1 Manje kwenteka ngemnyaka wemashumi lamatsatfu wekubusa kwebehluleli kubantfu baNefi, emvakwekutsi Moroni asayitfolile aphindze ayifundzile incwadzi yaHilamani, wajabula kakhulu ngenca yenhlalakahle, yebo, ngemphumelelo lenkhulu Hilamani laba nayo, ekutfoleni lawo mave labekalahlekile.

2 Yebo, waphindze wabatisa bonkhe bantfu bakhe, kulo lonkhe live lelitungeletile kuleyo ncenye lebekakuyo, kute nabo ngalokunjalo bajabule

3 Futsi kwenteka kutsi masinyane nje watfumela incwadzi kuPhahorani, afuna kutsi abite emadvodza kutsi ahlangane ndzawonye kuyocinisa Hilamani, noma emabutfo aHilamani, kute akwati kugcina leyo nceye yelive kalula labephunyeleliswe ngekumangalisa lokukhulu kutsi aphindze ayitfole

4 Futsi kwenteka kutsi ngesikhatsi Moroni asatfumele lencwadzi eveni laseZarahemla, wacala futsi wenta lisu kutsi akwati kutfola leto timphahla noma emadolobha labekasele emaLamani labekawatsetse kubo.

5 Futsi kwenteka kutsi ngesikhatsi Moroni enta emalungiselelo ekuhamba ayawukulwa nemaLamani, buka, bantfu baNefiha, labebabutsene ndzawonye bavela edolobheni laMoroni nasedolobheni laLehi kanye nasedolobheni laMoriyanthoni, bahlaselwa ngemaLamani.

6 Yebo, ngisho nalawo labekaphoceleleke kutsi abaleke eveni laseManthi, kanye naseveni lelitungeletile, eta ahlanganyela nemaLamani kulencenye yelive.

7 Futsi ngenca yekuba maningi kakhulu, yebo, aphindze atfola emandla lusuku ngelusuku, ngemyalo wa-Amoroni eta alwa nebantfu baNefiha, futsi acala kubabulala kakhulu.

8 Futsi emabutfo awo abemaningi kakhulu kangangekutsi bantfu labebasele baNefiha baphoceleleka kutsi bawabalekele; beta bahlangana lelibutfo laMoroni.

9 Manje njengoba Moroni bekacabanga kutsi bekufanele kube khona emadvodza labekatotfunyelwa edolobheni laNefiha, kuyawusita bantfu kugcina lelo dolobha, futsi ati kutsi bekulula kuligcina lelidolobha ekuweleni etandleni temaLamani kunekuphindze balitsatse kuwo, wacabanga kutsi bebatoligcina lelo dolobha kalula.

10 Ngako-ke waligcina lonkhe libutfo lakhe kute ligcine tonkhe leto tindzawo lebekaphindze watitfola.

11 Manje, ngesikhatsi Moroni abona kutsi lidolobha laNefiha laselilahlekile waba nelusizi lolukhulu, futsi wacala kungabata, ngenca yebubi bebantfu, kutsi angeke yini bawele etandleni tabomnakabo.

12 Manje kwakunjalo nakuto tonkhe tindvuna takhe letinkhulu. Tangabata futsi ngetulu kwaloko tamangala ngenca yebubi bebantfu, loku kwakungenca yemphumelelo yemaLamani ngetulu kwabo.

13 Futsi kwenteka kutsi Moroni wawutfukutselela umbuso, ngenca yekungabi nemdlandla kwawo mayelana nenkhululeko yelive labo.