1 Buka, manje kwenteka kutsi inhloso yetfu lelandzelako kwakukutfola lidolobha laseManthi; kodvwa buka, kwakute indlela lesasingawakhipha ngayo edolobheni ngemacembu etfu lamancane. Ngoba buka, abekukhumbula loko lesasikwentile kute kube ngunyalo; ngako-ke asikhonanga kuwakhohlisa kutsi aphume etincabeni tawo.

2 Futsi abemaningi kakhulu kwengca libutfo letfu kangangekutsi asitange silokotse siye kuyowahlasela etincabeni tawo.

3 Yebo, kwadzingeka kutsi sisebentise emadvodza etfu ekugcineni leto tincenye telive lesasesititfolile kutsi tibe tetfu; ngako-ke kwadzingeka kutsi sime, kute sitfole emandla langetekile lavela eveni laseZarahemla kanye nesabelo lesisha semiphako.

4 Futsi kwenteka kutsi ngalesi sizatfu ngatfumela sitfunywa kumbusi welive letfu, kutsi ngimatise mayelana nesimo sebantfu betfu. Futsi kwenteka kutsi sagadza kutsi sitfole imiphako kanye nemandla lavela eveni laseZarahemla.

5 Kodvwa buka, sazuza kancane kuloku; ngoba emaLamani nawo abetfola emandla lamakhulu lusuku ngelusuku, kanye nemiphako leminingi; taba kanjena-ke timo tetfu ngalesi sikhatsi.

6 Futsi emaLamani abephuma asihlasela tikhatsi ngetikhatsi, atimisele kusibulala ngelicebo; noko sasingakhoni kutokulwa nawo, ngenca yetindzawo tawo tekuphepha kanye netincaba tawo.

7 Futsi kwenteka kutsi salindza kuleti timo letimatima sikhatsi lesingangetinyanga letiningi, sate sacishe safa ngenca yekweswela kudla.

8 Kodvwa kwenteka kutsi sakutfola kudla, lokwaletfwa kitsi kugadvwe libutfo lemadvodza latinkhulungwane letimbili labekatosisita; futsi lolu ngilo lodvwa lusito lesalutfola, kutsi sitivikele siphindze sivikele nelive letfu kutsi lingaweli etandleni tetitsa tetfu, yebo, kutsi silwe netitsa tetfu letingabaleki.

9 Manje sizatfu salobu bulukhuni betfu, noma sizatfu sekutsi kungani bangatfumelanga emandla langetekile kitsi, sasingasati; ngako-ke sasikhatsatekile siphindze sigcwele kwesaba, hleze ngandlela tsite tehlulelo taNkulunkulu tite eveni letfu, kutosiketula kanye nekutosibhubhisa.

10 Ngako-ke sathandaza ngenshisekelo lenkhulu kuNkulunkulu, kutsi asicinise aphindze asikhulule asikhiphe etandleni tetitsa tetfu, yebo, nekutsi asinike emandla kutsi siwagcine emadolobha etfu, kanye nemave etfu, naloko lesinako, kute sisekele bantfu betfu.

11 Yebo, futsi kwenteka kutsi iNkhosi Nkulunkulu wetfu yasivakashela yasicinisekisa kutsi itawusikhulula; yebo, kangangekutsi yasinika kuthula emiphefumulweni yetfu, yasipha nelukholo lolukhulu, yaphindze yasenta kutsi setsembele ekukhululweni ngiyo.

12 Sema sibindzi nelibutfo letfu lelincane lesasilitfolile, sagcila ngenshisekelo kuncoba titsa tetfu, nekugcina emave etfu, naloko lesasinako nebafati betfu, kanye nebantfwana betfu, nemgomo wenkhululeko yetfu.

13 Ngako-ke sahamba ngemandla etfu onkhe sayawukulwa nemaLamani, labekasedolobheni laseManthi; futsi sawamisa emathende etfu eceleni kwelihlane, lelalisedvute nelidolobha.

