INcwadzi yaHilamani
Umlandvo wemaNefi. Timphi kanye nemibango yawo, kanye nekuphikisana kwawo. Ngetulu kwaloko netiphrofetho tebaphrofethi labaningi labangcwele, ngaphambi kwekuta kwaKhristu, ngekwemibhalo yaHilamani, lobekayindvodzana yaHilamani, futsi kanjalo nangekwemibhalo yemadvodzana akhe, kwehla kute kufike ekuteni kwaKhristu. Ngetulu kwaloko lamaningi emaLamani ayaphendvuka. Umlandvo wekuphendvuka kwawo. Umlandvo wekulunga kwemaLamani, bubi kanye netinengiso temaNefi, ngekwembhalo waHilamani kanye nemadvodzana akhe, kwehla njalo kute kufike ekuteni kwaKhristu, ubitwa ngekutsi yincwadzi yaHilamani, kanye nalokunye.
Sehluko 1
Phahorani wesibili uba ngumehluleli lomkhulu futsi ubulawa nguKhishkhumeni—Phakhumeni ungena esihlalweni sekwehlulela—Khoriyanthuma uhola emabutfo emaLamani, utsatsa iZarahemla, futsi ubulala Phakhumeni—Moroniha uncoba emaLamani futsi uphindze uyayitsatsa iZarahemla, naKhoriyanthuma uyabulawa. Cishe ngemnyaka wa 52 kuya kuwa 50 ngaphambi kwekutalwa kwaKhristu.
1 Manje bukani, kwenteka ekucaleni kwemnyaka wemashumi lamane wekubusa kwebehluleli ebantfwini baNefi, kwacala kwaba khona inkinga lenkhulu emkhatsini webantfu baNefi.
2 Ngoba bukani, Phahorani besekafile, futsi sekahambe indlela yemhlaba wonkhe; ngako-ke kwacala kwabakhona umbango lomkhulu mayelana nekutsi ngubani lobekufanele atsatse sihlalo sekwehlulela emkhatsini wabomnakabo, labebangemadvodzana aPhahorani.
3 Manje lawa ngemabito alabo labebabanga sihlalo sekwehlulela, labenta nekutsi bantfu babange: Phahorani, Phayankhi, kanye naPhakhumeni.
4 Manje lawa akusiwo onkhe emadvodzana aPhahorani (ngoba bekanalamaningi), kodvwa lawa ngiwo labekabanga sihlalo sekwehlulela; ngako-ke, enta kutsi kube khona kwehlukana katsatfu emkhatsini webantfu.
5 Noko, kwenteka kutsi Phahorani wakhetfwa ngelivi lebantfu kutsi abe ngumehluleli lomkhulu kanye nembusi kubantfu baNefi.
6 Futsi kwenteka kutsi Phakhumeni, ngesikhatsi abona kutsi bekangeke akhone kusitfola sihlalo sekwehlulela, wavumelana nelivi lebantfu.
7 Kodvwa bukani, Phayankhi, kanye naleyo ncenye yebantfu lebeyinesifiso sekutsi abe ngumbusi wabo, batfukutsela kakhulu; ngako-ke, besekatawubalutsa labo bantfu kutsi basukume bavukele bomnakabo.
8 Futsi kwenteka ngesikhatsi sekatokwenta loku, bukani, watsatfwa, wayogwetjwa licala ngekwelivi lebantfu, wajeziswa ngekufa; ngoba bekahlubukile futsi wafuna kucedza inkhululeko yebantfu.
9 Manje ngesikhatsi labo bantfu labebanesifiso sekutsi abe ngumbusi wabo babona kutsi besekajeziswe ngekufa, ngako-ke batfukutsela, bukani, batfumela Khishkhumeni, kutsi aye esihlalweni sekwehlulela saPhahorani, wabulala Phahorani ngesikhatsi ahleli esihlalweni sekwehlulela.
10 Wacoshwa tinceku taPhahorani; kodvwa bukani, belisetulu litubane laKhishkhumeni kangangekutsi bekute namunye umuntfu lobekangamkhandza.
