizulazula nemadvodzana aMosiya, sifuna kubhubhisa libandla laNkulunkulu, kodvwa buka, Nkulunkulu watfumela ingilosi yakhe lengcwele kutsi isimise endleleni.
7 Buka, yakhuluma kitsi, kwangatsi livi lekudvuma, umhlaba wonkhe watamatama ngaphansi kwetinyawo tetfu; sonkhe sawela phansi, ngoba kwesaba inkhosi kwafika kitsi.
8 Kodvwa buka, livi latsi kimi: Phakama. Ngaphakama ngasukuma ngema, ngayibona ingilosi.
9 Yatsi kimi: Uma wena ufuna ngekwakho kubulawa, ungabe usaphindza ufune kubhubhisa libandla laNkulunkulu.
10 Futsi kwenteka kutsi ngawela phansi, kwaba sikhatsi lesitinsuku letintsatfu kanye nebusuku lobutsatfu ngingakwati kuvula umlomo wami, noma ngisebentise emalunga ami.
11 Futsi ingilosi yakhuluma tintfo letiningi kimi, letaviwa bomnaketfu, kodvwa mine angitivanga ngoba ngesikhatsi ngiva lamavi atsi—Uma wena ufuna ngekwakho kubulawa, ungabe usaphindza ufune kubhubhisa libandla laNkulunkulu—ngashaywa kwesaba lokukhulu kakhulu kanye nekumangala hleze mhlawumbe ngibulawe, kangangekutsi ngawela phansi ngangabe ngiseva lutfo.
12 Kodvwa ngahlushwa buhlungu baphakadze, ngoba umphefumulo wami wakhatsateka kakhulu waphindze wahlupheka ngetono tami tonkhe.
13 Yebo, ngatikhumbula tonkhe tono tami kanye nebubi bami lengahlushwa ngabo ngebuhlungu besihogo; yebo, ngabona kutsi ngangimhlamukile Nkulunkulu wami, nekutsi ngangingayigcinanga imiyaleto yakhe lengcwele.
14 Yebo, futsi ngangibulele labaningi bebantfwana bakhe, noma-ke ngalenye indlela ngangibaholele ekubhujisweni; yebo kwephetsa nje babubukhulu bubi bami, kangangekutsi umcabango nje wekuta phambi kwaNkulunkulu wawuhlupha umphefumulo wami ngekwesaba lokungachazeki.
15 Awu, ngacabanga, kutsi ngingacoshwa futsi ngibe ngulongasekho ngekwemphefumulo kanye nangekwemtimba, kute ngingaletfwa kutsi ngime phambi kwaNkulunkulu wami, kutsi ngehlulelwe ngetento tami.
16 Futsi manje, tinsuku letintsatfu kanye nebusuku lobutsatfu ngahlushwa, nangebuhlungu bemphefumulo lojezisiwe.
17 Futsi kwenteka kutsi njengoba ngangihlushwa buhlungu, ngesikhatsi ngisakhatsatwa kukhumbula tono tami letiningi, buka, ngakhumbula futsi kutsi ngamuva babe aphrofetha kubantfu mayelana nekuta kwaJesu Khristu lotsite, iNdvodzana yaNkulunkulu, kutawuhlawulela tono temhlaba.
18 Manje, ngesikhatsi ingcondvo yami ibambelela kulomcabango, ngakhala ngekhatsi enhlitiyweni yami ngatsi: Awu Jesu, Ndvodzana yaNkulunkulu, bani nemusa kimi, mine lengisekubabeni kwenyongo, futsi ngitungeletwe ndzawotonkhe tinketane taphakadze tekufa.
19 Manje, buka, ngesikhatsi ngikucabanga loku, angitange ngisabuva buhlungu lenganginabo; yebo, angitange ngisakhatsatwa kukhumbula tono tami.
