Sehluko 12
Bantfu bayagucugucuka futsi batiwula baphindze bayashesha kwenta lokubi—INkhosi ijezisa bantfu Bayo—Kungabi lutfo kwebantfu kucatsaniswa nemandla aNkulunkulu—Ngelusuku lwekwehlulela, bantfu batawuzuza imphilo yaphakadze noma kulahlwa kwaphakadze. Cishe ngemnyaka wesi 6 ngaphambi kwekutalwa kwaKhristu.
1 Futsi ngaleyondlela siyabona kutsi abanamaciniso kangakanani, ngalokunjalo nekungatinti kwetinhlitiyo tebantfwana bebantfu; yebo, siyabona kutsi iNkhosi ngebuhle bayo lobukhulu lobungapheli iyababusisa iphindze ibaphumelelise labo lababeka litsemba labo kuyo.
2 Yebo, futsi singabona ngaso kanye leso sikhatsi uma seyiphumelelisa bantfu bayo, yebo, ngekwandza kwemasimu abo, imihlambi yabo yetimvu kanye nemihlambi yabo yetinkhomo, neligolide, nesiliva, kanye nato tonkhe tintfo letiligugu letitinhlobonhlobo kanye nebuciko; isindzisa timphilo tabo, ibakhulula ibakhipha etandleni tetitsa tabo; itsambisa tinhlitiyo tetitsa tabo kute tingamemeteli timphi ngalokumelene nabo; yebo, kwephetsa, yenta tintfo yentele inhlalakahle kanye nenjabulo yebantfu bayo; yebo, ngaleso sikhatsi kuba sikhatsi lapho batenta lukhuni tinhlitiyo tabo, bakhohlwe yiNkhosi Nkulunkulu wabo, futsi banyatsele ngaphansi kwetinyawo tabo loNgcwele—yebo, futsi loku kungenca yekukhululeka kwabo, kanye nekuphumelela kwabo lokukhulu kakhulu.
3 Ngaleyondlela siyabona kutsi ngaphandle kwekutsi iNkhosi ibajezise bantfu bayo ngetinhlupheko letiningi, yebo, ngaphandle kwekutsi ibavakashele ngekufa nekwesaba, nangendlala kanye nangayo yonkhe inhlobo yamashayabhuce wesifo, angeke bayikhumbule.
4 Awu kubuwula kangakanani, kulite kangakanani, kububi kangakanani, kubudeveli kangakanani, futsi bashesha kangakanani kwenta bubi, baphute kangakanani kwenta lokuhle, bantfwana bebantfu; yebo, bashesha kangakanani kulalela emavi alomubi, babeke litsemba labo etintfweni letilite temhlaba.
5 Yebo, bashesha kangakanani kutsi batichenye; yebo, bashesha kangakanani kutikhukhumeta, bente lonkhe luhlobo lwalokubi; futsi baphuta kangakanani kuyikhumbula iNkhosi Nkulunkulu wabo, nekutsi balalele imiyalo yayo, yebo, baphuta kangakanani kuhamba etindleleni tekuhlakanipha.
6 Buka, abafuni kutsi iNkhosi Nkulunkulu wabo, lebadalile, ibaphatse futsi ibuse etikwabo; nanoma kungebuhle bayo lobukhulu kanye nemusa wayo kubo, bayayidzelela imiyalo yayo, futsi abafuni kutsi ibe ngumcondzisi wabo
7 Awu kukhulu kanganani kungabi lutfo kwebantfwana bebantfu; yebo, balite ngisho kunelutfuli lwemhlaba.
8 Ngoba buka, lutfuli lwemhlaba luya lena nalena, luhlukana ekhatsi nekhatsi, ngekuyaletwa nguNkulunkulu wetfu lomkhulu futsi longunaphakadze
9 Yebo, buka ngelivi lakhe emagcuma kanye netintsaba kuyatfutfumela futsi kutamatame.
10 Nangemandla elivi lakhe kuyachekeka, kulingane, yebo, njengelitsafa.
11 Yebo, ngemandla elivi lakhe umhlaba wonkhe uyatfutfumela;
12 Yebo, ngemandla elivi lakhe, tisekelo tiyatamatama, ngisho nasemkhatsini imbala.
13 Yebo, uma atsi kuwo umhlaba—Gucuka—uyagucuka.
14 Yebo, uma atsi kuwo umhlaba—Buyela emuva, kute welule lusuku ngemahora lamaningi—kuyenteka;
15 Futsi ngenca yaloku, ngekwelivi lakhe umhlaba ubuyela emuva, kubukeke kumuntfu kwangatsi lilanga limile alinyakati; yebo, futsi buka, kunjalo; ngoba ngempela ngumhlaba logucukako hhayi lilanga.
16 Buka, futsi, uma atsi kulamanti elwandle lolukhulu—Yoma—kuyenteka.
17 Buka, uma atsi kulentsaba—Phakama, ute utawukuwa etikwalelidolobha, kute limbonyeke,—buka kuyenteka.
18 Futsi buka, uma umuntfu afihla umcebo ngaphansi kwemhlaba, uma iNkhosi iyawutsi—Awucalekiswe, ngenca yebubi baloyo lowufihlile—buka, uyawucalekiswa.
19 Futsi uma iNkhosi iyawutsi—Awucalekiswe, kute kubebete umuntfu loyawutfola kusukela nyalo kute kube phakadze—buka, kute umuntfu lowutfolako kusukela nyalo kute kube phakadze.
20 Futsi buka, uma iNkhosi iyawutsi kumuntfu—Ngenca yebubi bakho, uyawucalekiswa ingunaphakadze—kuyawenteka.
21 Futsi uma iNkhosi iyawutsi—Ngenca yebubi bakho utawususwa phambi kwami—iyawukwenta kutsi kube njalo.
22 Futsi maye kuloyo leyawusho kuye loku, ngoba kuyawuba njalo kuloyo loyawukwenta bubi, futsi akanawusindziswa; ngako-ke, ngalesi sizatfu, kute bantfu basindziswe, kuphendvuka kumenyetelwe.
23 Ngako-ke, babusisiwe labo labatawuphendvuka baphindze balilalele livi leNkhosi Nkulunkulu wabo; ngoba ngibo labo labayawusindziswa.
24 Futsi kwangatsi Nkulunkulu angavuma, ngebungcwele bakhe lobungapheli, kutsi bantfu baholelwe ekuphendvukeni kanye nasemisebentini lemihle, kute kubuyiselwe kubo umusa ngemusa, ngekwemisebenti yabo.
25 Futsi ngifisa kutsi bonkhe bantfu basindziswe. Kodvwa siyafundza kutsi ngelusuku lolukhulu nelwekugcina kuyawuba khona labayawuphonswa ngephandle, yebo, labayawukhishelwa ngephandle ebukhoneni beNkhosi;
26 Yebo, labayawuyiswa esimeni selusizi lolungapheli, bagcwalise emavi latsi: Labo labente lokuhle bayawuba nekuphila lokuphakadze; bese labo labente lokubi bayawulahlwa ingunaphakadze. Futsi kunjalo. Amen.