1 Manje lawa ngemavi a-Amulekhi lawashumayela kubantfu labebaseveni laseAmoniha, watsi:

2 Ngingu-Amulekhi; ngiyindvodzana yaGidona, lobekayindvodzana ya-Ishmayeli, lobekawentalelwane ya-Aminadi; futsi bekunguye kanye loyo Aminadi lowahumusha umbhalo lobewuseludvongeni lwelithempeli, lobewubhalwe ngemuno waNkulunkulu.

3 Futsi Aminadi bekawentalelwane yaNefi, lobekayindvodzana yaLehi, lowaphuma eveni laseJerusalema, lobekawentalelwane yaManase, lobekayindvodzana yaJosefa lowatsengiswa eGibhithe ngesandla sabomnakabo.

4 Bukani, ngetulu kwaloko ngingumuntfu lote ligama lelincane emkhatsini wabo bonkhe labangatiko; yebo, futsi bukani, nginetihlobo letiningi kanye nebangani, futsi ngetulu kwaloko ngizuze ingcebo leningi ngenca yekusebenta kwami.

5 Noko, emvakwakokonkhe loku, bengingatange ngati kakhulu ngetindlela teNkhosi, nangetimfihlakalo tayo kanye nangemandla ayo lamangalisako. Ngitsite bengingakate ngati kakhulu ngaleti tintfo; kodvwa bukani, ngenta liphutsa, ngoba ngitibonile letiningi timfihlakalo tayo kanye nemandla ayo lamangalisako; yebo, nasekulondvolotweni kwetimphilo talaba bantfu.

6 Noko, ngayenta yaba lukhuni inhlitiyo yami, ngoba ngabitwa tikhatsi letiningi futsi angilalelanga; ngako-ke ngangati mayelana naleti tintfo, kodvwa bengingatsandzi kwati; ngako-ke ngachubeka ngihlamuka Nkulunkulu, ebubini benhlitiyo yami, kwate kwaba lusuku lwesine lwalenyanga yesikhombisa, lesemnyakeni welishumi wekubusa kwebehluleli.

7 Ngesikatsi ngihamba ngiyawubona sihlobo lesisedvute kakhulu, buka ingilosi yeNkhosi yavela kimi yatsi: Amulekhi, buyela emtini wakho, ngoba utawukupha umphrofethi weNkhosi kudla; yebo, indvodza lengcwele, lengumuntfu lokhetsiwe waNkulunkulu; ngoba izilile tinsuku letiningi ngenca yetono talaba bantfu, futsi ilambile, utawuyemukela emtini wakho futsi uyiphe kudla, futsi iyawukubusisa wena kanye nendlu yakho; futsi sibusiso seNkhosi siyawuhlala etikwakho kanye nendlu yakho.

8 Futsi kwenteka kutsi ngalilalela livi lengilosi, ngabuyela emtini wami. Ngesikhatsi ngihamba ngisondzela lapho ngayitfola leyondvodza ingilosi lebeyitsite kimi: Utawuyemukela endlini yakho—futsi bukani bekungiyo kanye lendvodza lebeyikadze ikhuluma kini mayelana netintfo taNkulunkulu.

9 Futsi ingilosi yatsi kimi ingumuntfu longcwele; ngaloko-ke ngiyati kutsi ingumuntfu longcwele ngenca yekutsi kwashiwo yingilosi yaNkulunkulu.

10 Ngetulu kwaloko, ngiyati kutsi tintfo lefakaze ngato tiliciniso; ngoba bukani ngitsi kini, njengoba iNkhosi iphila, itfumele ingilosi yayo kutsi itembule letintfo kimi; futsi loku ikwente ngesikhatsi lo-Alima ahleti emtini wami.

11 Ngoba bukani, iyibusisile indlu yami, ingibusisile nami, kanye nebesifazane labasemtini wami, kanye nebantfwana bami, kanye nababe kanye nemndeni wami; yebo, nato tonkhe tihlobo tami itibusisile, futsi sibusiso seNkhosi sihlale etikwetfu ngekwemavi lewakhulumile.

12 Manje Amulekhi sekawakhulumile lamavi bantfu bacala kumangala, babona kutsi bekukhona bofakazi labangetulu kwamunye labebafakaza ngetintfo labebabekwa licala ngato, futsi ngalokunjalo nangetintfo lebetitowenteka, ngekwakamoya wesiphrofetho lobewukubo.

13 Noko, bekukhona labanye emkhatsini wabo labebacabanga kubabuta, kute ngemasu ebucili babo bababambe ngemavi abo, kute batfole bufakazi lobuphikisana nabo, kute babayise kubehluleli babo kute behlulelwe ngekwemtsetfo, futsi nekutsi babulawe noma baphonswe ejele, ngekwemacala labebatawuwenta kubukeke shengatsi banawo noma bafakaze kuphikisana nabo.

14 Manje bekungulawo madvodza labekafuna kubabulala, labekatatimtsetfo, labekacashiwe noma abekwe bantfu kutsi asebentise umtsetfo esikhatsini sabo sekutsetsa emacala, noma ekutsetfweni kwemacala ebantfu ngaphambi kwebehluleli.

15 Manje leti tatimtsetfo betifundze ngabo bonkhe buciko kanye nebucili bebantfu; futsi loku bekutotenta kutsi tibe nelikhono emsebentini wato.

