1 Manje kwenteka kutsi ngesikhatsi Nefi asawakhulumile lamavi, buka, bekukhona emadvodza labekabehluleli, labephindze abe elicembu leliyimfihlo laGadiyanthoni, bekatfukutsele, futsi amemeta aphikisana naye, atsi kubantfu: Kungani ningayibambi lendvodza niyiletse lapha, kute ijeziswe ngelicala leyilentile.

2 Kungani niyibuka lendvodza, futsi niyilalela itfuka labantfu kanye nemtsetfo wetfu na?

3 Ngoba buka, Nefi bekakhulume kubo mayelana nenkhohlakalo yemtsetfo wabo; yebo, tiningi tintfo Nefi latisho letingeke tibhalwe; futsi kute lakukhuluma lokuphikisana nemiyaleto yaNkulunkulu.

4 Futsi labo behluleli bebatfukutsele ngenca yekutsi wakhuluma ngalokusobala kubo mayelana nemisebenti yabo yebumnyama leyimfihlo; noko, abatange balinge bambambe, ngoba bebesaba bantfu hleze bamemete ngalokumelene nabo.

5 Ngako-ke bamemeta ebantfwini, batsi: Kungani nivumele lendvodza kutsi isitfuke na? Ngoba bukani ibagweba bonkhe labantfu, ngisho nasekubhujisweni; yebo, ngetulu kwaloko nekutsi lamadolobha etfu lamakhulu ayawutsatfwa kitsi, singabe sisaba nendzawo kuwo.

6 Manje siyati kutsi loku akunawenteka, ngoba bukani, sinemandla, futsi emadolobha etfu makhulu, ngako-ke titsa tetfu angeke tibe nemandla etikwetfu.

7 Futsi kwenteka kutsi babaphehla ngaleyondlela bantfu kutsi bamtfukutselele Nefi, bacala imibango emkhatsini wabo; ngoba kukhona labatsite labamemeta batsi: Yiyekeleni lendvodza, ngoba iyindvodza lelungile, futsi leto tintfo leyitikhulumile titawukwenteka ngempela ngaphandle kwekutsi siphendvuke;

8 Yebo, bukani, tonkhe tehlulelo lafakaze ngato titawuta etikwetfu; ngoba siyati kutsi ufakaze lokungiko kitsi mayelana nebubi betfu. Bukani buningi, futsi uyatati tonkhe tintfo letitawusehlela njengoba ati ngebubi betfu.

9 Yebo, futsi bukani, kube bekangasiye umphrofethi abengeke afakaze mayelana naleto tintfo.

10 Futsi kwenteka kutsi labo labebafuna kumbulala Nefi baphoceleleka ngenca yekwesaba, kutsi bangambambi; ngako-ke waphindze wacala kukhuluma nabo, abona kutsi besekatfole umusa emehlweni alabanye, kangangekutsi labebasele babo baba nekwesaba.

11 Ngako-ke waphoceleleka kutsi akhulume lokunye kubo watsi: Bukani, bomnaketfu, anifundzanga yini kutsi Nkulunkulu waniketa emandla kumuntfu munye, ngisho nakuMosi, kutsi ashaye emanti eLwandle loluBovu, futsi ahlukana ekhatsi, kangangekutsi ema-Israyeli labebobabe betfu, ewela emhlabatsini lowomile, futsi emanti ambonya libutfo lemaGibhithe awangwinya onkhe na?

12 Manje bukani, uma Nkulunkulu anika lendvodza emandla langaka, pho kungani niphikisana emkhatsini wenu, nitsi akate anginike emandla kutsi ngati mayelana netehlulelo letitawukuta kini ngaphandle kwekutsi niphendvuke na?

13 Kodvwa, bukani, aniphiki emavi ami kuphela, kodvwa niphika onkhe emavi lakhulunywe bobabe betfu, nemavi lakhulunywa ngulendvodza, Mosi, lobekanemandla lamakhulu kangaka labekaniketwe wona, yebo, emavi lawakhuluma mayelana nekuta kwaMesiya.

14 Yebo, akatange yini afakaze kutsi iNdvodzana yaNkulunkulu kufanele ite na? Futsi njengoba aphakamisa inyoka yelitfusi ehlane, kanjalo uyawuphakanyiswa loyo lokufanele ete.

