Sehluko 9
Titfunywa titfola umehluleli lomkhulu afile esihlalweni sekwehlulela—Tiyaboshwa futsi kamuva tiyakhululwa—Ngekuphefumulelwa ngumoya Nefi ukhomba Siyantham njengembulali—Nefi wemukelwa ngulabanye njengemphrofethi. Cishe ngemnyaka wa 23 kuya kuwa 21 ngaphambi kwekutalwa kwaKhristu.
1 Bukani, manje kwenteka kutsi ngesikhatsi Nefi sekawakhulumile lamavi, lamanye emadvodza labekasemkhatsini wabo agijima aya esihlalweni sekwehlulela; yebo, bekasihlanu lahamba, futsi atsi kulomunye nalomunye, ngesikhatsi asahamba;
2 Bukani, manje sitawukwati ngekweliciniso kutsi ngabe lendvodza inguye yini umphrofethi futsi nekutsi Nkulunkulu uyiyaletile yini kutsi iphrofethe tintfo letimangalisa kangaka kitsi. Bukani, asikholwa kutsi uyiyaletile; yebo, asikholwa kutsi ingumphrofethi; noko, uma lentfo layishito mayelana nemehluleli lomkhulu iliciniso, kutsi ufile, uma kunjalo sitawukholwa kutsi lamanye emavi lawakhulumile aliciniso.
3 Futsi kwenteka kutsi agijima ngemandla, ate afika esihlalweni sekwehlulela; futsi buka, umehluleli lomkhulu besekawele phansi, alele engatini yakhe.
4 Manje bukani, ngesikhatsi sekakubona loku atfuka kakhulu, kangangekutsi awela phansi; ngoba bekangatange sekawakholwe emavi Nefi labekawakhulumile mayelana nemehluleli lomkhulu.
5 Kodvwa manje, ngesikhatsi sekabona akholwa, futsi afikelwa kwesaba hleze tonkhe tehlulelo Nefi labekatikhulumile tenteke kubantfu; ngako-ke atfutfumela, awela phansi.
6 Manje, masinyane emvakwekutsi umehluleli sekabulewe—agwazwe ngumnakabo lobekagcoke tingubo tekutifihla, wabaleka, tinceku tagijima tayotjela bantfu, tikhala sikhalo sekubulala emkhatsini wabo;
7 Futsi buka bantfu babutsana ndzawonye endzaweni yesihlalo sekwehlulela—buka, ngekumangala bawabona lawo madvodza lasihlanu labesawele phansi.
8 Manje buka, labantfu bebangati lutfo mayelana nesicuku lebesibutsene ensimini yaNefi; ngako-ke batsi kulomunye nalomunye: Lamadvodza ngiwo labulele umehluleli, futsi Nkulunkulu sewuwashayile kute angabe asakhona kusibalekela.
9 Futsi kwenteka kutsi bawabamba, bawabopha bawaphonsa etilongweni. Kwase kuba khona simemetelo lesatfunyelwa kuto tonkhe tindzawo kutsi umehluleli besekabulewe, nekutsi babulali bese batsetfwe baphonswa ejele.
10 Futsi kwenteka kutsi ngakusasa bantfu babutsana ndzawonye kutsi batokhala baphindze bazile, emngcwabeni wemehluleli lomkhulu kakhulu lobekabulewe.
11 Futsi ngalesi sizatfu nalabo behluleli labebasensimini yaNefi, sebawevile lamavi akhe, nabo ngalokunjalo babutsana ndzawonye emngcwabeni.
12 Futsi kwenteka kutsi babuta kubantfu batsi: Baphi labo labasihlanu labebatfunywe kuyova mayelana nemehluleli lomkhulu kutsi ngabe ufile na? Baphendvula batsi: Mayelana nalabo labasihlanu lenitsi nibatfumile, tsine asati; kodvwa kukhona labasihlanu labababulali, lesibaphonse ejele.
13 Futsi kwenteka kutsi behluleli bafuna kutsi labo baletfwe; baletfwa; buka kwakungulabo labasihlanu labebatfunyiwe; futsi buka behluleli bababuta kute bati mayelana nalendzaba, baphindze babatjela konkhe loko labebakwentile, batsi:
14 Sigijime seta endzaweni yesihlalo sekwehlulela, futsi ngesikhatsi sesibona tonkhe tintfo tinjengoba Nefi abekadze afakazile, setfuka kangangekutsi sawela phansi; ngesikhatsi siphaphama ekwetfukeni kwetfu, bukani basiphonsa ejele.
15 Manje, ngekubulawa kwalendvodza, asati kutsi ngubani lokwentile loku; futsi nguloku kuphela lesikwatiko, sigijime seta lapha njengekufisa kwenu, futsi bukani besekafile, njengekwemavi aNefi.
16 Manje kwenteka kutsi behluleli bayichaza indzaba kubantfu, futsi bakhala kakhulu ngalokumelene naNefi, batsi: Bukani, siyati kutsi Nefi kufanele kutsi uvumelane nemuntfu kutsi abulale umehluleli, futsi emvakwaloko kute akumemetele kitsi, kute asente siphendvukele elukholweni lwakhe, kute atiphakamise kutsi abe ngumuntfu lomkhulu, lokhetfwe nguNkulunkulu, kanye nemphrofethi.
