Sehluko 14
Samuweli ubika kukhanya ngesikhatsi sasebusuku kanye nenkhanyeti lensha ngekutalwa kwaKhristu—Khristu ukhulula bantfu ekufeni kwemtimba kanye nekwakamoya—Tibonakaliso tekufa Kwakhe kutawuba tinsuku letintsatfu tebumnyama, kuchekeka kwemadvwala, kanye nekubhedvuka lokukhulu kwemvelo. Cishe ngemnyaka wesi 6 ngaphambi kwekutalwa kwaKhristu.
1 Manje kwenteka kutsi Samuweli, umLamani, waphrofetha tintfo letinkhulu naletingi kakhulu letingeke tibhalwe.
2 Buka, watsi kubo: Bukani, ngininika sibonakaliso; sekutsi eminyakeni lesihlanu letako, futsi bukani, iyawubese seyiyafika iNdvodzana yaNkulunkulu kutawuhlenga bonkhe labo labayawukholwa egameni layo.
3 Bukani, ngitawuninika loku kutsi kube sibonakaliso ngesikhatsi sekufika kwayo; ngoba bukani, kuyawuba khona kukhanya lokukhulu ezulwini, kangangekutsi ebusuku ngaphambi kwekutsi ifike angeke bube khona bumnyama, kangangekutsi kubantfu kuyawuba shengatsi kusemini.
4 Ngako-ke, kuyawuba khona lusuku lunye nebusuku kanye nelusuku, kube shengatsi lusuku lunye futsi kute busuku; loku kuyawuba sibonakaliso kini; ngoba niyawukwati ngekuphuma kwelilanga futsi kanjalo nangekushona kwalo; ngako-ke bayawukwati ngekweliciniso kutsi kuyawuba netinsuku letimbili nebusuku; noko busuku ngeke bube mnyama; futsi lobo kuyawuba busuku ngaphambi kwekutsi atalwe.
5 Bukani, kuyawuba khona inkhanyeti lensha leyawuvela, yeluhlobo leningakate nilubone; futsi naloku kuyawuba sibonakaliso kini.
6 Bukani, loko akusiko konkhe, kuyawuba khona letiningi tibonakaliso kanye netimangaliso ezulwini.
7 Futsi kuyawukwenteka kutsi nonkhe niyawumangala, niphindze nitibute, kangangekutsi niyawuwela phansi.
8 Futsi kuyawukwenteka kutsi loyo loyawukholwa kuyo iNdvodzana yaNkulunkulu, yena kanye loyo uyawuba nekuphila lokuphakadze.
9 Bukani, naku lengiyalete ngako iNkhosi, ngengilosi yayo, kutsi kufanele ngite ngitawunitjela lentfo; yebo, iyalete kutsi ngitawutiphrofetha letintfo kini; yebo, itsite kimi: Khala kulabantfu utsi, phendvukani futsi nilungise indlela yeNkhosi.
10 Manje, ngenca yekutsi ngingumLamani, ngikhulume kini emavi iNkhosi lengiyalete ngawo, futsi ngenca yekutsi abe lukhuni ngalokumelene nani, niyangitfukutselela nifuna kungibulala, niphindze nangicosha emkhatsini wenu.
11 Futi nitawuweva emavi ami, ngoba, ngalenhloso ngite etikwaletindvonga talelidolobha, kute nive futsi nati ngetehlulelo taNkulunkulu letinilindzile ngenca yebubi benu, futsi nekutsi nati ngemibandzela yekuphendvuka;
12 Nekutsi nati ngekuta kwaJesu Khristu, iNdvodzana yaNkulunkulu, Babe welizulu kanye nemhlaba, uMdali wetintfo tonkhe kusukela ekucaleni; futsi nekutsi nati ngetibonakaliso tekuta kwakhe, ngenhloso yekutsi nikholwe egameni lakhe.
13 Uma nikholwa egameni lakhe nitawuphendvuka etonweni tenu tonkhe, kute ngaloko nibe nekutsetselelwa kwato ngetento takhe letinhle.
14 Bukani, lesinye sibonakaliso ngininika sona futsi, yebo, sibonakaliso sekufa kwakhe.
15 Ngoba bukani, kufanele ngempela afe kute kube khona kusindziswa; yebo, kufanele futsi kumele kutsi afe, kute kube khona kuvuka kwalabafile, kute ngaloko bantfu baletfwe ebukhoneni beNkhosi.
16 Yebo, bukani, lokufa kwenta kube khona kuvuka, futsi kuhlenga lonkhe luntfu ekufeni kwekucala—loko kufa kwakamoya; ngoba lonkhe luntfu, ngekuwa kwa-Adamu lususiwe ebukhoneni beNkhosi, lutsatfwa ngekutsi lufile, etintfweni tasemhlabeni kanye nasetintfweni takamoya.
