1 Futsi kwenteka kutsi ngemnyaka wemashumi lamane nakubili wekubusa kwebehluleli, emvakwekutsi Moroniha sekacinisekise kuthula futsi emkhatsini wemaNefi nemaLamani, bukani, bekute lobekatawutsatsa sihlalo sekwehlulela; ngako-ke kwacala kwaba nembango futsi emkhatsini webantfu mayelana nekutsi ngubani lobekumele atsatse sihlalo sekwehlulela.

2 Futsi kwenteka kutsi Hilamani, lobekayindvodzana yaHilamani, wabekwa kutsi atsatse sihlalo sekwehlulela, ngelivi lebantfu.

3 Kodvwa bukani, Khishkhumeni, lobekabulele Phahorani, abebhacele kubulala naHilamani; futsi bekasekelwe licembu lakhe, lebelingene esivumelwaneni sekutsi kube bete namunye lotawukwati ngebubi bakhe.

4 Ngoba bekukhona Gadiyanthoni mumbe, lobekayingcweti kakhulu ekukhulumeni, kanjalo nangebuciko bakhe, kutsi achubeke nekwenta umsebenti lofihlekile wekubulala kanye newekugebenga; ngako-ke waba ngumholi welicembu laKhishkhumeni.

5 Ngako-ke wabayenga, kanjalo naKhishkhumeni, kutsi uma bangambeka esihlalweni sekwehlulela bekatawukwenta labo labebabelicembu lakhe kutsi banikwe emandla kanye neligunya emkhatsini webantfu; ngako-ke Khishkhumeni wafuna kumbulala Hilamani.

6 Futsi kwenteka kutsi ngesikhatsi ahamba aya ngasesihlalweni sekwehlulela kuyawubulala Hilamani, bukani yinye yetinceku taHilamani, lebeyiphumile ebusuku, itfolile, ngekutifihla, lwati ngalawo macebo labekabekiwe ngulelicembu kubulala Hilamani—

7 Futsi kwenteka kutsi yahlangana naKhishkhumeni, yamnika luphawu; ngako-ke Khishkhumeni wayitjela inhloso yesifiso sakhe, afuna kutsi imhole imyise esihlalweni sekwehlulela kute abulale Hilamani.

8 Ngesikhatsi inceku yaHilamani seyikwati konkhe lobekusenhlitiyweni yaKhishkhumeni, nekutsi bekuyinhloso yakhe kubulala, kanjalo nekutsi bekuyinhloso yabo bonkhe labo labebabelicembu lakhe kutsi babulale, baphange, nekuzuza emandla, (futsi loku bekulisu labo lelifihlekile, nelicebo labo) inceku yaHilamani yatsi kuKhishkhumeni: Asihambe siye esihlalweni sekwehlulela.

9 Manje loku kwamjabulisa Khishkhumeni, ngoba bekacabanga kutsi bekatawulifeza lisu lakhe; kodvwa bukani, inceku yaHilamani, basahamba baya esihlalweni sekwehlulela, yagwaza Khishkhumeni enhlitiyweni, kangangekutsi wawa wafa ngaphandle kwekububula. Yagijima yayotjela Hilamani tonkhe tintfo leyayitibonile, naleyayitivile kanye naleyayitentile.

10 Futsi kwenteka kutsi Hilamani watfumela kutsi kuyawubanjwa lelicembu letigebengu kanye nebabulali labafihlakele, kute bajeziswe ngekwemtsetfo.

11 Kodvwa bukani, ngesikhatsi Gadiyanthoni sekatfolile kutsi Khishkhumeni akabuyanga wesaba kutsi hleze naye abulawe; ngako-ke wenta kutsi licembu lakhe limlandzele. Babaleka baphuma eveni, ngendlela lefihlakele, baya ehlane; ngalesi sizatfu ngesikhatsi Hilamani sekatfumele kutsi bayobanjwa abatange basatfolakala ndzawo.

12 Futsi lokunye ngaloGadiyanthoni kutobuye kukhulunywe ngako emvakwaloku. Waphela kanjalo-ke umnyaka wemashumi lamane nakubili wekubusa kwebehluleli kubantfu baNefi

13 Futsi bukani, ekugcineni kwalencwadzi nitawubona kutsi loGadiyanthoni waba yimbangela yekubhujiswa, yebo, cishe konkhe kubhujiswa kwebantfu baNefi.

14 Bukani angisho ekugcineni kwencwadzi yaHilamani, kodvwa ngisho ekugcineni kwencwadzi yaNefi, lengitsatse kuyo wonkhe umlandvo lengiwubhalile.