11 Waya kulabo labebamtfumile, futsi bonkhe bangena esivumelwaneni, yebo, bafunga ngeMenti wabo waphakadze, kutsi bebangeke batjele namunye umuntfu kutsi Khishkhumeni bekabulele Phahorani.
12 Ngako-ke, Khishkhumeni akatange atiwe emkhatsini webantfu baNefi, ngoba bekatifihlile ngesikhatsi abulala Phahorani. Futsi Khishkhumeni kanye nelicembu lakhe, lebelente sivumelwano naye, lahlangana nebantfu, ngendlela yekutsi abatange batfolwe bonkhe; kodvwa ngebuningi balabo labatfolakala bajeziswa ngekufa.
13 Manje bukani, Phakhumeni wabekwa, ngekwelivi lebantfu, kutsi abe ngumehluleli lomkhulu kanye nembusi kubantfu, kute abuse esikhundleni semnakabo Phahorani; futsi bekunjengekwelilungelo lakhe. Konkhe loku kwenteka emnyakeni wemashumi lamane wekubusa kwebehluleli; kwabese kuba kuphela kwawo.
14 Futsi kwenteka ngemnyaka wemashumi lamane nakunye wekubusa kwebehluleli, kutsi emaLamani besekagcogcele ndzawonye emabutfo emadvodza lamaningi langabaleki, awahlomisa ngetinkemba, ngabocelemba nebutjoki, kanye nangemicibisholo, nangekwekuvikela inhloko, kanye nangetivikelo tesifuba, nangato tonkhe tinhlobo temahawu.
15 Aphindze ehlela entansi kute achube imphi nemaNefi. Futsi bekaholwa yindvodza libito layo lobekunguKhoriyanthuma; lebeyiyentalelwane yaZarahemla; iphindze ibe lihlubuka lelivela kumaNefi; bekuyindvodza lenkhulu futsi lenemandla.
16 Ngako-ke, inkhosi yemaLamani, libito layo bekunguThubalothi, lobekayindvodzana ya-Amoroni, ngekucabanga kutsi Khoriyanthuma, ngoba bekayindvodza lenemandla, bekangakwati kumelana nemaNefi, ngemandla akhe futsi kanjalo nangekuhlakanipha kwakhe lokukhulu, kangangekutsi ngekumtfumela kwakhe phambili bekatotfola emandla ngetulu kwemaNefi—
17 Ngako-ke wawaphehla kutsi atfukutsele, futsi wawagcogcela ndzawonye emabutfo akhe, wabeka Khoriyanthuma kutsi abe ngumholi wabo, waphindze wenta kutsi bahambe behlele eveni laseZarahemla kutsi bayawukulwa nemaNefi.
18 Futsi kwenteka kutsi ngenca yembango lomkhulu kakhulu kanye nebumatima lobukhulu embusweni, abatange babeke bogadzi labenele eveni laseZarahemla; ngoba bebacabanga kutsi emaLamani bekangeke alinge ete enkhabeni yemave abo kutsi atawuhlasela lelo lidolobha lelikhulu iZarahemla.
19 Kodvwa kwenteka kutsi Khoriyanthuma wahamba phambili ahola emabutfo akhe lamaningi, wate wefika kubahlali belidolobha, nekuhamba kwabo bekunelitubane lelisetulu kakhulu kangangekutsi asitange sibekhona sikhatsi semaNefi kutsi agcogcele ndzawonye emabutfo awo.
20 Ngako-ke Khoriyanthuma wababulala bogadzi labebasekungeneni kwelidolobha, wahamba waya phambili nelibutfo lakhe lonkhe wayawungena edolobheni, futsi bababulala bonkhe labebaphikisana nabo, kangangekutsi balitsatsa lidolobha lonkhe.
21 Futsi kwenteka kutsi Phakhumeni, lobekangumehluleli lomkhulu, wabaleka ngaphambi kwaKhoriyanthuma, wate wefika ngasetindvongeni telidolobha. Futsi kwenteka kutsi Khoriyanthuma wamshaya wamhlanganisa neludvonga, kangangekutsi wafa. Taphela kanjalo-ke tinsuku taPhakhumeni.
