Siphrofetho saSamuweli, umLamani, kumaNefi.
Sitfolakala etehlukweni 13 kuya ku 15.
Sehluko 13
Samuweli umLamani uphrofetha ngekubhujiswa kwemaNefi ngaphandle kwekutsi aphendvuke—Wona nemcebo wawo ayacalekiswa—Alahla aphindze agcoba baphrofethi ngematje, atungeletwa ngemadimoni, futsi etama kutfola injabulo ekwenteni bubi. Cishe ngemnyaka wesi 6 ngaphambi kwekutalwa kwaKhristu.
1 Manje kwenteka kutsi ngemnyaka wemashumi lasiphohlongo nesitfupha, emaNefi abesolo ahleli ebubini, yebo, ebubini lobukhulu, emaLamani ngakulolunye luhlangotsi wona abetama kugcina imiyaleto yaNkulunkulu ngekucophelela, ngekwemtsetfo waMosi.
2 Futsi kwenteka kutsi ngawo lowo mnyaka bekukhona Samuweli lotsite, umLamani, loweta eveni laseZarahemla, wacala kushumayela kubantfu. Futsi kwenteka kutsi washumayela, tinsuku letiningi, kuphendvuka kubantfu, kodvwa bamcosha bamkhiphela ngephandle, futsi besekatobuyela eveni lakhe.
3 Kodvwa buka, livi leNkhosi leta kuye, kutsi kumele aphindze abuyele, ayawuphrofetha kubantfu noma ngutiphi tintfo letatitawufika enhlitiyweni yakhe.
4 Futsi kwenteka kutsi abatange bamvumele kutsi angene edolobheni; ngako-ke wahamba wayawugibela eludvongeni lwalo, welula sandla sakhe futsi wamemeta ngelivi lelikhulu, waphindze waphrofetha kubantfu letintfo iNkhosi leyatifaka enhlitiyweni yakhe.
5 Watsi kubo: Bukani, mine, Samuweli, umLamani, ngikhuluma emavi iNkhosi lewafake enhlitiyweni yami; futsi bukani ikufakile enhlitiyweni yami kutsi ngisho kulabantfu kutsi inkemba yekulunga ilengela etikwalabantfu; futsi iminyaka lengemakhulu lamane angeke yendlule ngaphandle kwekutsi inkemba yekulunga iwele etikwalabantfu.
6 Yebo, kubhujiswa lokumatima kubalindzile labantfu, nakanjani kuyeta kulabantfu, futsi kute lokungabasindzisa ngaphandle kwekuphendvuka kanye nelukholo eNkhosini Jesu Khristu, lotawuta nakanjani emhlabeni, aphindze eve buhlungu betintfo letiningi futsi afele bantfu bakhe.
7 Futsi bukani, ingilosi yeNkhosi ikumemetele loku kimi, futsi iletse tindzaba letimnandzi emphefumulweni wami. Bukani, ngitfunyelwe kini kutsi ngitawumemetela nakini futsi, kute nani nibe netindzaba letimnandzi; kodvwa bukani anivumanga kungemukela.
8 Ngako-ke, itsi iNkhosi: Ngenca yebulukhuni betinhlitiyo tebantfu bemaNefi, ngaphandle kwekutsi baphendvuke ngitawususa livi lami kubo, ngiphindze ngihocise Moya wami kubo, futsi angeke ngisababeketelela nanini, ngitawugucula tinhlitiyo tabomnakabo ngalokumelene nabo.
9 Futsi iminyaka lengemakhulu lamane angeke yendlule ngaphambi kwekutsi ngente kutsi bashaywe; yebo, ngitawubavakashela ngenkemba nangendlala kanye nangamashayabhuce wesifo.
10 Yebo, ngitawubavakashela ngelulaka lwami lolwesabekako, futsi kuyawuba khona labo besitukulwane sesine labayawuphila, betitsa tenu, kutsi babone kubhujiswa nya kwenu; futsi loku kuyawukwenteka ngempela ngaphandle kwekutsi niphendvuke, kusho iNkhosi; nalabo besitukulwane sesine bayawuletsa kubhujiswa kwenu.
11 Kodvwa uma nitawuphendvuka niphindze nibuyele eNkhosini Nkulunkulu wenu ngitawulususa lulaka lwami, kusho iNkhosi; yebo, naku lokushiwo yiNkhosi, babusisiwe labo labatawuphendvuka baphindze babuyele kimi, kodvwa maye kuloyo longaphendvuki.