14 Futsi kwenteka kutsi ngakusasa, ngesikhatsi emaLamani abona kutsi sasiseminceleni ngasehlane lelalisedvute nelidolobha, atfumela tinhloli tawo tatungeleta kute atfole sibalo kanye nemandla elibutfo letfu.

15 Futsi kwenteka kutsi ngesikhatsi abona kutsi sasingakacini, ngekwesibalo setfu, esaba nekutsi sasitowavimbela ekusekelweni kwawo ngaphandle kwekutsi aphume alwe natsi asibulale, acabanga futsi kutsi abengasibulala kalula ngemabutfo awo lamaningi, ngako-ke acala kwenta emalungiselelo ekutsi aphume atawukulwa natsi.

16 Ngesikhatsi sibona kutsi abenta emalungiselelo ekutsi aphume atawukulwa natsi, buka, ngenta Gidi, kanye nesibalo lesincane semadvodza, kutsi abhace ehlane, na-Thiyomneri ngalokunjalo nesibalo lesincane semadvodza kutsi nabo babhace ehlane.

17 Manje Gidi kanye nemadvodza akhe bebangesekudla bese kutsi labanye bangesencele; ngesikhatsi sebabhacile, buka, mine ngasala, nalabasele belibutfo lami, kuyo kanye leyondzawo lesasimise kuyo kucala emathende etfu kutilungiselela sikhatsi sekutsi emaLamani aphume atawukulwa natsi.

18 Futsi kwenteka kutsi emaLamani aphuma nelibutfo lawo leliningi kutawukulwa natsi. Futsi ngesikhatsi asafikile asatokhwela etikwetfu ngenkemba, ngenta emadvodza ami, lawo labekanami, kutsi ahlehlele ehlane.

19 Futsi kwenteka kutsi emaLamani asilandzela ngesivivini lesikhulu, ngoba abenesifiso lesikhulu kutsi asikhandze kute asibulale; ngako-ke asilandzela angena ehlane; futsi sendlula emkhatsini waGidi kanye naThiyomneri, kangangekutsi bona ababonwanga ngemaLamani.

20 Futsi kwenteka kutsi ngesikhatsi emaLamani asendlulile, noma ngesikhatsi libutfo selendlulile, Gidi naThiyomneri bavuka etindzaweni tabo tekubhaca, batincamula tinhloli temaLamani kutsi tingasakhoni kubuyela edolobheni.

21 Futsi kwenteka kutsi ngesikhatsi sebatincamulile, bagijima baya edolobheni bakhwela etikwabogadzi labebashiywe kutsi bagadze lidolobha, kangangekutsi bababulala base bayalitsatsa lelidolobha.

22 Manje loku kwenteka ngoba emaLamani avumela libutfo lawo lonkhe, ngaphandle kwabogadzi labambalwa nje kuphela, kutsi liholelwe ehlane.

23 Futsi kwenteka kutsi Gidi kanye naThiyomneri ngalendlela bese bakutfolile kulawula tincaba tawo. Futsi kwenteka kutsi satsatsa indlela yetfu, emvakwekutsi sesihambe kakhulu ehlane saya ngaseveni laseZarahemla.

24 Futsi ngesikhatsi emaLamani abona kutsi abeya ngaseveni laseZarahemla, esaba kakhulu, hleze bekukhona lisu lelalibekiwe kubaholela ekubhujisweni; ngako-ke acala kuhlehlela emuva ehlane futsi, yebo, abuyela emuva ngayo kanye leyondlela labekachamuke ngayo.

25 Buka, besekungusebusuku ase amisa emathende awo, ngoba tindvuna letinkhulu temaLamani taticabanga kutsi emaNefi besekakhatsele ngenca yeluhambo lwawo; futsi ticabanga kutsi abelijikisile lonkhe libutfo lawo ngako-ke akacabanganga lutfo mayelana nelidolobha laseManthi.

26 Manje kwenteka kutsi ngesikhatsi sekuhlwile, ngenta kutsi emadvodza ami angalali, kodvwa ahambe ngalenye indlela aye ngaseveni laseManthi.

