Sehluko 62
Moroni uyahamba uyawuniketa lusito kuPhahorani eveni laGideyoni—Bantfu benkhosi labangafuni kuvikela live labo bayabulawa—Phahorani kanye naMoroni baphindze bayayitsatsa iNefiha—EmaLamani lamaningi ahlangana nebantfu ba-Amoni—Thiyankham ubulala Amoroni futsi naye ngalokunjalo uyabulawa—EmaLamani ayakhishwa eveni, futsi kumiswa kuthula—Hilamani ubuyela ebufundisini uphindze wakha liBandla. Cishe ngemnyaka wa 62 kuya kuwa 57 ngaphambi kwekutalwa kwaKhristu.
1 Manje kwenteka kutsi ngesikhatsi Moroni sekayitfolile lencwadzi inhlitiyo yakhe yaba nesibindzi, futsi wagcwala injabulo lenkhulu kakhulu ngenca yekwetsembeka kwaPhahorani, kutsi bekangasiye naye umtsengisi kuyo inkhululeko kanye netimiso telive lakhe.
2 Kodvwa futsi wakhala kakhulu ngenca yebubi balabo labebasuse Phahorani esihlalweni sekwehlulela, yebo, kafishane nje ngenca yalabo labahlubuka eveni labo kanjalo nakuNkulunkulu wabo.
3 Futsi kwenteka kutsi Moroni watsatsa sibalo lesincane semadvodza, njengekwesifiso saPhahorani, waniketa Lehi kanye naThiyankham kuphatsa kulabo labebasele belibutfo lakhe, wabese uyahamba uya ngaseveni laGideyoni.
4 Futsi wasiphakamisa sibonakaliso senkhululeko kunoma nguyiphi indzawo labekangena kuyo, futsi watsatsa noma ngabe nguliphi libutfo lebekangalitfola eluhambeni lwakhe lonkhe loluya ngaseveni laGideyoni.
5 Futsi kwenteka kutsi tinkhulungwane tabutsanela esibonakalisweni sakhe, tatitsatsa tinkemba tato kute tivikele inkhululeko yato, kute bangangeni ebugcilini.
6 Ngako-ke, ngesikhatsi Moroni sekawabutsele ndzawonye noma ngumaphi emadvodza labengawatfola ekuhambeni kwakhe konkhe, wafika eveni laGideyoni; ngesikhatsi ahlanganisa emabutfo akhe kanye nalawo akaPhahorani baba nemandla kakhulu, ngisho nangetulu kwemadvodza aPhakhasi, lobekayinkhosi yalawo mahlubuka labekacoshe bantfu benkhululeko babakhipha eveni laseZarahemla futsi batsatsa live laba labo.
7 Futsi kwenteka kutsi Moroni kanye naPhahorani bahamba behlela entansi nemabutfo abo baya eveni laseZarahemla, bachubeka balihlasela lelidolobha, futsi bahlangabetana nebantfu baPhakhasi, kangangekutsi balwa.
8 Buka, Phakhasi wabulawa kwatsi bantfu bakhe batsatfwa baboshwa, Phahorani wabese ubuyiselwa esihlalweni sakhe sekwehlulela.
9 Futsi bantfu baPhakhasi behlulelwa, ngekwemtsetfo, kanjalo nalabo bantfu benkhosi labebatsetfwe baphonswa etilongweni; babulawa ngekwemtsetfo; yebo, labo bantfu baPhakhasi kanye nalabo bantfu benkhosi, noma ngabe ngumuphi lobekangafuni kutsatsa tikhali kuvikela live labo, kodvwa balwa nalo, babulawa.
10 Futsi ngaleyondlela kwadzingeka kutsi lomtsetfo ugcinwe ngekucophelela kwentelwa kuphepha kwelive labo; yebo, futsi loyo lobekatfolakala aphikisana nenkhululeko yabo wabulawa ngekushesha ngekwemtsetfo.
11 Waphela kanjalo-ke umnyaka wemashumi lamatsatfu wekubusa kwebehluleli kubantfu baNefi; Moroni kanye naPhahorani sebakubuyisele kuthula eveni laseZarahemla, emkhatsini webantfu babo, sebababulele bonkhe labo labebangakatsembeki etimisweni tenkhululeko.