12 Yebo, maye kulelidolobha lelikhulu laseZarahemla; ngoba bukani, kungenca yalabo labalungile kutsi lisindziswe; yebo, maye kulelidolobha lelikhulu, ngoba ngiyacondza, kusho iNkhosi, kutsi baningi, yebo, etincenyeni letiningi talelidolobha lelikhulu, labatawutenta lukhuni tinhlitiyo tabo ngalokumelene nami, kusho iNkhosi.
13 Kodvwa babusisiwe labo labatawuphendvuka, ngoba ngitawubaphephisa. Kodvwa bukani, kube bekungasiko ngenca yalabalungile labakulelidolobha lelikhulu, bukani, bengiyawukwenta kutsi umlilo wehle uphume ezulwini ulibhubhise
14 Kodvwa bukani, kungenca yalabalungile kutsi liphephiswe. Kodvwa bukani, sikhatsi siyeta, kusho iNkhosi, kutsi uma senicosha labalungile emkhatsini wenu, ngaleso sikhatsi niyawube senilungele kubhujiswa; yebo, maye kulelidolobha lelikhulu, ngenca yebubi kanye netinengiso letikulo.
15 Yebo, futsi maye kulelidolobha laGideyoni, ngenca yebubi netinengiso letikulo.
16 Yebo, maye kuwo onkhe emadolobha laseveni lelitungeletile, lokungewemaNefi, ngenca yebubi kanye netinengiso letikuwo
17 Futsi bukani, sicalekiso siyawuta etikwalelive, kusho iNkhosi yemaBandla, ngenca yebantfu labakulelive, yebo, ngenca yebubi babo kanye netinengiso tabo.
18 Futsi kuyawukwenteka, kusho iNkhosi yemaBandla, yebo, Nkulunkulu wetfu lomkhulu neweliciniso, kutsi loyo lofihla umcebo ngaphansi kwemhlaba angeke aphindze awutfole nanini, ngenca yesicalekiso lesikhulu salelive, ngaphandle nangabe ungumuntfu lolungile futsi ayawufihla eNkhosini.
19 Ngoba ngifuna, kusho iNkhosi, kutsi bafihle umcebo wabo kimi; futsi bacalekisiwe labo labangawufihli umcebo wabo kimi; ngoba kute namunye lofihla umcebo wakhe kimi ngaphandle kwalabalungile; futsi loyo longawufihli umcebo wakhe kimi, ucalekisiwe, kanjalo nalowo mcebo wakhe, futsi kute namunye loyawutfola ngenca yesicalekiso salelive.
20 Futsi lusuku luyeta lapho bayawufihla umcebo wabo, ngenca yekutsi babeke litsemba labo emcebeni; futsi ngenca yekutsi babeke litsemba labo emcebeni, batawufihla umcebo wabo uma babalekela titsa tabo; ngoba angeke bawufihle kimi, bacalekisiwe kanjalo nawo umcebo wabo; ngalolo suku bayawushaywa, kusho iNkhosi.
21 Bukani nine, bantfu balelidolobha lelikhulu, futsi nilalele emavi ami; yebo, lalelani emavi iNkhosi lewashoko; ngoba bukani, itsi nicalekisiwe ngenca yemcebo wenu, kanjalo nemcebo wenu ucalekisiwe ngenca yekutsi nibeka litsemba lenu kuwo, futsi anikawalaleli emavi aloyo lowaninika wona
22 Aniyikhumbuli iNkhosi Nkulunkulu wenu etintfweni lenibusise ngato, kodvwa ngaso sonkhe sikhatsi niyawukhumbula umcebo wenu, hhayi kubonga iNkhosi Nkulunkulu wenu ngawo; yebo tinhlitiyo tenu atihlali tiseNkhosini, kodvwa tigcwele kutichenya lokukhulu, ngekutikhukhumeta, nangekutatisa lokukhulu, umbango, umona, inzondo, kuhlukubeta, kubulala, kanye nato tonkhe tinhlobo tebubi.
23 Ngenca yalesizatfu iNkhosi Nkulunkulu yente kutsi sicalekiso sehlele kulelive, kanjalo nasetikwemcebo wenu, loku kungenca yebubi benu.
24 Yebo, maye kulabantfu, ngenca yalesi sikhatsi lesesifikile, kutsi nicoshe baphrofethi, nihlekise ngabo, nibagcobe ngematje, nibabulale, niphindze nente yonkhe inhlobo yebubi kubo, njengoba benta basendvulo.
25 Manje uma nikhuluma, nitsi: Kube tinsuku tetfu bekunguletinsuku tabobabe betfu basendvulo, besingeke sibabulale baphrofethi; besingeke sibagcobe ngematje, futsi sibacoshe.
