Siphrofetho saNefi, iNdvodzana yaHilamani—Nkulunkulu wesabisa bantfu baNefi ngekutsi utawubavakashela ngentfukutselo yakhe, lokutobangela kutsi babhujiswe ngaphanndle kwekutsi baphendvuke ebubini babo. Nkulunkulu ushaya bantfu baNefi ngamashayabhuce wesifo; bayaphendvuka baphindze babuyela kuye, Samuweli, umLamani, uphrofetha kumaNefi.
Sitfolakala etahlukweni 7 kuya ku 16.
Sehluko 7
Nefi uyaliwa enyakatfo futsi ubuyela eZarahemla—Uyathandaza embhoshongweni losensimini yakhe emvakwaloko uncusa bantfu kutsi baphendvuke noma bafe. Cishe ngemnyaka wa 23 kuya kuwa 21 ngaphambi kwekutalwa kwaKhristu.
1 Buka, manje kwenteka kutsi ngemnyaka wemashumi lasitfupha nemfica wekubusa kwebehluleli kubantfu baNefi, Nefi, indvodzana yaHilamani, wabuyela edolobheni laseZarahemla asuka eveni lelingasenyakatfo.
2 Ngoba bekaphumile emkhatsini webantfu labebaseveni lelingasenyakatfo, walishumayela livi laNkulunkulu kubo, waphindze waphrofetha tintfo letiningi kubo
3 Futsi bawalahla onkhe emavi akhe, kangangekutsi akatange avunyelwe kuhlala emkhatsini wabo, kodvwa waphindze wabuyela eveni latalelwa kulo.
4 Futsi abona bantfu basesimeni sebubi lobesabeka kanje, kanye naleto tigebengu taGadiyanthoni titsatsa tihlalo tekwehlulela—setitsetse ngebucili emandla kanye neligunya lalelive; tabeka eceleni imiyaleto yaNkulunkulu, futsi tangenti nalokuncane lokulungile phambi kwakhe; tangehluleli ngekulunga kubantfwana bebantfu;
5 Tijezisa labalungile ngenca yekulunga kwabo; tiyekela labanelicala nalababi kutsi bangajeziswa ngenca yemali yabo; ngetulu kwaloko tibekwa etihlalweni letisetulu tembuso, kutsi tibuse tiphindze tente ngekwentsandvo yato, kute titfole inzuzo kanye neludvumo lwemhlaba, futsi, ngetulu kwaloko, kute tiphinge kalula, tebe, tibulale, tiphindze tente ngekwentsadvo yato—
6 Manje lobu bubi lobukhulu befika kumaNefi, esikhatsini lesiyiminyaka lemincane; futsi ngesikhatsi Nefi akubona loku, inhlitiyo yakhe yagcwala lusizi ngekhatsi esifubeni sakhe; wamemeta ngebuhlungu bemphefumulo wakhe.
7 Awu, kube tinsuku tami taba nguletinsuku ngesikhatsi babe Nefi aphuma kwekucala eveni laseJerusalema, ngabe ngangiyojabula naye eveni lesetsembiso; ngaleso sikhatsi bantfu bakhe bekulula kubancenga, bacinile ekugcineni imiyaleto yaNkulunkulu, kungasilula kutsi baholelwe ekwenteni lokubi; futsi bebashesha kuwalalela emavi eNkhosi—
8 Yebo, kube tinsuku tami tatingaleto tinsuku, ngabe umphefumulo wami wawutfokota kuko kulunga kwabomnaketfu.
9 Kodvwa buka, nginikwe kutsi leti kube tinsuku tami, nekutsi umphefumulo wami uyawugcwaliswa ngelusizi ngenca yebubi babomnaketfu.
10 Buka, manje kwenteka kutsi bekungusetikwembhoshongo, lobewusensimini yaNefi, lebeyingasemgwacweni lomkhulu lobewuya emakethe lenkhulu, lebeyisedolobheni laseZarahemla; ngako-ke, Nefi bekaguce embhoshongweni lobewusensimini yakhe, umbhoshongo lobewusedvute nelisango lensimu lapho umgwaco lomkhulu bewendlula khona.
11 Futsi kwenteka kutsi bekukhona emadvodza latsite labekendlula lapho ambona Nefi ngesikhatsi athandaza ngenshisekelo kuNkulunkulu embhoshongweni; agijima ayotjela bantfu ngalabekakubonile, futsi nebantfu babutsana ndzawonye ngeticuku kute bati sizatfu sekulila lokukhulu kangaka ngenca yebubi bebantfu.
