1 Manje, kwenteka kutsi baba baningi labaweva emavi aSamuweli, umLamani, lawakhuluma etikwetindvonga telidolobha. Ngebuningi balabo labakholelwa evini lakhe bahamba bayawufuna Nefi; futsi ngesikhatsi sebamtfolile bativuma kuye tono tabo bangatiphiki, banesifiso sekutsi babhajatiselwe eNkhosini.

2 Kodvwa ngebuningi balabo labangatange bakholelwe emavini aSamuweli bamtfukutselela; bamjikijela ngematje asetikweludvonga, ngetulu kwaloko labaningi bamdubula ngemicibisholo ngesikhatsi eme etikweludvonga; kodvwa Moya weNkhosi bewunaye, kangangekutsi abakwatanga kumshaya ngematje abo futsi kanjalo nangemicibisholo yabo.

3 Manje ngesikhatsi babona kutsi bebangakhoni kumshaya, kwaba khona labaningi kakhulu labakholelwa emavini akhe, kangangekutsi bahamba baya kuNefi kute babhajatiswe.

4 Ngoba bukani, Nefi bekabhabhatisa, aphrofetha, ashumayela, amemetela kuphendvuka ebantfwini, abakhombisa timphawu kanye netibonakaliso, futsi enta timangaliso emkhatsini webantfu, kute bati kutsi Khristu bese kufanele ete madvute—

5 Abatjela ngetintfo lebekufanele tenteke masinyane, kute bati futsi bakhumbule ngesikhatsi sekuta kwato kutsi tatembuliwe kubo ngaphambili, ngenhloso yekutsi bakholwe; ngako-ke ngebuningi balabo labakholwa emavini aSamuweli baya kuye kute babhajatiswe; ngoba beta baphendvuka futsi bativuma tono tabo.

6 Kodvwa liningi labo aliwakholwanga emavi aSamuweli; ngako-ke ngesikhatsi babona kutsi bebangakhoni kumshaya ngematje kanye nangemicibisholo yabo, bakhala etindvuneni tabo, batsi: Tsatsani lomuntfu nimbophe, ngoba bukani unadeveli; futsi ngenca yemandla adeveli lakuye asikhoni kumshaya ngematje etfu kanye nangemicibisholo yetfu; ngako-ke mtsatseni nimbophe, bese niyamsusa lapha.

7 Futsi ngesikhatsi sebahamba kute bayombamba, bukani, wagcumela phansi asuka etulu eludvongeni, wabaleka waphuma eveni labo, yebo, wate wefika eveni lakubo, futsi wacala kushumayela kanye nekuphrofetha emkhatsini webantfu bakubo.

8 Bukani, emaNefi akaphindzanga eva ngaye; futsi taba kanjalo-ke tindzaba tebantfu.

9 Waphela kanjalo-ke umnyaka wemashumi lasiphohlongo nesitfupha wekubusa kwebehluleli kubantfu baNefi.

10 Waphela kanjalo-ke nemnyaka wemashumi lasiphohlongo nesikhombisa wekubusa kwebehluleli, incenye leningi yebantfu ihleli nekutatisa kanye nekwenta bubi, futsi incenye lencane ihamba ngekucaphela ngaphambi kwaNkulunkulu.

11 Futsi kwaphindze kwaba ngulesi simo, nangemnyaka wemashumi lasiphohlongo nesiphohlongo wekubusa kwebehluleli.

12 Kwabakhona lokuncane kugucuka etimeni tebantfu, ngaphandle kwekutsi bantfu bacala kucina kakhulu ekwenteni bubi, futsi benta lokuningi kakhulu kwaloko lokwakuphambene nemiyaleto yaNkulukulu, ngemnyaka wemashumi lasiphohlongo nemfica wekubusa kwebehluleli.

13 Kodvwa kwenteka kutsi ngemnyaka wemashumi layimfica wekubusa kwebehluleli, kwaba khona tibonakaliso letinkhulu letanikwa bantfu, kanye netimangaliso; nemavi ebaphrofethi acala kugcwaliseka.

14 Futsi tingilosi tavela kubantfu, tati, futsi tamemetela kubo tindzaba letimnandzi tekutfokota lokukhulu; ngako-ke ngalomnyaka imibhalo lengcwele yacala kugcwaliseka.

15 Noko, bantfu bacala benta tinhlitiyo tabo taba lukhuni, bonkhe ngaphandle kwaleyo ncenye yabo lebeyikholwa kakhulu, yemaNefi futsi kanjalo neyemaLamani, bacala kutsembela emandleni abo kanye nasekuhlakanipheni kwabo, batsi:

16 Letinye tetintfo baticagele kahle, emkhatsini waletiningi kangaka; kodvwa buka, siyati kutsi yonkhe lemisebenti lemikhulu kanye nalemangalisako ngeke igcwaliseke, lokwakhulunywa ngayo.

17 Futsi bacala kucocisana kanye nekuphikisana, batsi:

18 Akunamcondvo kutsi umuntfu lonjengaKhristu uyawuta; uma kunjalo, futsi ayiNdvodzana yaNkulunkulu, Babe welizulu nemhlaba, njengoba bekukhulunyiwe, kuyangani angeke atibonakalise kitsi kanjalo nakulabo labayawube baseJerusalema na?

19 Yebo, kuyangani angeke atibonakalise kulelive kanjalo naseveni laseJerusalema na?

20 Kodvwa bukani, siyati kutsi leli lisiko lelibi, lelandluliselwa kitsi bobabe betfu, kusenta kutsi sikholwe entfweni letsite lenkhulu futsi nalemangalisako leyawukwenteka, kodvwa hhayi emkhatsini wetfu, kodvwa eveni lelikhashane kakhulu, live lesingalati; ngaloko-ke bangasigcina singenalwati, ngoba ngeke sikwati kutibonela ngemehlo etfu kutsi tiliciniso.

21 Futsi, ngebucili kanye nangebuciko lobungacondzakali balomubi, bente timfihlakalo letitsite letinkhulu lesingeke siticondze, letiyosigcina sisesimeni lesibi singaphansi kwemavi abo, futsi ngetulu kwaloko sibe ngaphansi kwabo, ngoba setsembele kubo kutsi basifundzise livi; futsi ngaleyondlela bayawusigcina site lwati uma sitinikela kubo, tinsuku tonkhe tekuphila kwetfu.

22 Futsi tiningi letinye tintfo bantfu labaticabanga etinhlitiyweni tabo, lebetibuwula futsi tilite; bebaphatamisekile kakhulu, ngoba Sathane wabaphehla kutsi bente bubi njalo; yebo, bekahamba azulazula andzisa emahemuhemu kanye nemibango eveni lonkhe, kute atente lukhuni tinhlitiyo tebantfu ngalokumelene naloko lobekukuhle kanye naloko lobekutawenteka.

23 Futsi nanoma kungenca yetimphawu kanye netibonakaliso lebetentiwa emkhatsini webantfu beNkhosi, kanye netimangaliso letiningi labebatenta, Sathane watfola kubambelela lokukhulu etinhlitiyweni tebantfu eveni lonkhe.

24 Futsi waphela kanjalo-ke umnyaka wemashumi layimfica wekubusa kwebehluleli kubantfu baNefi.

25 Futsi iphela kanjalo-ke incwadzi yaHilamani, ngekwembhalo waHilamani kanye nemadvodzana akhe.