12 Futsi kwenteka ekucaleni kwemnyaka wemashumi lamatsatfu nakunye wekubusa kwebehluleli kubantfu baNefi, Moroni masinyane wenta kutsi imiphako ihanjiswe, kanjalo nelibutfo lemadvodza latinkhulungwane letisitfupha litfunyelwe kuHilamani, kuyawumsita ekugcineni leyo ncenye yelive.
13 Ngetulu kwaloko wenta kutsi lelibutfo lemadvodza latinkhulungwane letisitfupha, nekudla lokwanele, kutfunyelwe emabutfweni aLehi anaThiyankham. Futsi kwenteka kutsi loku kwentiwa kute kuciniswe lelive ngekumelana nemaLamani.
14 Futsi kwenteka kutsi Moroni kanye naPhahorani, bashiya licembu lemadvodza lelikhulu eveni laseZarahemla, batsatsa luhambo lwabo nelicembu lelikhulu lemadvodza baya ngaseveni laseNefiha, baphokophele kuyawuketula emaLamani kulelo dolobha.
15 Futsi kwenteka kutsi ngesikhatsi basahamba baya ngakulelo live, babamba licembu lelikhulu lemadvodza emaLamani, babulala lamaningi awo, baphindze batsatsa imiphako yawo kanye netikhali tawo.
16 Futsi kwenteka emvakwekutsi sebawatsetse, benta kutsi angene esivumelwaneni sekutsi angeke asatitsatsa tikhali tawo temphi alwe nemaNefi nanini.
17 Ngesikhatsi sekangene kulesi sivumelwano bawatfumela kutsi ayawuhlala nebantfu baka-Amoni, futsi bekasibalo cishe lesitinkhulungwane letine lawo labekangakabulawa.
18 Futsi kwenteka kutsi ngesikhatsi sebawatfumele bachubeka neluhambo lwabo loluya eveni laseNefiha. Futsi kwenteka kutsi ngesikhatsi sebafike edolobheni laseNefiha, bamisa emathende abo ematsafeni aseNefiha, labekasedvute nelidolobha iNefiha.
19 Manje Moroni bekanesifiso sekutsi emaLamani aphume ayawukulwa nabo, ematsafeni; kodvwa emaLamani, ati ngesibindzi sabo lesikhulu kakhulu, aphindze abona sibalo sabo lesikhulu kakhulu, ngako-ke akalokotsanga nhlobo aphuma kuyawukulwa nabo; ngako-ke abatange balwe ngalolo suku.
20 Ngesikhatsi busuku bufika, Moroni wahamba ebumnyameni balobobusuku, wate wafinyelela esicongweni seludvonga kuhlola kutsi emaLamani bekangakuyiphi incenye yelidolobha lapho bekamise khona emathende kwesikhashana nelibutfo lawo.
21 Futsi kwenteka kutsi bekasemphumalanga, ngasekungeneni; futsi onkhe bekalele. Manje Moroni wabuyela ebutfweni lakhe, wenta kutsi lisheshise lilungise tintsambo leticinile kanye nemaladi, kutsi kwehliselwe phansi kusuka ngetulu eludvongeni kungeniswe ngekhatsi kweludvonga.
22 Futsi kwenteka kutsi Moroni wenta kutsi emadvodza akhe ahambe ete etikweludvongeni, bese ehlela kuleyo ncenye yelidolobha, yebo, ngisho nasenshonalanga, lapho emaLamani bekangakemisi emathende awo kwesikhashana nemabutfo awo.
23 Futsi kwenteka kutsi bonkhe behliselwa edolobheni ebusuku, ngetintsambo tabo leticinile kanye nangemaladi abo; ngako-ke ngesikhatsi kufika kusa bonkhe bese bangekhatsi kwetindvonga telidolobha.
24 Manje, ngesikhatsi emaLamani avuka abona kutsi emabutfo aMoroni bekangekhatsi kwetindvonga, esaba kakhulu; kangangekutsi abaleka aphuma ngesikhala.
25 Manje ngesikhatsi Moroni abona kutsi bekambalekela, wenta kutsi emadvodza akhe ahambe awalandzele, abulale labaningi, aphindze atungelete labaningi labanye, bese uyawatsatsa abe tiboshwa; kwatsi labasalako bawo babalekela eveni laMoroni, lebelisemnceleni ngaselugwini lwelwandle.