15 Futsi ngebuningi babo labo labebayoyibuka leyo nyoka bebayophila, kanjalo ngebuningi balabo labayobuka iNdvodzana yaNkulunkulu ngelukholo, babe nemoya lotfobekile, bayawuphila, ngisho leyo mphilo lengunaphakadze.

16 Manje bukani, Mosi akusuye yena yedvwa lowafakaza ngaletintfo, kodvwa nabo bonkhe baphrofethi labangcwele, kusukela etinsukwini takhe kuya etinsukwini ta-Abrahama.

17 Yebo, bukani, Abrahama wakubona kuta kwayo, wagcwala injabulo futsi watfokota.

18 Yebo, futsi bukani ngitsi kini, Abrahama akusuye yena yedvwa lowati ngaletintfo, kodvwa bekukhona labaningi ngaphambi kwetinsuku ta-Abrahama labebabitwe ngekweluhlelo lwaNkulunkulu; yebo, nangekweluhlelo lweNdvodzana yakhe; futsi kute loku kukhonjiswe kubantfu, iminyaka leminingi letinkhulungwane ngaphambi kwekuta kwayo, kutsi kuhlengwa kuyawukuta kubo.

19 Manje ngifuna kutsi nati, kutsi kusukela etinsukwini ta-Abrahama bekukhona labaningi baphrofethi labafakazile ngaletintfo; yebo, bukani, umphrofethi Zenoshe wafakaza ngesibindzi; ngaloko wabulawa.

20 Futsi bukani, Zenokhi ngalokunjalo, na-Eziyasi, na-Isaya, naJeremiya, (Jeremiya yena kanye loyo mphrofethi lowafakaza ngekubhujiswa kweJerusalema) manje siyati kutsi iJerusalema yabhujiswa ngekwemavi aJeremiya. Pho, kungani iNdvodzana yaNkulunkulu ingeti, ngekwesiphrofetho sakhe na?

21 Manje nitawuphika yini kutsi iJerusalema yabhujiswa na? Ningasho yini kutsi emadvodzana aSedekiya awatange abulawe, onkhe ngaphandle kwaMulekhi na? Yebo, aniboni yini kutsi intalelwane yaSedekiya inatsi na, futsi bakhishwa eveni laseJerusalema na? Kodvwa bukani, akusiko loku kuphela—

22 Babe Lehi wakhishwa eJerusalema ngenca yekutsi wafakaza ngaletintfo. Nefi naye wafakaza ngaletintfo, cishe nabo bonkhe bobabe betfu, kwehla kute kube ngulesi sikhatsi; yebo, bafakazile ngekuta kwaKhristu, balangatelele, futsi balutfokotele lusuku lwakhe lolutawufika.

23 Futsi bukani, unguNkulunkulu, futsi unabo, waphindze watibonakalisa kubo, kutsi bebahlengwe nguye, futsi bamnika ludvumo, ngenca yaloko lokutawufika.

24 Manje, ngekubona kutsi niyatati letintfo futsi angeke nitiphike ngaphandle kwekutsi nicambe emanga, ngako-ke nonile, ngoba nitilahlile tonkhe letintfo, nanoma kunebufakazi lobuningi kangaka lenibutfolile; yebo, nititfolile tonkhe tintfo, tintfo letisezulwini, kanye nato tonkhe tintfo letisemhlabeni, njengebufakazi bekutsi tiliciniso.

25 Kodvwa bukani, nililahlile liciniso, nahlamuka Nkulunkulu wenu longcwele, nangalesi sikhatsi, esikhundleni sekutsi nitibekele umcebo ezulwini, lapho kute lutfo lokubolako, nalapho kute lutfo lokungcolile lokungangena khona, nitibekela intfukutselo ngelusuku lwekwehlulelwa

26 Yebo, nangalesi sikhatsi senilungele, ngenca yekubulala nekuphinga nenkhohlakalo yenu, kutsi nibhujiswe ingunaphakadze; yebo, futsi ngaphandle kwekutsi niphendvuke kutawufika kini masinyane.

27 Yebo, bukani manje sekuseminyango yenu; yebo, hambani niye esihlalweni sekwehlulela, nifune; futsi bukani, umehluleli wenu ubulewe, futsi ulele engatini yakhe; ubulewe ngumnakabo, lofuna kuhlala esihlalweni sekwehlulela.

28 Bukani, bobabili belicembu lenu leliyimfihlo, umcambi walo lokunguGadiyanthoni kanye nalomubi lofuna kubulala bantfu.