12 Manje, ngesikhatsi Nefi asukuma watibona ticuku tebantfu labesebabutsene ndzawonye.
13 Futsi kwenteka kutsi wakhuluma nabo watsi: Bukani, kungani nibutsene ndzawonye na? Kungoba nifuna nginitjele ngebubi benu na?
14 Yebo, ngenca yekutsi ngigibele embhoshongweni wami kute ngithandaze ngenshisekelo kuNkulunkulu wami, ngenca yelusizi lolukhulu lwenhlitiyo yami, ngenca yebubi benu!
15 Futsi ngenca yekulila kanye nekukhala kwami senibutsene ndzawonye, niyamangala; yebo, futsi kufanele kutsi nimangale; yebo, nimele kumangala ngoba senitinikele kangangekutsi develi sewunemandla lamakhulu etinhlitiyweni tenu..
16 Yebo, nivumelani kutinikela ekuyengweni nguloyo lofuna kuphonsa imiphefumulo yenu phansi ekuhluphekeni kwaphakadze kanye naselusizini lolungapheli na?
17 Awu phendvukani, phendvukani! Kungani nitawukufa na? Buyani, buyani eNkhosini Nkulunkulu wenu. Kungani inilahlile na?
18 Kungoba nitente lukhuni tinhlitiyo tenu; yebo, anifuni kulalela livi lemelusi lolungile; yebo, nimente wanitfukutselela.
19 Bukani, esikhundleni sekutsi anigcogce, ngaphandle kwekutsi niphendvuke, bukani, utawunihlakata kute nibe yinyama yetinja kanye netilwane tasendle.
20 Awu, ngabe nimkhohlwe kanjani Nkulunkulu wenu ngalo kanye lolusuku lanikhulula ngalo na?
21 Kodvwa bukani, kungoba nifuna kutfola inzuzo, kute nidvunyiswe bantfu, yebo, kute nitfole ligolide nesiliva. Futsi senibeke tinhlitiyo tenu emcebeni kanye nasetintfweni letilite talomhlaba, ngenca yato niyabulala, niyaphanga, niyeba, nifakaze emanga ngamakhelwane wenu, niphindze nente tonkhe tinhlobo tebubi.
22 Futsi ngalesizatfu lusizi luyeta kini ngaphandle kwekutsi niphendvuke. Ngoba uma ningeke niphendvuke, bukani, lelidolobha lelikhulu, kanye nawo onkhe lawo madolobha lamakhulu lalitungeletile, laseveni lekungeletfu, atawutsatfwa kute ningasabi nendzawo kuwo; ngoba bukani, iNkhosi angeke ininike emandla, njengoba yentile kute kube ngumanje, kutsi nimelane netitsa tenu.
23 Ngoba bukani, naku lokushiwo yiNkhosi: Angeke ngikhombise kulabo lababi emandla ami, kulomunye ngetulu kwalomunye, ngaphandle kwalabo labaphendvukako etonweni tabo, futsi balalele emavi ami. Manje ngako-ke, ngifuna kutsi nibuke, bomnaketfu, kutsi kuyawubancono kumaLamani kunani ngaphandle kwekutsi niphendvuke.
24 Ngoba bukani, wona alunge kakhulu kunani, ngoba akate one ngalokumelene nalolo lwati lolukhulu lenilutfolile; ngako-ke iNkhosi itawuba nemusa kuwo; yebo, itawandzisa tinsuku tawo iphindze yandzise intalelwane yawo, kantsi nine nitawubhujiswa ngaphandle kwekutsi niphendvuke.
25 Yebo, maye kini ngenca yaleso sinengiso lesikhulu lesite kini, futsi nitihlanganise naso, yebo, lelo cembu leliyimfihlo lelasungulwa nguGadiyanthoni!
26 Yebo, lusizi luyawuta kini ngenca yaloko kutichenya lenikuvumele kutsi kungene etinhlitiyweni tenu, lokuniphakamise ngetulu kwaloko lokulungile ngenca yemcebo wenu lomkhulu kakhulu!
27 Yebo, maye kini ngenca yebubi kanye netinengiso tenu!
28 Futsi ngaphandle kwekutsi niphendvuke nitawukufa; yebo, nemave enu atawutsatfwa kini, niphindze nibhujiswe niphele emhlabeni wonkhe.
29 Bukani manje, angisho kutsi letintfo tiyawuba njalo, ngekwami, ngoba akusiko kuhlakanipha kwami kutsi ngitati letintfo; kodvwa bukani, ngiyati kutsi letintfo tiliciniso ngoba iNkhosi Nkulunkulu itembulile kimi, ngako-ke ngiyafakaza kutsi titawukwenteka.