17 Kodvwa bukani, kuvuka kwaKhristu kuhlenga luntfu, yebo, ngisho luntfu lonkhe, futsi kulubuyisela ebukhoneni beNkhosi.
18 Yebo, kuletsa umbandzela wekuphendvuka, wekutsi loyo lophendvukako yena kanye loyo ngeke ajutjwe aphonswe emlilweni; kodvwa loyo longaphendvuki uyajutjwa aphonswe emlilweni; bese kuta kubo futsi kufa kwakamoya, yebo, kufa kwesibili, ngoba bayasuswa futsi etintfweni letiphatselene nekulunga.
19 Ngako-ke phendvukani, phendvukani, hleze ngekwati letintfo kodvwa ningatenti niyawutivumela kutsi nibekwe licala, bese niletfwa kulokufa kwesibili.
20 Kodvwa bukani, njengoba ngishito kini mayelana nalesinye sibonakaliso, sibonakaliso sekufa kwayo, bukani, ngalolo suku layawukuva ngalo kufa lilanga liyawushona lale kuveta kukhanya kwalo kini; kanjalo nenyanga kanye netinkhanyeti; futsi angeke kube khona kukhanya eveni lonkhe, kusukela esikhatsini leso layawukuva ngaso kufa, sikhatsi lesitinsuku letintsatfu, kute kube sikhatsi layawuvuka ngaso futsi ekufeni.
21 Yebo, ngesikhatsi leso layawukhipha ngaso umoya kuyawuba khona kudvuma kanye nemibane sikhatsi lesingemahora lamaningi, futsi umhlaba uyawutamatama uphindze utfutfumale; nemadvwala lasetikwemhlaba wonkhe, lakhona ngetulu kanye nangephansi kwemhlaba, leniwati manje njengalacinile, noma incenye lenkhulu yawo leyintfo lecinile kakhulu, ayawuhlephuka;
22 Yebo, ayawuchekeka kabili, emvakwaloko ayawutfolakala achekekile futsi anetimfa, netincetu letichekekile emhlabeni wonkhe, yebo, ngetulu kanye nangephansi kwemhlaba.
23 Bukani, kuyawuba khona tiphepho letinkhulu, kuphindze kube khona tintsaba letiningi letiyawulaliswa phansi, tifane nematsafa, futsi kuyawuba khona tindzawo letiningi manje letibitwa ngematsafa letiyawuba tintsaba, budze bato lobukhulu kakhulu.
24 Nemigwaco lemikhulu leminingi iyawuchekeka, nemadolobha lamaningi ayawusala angenamuntfu.
25 Nemathuna lamaningi ayawuvuleka, akhiphe labaningi bawo labafa; bese labaningi labangcwele bayawuvela kulabaningi.
26 Bukani, naku lokukhulunywe yingilosi kimi; ngoba itsite kimi kuyawuba khona kudvuma kanye nemibane sikhatsi lesingemahora lamaningi.
27 Futsi itsite kimi ngesikhatsi kudvuma kanye nemibane kusachubeka, kanye nesiphepho, letintfo kufanele tibekhona, futsi nekutsi bumnyama buyombonya umhlaba wonkhe sikhatsi lesingangetinsuku letintsatfu.
28 Ingilosi itsite kimi labaningi bayawubona tintfo letinkhulu kakhulu kunaleti, ngenhloso yekutsi bakholwe kutsi letibonakaliso kanye naletimangaliso tiyawukwenteka kulo lonkhe live, ngenhloso yekutsi kungabikhona sizatfu sekungakholwa emkhatsini webantfwana bebantfu—
29 Futsi loku kungenhloso yekutsi loyo loyawukholwa asindziswe, futsi nekutsi loyo longeke akholwe, sehlulelo lesilungile site kubo; futsi ngetulu kwaloko uma babekwa licala batiletsela bona kubekwa licala.
30 Manje khumbulani, khumbulani, bomnaketfu, kutsi loyo lolahlekako, utilahlekisa yena; futsi loyo lowenta bubi, ubenta kuye lucobo; ngoba bukani, nikhululekile; nivunyelwe kutsi nitentele; ngoba bukani, Nkulunkulu uninike lwati futsi wanenta kutsi nikhululeke.
31 Uninike kutsi nati lokuhle kulokubi, waphindze waninika kutsi nikhetse kuphila noma kufa; futsi ningenta lokuhle bese nibuyiselwa kuloko lokuhle, noma kutsi loko lokuhle kubuyiselwe kini; noma ningenta lokubi, futsi loko lokubi kubuyiselwe kini.