26 Ngaleyondlela Moroni kanye naPhahorani balitfola lidolobha laseNefiha laba labo ngaphandle kwekulahlekelwa nangumphefumulo munye; futsi baba baningi bemaLamani lababulawa.
27 Manje kwenteka kutsi labaningi bemaLamani labebatiboshwa baba nesifiso sekuhlangana nebantfu ba-Amoni bese baba bantfu labakhululekile.
28 Futsi kwenteka kutsi ngebuningi balabo labebanaleso sifiso, banikwa njengekwetifiso tabo.
29 Ngako-ke, tonkhe tiboshwa temaLamani tahlangana nebantfu ba-Amoni, bacala kusebenta kakhulu, balima umhlabatsi, bakhulisa tonkhe tinhlobo talokuyinhlavu, kanye nemihlambi yetimvu nemihlambi yetinkhomo letitinhlobonhlobo; futsi ngaleyondlela emaNefi aphumula emtfwalweni lomkhulu; yebo, kangangekutsi aphunyutwa kuto tonkhe tiboshwa temaLamani.
30 Manje kwenteka kutsi Moroni, emvakwekutsi sekatfole lidolobha laNefiha laba lakhe, sekatsetse tiboshwa letiningi, loko lokwasehlisa kakhulu sibalo semabutfo emaLamani, futsi sekatfole labaningi bemaNefi labebaboshiwe, loko lokwalicinisa kakhulu libutfo laMoroni; ngako-ke Moroni wahamba esuka eveni laNefiha waya eveni laLehi.
31 Futsi kwenteka kutsi ngesikhatsi emaLamani abona kutsi Moroni beketa atawukulwa nawo, aphindze esaba futsi alibalekela libutfo laMoroni.
32 Futsi kwenteka kutsi Moroni kanye nelibutfo lakhe bawacosha lidolobha ngelidolobha, bate bahlangana naLehi banaThiyankham; futsi emaLamani abalekela Lehi anaThiyankham, ehlisa imincele ngaselugwini lwelwandle, ate afika eveni laMoroni.
33 Emabutfo emaLamani abutsana onkhe ndzawonye, kangangoba onkhe aba licembu linye eveni laMoroni. Manje Amoroni, inkhosi yemaLamani, nayo ngalokunjalo beyinawo.
34 Futsi kwenteka kutsi Moroni naLehi kanye naThiyankham bakanekisa nemabutfo abo batungeleta eminceleni yelive laMoroni, kangangoba emaLamani atungeletwa eminceleni yelihlane ngaseningizimu, kanye naseminceleni yelihlane lelisempumalanga.
35 Futsi ngaleyondlela bamisa emathende kwesikhashana busuku bonkhe. Ngoba buka, emaNefi kanye nemaLamani ngalokunjalo besebakhatsele ngenca yebudze beluhambo; ngako-ke abentanga licebo lekuhlakanipha ebusuku, ngaphandle kwaThiyankham; ngoba yena bekamtfukutselele kakhulu Amoroni, kangangekutsi bekabona kutsi ngu-Amoroni, kanye na-Amalikhiya umnakabo, labebayimbangela yalemphi lenkhulu nalengapheli emkhatsini wabo kanye nemaLamani, lebeyiyimbangela yekulwa kanye nekucitseka kwengati lokukhulu kangaka, yebo, kanye nendlala lengaka.
36 Futsi kwenteka kutsi Thiyankham entfukutselweni yakhe wahamba waya enkanjini yemaLamani, wahla ngeludvonga lwelidolobha. Wahamba ngentsambo, indzawo ngendzawo, kangangoba wate wayitfola inkhosi; wayijikijela ngentjumentju, leyabhobosa edvute nenhlitiyo. Kodvwa buka, inkhosi yativusa tinceku tayo ngaphambi kwekutsi ife, kangangekutsi tamlandzela Thiyankham, futsi tambulala.
37 Manje kwenteka kutsi ngesikhatsi Lehi kanye naMoroni batfola kutsi Thiyankham besekafile badzabuka kakhulu; ngoba buka, bekayindvodza lebeyililwele ngebuchawe live layo, yebo, umngani weliciniso lenkhululeko; futsi bekeve tinhlupheko letiningi kakhulu. Kodvwa buka, besekafile, futsi sekahambe indlela yemhlaba wonkhe.