22 Manje ngesikhatsi Khoriyanthuma abona kutsi besekalitfolile lidolobha laseZarahemla, sekabona kutsi emaNefi besekababalekele, abulawa, aphindze atsatfwa, aphonswa ejele, nekutsi besekatitfolile tincaba leticine kakhulu eveni lonkhe kutsi tibe ngetakhe, inhlitiyo yakhe yema sibindzi kangangekutsi besekatohamba ayawukulwa kulo lonkhe live.
23 Manje akahlalanga eveni laseZarahemla, kodvwa wachubeka nelibutfo lelikhulu, wacondza ngasedolobheni iNala; ngoba bekuyinhloso yakhe kutsi ahambe futsi avule indlela yakhe ngenkemba, kute atfole tincenye letisenyakatfo yelive.
24 Futsi, acabanga kutsi emandla abo lamakhulu kakhulu bekasekhatsi nekhatsi nelive, ngako-ke wachubeka, angabaniki litfuba lekutsi babutsane ndzawonye ngaphandle nje kwetincumbi letincane; futsi ngaleyondlela bawahlasela bawabulala.
25 Kodvwa bukani, loku kuhamba kwaKhoriyanthuma aye ekhatsi nekhatsi nelive kwanika Moroniha litfuba lelikhulu etikwawo, nanoma besisikhulu sibalo semaNefi labekabulewe.
26 Ngoba bukani, Moroniha bekacabanga kutsi emaLamani bekangeke alinge ete ekhatsi nekhatsi nelive, kodvwa kutsi bekatohlasela emadolobha labekatungeletwe eminceleni njengoba bekadze nakucala entile; ngako-ke Moroniha bekente kutsi emabutfo abo lacinile agcine leto tincenye lebetingaseminceleni.
27 Kodvwa bukani, emaLamani bekangesabi njengekwesifiso sakhe, kodvwa besekangene ekhatsi nelive, besekayitsatsile inhloko dolobha lebekulidolobha laseZarahemla, futsi bekahamba adzabula acondze etincenyeni letibalulekile telive, abulala bantfu labaningi kakhulu, besilisa, nebesifazane, kanye nebantfwana, atsatsa emadolobha lamaningi kanye netincaba letiningi kube ngekwabo.
28 Kodvwa ngesikhatsi Moroniha sekakubonile loku, watfumela Lehi ngekushesha kanye nelibutfo kutsi ahambe etindzaweni tonkhe awancandze ngaphambi kwekutsi afike eveni iNala.
29 Futsi wenta kanjalo; wawancandza ngaphambi kwekutsi afike eveni iNala, wawahlasela, kangangekutsi acala ahlehlela emuva aya ngaseveni laseZarahemla.
30 Futsi kwenteka kutsi Moroniha wawancandza ekuhlehleni kwawo ngemuva, wawahlasela, kangangekutsi kwaba yimphi yengati leningi kakhulu; yebo, labaningi babulawa, futsi emkhatsini wesibalo salabo labebabulewe Khoriyanthuma naye ngalokunjalo watfolakala lapho.
31 Manje, buka emaLamani bekangasakwati kuhlehla noma ngukuphi, noma kuya enyakatfo, noma kuya eningizimu, noma emphumalanga, noma enshonalanga, ngoba besekatungeletwe ndzawo tonkhe ngemaNefi.
32 Khoriyanthuma wawafaka ngaleyondlela emaLamani ekhatsi nekhatsi nemaNefi, kangangekutsi besebasemandleni emaNefi, futsi naye lucobo lwakhe besekabulewe, futsi emaLamani atinikela etandleni temaNefi.
33 Futsi Moroniha waphindze walitsatsa lidolobha laseZarahemla kutsi libe ngelakhe, waphindze wenta kutsi emaLamani labekadze aboshiwe ahambe aphume eveni ngekuthula.
34 Waphela kanjalo-ke umnyaka wemashumi lamane nakunye wekubusa kwebehluleli.