27 Futsi ngenca yaloku kuhamba kwetfu kwasebusuku, buka, ngakusasa sasesingembili kwemaLamani, kangangekutsi safika kucala kunawo edolobheni laseManthi.

28 Ngako-ke kwenteka, kutsi ngalelicebo salitsatsa lidolobha laseManthi laba ngeletfu ngaphandle kwekucitsa ingati

29 Futsi kwenteka kutsi ngesikhatsi emabutfo emaLamani efika edvute nelidolobha, abona kutsi sasikulungele kulwa nawo, amangala kakhulu futsi aphatfwa kwesaba lokukhulu, kangangekutsi abalekela ehlane.

30 Yebo, futsi kwenteka kutsi emabutfo emaLamani abaleka aphuma kuyo yonkhe leyoncenye yelive. Kodvwa buka, abetfwele besifazane kanye nebantfwana labaningi baphuma eveni.

31 Nalawo madolobha labekatsetfwe ngemaLamani, onkhe ngalesikhatsi asaphetfwe ngitsi; futsi bobabe betfu nebesifazane betfu kanye nebantfwana betfu sebabuyela emakhaya abo, bonkhe ngaphandle kwalabo labatsatfwe baba tiboshwa baphindze batfwalwa ngemaLamani.

32 Kodvwa buka, emabutfo etfu mancane kutsi agcine emadolobha lamaningi kangaka kanye nemphahla leningi kangaka.

33 Kodvwa buka, setsembe Nkulunkulu wetfu losinike kuncoba ngetulu kwalawo mave, kangangoba siwatfolile lawo madolobha kanye nalawo mave, labekavele angewetfu.

34 Manje asisati sizatfu sekutsi umbuso yini ungasiniki emandla langetekile; nalawo madvodza laketa kitsi akati kutsi kuyangani singanikwa emandla langetekile.

35 Buka, asati kodvwa kungenteka kutsi aniphumeleli, futsi nidvonsele emabutfo kuleyoncenye yelive; uma kunjalo, asifuni kuvungama

36 Kodvwa uma kungenjalo, buka, siyesaba kutsi kukhona kungevani embusweni, kutsi bangatfumeli emadvodza lamaningi kutsi atawusisita; ngoba siyati kutsi maningi kakhulu kunalawo labawatfumele.

37 Kodvwa buka, akunandzaba—siyetsemba Nkulunkulu utawusikhulula, nanoma kungebutsakatsaka bemabutfo etfu, yebo, futsi asikhulule nasetandleni tetitsa tetfu.

38 Buka, lona ngumnyaka wemashumi lamabili nemfica, ekupheleni kwawo, futsi lamave sengewetfu; nemaLamni asabalekele eveni laNefi.

39 Futsi lawo madvodzana ebantfu ba-Amoni, lengikhulume kahle ngawo, anami eveni laseManthi; neNkhosi iwasekele, yebo, futsi yawagcina ekubulaweni ngenkemba, kangangekutsi kute namunye lobulewe.

40 Kodvwa buka, atfole emanceba lamaningi; noko eme acina kuleyo nkhululeko Nkulunkulu lawakhulule ngayo; futsi akukhutsalele kukhumbula iNkhosi Nkulunkulu wawo lusuku ngelusuku; yebo, ayakucaphela kugcina imitsetfo yayo, kanye netehlulelo tayo, kanye nemiyaleto yayo njalo nje; futsi lukholo lwawo lucinile kuto tiphrofetho mayelana naloko lokutako.

41 Manje, mnaketfu lotsandzekako, Moroni, shengatsi iNkhosi Nkulunkulu wetfu, losihlengile futsi wasikhulula, angakugcina njalo nje phambi kwakhe; yebo, futsi shengatsi angabatsandza labantfu, kute utfole imphumelelo ekutfoleni konkhe loko emaLamani lakutsatsa kitsi kube ngekwetfu, lobekukwekusisekela. Manje, buka, ngiyayivala lencwadzi. NginguHilamani, indvodzana ya-Alima.