16 Futsi kwenteka kutsi bacala kumbuta Amulekhi, kute ngaloko bamente aphambanise emavi akhe, noma aphikisane nemavi lekufanele awakhulume.

17 Manje bebangati kutsi Amulekhi bekasenekulati lisu labo. Kodvwa kwenteka kutsi ngesikhatsi bacala bambuta, wayibona imicabango yabo, watsi kubo: Awu nine lababi kanye nesitukulwane lesonakele, nine tatimtsetfo kanye nani batentisi, nibeka sisekelo sadeveli; ngoba nibeka ticipho kanye netitsiyo kute nibambe labangcwele baNkulunkulu.

18 Nibeka tinhlelo kutsi niphambanise tindlela talabalungile, futsi nehlisele intfukutselo yaNkulukhulu etikwetinhloko tenu, nasekubhujisweni lokuphelele kwalaba bantfu.

19 Yebo, washo kahle Mosiya, lobekayinkhosi yetfu yekugcina, ngesikhatsi sekatawundlulisa umbuso, angenamuntfu wekumniketa wona, enta kutsi labantfu batiphatse ngekwemavi abo—yebo, washo kahle kutsi uma sikhatsi sifika sekutsi livi lalabantfu likhetse bubi, lokungukutsi, uma sikhatsi sifika sekutsi labantfu bawele esiphambukweni, bayobe sebakulungele kubhujiswa.

20 Manje ngitsi kini iNkhosi yehlulela kahle ngebubi benu; ngetizatfu letinhle iyakhala kulabantfu, ngelivi letingilosi tayo itsi: Phendvukani, phendvukani, ngoba umbuso welizulu sewusondzele.

21 Yebo, ngetizatfu letinhle iyakhala, ngelivi letingilosi tayo itsi; ngitawukuta ngehlele emkhatsini webantfu bami, ngekulunga kanye nangekwehlulela lokuhle etandleni tami.

22 Yebo, futsi ngitsi kini kube bekungasiko ngenca yemithandazo yalabalungile, lekungumanje bakulelive, ngabe manje senavakashelwa ngekubhujiswa lokuphelele; noko bekungayukuba kwetikhukhula, njengoba kwenteka kubantfu ngemalanga aNowa, kodvwa bekuyawuba ngendlala, nangamashayabhuce wesifo, kanye nangenkemba.

23 Kodvwa kungenca yemithandazo yalabalungile kutsi niyasidziswa; manje, uma nitawubacosha labalungile emkhatsini wenu iNkhosi ayitukusigodla sandla sayo; kodvwa entfukutselweni yayo leyesabekako itawuta ngalokumelene nani; ngaleso sikhatsi niyawushaywa ngendlala, nangamashayabhuce wesifo, kanye nangenkemba; futsi leso sikhatsi sesisedvute ngaphandle kwekutsi niphendvuke.

24 Manje kwenteka kutsi bantfu bamtfukutselela kakhulu Amulekhi, futsi bamemeta kakhulu, batsi: lendvodza itfuka imitsetfo yetfu lelungile, kanye netatimtsetfo tetfu letihlakaniphile lesitikhetsile.

25 Kodvwa Amulekhi welula sandla sakhe, futsi wamemeta kakhulu kubo, atsi: Awu nine situkulwane lesibi nalesonakele, kungani Sathane alawula tinhlitiyo tenu na? Kungani nitinikela kuye kute abe nemandla ngetulu kwenu, kutsi aphumphutsekise emehlo enu, kute ningawacondzi emavi lakhulunywako, ngekweliciniso lawo na?

26 Ngoba bukani, ngabe ngike ngafakaza yini ngaphikisana nemtsetfo wenu na? Anicondzi; nitsi ngikhulume ngaphikisana nemtsetfo wenu; kodvwa angikate, kodvwa ngikhulume ngawuvuna umtsetfo wenu, kute nilahlwe ngelicala.

27 Manje bukani, ngitsi kini, sisekelo sekubhujiswa kwalaba bantfu sesicala kubekwa ngalokungalungi kwetatimtsetfo tenu kanye nebehluleli benu.

28 Manje kwenteka kutsi ngesikhatsi Amulekhi sekawakhulumile lamavi bantfu bamemeta kakhulu baphikisana naye, batsi: Manje sesiyati kutsi lendvodza ingumntfwana wadeveli, ngoba isikhohlisile; ngoba ikhulume yaphikisana nemtsetfo wetfu. Manje itsi ayikate ikhulume iphikisane nawo.

29 Ngetulu kwaloko, yedzelele tatimtsetfo tetfu, kanye nebehluleli betfu.

30 Futsi kwenteka kutsi tatimtsetfo takubeka etinhlitiyweni tato kute titikhumbule letintfo ngalokumelene naye.

31 Futsi bekukhona munye emkhatsini wabo ligama lakhe bekunguZeziromu. Manje waba wekucala kubeka licala Amulekhi kanye na-Alima, angulomunye wetihlakaniphi emkhatsini wabo, anemabhizinisi lamaningi lekawentako emkhatsini walabantfu.

32 Manje injongo yaleti tatimtsetfo bekukutfola inzuzo; futsi tatitfola inzuzo ngekusebenta kwato.