20 Awu, yeka bukhulu benjabulo, nekumangalisa kwekukhanya lengakubona; yebo, umphefumulo wami wagcwaliswa ngenjabulo leyabayinkhulu njengebuhlungu bami!
21 Yebo, ngitsi kuwe, ndvodzana yami, kute lokwakungaba kukhulu futsi kube buhlungu njengebuhlungu lenganginabo. Yebo, futsi ngiyaphindza ngitsi kuwe, ndvodzana yami, ngakulolunye luhlangotsi kute lokungaba kukhulu futsi kube mnandzi njengenjabulo lengaba nayo.
22 Yebo, ngacabanga kutsi ngabona, njengoba babe Lehi abona, Nkulunkulu ahleti esihlalweni sakhe sebukhosi, atungeletwe ticuku tetingilosi letingabaleki, tisesimeni sekuhlabela kanye nekudvumisa Nkulunkulu wato; yebo, futsi umphefumulo wami walangatelela kuba lapho.
23 Kodvwa buka, emalunga ami aphindze atfola emandla awo futsi, ngema ngetinyawo tami, ngamemeta kubantfu kutsi ngasengitelwe nguNkulunkulu.
24 Yebo, kusukela ngaleso sikhatsi kute kube ngumanje, ngisebente ngangayekeli, kute ngiletse bantfu ekuphendvukeni; kute ngibaletse kutsi beve leyo njabulo lenkhulu nami lengayiva; kute nabo ngalokunjalo batalwe nguNkulunkulu, futsi bagcwaliswe ngaMoya loNgcwele.
25 Yebo, manje buka, Awu ndvodzana yami, iNkhosi inginika injabulo lenkhulu ngalokwendlulele ngenca yetitselo tekusebenta kwami;
26 Ngoba ngenca yelivi lenginikete lona, buka, labaningi batelwe nguNkulunkulu, futsi beve njengoba nami ngivile, futsi batibonela ngewabo emehlo njengoba nami ngibonile; ngako-ke bayati ngaletintfo lengikhulume ngato, njengoba nami ngati; futsi lwati lenginalo luvela kuNkulunkulu.
27 Futsi bengisekelwe ngisetilingweni kanye nasetinkhatsatweni letitinhlobonhlobo, yebo, nakuto tonkhe tinhlobo tetinhlupheko; yebo, Nkulunkulu ungikhululile ejele, nasekuboshweni, kanye nasekufeni; yebo, ngibeka litsemba lami kuye, futsi usetawungikhulula njalo.
28 Futsi ngiyati kutsi uyawungivusa ngelusuku lwekugcina, kutsi ngihlale naye enkhatimulweni; yebo, ngitawumdvumisa ingunaphakadze, ngoba ubakhiphile bobabe betfu eGibhithe, uwagwinyile emaGibhithe eLwandle loluBovu; wabahola ngemandla akhe wabayisa eveni lesetsembiso; yebo, futsi ubakhululile ebugcilini kanye nasekutfunjweni tikhatsi ngetikhatsi.
29 Yebo, ngetulu kwaloko ubakhiphile bobabe betfu eveni laseJerusalema; futsi, ngemandla akhe langapheli, wabakhulula baphuma ebugcilini kanye nasekutfunjweni, tikhatsi ngetikhatsi kwehle kute kufike kulolusuku lwanamuhla; futsi njalo-nje ngihlala ngikhumbula kutfunjwa kwabo; yebo, nawe ngalokunjalo kumele uhlale ukukhumbula, njengoba nami ngentile, kutfunjwa kwabo.
30 Kodvwa buka, ndvodzana yami, akusiko loku kuphela; ngoba nawe kumele wati njengoba nami ngati, kutsi nangabe uyawuyigcina imiyaleto yaNkulunkulu uyawuphumelela eveni; kumele wati futsi, kutsi kangangoba ungayuyigcina imiyaleto yaNkulunkulu uyawususwa phambi kwakhe. Manje loku kungekwelivi lakhe.