Sehluko 63
Shibiloni naHilamani muva batsatsa imibhalo lengcwele iba ngeyabo—EmaNefi lamaningi ahamba aya eveni lelingasenyakatfo—Hagothi wakha imikhumbi, lehamba elwandle lolusenshonalanga—Moroniha wehlula emaLamani emphini, Cishe ngemnyaka wa 56 kuya kuwa 52 ngaphambi kwekutalwa kwaKhristu.
1 Futsi kwenteka kutsi ekucaleni kwemnyaka wemashumi lamatsatfu nesitfupha wekubusa kwebehluleli kubantfu baNefi, Shibiloni watsatsa leto tintfo letingcwele letatiletfwe kuHilamani .
2 Futsi bekayindvodza lelungile, wahamba ngebucotfo phambi kwaNkulunkulu; wetama kutsi ente lokuhle njalonjalo, ngekutsi ayigcine imiyaleto yeNkhosi Nkulunkulu wakhe; futsi wenta kanjalo nemnakabo.
3 Futsi kwenteka kutsi Moroni naye wafa. Waphela kanjalo-ke umnyaka wemashumi lamatsatfu nesitfupha wekubusa kwebehluleli.
4 Futsi kwenteka kutsi ngemnyaka wemashumi lamatsatfu nesikhombisa wekubusa kwebehluleli, kwaba khona licembu lelikhulu lemadvodza, lelingabalelwa etinkhulungwaneni letisihlanu nemakhulu lamane, nebafati bawo kanye nebantfwana bawo, esuka aphuma eveni laseZarahemla aya eveni lelingasenyakatfo.
5 Futsi kwenteka kutsi Hagothi, ayindvodza letsandza kwati lokufihlakele, ngako-ke wahamba watakhela umkhumbi lomkhulu kakhulu, eminceleni yelive iNala, ngaseveni iNchitsakalo, wawungenisa elwandle lolusenshonalanga, ngasesihlengeni lesincane lesiholela eveni lelingasenyakatfo.
6 Buka, bekukhona labaningi bemaNefi labangena kuwo bahamba nemiphako leminingi kakhulu, nebesifazane labaningi kanye nebantfwana; futsi batsatsa indlela yabo leya ngasenyakatfo. Waphela kanjalo-ke umnyaka wemashumi lamatsatfu nesikhombisa
7 Ngemnyaka wemashumi lamatsatfu nesiphohlongo, lendvodza yakha leminye imikhumbi. Futsi umkhumbi wekucala waphindze wabuya, bantfu labanye labaningi bangena kuwo; nabo ngalokunjalo batsatsa umphako lomningi, baphindze bahamba baya eveni lelingasenyakatfo.
8 Futsi kwenteka kutsi akuphindzanga kwevakala lutfo ngabo. Sicabanga kutsi bamita ekujuleni kwelwandle. Futsi kwenteka kutsi lomunye umkhumbi nawo wahamba; kutsi lowo waya kuphi asati.
9 Futsi kwenteka kutsi ngalowo mnyaka baba baningi bantfu labahamba baya eveni lelingasenyakatfo. Waphela kanjalo-ke umnyaka wemashumi lamatsatfu nesiphohlongo.
10 Futsi kwenteka ngemnyaka wemashumi lamatsatfu nemfica wekubusa kwebehluleli, Shibiloni naye wafa, Khoriyanthoni besekahambe waya eveni lelingasenyakatfo ngemkhumbi, kuyawumikisa umphako kubantfu labebahambe baya kulelo live.
11 Ngako-ke kwadzingeka kutsi Shibiloni endlulise leto tintfo letingcwele, ngaphambi kwekufa kwakhe, kundvodzana yaHilamani, leyayibitwa ngekutsi nguHilamani, leyayicanjwe ngelibito leyise.
12 Manje buka, yonkhe leyo micopho leyayiphetfwe nguHilamani yabhalwa futsi yatfunyelwa emkhatsini webantfwana bebantfu kulo lonkhe live, ngaphandle kwaleto tincenye Alima labebayale ngato kutsi tingembulwa.
13 Noko, leti tintfo kwakufanele tigcinwe tingcwele, futsi tendluliselwe tehle tisuke esitukulwaneni sinye kuya kulesinye; ngako-ke ngalowo mnyaka, tatinikwe Hilamani, ngaphambi kwekufa kwaShibiloni.
14 Futsi kwaphindze kwenteka ngawo lowo mnyaka kutsi kwaba khona lamanye emahlubuka labekahambe aya kumaLamani, aphindze aphehlwa kutsi awatfukutselele emaNefi.
15 Futsi ngalowo mnyaka ehla nelibutfo leliningi kakhulu kutawukulwa nebantfu baMoroniha, noma nelibutfo laMoroniha, lapho ashaywa aphindze achutjwa abuyiselwa emuva futsi emaveni awo, alahlekelwe kakhulu.
16 Waphela kanjalo-ke umnyaka wemashumi lamatsatfu nemfica wekubusa kwebehluleli kubantfu baNefi.
17 Waphela kanjalo-ke umlandvo waAlima, kanye naHilamani indvodzana yakhe, kanjalo naShibiloni, lobekayindvodzana yakhe.