26 Bukani nine nibabi kwendlula bona; ngoba njengoba iNkhosi iphila, uma umphrofethi efika emkhatsini wenu amemetela kini livi leNkhosi, lelifakaza ngetono tenu kanye nebubi benu, niyamtfukutselela, niphindze nimcoshe nifune tonkhe tinhlobo tetindlela tekumbulala; yebo, nitsi ungumphrofethi wemanga, nekutsi usoni, wadeveli, ngenca yekutsi ufakaza kutsi tento tenu timbi.
27 Kodvwa bukani, uma umuntfu angafika emkhatsini wenu atsi: Yentani loku naloku kute bubi; yentani lokwa nalokwa angeke nive buhlungu; yebo, utawutsi: Philani ngekutichenya lokusetinhlitiyweni tenu; yebo, philani ngekutichenya ngendlela lenibona ngayo, futsi yentani noma ngayini lefiswa yinhlitiyo yenu—uma umuntfu angafika emkhatsini wenu asho loku, nitawumemukela, nitsi ungumphrofethi.
28 Yebo, nitawumphakamisa, niphindze nimnike tintfo tenu; nitawumnika ligolide lenu kanye nesiliva yenu, nitawumembatsisa tingubo letibitako; futsi ngenca yekutsi ukhuluma emavi ekuyengana, latsi konkhe kulungile, ngaloko angeke nilitfole liphutsa kuye.
29 Awu nine situkulwane lesibi nalesiphambene; nine bantfu labalukhuni nalababonhlokolukhuni, nicabanga kutsi kuyawute kube nini iNkhosi inibeketelela? Yebo, kuyawute kube nini nivumela kuholwa baholi labatiwula nalabatimphumphutse? Yebo, kuyawute kube nini nikhetsa bumnyama esikhundleni sekukhanya na?
30 Yebo, bukani, intfukutselo yeNkhosi seyivele yokhelekile ngalokumelene nani; bukani, seyilicalekisile lelive ngenca yebubi benu.
31 Futsi bukani, sikhatsi siyeta lapho atawucalekisa umcebo wenu, kangangoba utawuphunyuka, ningakhoni kuwubamba; futsi ngetinsuku tekuhlupheka kwenu angeke nikhone kuwugcina.
32 Futsi ngetinsuku tekuhlupheka kwenu niyawukhala eNkhosini; nekukhala kwenu kuyawuba lite, ngoba kubhujiswa kwenu sekuvele kufikile etikwenu, futsi nekubhujiswa kwenu sekucinisekisiwe; ngaleso sikhatsi niyawukhala niphindze nihhewule ngalolo suku, kusho iNkhosi yemaBandla. Futsi ngaleso sikhatsi niyawulila, nitsi:
33 Awu kube ngaphendvuka, ngangababulali baphrofethi, ngangabagcobi ngematje futsi ngangabacoshi. Yebo, ngalolo suku niyawutsi: Awu kube sayikhumbula iNkhosi Nkulunkulu wetfu ngelilanga isinika umcebo wetfu, ngabe awukaphunyuki ute usilahlekele; ngoba buka, umcebo wetfu awusekho kitsi.
34 Bukani, sibeka lithulusi lapha ngakusasa alisekho; futsi bukani, tinkemba tetfu titsetfwe kitsi ngelilanga lapho sitifunela imphi.
35 Yebo, sifihle umcebo wetfu futsi seyisiphunyukele ngenca yekucalekiswa kwalelive.
36 Awu kube saphendvuka ngelilanga livi leNkhosi lifika kitsi; ngoba buka lelive licalekisiwe, futsi tonkhe tintfo tiyaphunyuka, asikhoni kutibamba.
37 Bukani, situngeletwe ngemadimoni, yebo, situngeletwe tingilosi taloyo lofuna kubhubhisa imiphefumulo yetfu. Bukani, bubi betfu bukhulu. Awu Nkhosi, ngabe angeke yini uyisuse intfukutselo yakho kitsi na? Loku kuyawuba lulwimi lwenu ngaleto tinsuku.
38 Kodvwa bukani, tinsuku tenu tekuvivinywa setendlulile; niluhlehlisile lusuku lwekusindziswa kwenu kwate kwendlula sikhatsi ingunaphakadze, futsi kubhujiswa kwenu sekucinisekisiwe; yebo, ngoba tonkhe tinsuku tekuphila kwenu nifune loko leningeke nikutfole; futsi nifune injabulo ngekwenta lokubi, lokuyintfo lephikisana nendalo yaloko kulunga lokukuyo iNhloko yetfu lengetulu neyaPhakadze.
39 Awu nine bantfu balelive, ngifisa kwangatsi beningaweva emavi ami! Futsi ngiyathandaza kutsi intfukutselo yeNkhosi isuswe kini, nekutsi niphendvuke niphindze nisindziswe.