38 Manje kwenteka kutsi Moroni wahamba ngakusasa, wate wefika kumaLamani, kangangekutsi bawabulala kakhulu; baphindze bawachuba bawakhipha eveni; abaleka, kangangekutsi abatange basabuya ngaleso sikhatsi kutawukulwa nemaNefi.
39 Futsi waphela kanjalo-ke umnyaka wemashumi lamatsatfu nakunye wekubusa kwebehluleli kubantfu baNefi; ngaleyondlela bese bake baba netimphi, nekucitseka kwengati, nendlala, kanye netinhlupheko, sikhatsi lesiyiminyaka leminingi.
40 Futsi bekukhona kubulalana, nemibango, nekuhlubuka, kanye nato tonkhe tinhlobo tebubi emkhatsini webantfu baNefi; noko ngenca yalabalungile, yebo, ngenca yemithandazo yalabalungile, basindziswa.
41 Kodvwa buka, ngenca yekudvonsa lokukhulu kakhulu kwalemphi emkhatsini wemaNefi kanye nemaLamani labaningi bese balukhuni, ngenca yekudvonsa lokukhulu kakhulu kwemphi; futsi labaningi batsamba ngenca yetinhlupheko tabo, kangangekutsi batitfoba phambi kwaNkulunkulu, ngisho nasekujuleni kwekutitfoba.
42 Futsi kwenteka kutsi emvakwekutsi Moroni sekaticinisile leto tincenye telive lebetisengotini kakhulu kumaLamani, taze tacina ngalokwanele, wabuyela edolobheni laseZarahemla; kanjalo naHilamani wabuyela endzaweni lelifa lakhe; kwaba khona kuthula lokwamiswa emkhatsini webantfu baNefi.
43 Moroni wanikela kuphatfwa kwemabutfo akhe etandleni tendvodzana yakhe, libito layo bekunguMoroniha; futsi yena watsatsa umhlalaphansi ekhaya lakhe kute acitse tinsuku takhe letasetisele ngekuthula.
44 Futsi Phahorani wabuyela esihlalweni sakhe sekwehlulela; naHilamani watsatsa umsebenti wekushumayela kubantfu livi laNkulunkulu; ngoba ngenca yetimphi letiningi kangaka kanye nemibango kwadzingeka kutsi lihlelwe futsi libandla.
45 Ngako-ke, Hilamani kanye nabomnakabo bahamba, balimemetela livi laNkulunkulu ngemandla lamakhulu, kangangoba bakholisa bantfu labaningi ngebubi babo, lokwabenta kutsi baphendvuke etonweni tabo baphindze babhajatiswe eNkhosini Nkulunkulu wabo.
46 Futsi kwenteka kutsi baphindze balimisa libandla laNkulunkulu, kulo lonkhe live.
47 Yebo, imigomo yentiwa mayelana nemtsetfo. Behluleli babo, kanye nebehluleli babo labakhulu bakhetfwa.
48 Futsi bantfu baNefi baphindze bacala baphumelela eveni, bacala bandza bacina kakhulu eveni. Bacala futsi bakhula banotsa kakhulu.
49 Kodvwa nanoma kungenca yemcebo wabo, nemandla abo, kanye nemphumelelo yabo, abatange batikhukhumete ngenca yekutibona kwabo; noma baphute kukhumbula iNkhosi Nkulunkulu wabo; kodvwa batitfoba kakhulu ngaphambi kwayo.
50 Yebo, bakhumbula kutsi betitinkhulu kangakanani tintfo iNkhosi lebeyibentele tona, kutsi beyibakhululile ekufeni, nasekuboshweni, nasemajele, kanye nakuto tonkhe tinhlobo tetinhlupheko, futsi beyibakhululile baphuma etandleni tetitsa tabo.
51 Futsi bathandaza eNkhosini Nkulunkulu wabo njalonjalo, kangangekutsi iNkhosi yababusisa, njengekwelivi layo, kangangoba bakhula bacina baphindze baphumelela eveni.
52 Futsi kwenteka kutsi tonkhe leti tintfo tenteka. NaHilamani wafa, ngemnyaka wemashumi lamatsatfu nesihlanu wekubusa kwebehluleli kubantfu baNefi.