17 Manje bukani, sitawuyitfola lendvodza, futsi itolivuma licala layo isitjele ngembulali wangempela wemehluleli.
18 Futsi kwenteka kutsi labo labasihlanu bakhululwa ngelusuku lwemngcwabo. Noko, babekhuta behluleli ngemavi labebawakhulumile ngalokumelene naNefi, baphikisana nabo ngamunye nangamunye, kangangekutsi babehlula.
19 Nanoma kunjalo, benta kutsi Nefi atsatfwe aboshwe aletfwe phambi kwesicuku, bacala kumbuta ngetindlela letehlukene kute bamdide, kute bambeke licala khona atawubulawa—
20 Batsi kuye: Wente luzungu nemuntfu; ngubani lendvodza lebulele na? Manje sitjele, ulivume licala lakho; batsi, Buka nayi imali; ngetulu kwaloko sitawukuvumela uphile uma ungasitjela, futsi usivume leso sivumelwano losente naloyo.
21 Kodvwa Nefi watsi kubo: Awu tiwula, nine leningakasoki ngekwenhlitiyo, nine timphumphutse, futsi nine bantfu lababonhlokolukhuni, ngabe niyati yini kutsi kuyote kube kunini iNkhosi Nkulunkulu wenu inivumela kutsi nichubeke nalendlela yenu yekona na?
22 Awu kumele nicale nihhewule futsi nikhale, ngenca yekubhujiswa lokukhulu lokunihlalele kulesi sikhatsi, ngaphandle kwekutsi niphendvuke.
23 Bukani nitsi ngivumelene nemuntfu kutsi abulale Sezoramu, umehluleli wetfu lomkhulu. Kodvwa bukani, ngitsi kini, loku kungenca yekutsi ngifakaze kini kute nati mayelana nalentfo; yebo, kutsi kube njengebufakazi kini, kutsi ngiyati ngenkhohlakalo kanye nangetinengiso letisemkhatsini wenu.
24 Futsi ngenca yekutsi ngente loku, senitsi ngivumelene nemuntfu kutsi ente lentfo; yebo, ngenca yekutsi nginikhombise lesibonakaliso seningitfukutselele, futsi senifuna kungibulala.
25 Manje bukani, ngitawunikhombisa lesinye sibonakaliso, bese niyabona kutsi nitawufuna kungibulala yini.
26 Bukani ngitsi kini: Hambani niye endlini yaSiyantham, longumnakaboSezoram, nifike nitsi kuye—
27 Ngabe Nefi, lotenta umphrofethi, lona lophrofetha ngebubi lobungaka mayelana nalabantfu, uvumelene yini nawe, kutsi umbulale Sezoramu, longumnakenu na?
28 Bukani, uyawutsi kini, Cha.
29 Futsi niyawutsi kuye: Umbulele yini umnakenu na?
30 Futsi uyawukuma anekwesaba, angati kutsi atsini. Bukani, uyawuphika kini; futsi uyawukwenta shengatsi wetfukile; noko, uyawutsi kini akanacala.
31 Kodvwa bukani, niyawumhlola, futsi niyawutfola ingati etimbatfweni takhe.
32 Senikubonile loku, niyawutsi: Iphumaphi lengati na? Ucabanga kutsi asati kutsi yingati yemnakenu lena na?
33 Emvakwaloko uyawutfutfumela, abukeke aphaphatsekile, shengatsi kufa sekufike kuye.
34 Emvakwaloko niyawutsi: Ngenca yaloku kwesaba kanye nalokuphaphatseka lokusebusweni bakho, buka, siyati kutsi unelicala.
35 Emvakwaloko kwesaba lokukhulu kuyawumfikela; emvakwaloko uyawuvuma kini, futsi angabe asaphika kutsi nguye lobulele.
36 Emvakwaloko uyawusho kini, kutsi mine, Nefi, angati lutfo mayelana naloludzaba ngaphandle kwekutsi luniketwe kimi ngemandla aNkulunkulu. Futsi emvakwaloko niyawukwati kutsi ngingumuntfu lotsembekile, nekutsi ngitfunyelwe kini nguNkulunkulu.
37 Futsi kwenteka kutsi bahamba bayawukwenta, njengoba Nefi abatjelile. Futsi bukani, emavi labekawakhulumile bekaliciniso; ngoba njengekwalawo mavi waphika; ngetulu kwaloko njengekwalawo mavi wavuma.
38 Waletfwa kutsi atawutivumela kutsi nguye lucobo lwakhe lobekangumbulali, kangangekutsi labo labasihlanu bakhululwa, kanjalo naNefi.
39 Kwaba khona labatsite labangemaNefi labakholelwa emavini aNefi; futsi bekukhona labanye, labakholwa ngenca yebufakazi balabo labasihlanu, ngoba baphendvuka ngesikhatsi basejele.
40 Manje kwaba khona labanye emkhatsini webantfu, labatsi Nefi bekangumphrofethi.
41 Futsi kwaba khona labanye labatsi: Bukani, ungunkulunkulu, ngoba ngaphandle kwekutsi angunkulunkulu bekangeke atati tonkhe letintfo. Ngoba bukani, usitjele imicabango yetinhlitiyo tetfu, ngetulu kwaloko wasitjela tintfo; futsi sewusatise umbulali wangempela wemehluleli wetfu lomkhulu.